ທີມນັກກິລາປິ່ງປ່ອງ ກະຊວງປ້ອງກັນຄວາມສະຫງົບ ປະກາດສັກດາ ຄວ້າ 3 ຫຼຽນຄຳ ໄດ້ເປັນເຈົ້າຫຼຽນຄຳໃນການແຂ່ງຂັນກິລາປະເພດດັ່ງກ່າວ……ຂະນະທີ່ ນະຄອນຫຼວງວຽງຈັນ ຄວ້າ 2 ຫຼຽນຄຳໃນການແຂ່ງຂັນລິລາເທັນນິສ ງານມະຫາກຳກິລາແຫ່ງຊາດຄັ້ງທີⅹ ຫຼື ອຸດົມໄຊ ເກມ ທີ່ຈະໄດ້ເປີດສາກຢ່າງເປັນທາງການລະຫວ່າງວັນທີ 13-21 ທັນວານີ້.
ໃນຕອນບ່າຍມື້ວານນີ້ (7 ທັນວາ) ທີ່ມະໂມສອນໃໝ່ຂອງແຂວງອຸດົມໄຊ ໄດ້ມີພິທີມອບຫຼຽນລາງວັນໃຫ້ແກ່ນັກກິລາປິ່ງປ່ອງຊະນະເລີດ ໃນອຸດົມໄຊ ເກມໂດຍເປັນກຽດມອບຂອງທ່ານຄຳຫຼ້າ ລີ້ງນະສອນ ກຳມະການສູນກາງພັກ, ເລຂາພັກແຂວງ, ເຈົ້າແຂວງອຸດົມໄຊ, ທ່ານແສງພອນ ພົນອາມາດ ຫົວໜ້າກົມກິລາລະດັບສູງ ກະຊວງສຶກສາທິການ ແລະ ລິລາ ພ້ອມດ້ວຍຄະນະນຳທີ່ກ່ຽວຂ້ອງຂັ້ນສູນກາງ ແລະ ແຂວງເຂົ້າຮ່ວມ.
ການແຂ່ງຂັນລິກາປິ່ງປ່ອງໄດ້ເລິ່ມຂຶ້ນໃນລະຫວ່າງວັນທີ 3-5 ທັນວາ 2014 ໂດຍມີການຊີງໄຊກັນທັງໝົດ 7 ຫຼຽນຄຳ ແລະ ມີນັກກິລາຈາກ 10 ພາກສ່ວນເຂົ້າຮ່ວມ, ໃນນັ້ນ ນັກກິລາກະຊວງປ້ອງກັນຄວາມສະຫງົບ ໂຊຟອມໄດ້ສົມສັກສີ ປະກາດສັກດາຄວ້າມາໄດ້ 3 ຫຼຽນຄຳ ໃນປະເພດທີມຊາຍ, ຄູ່ຊາຍ ແລະ ປະເພດດ່ຽວຊາຍ. ຂະນະດຽວກັນ ນະຄອນຫຼວງວຽງຈັນ ຄວ້າມາໄດ້ 2 ຫຼຽນຄຳ ໃນປະເພດຄູ່ຍິງ ແລະ ດ່ຽວຍິງ, ພ້ອມດຽວກັນນີ້ ຍັງຄວ້າອີກ 1 ຫຼຽນເງິນ ປະເພດທີມຍິງ. ສ່ວນແຂວງຫຼວງພະບາງຄວ້າ 1 ຫຼຽນຄຳປະເພດຄູ່ປະສົມ ພ້ອມກັບ 4 ຫຼຽນເງິນ ປະເພດທີມຊາຍ, ຄູ່ຊາຍ, ດ່ຽວຊາຍ, ດ່ຽວຍິງ ແລະ 5 ຫຼຽນທອງໄດ້ຈາກປະເພດທີມຍິງ, ຄູ່ຊາຍ, ຄູ່ຍິງ, ຄູ່ປະສົມ ແລະ 3 ຫຼຽນທອງ ປະເພດຄູ່ຍິງ ແລະ ປະເພດດ່ຽວ (ມີ 2 ຄົນ), ກະຊວງພາຍໃນໄດ້ 1 ຫຼຽນເງິນ ປະເພດຄູ່ຍິງ ແລະ 2 ຫຼຽນທອງປະເພດທີມຍິງ ແລະ ປະເພດຄູ່ປະສົມ, ແຂວງຄຳມ່ວນ ໄດ້ 2 ຫຼຽນທອງ ຈາກປະເພດທີມຊາຍ ແລະ ປະເພດ່ຽວຊາຍ, ແຂວງຈຳປາສັກໄດ້ 1 ຫຼຽນທອງ ຈາກປະເພດຄູ່ຊາຍ, ແຂວງຫຼວງນ້ຳທາໄດ້ 1 ຫຼຽນທອງຈາກປະເພດທີມຊາຍ. ສ່ວນແຂວງອັດຕະປື ແລະ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມບໍ່ໄດ້ຈັກຫຼຽນ.
