ກິລາໝາກເສິກ ໄດ້ຖືກຈັດເຂົ້າແຂ່ງຂັນໃນງານກິລາແຫ່ງຊາດຄັ້ງທີ X ຢູ່ ແຂວງ ອຸດົມໄຊ, ແລະ ໄດ້ເປີດການແຂ່ງຂັນຢ່າງເປັນທາງການໃນວັນທີ 14 ທັນວານີ້, ໂດຍການ ເຂົ້າຮ່ວມຂອງ ທ່ານ ດຣ ຄຳມະນີ ອິນທິລາດ ລັດຖະມົນຕີຊ່ວຍວ່າການກະຊວງ ພະລັງງານ ແລະ ບໍ່ແຮ່, ປະທານສະຫະພັນໝາກເສິກແຫ່ງຊາດລາວ.
ຄະນະກຳມະການກິລາໝາກເສິກ ຂອງງານມະຫະກຳກິລາແຫ່ງຊາດຄັ້ງທີ X ໄດ້ລາຍງານວ່າ: ກິລາໝາກເສິກຖືເປັນຄັ້ງທຳອິດທີ່ໄດ້ເຂົ້າມາແຂ່ງຂັນໃນງານກິລາແຫ່ງ ຊາດ ຢູ່ ອຸດົມໄຊຄັ້ງນີ້, ຊຶ່ງມີນັກກິລາເຂົ້າຮ່ວມທັງໝົດ 60 ຄົນ, ຈາກ 8 ພາກສ່ວນ, ໃນນັ້ນເປັນຍິງ 28 ຄົນຄື: ອຸດົມໄຊເຈົ້າພາບ, ແຂວງຫຼວງພະບາງ, ນະຄອນຫຼວງວຽງ ຈັນ, ແຂວງ ສະຫວັນນະເຂດ, ຈຳປາສັກ, ເຊກອງ, ອັດຕະປື ແລະ ກະຊວງພະລັງ ງານແລະບໍ່ແຮ່, ການຈັດແຂ່ງຂັນກິລາໝາກເສິກ ປະກອບດ້ວຍ 9 ລາຍການຄື: ດ່ຽວຍິງບລິຕສ໌ 5 ນາທີ, ດ່ຽວຊາຍ ບລິຕສ໌ 5 ນາທີ, ດ່ຽວຍິງ ຣາປິດ 25 ນາທີ, ດ່ຽວຊາຍ ຣາປິດ 25 ນາທີ, ທິມຍິງ 4 ຄົນ ຣາປິດ 15 ນາທີ, ທີມຊາຍ 4 ຄົນ ຣາປິດ 15 ນາທີ ແລະ ທີມປະສົມຍິງຊາຍ(2+2) 25 ນາທີ ມີການຊີງຫຼຽນທັງໝົດ 96 ຫຼຽນ.
ໃນພິທີເປີດ, ທ່ານ ດຣ ຄຳມະນີ ອິນທິລາດ ລັດຖະມົນຕີຊ່ວຍວ່າການກະຊວງພະລັງງານ ແລະ ບໍ່ແຮ່, ປະທານສະຫະພັນກິລາໝາກເສິກ ແຫ່ງຊາດລາວ ກ່າວວ່າ: ກິລາໝາກເສິກໄດ້ຖືກບັນຈຸເຂົ້າແຂ່ງຂັນເປັນຄັ້ງທຳອິດໃນກິລາແຫ່ງຊາດ ແລະ ກິລາ ດັ່ງກ່າວນີ້, ກໍກຳລັງໄດ້ຮັບຄວາມນິຍົມຈາກສັງຄົມ, ຊຶ່ງເປັນກິລາທີ່ບໍ່ໄດ້ອອກແຮງງານ ດ້ວຍພະລະກຳລັງ ແຕ່ເປັນການໃຊ້ມັນສະໝອງ, ຊຶ່ງຈະຊ່ວຍໃຫ້ຜູ້ຫຼີ້ນມີສະມາທິ ແລະ ເປັນນັກວາງແຜນທີ່ດີ, ສະນັ້ນ ການເຂົ້າຮ່ວມແຂ່ງຂັນກິລາແຫ່ງຊາດ ຄັ້ງທີ 10 ນີ້, ຈະຊ່ວຍເຮັດໃຫ້ຄວາມສົນໃຈຈາກສັງຄົມຫັນມາຫຼີ້ນກິລາປະເພດນີ້ຫຼາຍຂື້ນ ແລະ ທາງສະຫະພັນກໍຫວັງວ່າຈະພັດທະນາໃຫ້ກິລາດັ່ງກ່າວໄດ້ໂດດເດັ່ນໃນເວທີສາກົນ.