ຕອນເຊົ້າວັນທີ 14 ທັນວານີ້, ທ່ານ ພອນສະຫວັນ ພັນທະຈິດ ຫົວໜ້າພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວແຂວງອຸດົມໄຊ ໄດ້ຕ້ອນຮັບການເຂົ້າສຳພາດຂອງນັກຂ່າວ CRI ວ່າ, ການເປັນເຈົ້າພາບຈັດງານແຂ່ງຂັນກິລາແຫ່ງຊາດຄັ້ງທີ 10 ນີ້, ຈະເຮັດໃຫ້ບັນຍາກາດຢູ່ແຂວງ ອຸດົມໃຊຝົດຟື້ນຂື້ນ, ແລະເຊື່ອໝັ້ນວ່າ ຈະພາໃຫ້ການທ່ອງທ່ຽວຂອງແຂວງອຸດົມໄຊໂດດເດັ່ນຂື້ນ, ນັກທ່ອງທ່ຽວພາຍໃນແລະຕ່າງປະເທດຈະເຂົ້າມາທ່ອງທ່ຽວຫຼາຍຂຶ້ນ.
ທ່ານ ພອນສະຫວັນ ພັນທະຈິດ ຫົວໜ້າພະແນກ ຖະແຫຼງຂ່າວ ວັດທະນະທຳ ແລະ ທ່ອງທ່ຽວ ແຂວງ ອຸດົມໄຊ ກ່າວວ່າ: ການທ່ອງທ່ຽວຂອງແຂວງ ອຸດົມໄຊ ກຳລັງ ໄດ້ຮັບຄວາມນິຍົມສົນໃຈຈາກນັກທ່ອງທ່ຽວ ທັງພາຍໃນ ແລະ ຕ່າງປະເທດ, ພົ້ນເດັ່ນໃນການຈັດງານແຂ່ງຂັນກິລາແຫ່ງຊາດ ຄັ້ງທີ 10 ທີ່ແຂວງອຸດົມໄຊ ເປັນເຈົ້າພາບ, ແມ່ນເຮັດໃຫ້ບັນຍາກາດການທ່ອງທ່ຽວພາຍໃນແຂວງ ຄືກຄື້ນຂື້ນຫຼາຍພໍສົມຄວນ, ນັກທ່ອງທ່ຽວໄດ້ເດີນທາງເຂົ້າມາທ່ຽວຊົມສະຖານທີ່ທ່ອງທ່ຽວຂອງພາຍໃນ ແຂວງ ສະເລ່ຍແລ້ວມື້ໜຶ່ງຫຼາຍກວ່າ 200 ຄົນ. ມາຮອດປະຈຸບັນ, ມີການພັດທະນາຫຼາຍດ້ານ ແລະ ການຮ່ວມມືກັບບັນດາປະເທດໄກ້ຄຽງ ໂດຍສະເພາະແມ່ນປະເທດ ສປ ຈີນ, ໄທ, ສສ ຫວຽດນາມ,ແລະ ພວມຈະໄປສູ່ ມຽນມ້າ, ຊຶ່ງເປັນການທ່ອງທ່ຽວ ແບບເຊື່ອມຕໍ່ລະຫວ່າງປະເທດ ແລະ ແຂວງ ອຸດົມໄຊ, ກໍເປັນເສັ້ນທາງຜ່ານ, ສະນັ້ນ ຈຶ່ງເປັນສິ່ງອຳນວຍຄວາມສະດວກໃນດ້ານການທ່ອງທ່ຽວ. ໃນປີຜ່ານມາ, ນັກທ່ອງທ່ຽວເຂົ້າມາ ແຂວງອຸດົມໄຊ ເພື່ອສໍາພັດກັບວິຖີຊີວິດຂອງຊົນເຜົ່າ, ສຳພັດກັບທຳມະຊາດ, ໂດຍສະເພາະພວກທີ່ມັກພະຈົນໄພ, ໃຊ້ການຍ່າງປ່າມັກການປີນພູຜາປ່າດົງ ໄປຫາໜູ່ບ້ານປະຊາຊົນທີ່ຫ່າງໄກສອກຫຼີກ ແລະ ໄປສຳພັດກັບທຳມະຊາດໃຫ້ເສັ້ນທາງເດີນນັ້ນ ແລະພູຜາປ່າໄມ້, ວິຖີຊີວິດຂອງປະຊາຊົນທີ່ອາໄສຢູ່ຕາມເສັ້ນທາງຍ່າງປ່ານັ້ນ. ຕາມການຄາດຄະເນ, ນັກທ່ອງທ່ຽວປີ 2014 ຈະເພີ່ມຂື້ນ 2 ແສນກວ່າຄົນ.
ທ່ານ ພອນສະຫວັນກ່າວວ່າ, ແຂວງອຸດົມໄຊມີ 12 ຊົນເຜົ່າມີຫຼາຍກວ່າ 20 ແຊງເຜົ່າ ຄື: ຂະມຸ, ມົ້ງ, ອາຄ່າ ແລະ ເຜົ່າອື່ນໆ, ການດຳລົງຊີວິດ, ວັດທະນະທຳ ແລະ ຮີດຄອງປະເພນີ ລ້ວນແຕ່ຕາກຕ່າງກັນ, ເຂົາເຈົ້າຍັງຮັກສາວັດທະນະທຳ ແລະ ການດຳລົງຊີວິດແບບດັ້ງເດີມ ໂດຍສະເພາະແບບແຜນການດຳລົງຊີວິດຍັງເປັນເອກະລັກ ຮີດຄອງປະເພນີ ບຸນສິນກິນທານ ແລະ ການນຸ່ງຖື, ເຊິ່ງຈະເປັນທ່າແຮງທີ່ສາມາດດຶງດູດນັກທ່ອງທ່ຽວທັງພາຍໃນແລະຕ່າງປະເທດ, ແລະອີງໃສ່ຍຸດທະສາດລວມຂອງຊາດ, ແຂວງອຸດົມໄຊກໍ່ ກໍາລັງເລັ່ງໃສ່ພັດທະນາການທ່ອງທ່ຽວ ທາງດ້ານວັດທະນະທຳຊົນເຜົ່າ, ເຮັດໃຫ້ການທ່ອງທ່ຽວວັດທະນະທຳຊົນເຜົ່າດີຂື້ນ.
