（ທ່ານຈ່າງເຕີຈ່ຽງເປັນປະທານກອງປະຊຸມປິດກອງປະຊຸມຄັ້ງທີ 3 ຂອງສະພາຜູ້ແທນປະຊາຊົນແຫ່ງຊາດຈີນຊຸດທີ 12）
ກອງປະຊຸມຄັ້ງທີ 3 ຂອງສະພາຜູ້ແທນປະຊາຊົນແຫ່ງຊາດຈີນຊຸດທີ 12 ໄດ້ໄຂກອງປະຊຸມຄົບຄະນະຄັ້ງທີ 4 ຢູ່ຫໍສະພາປະຊາຊົນແຫ່ງຊາດຈີນໃນຕອນເຊົ້າວັນທີ 15 ມີນານີ້, ເຊິ່ງເປັນກອງປະຊຸມຄັ້ງສຸດທ້າຍຂອງກອງປະຊຸມສະພາຜູ້ແທນປະຊາຊົນປີນີ້. ເມື່ອເປັນແນວນັ້ນ, ກອງປະຊຸມຄັ້ງທີ 3 ຂອງສະພາຜູ້ແທນປະຊາຊົນແຫ່ງຊາດຈີນຊຸດທີ 12 ທີ່ດຳເນີນມາເປັນເວລາ 10 ວັນເຄິ່ງນັ້ນໄດ້ປິດລົງໂດຍໄດ້ສຳເລັດວາລະປະຊຸມທຸກລາຍ.
ໃນກອງປະຊຸມປິດດັ່ງກ່າວ, ມີຜູ້ແທນ 2877 ຄົນເຂົ້າຮ່ວມ, ເຊິ່ງເປັນຈຳນວນຜູ້ແທນທີ່ຖືກຕ້ອງຕາມຈຳນວນຄົນທີ່ກຳນົດໄວ້ໃນກົດໝາຍ.
ກອງປະຊຸມປິດດັ່ງກ່າວແມ່ນມີທ່ານຈ່າງເຕີຈ່ຽງ ປະທານສະພາຜູ້ແທນປະຊາຊົນແຫ່ງຊາດຈີນເປັນປະທານຈັດຂຶ້ນ. ທ່ານສີຈິ້ນຜິງ ທ່ານຫຼີເຄີ້ສຽງ ທ່ານອີເຈິ້ງເສີ່ນ ທ່ານຫຼິວຢຸນຊານ ທ່ານຫວາງຊີຊານແລະທ່ານຈ່າງກ່າວລີ້ໄດ້ເຂົ້າຮ່ວມກອງປະຊຸມດັ່ງກ່າວ.
ໃນໄລຍະກອງປະຊຸມຄັ້ງນີ້, ຜູ້ແທນເກືອບ 3 ພັນຄົນໄດ້ປະຕິບັດພັນທະຂອງຕົນທີ່ມອບໝາຍໂດຍລັດຖະທຳມະນູນແລະກົດໝາຍນັ້ນຢ່າງຈິງຈັງ, ໄດ້ກວດກາພິຈາລະນາບົດລາຍງານວຽກງານຂອງລັດຖະບານແລະບົດລາຍງານອື່ນໆ, ໄດ້ສະຫຼຸບຜົນສຳເລັດແລະບົດຮຽນທີ່ດີທີ່ຈີນໄດ້ຮັບໃນວຽກງານທຸກດ້ານໃນໜຶ່ງປີທີ່ຜ່ານມາ, ແລະໄດ້ສະເໜີໜ໊າທີ່ສຳຄັນແລະການຈັດວາງວຽກງານໃນປີນີ້ອອກ.
ກອງປະຊຸມໄດ້ຜ່ານການລົງຄະແນນສຽງຜ່ານມະຕິກ່ຽວກັບບົດລາຍງານວຽກງານລັດຖະບານ. ເຊິ່ງມະຕິຊີ້ອອກວ່າ, ກອງປະຊຸມໄດ້ຢືນຢັນຕໍ່ວຽກງານຂອງຄະນະລັດຖະບານໃນໜຶ່ງປີທີ່ຜ່ານມາ, ເຫັນດີການຈັດວາງລວມ, ໜ້າທີ່ເປົ້າໝາຍແລະມາດຕະການນະໂຍບາຍຕ່າງໆຂອງປີ 2015 ທີ່ລະບຸໄວ້ໃນບົດລາຍງານ, ແລະຕົກລົງຜ່ານບົດລາຍງານສະບັບນີ້. ໃນບົດລາຍງານສະບັບນີ້ ລັດຖະບານຈີນຄາດວ່າການເຕີບໂຕດ້ານ GDP ປີນີ້ຈະແມ່ນປະມານ 7%.
ນອກນີ້, ກອງປະຊຸມຍັງໄດ້ລົງຄະແນນສຽງຜ່ານມະຕິກ່ຽວກັບການດັດແກ້ ກົດໝາຍວ່າດ້ວຍນິຕິບັນຍັດຂອງສາທາລະນະລັດປະຊາຊົນຈີນ, ມະຕິກ່ຽວກັບບົດລາຍງານວຽກງານຂອງຄະນະກຳມະການສະພາປະຊາຊົນແຫ່ງຊາດຈີນ, ມະຕິກ່ຽວກັບບົດລາຍງານວຽກງານຂອງສານປະຊາຊົນສູງສດແລະບົດລາຍງານວຽກງານຂອງອົງການອະທິໄອຍະການປະຊາຊົນຈີນ.
