ວັນທີ 15 ມີນານີ້ ຢູ່ທີ່ນະຄອນຫຼວງປັກກິ່ງ, ທ່ານຫຼີເຄີ້ສຽງ ນາຍົກລັດຖະມົນຕີຈີນ ກ່າວວ່າ, ເມື່ອເວົ້າເຖິງການພົວພັນລະຫວ່າງຈີນ-ອາເມລິກາ ກໍ່ຄືການພົວພັນລະຫວ່າວ ປະເທດທີ່ພວມພັດທະນາທີ່ໃຫຍ່ທີ່ສຸດກັບປະເທດທີ່ໄດ້ພັດທະນາແລ້ວທີ່ໃຫຍ່ທີ່ສຸດ. ພວກເຮົາຍິນດີສ້າງການົວພັນລະຫວ່າງປະເທດໃຫຍ່ແບບໃໝ່ທີ່ຕ່າງເຄົາລົບເຊິ່ງກັນແລະກັນ, ຮ່ວມມືກັນໄດ້ຮັບຜົນປະໂຫຍດນຳກັນ, ບໍ່ປະທະກັນ, ແລະບໍ່ເປັນປໍລະປັກກັນ.
ຫຼັງຈາກປິດກອງປະຊຸມຄັ້ງທີ 3 ຂອງສະພາຜູ້ແທນປະຊາຊົນແຫ່ງຊາດຈີນຊຸດທີ 12 ແລ້ວ, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ຈັດກອງປະຊຸມຂ່າວ ເພື່ອຕອບຄຳຖາມຂອງນັກຂ່າວຈີນແລະຕ່າງປະເທດ. ທ່ານໄດ້ໃຫ້ທັດສະນະດັ່ງກ່າວໃນເວລາຕອບຄຳຖາມຂອງນັກຂ່າວ.
ທ່ານກ່າວວ່າ, ກອ່ນອື່ນ, ຈີນບໍ່ແມ່ນອົງກອນເສດຖະກິດໃຫຍ່ທີ່ສຸດໃນໂລກ, ອີງຕາມສະຖິຕິທີ່ມີອິດທິພົນທີ່ສຸດຂອງສາກົນແລ້ວເຫັນວ່າ, ຈີນແມ່ນອົງກອນເສດຖະກິດໃຫຍ່ອັນດັບທີ 2 ໃນໂລກ. ຍິ່ງສຳຄັນກວ່ານັ້ນແມ່ນ, GDP ສະເລ່ຍຕາມຫົວຄົນຂອງຈີນຢູ່ໃນອັນດັບ 80 ກວ່າໃນໂລກ. ສະນັ້ນ ຈີນເຮັດວຽກຂອງຕົນເອງໃຫ້ດີ, ຮັກສາການພັດທະນາຢ່າງສົມເຫດສົມຜົນແລ້ວ, ກໍ່ຖືວ່າເປັນການປະກອບສ່ວນທີ່ມະຫາສານໃຫ້ແກ່ໂລກ, ອີກດ້ານໜຶ່ງຈີນພວມແບກຫາບໜ້າທີ່ຮັບຜິດຊອບແລະພັນທະໃນສາກົນນັບມື້ນັບຫຼາຍ.
ທ່ານຫຼີເຄີ້ສຽງກ່າວວ່າ, ຈີນກັບອາເມລິກາມີຄວາມເຫັນທີ່ຂັດແຍ່ງກັນ, ແຕ່ກໍ່ມີຜົນປະໂຫຍດຮ່ວມທີ່ກວ້າງຂວາງ. ການແກ້ໄຂຄວາມຂັດແຍ່ງກັນຢ່າງເໝາະສົມ, ສາມາດຜ່ານຈາກການເປີດກວ້າງຈຸດຮ່ວມດ້ານຜົນປະໂຫຍດ, ເຊິ່ງໃນນັ້ນຈຸດສຸມທີ່ໜ້າສົນໃຈອັນໜຶ່ງກໍ່ຄື: ພວກເຮົາກຳລັງຊຸກຍູ້ການເຈລະຈາກ່ຽວກັບສັນຍາການລົງທຶນລະຫວ່າງຈີນ-ອາເມລິກາ.