ຕາມຂ່າວສານຊິນຮວາລາຍງານວ່າ: ວັນທີ 26 ມີນານີ້, ກອງປະຊຸມໂຕະມົນຜູ້ນຳສື່ມວນຊົນຂອງກອງປະຊຸມເວທີປຶກສາຫາລືອາຊີໂປອາວ 2015 ໄດ້ຈັດຂຶ້ນຢູ່ເມືອງໂປອາວ ແຂວງໄຫຫຼຳຂອງຈີນ. ຜູ້ຮັບຜິດຊອບສື່ມວນຊົນ 20 ກວ່າທ່ານທີ່ມາຈາກ 17 ປະເທດເຊັ່ນຣັດເຊຍ,ອາເມລິກາ,ອັງກິດໄດ້ເຂົ້າຮ່ວມກອງປະຊຸມໃນຄັ້ງນີ້ໂດຍປິ່ນປ້ອມຫົວຂໍ້ຫຼັກທີ່ວ່າ "ທ້ອນໂຮມຄວາມຮັບຮູ້ທີ່ເປັນເອກະສັນກັນກ່ຽວກັບເສັ້ນທາງສາຍໄໝ,ຮ່ວມກັນສ້າງແຜນວາດອະນາຄົດແຫ່ງການຮ່ວມມືລະຫວ່າງສື່ມວນຊົນ", ຮ່ວມກັນຄົ້ນຄວ້າທັດສະນະຄະຕິໃໝ່ກ່ຽວກັບການເຜີຍແຜ່ແບບຂ້າມວັດທະນະທຳ, ສ້າງແຜນວາດແຫ່ງການຮ່ວມມືແລະການພັດທະນາຂອງສື່ມວນຊົນໃນອະນາຄົດ, ເຊິ່ງໄດ້ບັນລຸຄວາມຮັບຮູ້ທີ່ເປັນເອກະສັນກັນຢ່າງຫຼວງຫຼາຍ, ໄດ້ຮ່ວມກັນລົງນາມຂໍ້ລິເລີ່ມເສັ້ນທາງສາຍໄໝ.
ໃນໂອກາດປະກອບຄຳຄິດຄຳເຫັນ, ຜູ້ແທນທີ່ເຂົ້າຮ່ວມກອງປະຊຸມຫຼາຍທ່ານໄດ້ຢືນຢັນວ່າຍິນດີເພີ່ມທະວີການຮ່ວມມືລະຫວ່າງສື່ມວນຊົນ, ສະໜອງການຝຶກອົບຮົມດ້ານເຕັກນິກແລະບຸກຄະລາກອນ, ສະເໜີຂໍ້ສະເໜີແລະແຜນງານທີ່ມີລັກສະນະສ້າງສັນຢ່າງເປັນລະບົບເປັນຕົ້ນ ແມ່ນການສ້າງຕັ້ງອົງການຮ່ວມມືດ້ານສື່ມວນຊົນໃນໂອກາດອັນເໝາະສົມແລະອື່ນໆ. ທ່ານຫວາງເກິ່ງນຽນ ຜູ້ອຳນວຍການໃຫຍ່ວິທະຍຸສາ ກົນແຫ່ງປະເທດຈີນຫຼື CRI ທັງເປັນປະທານຂອງກອງປະຊຸມໄດ້ກ່າວຄຳປາໄສແບບສະຫຼຸບໃນກອງປະຊຸມຄັ້ງນີ້.
ກອງປະຊຸມໂຕະມົນຜູ້ນຳສື່ມວນຊົນຄັ້ງນີ້ແມ່ນຈັດຂຶ້ນໂດຍການເປັນເຈົ້າພາບຮ່ວມຂອງວິທະຍຸສາກົນແຫ່ງປະເທດ, ສະມາຄົມການຕ່າງປະເທດສາທາລະນະຈີນ ແລະໄດ້ຮັບການຊີ້ນຳແລະສະໜັບສະໜູນຈາກຫ້ອງການຖະແຫຼງຂ່າວລັດຖະບານຈີນ.