ວັນທີ 30 ເມສານີ້, ທ່ານນາງປູ້ຈ້ຽນໂກວ ເອກອັກຄະລັດຖະທູດຈີນປະຈຳກຳປູເຈຍໄດ້ກ່າວຄຳປາໄສຢູ່ສະຖາບັນການປົກຄອງລາຊະສຳນັກກຳປູເຈຍ.
ຕາມຂ່າວ CRI ລາຍງານວ່າ: ວັນທີ 30 ເມສານີ້, ທ່ານນາງປູ້ຈ້ຽນໂກວ ເອກອັກຄະລັດຖະທູດຈີນປະຈຳກຳປູເຈຍຢືນຢັນວ່າ ຈີນໃຫ້ຄວາມສຳຄັນແກ່ການຮ່ວມມືກັບກຳປູເຈຍພາຍໃຕ້ຂອບແລວທາງເສດຖະກິດເສັ້ນທາງສາຍໄໝແລະເສັ້ນທາງສາຍໄໝທາງທະເລສະຕະວັດທີ 21 ຫຼື "ໜຶ່ງແລວທາງໜຶ່ງເສັ້ນທາງ", ຍິນດີຮ່ວມກັບກຳປູເຈຍກາຍເປັນຄູ່ຮ່ວມມືສຳຄັນໃນການຊຸກຍູ້ການກໍ່ສ້າງ "ໜຶ່ງແລວທາງໜຶ່ງເສັ້ນທາງ".
ທ່ານນາງປູ້ຈ້ຽນໂກວກ່າວວ່າ, ໃນໄລຍະດົນນານມານີ້, ສອງປະເທດຈີນ-ກຳປູເຈຍໄດ້ມີຄວາມເຂົ້າໃຈກັນ, ໄວ້ເນື້ອເຊື່ອໃຈກັນແລະສະໜັບ ສະໜູນເຊິ່ງກັນແລະກັນ, ເຊິ່ງເປັນເພື່ອນບ້ານທີ່ດີຢ່າງແທ້ຈິງ. ຈີນໄດ້ກາຍເປັນປະເທດທີ່ລົງທຶນຢູ່ກຳປູເຈຍຫຼາຍທີ່ສຸດ, ຕາມສະຖິຕິທາງການຂອງກຳປູເຈຍ, ມູນຄ່າການລົງທຶນຂອງຈີນຢູ່ກຳປູເຈຍຕາມສັນຍາມີຫຼາຍກວ່າ 10 ຕື້ໂດລາສະຫະລັດ. ການຮ່ວມມືຈີນ-ກຳປູເຈຍມີພື້ນຖານອັນໜັກແໜ້ນ, ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ຈະອຳນວຍໂອກາດໃໝ່ແລະສ້າງເວທີໃໝ່ໃຫ້ແກ່ຈີນ-ກຳປູເຈຍລົງເລິກການຮ່ວມມືໃນຂົງເຂດຕ່າງໆຕື່ມອີກ.