ໂຄສົກປະທານາທິບໍດີມຽນມາກ່າວວ່າ: ຈີນໄດ້ເສີມຂະຫຍາຍບົດບາດອັນສຳຄັນໃນສົງຄາມຕໍ່ຕ້ານຟາຊິດຂອງໂລກ
ຕາມຂ່າວCRI:ວັນທີ 2 ກັນຍານີ້, ທ່ານເຢ ທຸດ, ໂຄສົກປະທານາທິບໍດີມຽນມາກ່າວໃນເວລາໃຫ້ສຳພາດຕໍ່ນັກຂ່າວ CRI ທີ່ນະຄອນຫຼວງປັກກິ່ງວ່າ, ຈີນໄດ້ເສີມຂະຫຍາຍບົດບາດອັນສຳຄັນໃນສົງຄາມຕໍ່ຕ້ານຟາຊິດຂອງໂລກແລະກໍ່ແມ່ນເຫດຜົນທີ່ທ່ານເທັນ ເຊັນ, ປະທານາທິບໍດີມຽນມາໄດ້ເດີນທາງມາທີ່ນະຄອນຫຼວງປັກກິ່ງຂອງຈີນເພື່ອເຂົ້າຮ່ວມກິດຈະກຳລະລຶກໄຊຊະນະສົງຄາມປະຊາຊົນຈີນຕໍ່ຕ້ານຟາຊິດຍີ່ປຸ່ນແລະສົງຄາມຕໍ່ຕ້ານຟາຊິດຂອງໂລກຄົບຮອບ 70 ປີ.
ທ່ານເຢ ທຸດກ່າວວ່າ, ເມື່ອຫວນຄືນເຖິງປະຫວັດສາດຂອງສົງຄາມຕໍ່ຕ້ານຟາຊິດຂອງໂລກ, ພວກເຮົາສາມາດສັງເກດເຫັນວ່າ, ເປັນເວລາ 10 ຄືແຕ່ປີ 1931 ຫາປີ 1941 ທີ່ອາເມລິກາເຂົ້າຮ່ວມສົງຄາມ, ມີພຽງແຕ່ຈີນປະເທດດຽວຂອງທະວີບອາຊີຕໍ່ຕ້ານການຮຸກຮານຂອງຍີ່ປຸ່ນ. ໃນສົງຄາມຄັ້ງນັ້ນ, ປະຊາຊົນຈີນຈຳນວນ 30 ລ້ານກວ່າຄົນໄດ້ເສຍຊີວິດ. ທ່ານກ່າວຕື່ມວ່າ, ຖ້າວ່າຈີນບໍ່ມີການຕໍ່ຕ້ານການຮຸກຮານຂອງຍີ່ປຸ່ນພາຍຫຼັງປີ 1931, ຖ້າວ່າຈີນຍອມຈຳນົນ, ຜົນສຳເລັດຂອງສົງຄາມໂລກຄັ້ງທີສອງກໍຈະມີການຜັນປ່ຽນໄປ.