ຕອນຄໍ່າຂອງວັນທີ 3 ກັນຍານີ້, ງານລາຕີເພື່ອສະຫຼອງວັນຄົບຮອບ 70 ປີແຫ່ງໄຊຊະນະສົງຄາມຕໍ່ຕ້ານຟາຊິດຍີ່ປຸ່ນຂອງປະຊາຊົນຈີນ ແລະສົງຄາມຕໍ່ຕ້ານຟາຊິດຂອງໂລກ ເຊິ່ງມີຫົວຂໍ້ວ່າ ໄຊຊະນະກັບສັນຕິພາບ ໄດ້ຈັດຂຶ້ນຢູ່ຫໍສະພາປະຊາຊົນແຫ່ງຊາດທີ່ນະຄອນຫຼວງປັກກິ່ງຂອງຈີນ. ຜູ້ນໍາຂອງພັກ ແລະລັດຂອງຈີນ ພ້ອມກັບບຸກຄົນທັງພາຍໃນແລະຕ່າງປະເທດຈໍານວນ 6.000 ຄົນໄດ້ເຂົ້າຊົມງານລາຕີໃນຄັ້ງນີ້ ເພື່ອຮ່ວມກັນລະນຶກວັນສະຫງ່າລາສີດັ່ງກ່າວ.
ງານລາຕີດັ່ງກ່າວໄດ້ຖືຈຸດເວລາທີ່ສໍາຄັນຂອງປະຫວັດສາດ ແລະເຫດການແບບຢ່າງຂອງສົງຄາມຕໍ່ຕ້ານເປັນສາຍຫຼັກ, ເລືອກເອົາເພງກ່ຽວກັບສົງຄາມຕໍ່ຕ້ານຟາຊິດ, ຖືການຮ້ອງເພງລວມໝູ່ແບບມີທ່າທາງອັນໃຫຍ່ໂຕມະໂຫລານນັ້ນເປັນຮູບການສະແດງອັນຕົ້ນຕໍ ໂດຍເຊື່ອມໂຍງເຂົ້າກັບດົນຕີ, ການຟ້ອນ, ລະຄອນ, ການອ່ານກະວີ ແລະຮູບການສິລະປະອື່ນໆ ເຊິ່ງມີຫົວຂໍ້ຫຼັກອັນຈະແຈ້ງ, ມີສາຍຫຼັກອັນເດັ່ນຊັດ, ມີທ່າທາງອັນໃຫຍ່ໂຕມະໂຫລານ, ມີການໃຫ້ກໍາລັງໃຈ ເຊິ່ງເປັນເພງໄຊວິລະຊົນຂອງສົງຄາມຕໍ່ຕ້ານການຮຸກຮານຂອງປະຊາຊົນຈີນ, ເປັນກະວີປະຫວັດສາດອັນຍິ່ງໃຫຍ່ກ່ຽວກັບຊົນຊາດຈີນຮ່ວມກັນຕໍ່ຕ້ານການຢຽບຢາມຈາກຕ່າງປະເທດ, ສະແດງໃຫ້ເຫັນເຖິງບົດບາດຂອງພັກກອມມູນິດຈີນທີ່ເປັນເສົາຄໍ້າໃນສົງຄາມຕໍ່ຕ້ານຟາຊິດຍີ່ປຸ່ນຢ່າງເດັ່ນຊັດ ພ້ອມທັງສ່ອງແສງໃຫ້ເຫັນເຖິງການປະກອບສ່ວນຂອງຈີນທີ່ບໍ່ມີວັນເສົ້າສູນໄດ້ເຂົ້າໃນໄຊຊະນະແຫ່ງສົງຄາມຕໍ່ຕ້ານຟາຊິດຂອງໂລກຢູ່ທີ່ສະໜາມຮົບພາກຕາເວັນອອກ.