(ທ່ານສັງຂານ ຈູມຄຳພັນ ຮອງອຳນວຍການວິທະຍຸກະຈາຍສຽງແຫ່ງຊາດລາວໃຫ້ສຳພາດຕໍ່ນັກຂ່າວ CRI)
ກອງປະຊຸມຄັ້ງທີ 4 ຂອງສະພາຜູ້ແທນປະຊາຊົນແຫ່ງຊາດຈີນຊຸດທີ 12 ໄດ້ໄຂຂຶ້ນຢູ່ນະຄອນຫຼວງປັກກິ່ງໃນວັນທີ 5 ມີນານີ້. ໃນຖານະເປັນນັກຂ່າວອາວູໂສຂອງປະເທດລາວ, ທ່ານສັງຂານ ຈູມຄຳພັນ ຮອງອຳນວຍການວິທະຍຸກະຈາຍສຽງແຫ່ງຊາດລາວແມ່ນສຸດທີ່ເອົາໃຈໃສ່ນຳບົດລາຍງານວຽກງານຂອງລັດຖະບານຈີນທີ່ທ່ານຫຼີເຄີ້ສຽງ ນາຍົກລັດຖະມົນຕີຜ່ານໃນກອງປະຊຸມດັ່ງກ່າວ. ທ່ານສັງຂານກ່າວວ່າ, ຈີນໄດ້ສົ່ງຜົນສະທ້ອນຢ່າງຫຼວງຫຼາຍໄປສູ່ໂລກ, ປະເທດລາວແມ່ນຍິນດີໄດ້ເຫັນຈີນທີ່ມີການພັດທະນາ.
ປີນີ້ແມ່ນປີທຳອິດໃນການປະຕິບັດຕາມແຜນການພັດທະນາເສດຖະກິດສັງຄົມ 5 ປີຄັ້ງທີ 13 ຂອງຈີນ. ເນື້ອໃນຕ່າງໆທີ່ກຳນົດໄວ້ໃນແຜນການດັ່ງກ່າວແມ່ນຈຸດສຸມທີ່ກອງປະຊຸມສອງສະພານີ້ຕ້ອງໄດ້ພິຈາລະນາ. ທ່ານສັງຂານ ຈູມຄຳພັນກ່າວວ່າ, ເຖິງວ່ານີ້ແມ່ນແຜນການພັດທະນາພາຍໃນປະເທດຈີນທໍ່ນັ້ນ, ແຕ່ທົ່ວໂລກກໍ່ໄດ້ໃຫ້ຄວາມສົນໃຈຢ່າງສູງ:
" ນີ້ແມ່ນມີຄວາມສຳຄັນບໍ່ແມ່ນແຕ່ສະເພາະຕໍ່ການພັດທະນາເສດຖະກິດ-ສັງຄົມຂອງຈີນ ແຕ່ຍັງມີຄວາມສຳຄັນ ແລະທັງມີຜົນສະທ້ອນຕໍ່ທົ່ວໂລກນຳເພາະວ່າ ສປ ຈີນ ນີ້ເປັນປະເທດທີມີພົນລະເມືອງຫຼາຍທີ່ສຸດໃນໂລກ, ເປັນປະເທດທີ່ພວມພັດທະນາທີ່ໃຫຍ່ທີ່ສຸດໃນໂລກ, ເປັນປະເທດທີມີເສດຖະກິດຂະໜາດໃຫຍ່ເປັນອັນດັບສອງຂອງໂລກຮອງຈາກອາເມຣິກາ ແລະ ຖ້າ ສປ ຈີນ ມີພັດທະນາໃນຕໍ່ໜ້າໄປໄດ້ດີໃນ 5 ປີຕໍ່ໜ້ານີ້ ມັນກໍ່ຈະຊ່ວຍໂລກໃຫ້ຟື້ນ ຈາກວິກິດການເສດຖະກິດໄດ້ດີຄືກັນ ສະນັ້ນ ຖືວ່າການຄົ້ນຄວ້າພິຈາລະນາເພື່ອຮັບຮອງ ເອົາແຜນພັດທະນາເສດຖະກິດ-ສັງຄົມ 5 ປີຄັ້ງທີ 13 ຂອງ ສປ ຈີນ ໃນສອງກອງປະຊຸມສະ ພາເທື່ອນີ້ ແມ່ນມີຄວາມສຳຄັນຫຼາຍຕໍ່ ສປ ຈີນ ແລະ ທັງທົ່ວໂລກ ຈຶ່ງມີການແລກປ່ຽນ."
ໃນບົດລາຍງານວຽກງານຂອງລັດຖະບານຈີນປະຈຳປີ 2016 ໄດ້ເນັ້ນໜັກວ່າຈະຊຸກຍູ້ການສ້າງສາ "ແລວທາງເສດຖະກິດເສັ້ນທາງສາຍໄໝ ແລະເສັ້ນທາງສາຍໄໝທາງທະເລໃນສັດຕະວັດທີ 21" ຫຼື "ໜຶ່ງແລວທາງໜຶ່ງເສັ້ນທາງ", ຍຶດໝັ້ນທິດທາງທີ່ປຶກສາຫາລືກັນ, ສ້າງສາຮ່ວມກັນແລະຊົມໃຊ້ຜົນປະໂຫຍດນຳກັນ, ເພື່ອສ້າງ "ໜຶ່ງແລວທາງໜຶ່ງເສັ້ນທາງ" ເປັນຂົວຕໍ່ແຫ່ງສັນຕິພາບແລະມິດຕະພາບ, ກາຍເປັນເສັ້ນທາງທີ່ສ້າງຄວາມຈະເລີນຮຸ່ງເຮືອງຮ່ວມກັນ. ທ່ານສັງຂານ ຈູມຄຳພັນມີຄຳເຫັນດີຕໍ່ເລື່ອງນີ້ວ່າ:
"ໜຶ່ງແລວທາງໜຶ່ງເສັ້ນທາງ ເປັນໂຄງການທີ່ຍິ່ງໃຫຍ່ທີ່ສຸດ, ນີ້ຖືວ່າເປັນໂຄງການທີ່ສ້າງ ເຄືອຄາຍຂອງເສັ້ນທາງຄົມມະນາຄົມຕ່າງໆ ຖືວ່າເປັນໂຄງການທີ່ໃຫຍ່ຫຼາຍ ບໍ່ແມ່ນແຕ່ຈະສ້າງ ຜົນປະໂຫຍດໃຫ້ແກ່ການພັດທະນາເສດຖະກິດຂອງຈີນເທົ່ານັ້ນ ແຕ່ຈຸດປະສົງຂອງໂຄງການ ນີ້ແລ້ວແມ່ນເພື່ອເຮັດໃຫ້ທຸກປະເທດໃນໜຶ່ງແລວທາງໜຶ່ງເສັ້ນທາງ ໄດ້ພັດທະນາຮ່ວມກັນ ໄດ້ ຮັບຜົນປະໂຫຍດຮ່ວມກັນ. ຫຼັງຈາກທີ່ຄວາມຄິດລິເລີ່ມຂອງທ່ານ ສີຈິ້ນຜິງ ອອກມາ ຖືວ່າ ໄດ້ຮັບສຽງຕອບຮັບຈາກບັນດາປະເທດທີ່ຢູ່ຕາມໜຶ່ງແລວທາງໜຶ່ງເສັ້ນທາງ ນັ້ນດີຫຼາຍເພື່ອສ້າງ ເຄືອຄາຍການຮ່ວມມືຕ່າງໆ."
ປະເທດຈີນກັບປະເທດລາວແມ່ນປະເທດທີ່ພວມພັດທະນາເຊັ່ນກັນ. ທ່ານສັງຂານກ່າວວ່າ ທ່ານໄດ້ຕິດຕາມຂ່າວກ່ຽວກັບປະເທດຈີນນັບມື້ນັບສຸມໃສ່ການປົກປັກຮັກສາສິ່ງແວດລບ້ອມ, ແລະເອົາໃຈໃສ່ນຳການພັດທະນາແບບກົມກຽວກັນ. ທ່ານສັງຂານກ່າວວ່າ:
"ໄຂປະຕູສູ່ພາຍນອກມາ 30 ກວ່າປີ ຈີນມີການພັດທະນາທຽບເທົ່າກັບປະເທດຕາເວັນຕົກ ທີ່ ພັດທະນາມາເປັນຮ້ອຍ ສອງຮ້ອຍປີ ແຕ່ວ່າທົ່ວໂລກກໍ່ມີການຮັບຮູ້ດີ ແລະ ທາງຜູ້ນຳຈີນເພິ່ນ ກໍ່ຮັບຮູ້ດີເຊັ່ນກັນວ່າຖ້າຫາກວ່າຢາກມີການພັດທະນາໄວກໍ່ຕ້ອງໄດ້ມີການແລກປ່ຽນອັນໄດ້ອັນ ເສຍແຕ່ທີ່ສຳຄັນວ່າອັນໄດ້ມັນຫຼາຍກວ່າອັນເສຍນີ້ກໍ່ຈຳເປັນໄດ້ແລກໃນເມື່ອເສດຖະກິດໄປໄດ້ ດີແລ້ວ, ຄວາມຈະເລີນມາແລ້ວ, ລາຍຮັບມີແລ້ວ ລັດຖະບານມີລາຍຮັບເພີ່ມຂຶ້ນແລ້ວກໍ່ຈຶ່ງໄດ້ ມີການຟື້ນຄືນກັບສິ່ງທີ່ເຮົາແລກມາກັບສິ່ງທີ່ມັນເສຍໄປສະນັ້ນ ແລ້ວດຽວນີ້ການພັດທະນາຂອງ ຄະນະນຳຂອງຈີນບໍ່ວ່າພັກ-ລັດເພິ່ນໄດ້ມີນະໂຍບາຍການພັດທະນາການປັບປຸງຊີວິດການເປັນ ຢູ່ຂອງປະຊາຊົນຕ້ອງໄປຄຽງຄູ່ກັບການຟື້ນຟູ ແລະ ຮັກສາແວດລ້ອມທີ່ເພິ່ນເອີ້ນວ່າພັດທະນາ ສີຂຽວ."
ກ່ຽວກັບໝາກຜົນໃນການການຫຼຸດຜ່ອນຄວາມທຸກຍາກຂອງຈີນ ໄດ້ສ້າງຄວາມປະທັບໃຈອັນເລິກເຊິ່ງໃຫ້ແກ່ທ່ານສັງຂານ ຈູມຄຳພັນ. ທ່ານກ່າວວ່າ：
"ຢູ່ໃນສອງກອງປະຊຸມສະພາເທື່ອນີ້ຖືວ່າບັນຫາຂອງການລຶບລ້າງຄວາມທຸກຍາກນີ້ກໍ່ເປັນບູລິມະສິດທີ່ຜູ້ແທນປະມານ 5 ພັນທ່ານ ເວົ້າລວມທັງສອງກອງປະຊຸມເພິ່ນໄດ້ຄົ້ນຄວ້າພິຈາລະ ນາ ຜ່ານມາ ສປ ຈີນກໍ່ເຮັດໄດ້ດີຫຼາຍ ເວົ້າເລື່ອງການລົບລ້າງຄວາມທຸກຢາກປະຊາຄົມໂລກກໍ່ ຖືວ່າມີການຍ້ອງຍໍຊົມເຊີຍ ສປ ຈີນ ເພາະວ່າພົນລະເມືອງຈີນມີຫຼາຍກວ່າ 1 ຕື້ 370 ລ້ານຄົນ ແລະ ດຽວນີ້ເຫຼື່ອພຽງແຕ່ 70 ລ້ານຄົນ ອັນນີ້ຖືວ່າເປັນສິ່ງທີປະເສີດຫຼາຍທີ່ພັກ-ລັດຖະ ບານຈີນເພິ່ນໄດ້ມີການເອົາໃຈໃສ່ແທ້ໆ ແຜນພັດທະນາເສດຖະກິດສັງຄົມເທື່ອທີ 13 ນີ້ ຈົນປະຮອດປີ 2020 ກໍ່ຖືວ່າຢູ່ ສປ ຈີນ ບໍ່ມີຄົນທຸກຍາກແລະ ສປ ຈີນ ກໍ່ເຮັດໄດ້ດີ."
ທ່ານສັງຂານຈູມຄຳພັນ ເຄີຍເປັນຜູ້ດຳເນີນລາຍການວິທະຍຸທີ່ມີຊື່ສຽງຂອງປະເທດລາວ, ທ່ານໄດ້ຈັດທຳລາຍການວິທະຍຸທີ່ມີເນື້ອໃນກ່ຽວກັບປະເທດຈີນເປັນເວລາຫຼາຍປີ, ກ່ຽວກັບການຕໍ່ຕ້ານກັບການເສຍທາດຂາດຄຸນ, ທ່ານມີຄວາມເຫັນວ່າ:
ບັນຫາຂອງການສໍ້ລາດບັງຫຼວງຕາມການຕິດຕາມຂ່າວທາງ ສປ ຈີນ ມາ ແລະ ຂ່າວໂລກ ໂດຍສະເພາະຄະນະນຳຊຸດໃໝ່ຂອງຈີນຂຶ້ນມາປົກຄອງປະເທດບໍ່ວ່າຈະເປັນສາຍພັກສາຍລັດ ໂດຍການນຳພາຂອງທ່ານ ສີຈິ້ນຜິງ ເລຂາທິການໃຫຍ່ຄະນະບໍລິຫານສູນກາງພັກຄອມມູ ນິດຈີນປະທານປະເທດຈີນ. ແຕ່ກີ້ເພິ່ນກໍ່ເອົາຈິງເອົາຈັງ ແຕ່ມາຊຸດທ່ານ ສີຈີ້ນພິງນີ້, ແບບ ເຫັນຈະແຈ້ງກັບຫູກັບຕາເລີຍ ຄັນຜູ້ໃດຕິດຕາມຂ່າວເປັນປົກກະຕິ ຊື່ມວນຊົນຈີນບໍ່ໄດ້ປິດບັງ ບໍ່ໄດ້ອໍາໄດ໋!!! ເຂົາເຈົ້າລາຍງານຕະຫຼອດຄະດີລະດັບບິກໆ ທ່ານ ສີຈີ້ນເພິງ ເພິ່ນປະກາດຕອນ ເພິ່ນຂຶ້ນເປັນເລຂາທິການໃຫຍ່ປະກາດຕໍ່ກອງປະຊຸມໃຫຍ່ຂອງພັກວ່າ: ຈີນຈະປາບໝົດບໍ່ວ່າຈະ ເປັນເສືອຫຼືແມງວັນເສືອ, ເພິ່ນວ່າ: ບໍ່ວ່າຈະເປັນໜ້າໃດ!!! ບໍ່ວ່າຈະເປັນໃຜ!!! ບໍ່ວ່າຈະຕໍາແໜ່ງ ໃດ!!! ຖ້າວ່າຝ່າຝືນລະບຽບພັກ ຝ່າຝືນລະບຽບກົດໝາຍຂອງລັດແມ່ນຈະບໍ່ຈົ່ງໄວ້ຈະບໍ່ມີຊ່ອງ ວ່າງ. ປີຕໍ່ໄປຈະຫາກົນໄກອັນໃດທີ່ຈະມາປາບປາມພວກສໍ້ລາດບັງຫຼວງກິນສິນບົນ ເພາະຄົນ ເຮັດຜິດຕ້ອງຊອກຊ່ອງຫວ່າງຂອງກົດໝາຍແຕ່ດຽວນີ້ພັກ-ລັດຈີນກໍ່ຊອກວິທີເພື່ອອັດຊ່ອງຫວ່າງນີ້.
