ກອງປະຊຸມໂຕະມົນຜູ້ນຳສື່ມວນຊົນຂອງກອງປະຊຸມປະຈຳປີ 2016 ໃນເວທີປຶກສາຫາລືອາຊີໂປອາວ ໄດ້ຈັດຂຶ້ນຢູ່ສູນປະຊຸມສາກົນໂປອາວໃນວັນທີ 22 ມີນານີ້ ໂດຍແຂກທີ່ເຂົ້າຮ່ວມປະຊຸມ ໄດ້ແລກປ່ຽນ, ປຶກສາຫາລືກັນຢ່າງກວ້າງຂວາງແລະເລິກເຊິ່ງໃນຫຼາຍຫົວຂໍ້ ເປັນຕົ້ນ ສະພາບການໃໝ່ທີ່ສື່ມວນຊົນປະເຊີນ, ການແລກປ່ຽນບົດຮຽນຈາກຕົວຢ່າງການເຊື່ອມໂຍງແລະການຮ່ວມມືລະຫວ່າງສື່ມວນຊົນ ແລະ ກົນໄກການຮ່ວມມືລະຫວ່າງສື່ມວນຊົນ. ຂະນະທີ່ທ່ານດວງຈິດ ສະຫວັດບຸນມີ ບັນນາທິການໃຫຍ່ໜັງສືພິມປະຊາຊົນກໍໄດ້ເຂົ້າຮ່ວມກອງປະຊຸມດັ່ງກ່າວເປັນຄັ້ງທຳອິດ ທັງໄດ້ແລກປ່ຽນບົດຮຽນກັບຜູ້ແທນບັນດາປະເທດທີ່ຮ່ວມປະຊຸມກ່ຽວກັບບາງບົດຮຽນໃນການພັດທະນາໜັງສືພິມຂອງລາວພາຍໃຕ້ສະພາບແວດລ້ອມໃໝ່ຂອງສື່ມວນຊົນ ໂດຍເຫັນວ່າ: ການຈັດກອງປະຊຸມເທື່ອນີ້ຈະມີຜົນດີຕໍ່ການຊຸກຍູ້ການພັດທະນາ, ການພົວພັນແລະການເຊື່ອມໂຍງຂອງສື່ມວນຊົນບັນດາປະເທດໃນຍຸກສະໄໝໃໝ່. ທ່ານດວງຈິດ ສະຫວັດບຸນມີ ກ່າວວ່າ:
ກ່ອນອື່ນ ຂໍສະແດງຄວາມຮູ້ບຸນຄຸນເປັນຢ່າງສູງຕໍ່ວິທະຍຸສາກົນແຫ່ງປະເທດຈີນທີ່ໃຫ້ໂອກາດແກ່ຂ້າພະເຈົ້າ ໄດ້ມີຄວາມເຫັນຕໍ່ ການມາເຂົ້າຮ່ວມກອງປະຊຸມເວທີປຶກສາຫາລືໃນຄັ້ງນີ້ ຂ້າພະເຈົ້າຕີລາຄາວ່າ ກອງປະຊຸມນີ້ສຸດທີ່ມີຄວາມໝາຍສຳຄັນຕໍ່ການພັດທະນາກໍ່ຄືການຮ່ວມມືລະຫວ່າງນັກສື່ມວນຊົນດ້ວຍກັນ. ໃນຍຸກແຫ່ງຂໍ້ມູນຂ່າວສານທີ່ມີການພັດທະນາຢ່າງວ່ອງໄວ, ແຕ່ລະປະເທດບໍ່ສາມາດຢູ່ຢ່າງໂດດດ່ຽວໄດ້, ການພົວພັນເຊິ່ງກັນແລະກັນ ແລະການແລກປ່ຽນທາງຂໍ້ມູນຂ່າວສານ ແມ່ນມີຄວາມຈຳເປັນທີ່ສຸດ. ຂ້າພະເຈົ້າຂໍສະແດງຄວາມຊົມເຊີຍ ແລະຍ້ອງຍໍ ທີ່ທາງ ສປ ຈີນ ມີແນວຄິດລິເລີ່ມແລະເປັນເຈົ້າພາບກອງປະຊຸມນີ້ຂຶ້ນ, ຖືວ່າກອງປະຊຸມນີ້ເປັນເວທີຢູ່ໃນລະດັບໂລກ ທີ່ມີຫຼາຍປະເທດ ຫຼາຍຄົນໃຫ້ຄວາມສົນໃຈ. ຂ້າພະເຈົ້າມີຄວາມຮູ້ສຶກວ່າ ຈາກຜົນສຳເລັດຂອງກອງປະຊຸມຄັ້ງນີ້ ຈະເຮັດໃຫ້ສື່ມວນຊົນແຕ່ລະປະເທດທີ່ເຂົ້າຮ່ວມກອງປະຊຸມຄັ້ງນີ້ ກໍ່ຄືສື່ມວນຊົນທຸກປະເທດໃນໂລກ ຈະມີຄວາມເຂົ້າໃຈເຊິ່ງກັນແລະກັນ, ມີການແລກປ່ຽນຂໍ້ມູນຂ່າວສານເຊິ່ງກັນແລະກັນທີ່ດີ ເພື່ອການພັດທະນາຂອງແຕ່ລະປະເທດ ເພື່ອການເຊື່ອມໂຍງທີ່ດີ ແລະມີການພົວພັນເຊິ່ງກັນແລະກັນ ເພື່ອເຮັດໃຫ້ການພັດທະນາສື່ມວນຊົນ ໄປຖືກຕ້ອງຕາມຍຸກຂໍ້ມູນຂ່າວສານໃນປັດຈຸບັນ. ຂໍສະເໜີວ່າຂໍໃຫ້ມີກອງປະຊຸມຄືແນວນີ້ເກີດຂຶ້ນຕື່ມອີກ.
ຂະນະດຽວກັນ, ທ່ານດວງຈິດ ສະຫວັດບຸນມີ ກໍໄດ້ຕີລາຄາສູງຕໍ່ວິທະຍຸ FM93 ຂອງ CRI ທີ່ນະຄອນຫຼວງວຽງຈັນ ໂດຍກ່າວວ່າ:
ກ່ຽວກັບວິທະຍຸສາກົນແຫ່ງປະເທດຈີນ ພາກພາສາລາວ ພວກຂ້າພະເຈົ້າຂໍສະແດງຄວາມຊົມເຊີຍ ແລະຍິນດີ ພາຍຫຼັງທີ ສປ ຈີນໄດ້ເປີດວິທະຍຸຢູ່ຈີນເປັນພາສາລາວແລ້ວ ຜູ້ຟັງ ຜູ້ອ່ານຂອງຄົນລາວນັບທັງຢູ່ພາຍໃນແລະຕ່າງປະເທດ ທີ່ຮູ້ພາສາລາວແມ່ນມີຄວາມນິຍົມຊົມຊອບມັກຟັງ. ໂດຍສະເພາະແມ່ນລາຍການຂ່າວຂອງປະເທດ ອອກໄວທັນການ, ໄວກວ່າວິທະຍຸອື່ນ. ອັນ 2 ແມ່ນລາຍການຮຽນພາສາຈີນ ຂອງ cri ເຫັນວ່າ ເຮັດໃຫ້ເຍົາວະຊົນຊາວໜຸ່ມທີ່ຮຽນພາສາຈີນ ຫຼື ຜູ້ທີ່ກຳລັງຢາກຮຽນພາສາຈີນ ຕິດຕາມການຮຽນຮູ້ພາສາຈີນມື້ລະໜ້ອຍຈາກ cri; ອີກອັນໜຶ່ງ ກໍ່ຄືລາຍການເຜີຍແຜ່ວັດທະນະທຳຈີນຂອງ cri ໂດຍສະເພາະແມ່ນລາຍການເພງ ດົນຕີຕ່າງໆ ລ້ວນແຕ່ເປັນທີ່ນິຍົມຂອງຜູ້ຟັງຄົນລາວ ທັງຢູ່ພາຍໃນແລະຕ່າງປະເທດ. ເຂົາເຈົ້າເຫັນວ່າການເປີດພາສາລາວຢູ່ໃນລາຍການຂອງ cri ແມ່ນສຸດທີ່ມີປະໂຫຍດ ແລະມີຄຸນຄ່າທີ່ສຸດ, ເຂົາເຈົ້າຄິດວ່າໃນຕໍ່ໜ້າ ທາງ cri ກໍ່ຄືພາກພາສາລາວຈະມີການພັດທະນາຫຼາຍຂຶ້ນ ມີຫຼາຍຄໍລຳ, ມີການພັດທະນາໃນດ້ານລາຍການ.
ໃນຖານະເປັນສຽງຂອງສູນກາງພັກປະຊາຊົນປະຕິວັດລາວ ກໍ່ໄດ້ມີການຮ່ວມມືກັບວິທະຍຸສາກົນແຫ່ງປະເທດຈີນປະຈຳລາວເຊັ່ນດຽວກັນ, ມີການແລກປ່ຽນຂໍ້ມູນຂ່າວສານເຊິ່ງກັນແລະກັນ, ທຸກບົດຂ່າວຕ່າງໆທີ່ກ່ຽວກັບການເຄື່ອນໄຫວທາງດ້ານພັດທະນາເສດຖະກິດ ສັງຄົມ ລວມທັງການເມືອງຂອງ ສປ ຈີນ ພວກເຮົາກໍ່ໄດ້ນຳລົງມາອອກຢູ່ໃນໜັງສືພິມປະຊາຊົນ ນັບທັງໂຕແບບ ແລະການພັດທະນາຕ່າງໆ ພວກເຮົາແມ່ນໄດ້ເອົາມາລົງໜ້າໜັງສືພິມ, ພິເສດແມ່ນກອງປະຊຸມທຸກຄັ້ງຂອງພັກກອມມູນິດຈີນ ແລະກອງປະຊຸມສຳຄັນຕ່າງໆ ພວກເຮົາແມ່ນໄດ້ເອົາບົດ ຂອງ cri ທີ່ເປັນພາສາລາວນັ້ນມາອອກຕື່ມຢູ່ໃນໜັງສືພິມຂອງພວກເຮົາ ເຮັດໃຫ້ຜູ້ອ່ານມີຄວາມນິຍົມຊົມຊອບ ໄດ້ອ່ານບົດຂ່າວຕ່າງໆທີ່ເປັນທີ່ຕິດຕາມກ່ຽວກັບສະພາບການຂອງປະເທດຈີນໄດ້ໄວທັນການ.
