ຕາມຂ່າວ CRI On Line: ເນື່ອງໃນໂອກາດວັນສ້າງຕັ້ງພັກກອມມູນິດຈີນຄົບຮອບ 95 ປີ, ສະຫະພັນສິລະປະວັນນະຄະດີຈີນ, ສະມາຄົມວິຈິດຕະກອນຈີນ, ກອງທຶນສິລະປະວັນນະຄະດີຈີນແລະກອງທຶນສະເພາະເພື່ອການພັດທະນາສິລະປະວັນນະຄະດີຈີນໄດ້ຮ່ວມກັນເປັນເຈົ້າພາບຈັດງານວາງສະແດງວິຈິດຕະກຳເພື່ອສະຫຼອງວັນສ້າງຕັ້ງພັກກອມມູນິດຈີນຄົບຮອບ 95 ປີຂຶ້ນ ຢູ່ຫໍພິພິທະພັນແຫ່ງຊາດຈີນ ໃນວັນທີ 19 ມິຖຸນານີ້ ໂດຍໄດ້ຫວນຄືນຂະບວນວິວັດອັນສະຫງ່າລາສີແຫ່ງການກຳເນີດ,ການນຳພາແລະຜົນສຳເລັດອັນຍິ່ງໃຫຍ່ຂອງພັກກອມມູນິດຈີນໃນເວລາ 95 ປີຜ່ານມາ.
ງານວາງະແດງເທື່ອນີ້ໄດ້ນຳເອົາຮູບແຕ້ມທີ່ເປັນເອກະລັກຂອງຈີນ, ຮູບແຕ້ມສີນ້ຳມັນ, ຮູບພິມ, ຮູບຄວັດ, ປຶ້ມກາຕູນກວ່າ 300 ຜົນງານລວມທັງສິລະປະອື່ນໆອີກຫຼາຍຢ່າງທີ່ສ່ອງແສງໃຫ້ເຫັນຜົນງານຕະຫຼອດໄລຍະ 95 ປີຜ່ານມາເຊິ່ງພັກກອມມູນິດຈີນໄດ້ນຳພາປະຊາຊົນຈີນຍາດເອົາຄວາມເປັນເອກະລາດຂອງຊາດ, ຕໍ່ສູ້ປົດປ່ອຍຊາດແລະຜົນສຳເລັດໃນການສ້າງສັງຄົມນິຍົມທີ່ມີສີສັນພິເສດຂອງຈີນ ພ້ອມດ້ວຍຜົນສຳເລັດໃນການສ້າງປະເທດຊາດທີ່ຈະເລີນຮຸ່ງເຮືອງ, ປະເທດເຂັ້ມແຂງຮັ່ງມີແລະປະຊາຊົນມີຄວາມສຸກ ແລະມູນເຊື້ອອັນສະຫງ່າລາສີຂອງພັກກອມມູນິດຈີນ.
