ຕາມຂ່າວສານຊິນຮວາ: ຕອນເຊົ້າວັນທີ 1 ກໍລະກົດນີ້, ໄດ້ຈັດພິທີສະເຫຼີມ ສະຫຼອງວັນສ້າງຕັ້ງພັກກອມມູນິດຈີນຄົບຮອບ 95 ປີຂຶ້ນຢູ່ຫໍສະພາປະຊາຊົນນະຄອນຫຼວງປັກກິ່ງຢ່າງສະຫງ່າຜ່າເຜີຍ ໂດຍທ່ານ ສິຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດ, ປະທານຄະນະກຳມະການການທະຫານສູນກາງຈີນໄດ້ກ່າວປາໄສໂດຍເນັ້ນວ່າ, ເຖິງວ່າພັກກອມມູນິດຈີນໄດ້ສ້າງຕັ້ງຂຶ້ນຄົບຮອບ 95 ປີແລ້ວກໍຕາມ, ແຕ່ພວກເຮົາຕ້ອງຮັກສາຈິດໃຈບຸກບືນສູ້ຊົນຂອງສະມາຊິກພັກກອມມູນິດຈີນໃນເວລາສ້າງຕັ້ງພັກແລະຮັກສາຈິດໃຈບໍລິສຸດຜຸດຜ່ອງຕໍ່ປະຊາຊົນຕະຫຼອດໄປ.
ທ່ານ ສິຈິ້ນຜິງ ກ່າວເນັ້ນວ່າ, ການທີ່ພັກກອມມີນິດກຳເນີດຢູ່ຈີນເປັນການປ່ຽນແປງຄັ້ງຍິ່ງໃຫຍ່ໂດຍການປ່ຽນແປງດັ່ງກ່າວໄດ້ປ່ຽນທິດທາງແລະຂະບວນ ການພັດທະນາຂອງປະຊາຊຊາດຈີນຫຼັງສະໄໝກາງສະຕະວັດທີ 19 ເປັນຕົ້ນມາຢ່າງເລິກເຊິ່ງ ທັງໄດ້ປ່ຽນອະນາຄົດແລະຊາຕາກຳຂອງປະຊາຊົນຈີນແລະປະຊາຊາດຈີນກໍຄືທ່າອ່ຽງແລະສະຖານະການພັດທະນາຂອງໂລກຢ່າງເລິກເຊິ່ງ. ຕະຫຼອດໄລຍະ 95 ປີຜ່ານມາ, ພັກກອມມູນິດຈີນໄດ້ໃກ້ຊິດຕິດແທດກັບປະຊາຊົນແລະສາມາດຜ່ານຜ່າອຸປະສັກຕ່າງໆນານາແລະຮັບໄຊຊະນະຄັ້ງແລ້ວຄັ້ງອີກ ເຊິ່ງເປັນການປະກອບສ່ວນອັນຍິ່ງໃຫຍ່ເພື່ອປະຊາຊາດຈີນ.
ທ່ານ ສີຈິ້ນຜິງ ກ່າວເນັ້ນວ່າ: ປະຫວັດສາດໃຫ້ພວກເຮົາໄດ້ຮູ້ວ່າ: ປະຫວັດສາດແລະປະຊາຊົນທີ່ເລືອກໃຫ້ພັກກອມມູນິດຈີນເປັນຜູ້ນຳພາໃນພາລະກິດຟື້ນຟູຄວາມຈະເລີນຮຸ່ງເຮືອງທີ່ຍິ່ງໃຫຍ່ຂອງຊົນຊາດຈີນນັ້ນແມ່ນທາງເລືອກທີ່ຖືກຕ້ອງ, ຕ້ອງຍຶດໝັ້ນເປັນໄລຍະຍາວນານແລະເດັດດ່ຽວບໍ່ຫວັ່ນໄຫວໂດຍຕະຫຼອດໄປ; ເສັ້ນທາງສັງຄົມນິຍົມທີ່ມີສີສັນພິເສດຂອງຈີນທີ່ພັກກອມມູນິດຈີນນຳພາປະຊາຊົນບຸກເບີກນັ້ນແມ່ນເສັ້ນທາງທີ່ຖືກຕ້ອງ, ຕ້ອງຍຶດໝັ້ນເປັນໄລຍະຍາວນານແລະເດັດດ່ຽວບໍ່ຫວັ່ນໄຫວໂດຍຕະຫຼອດ; ພັກກອມມູນິດແລະປະຊາຊົນຈີນສ້າງພື້ນຖານບົນດິນແດນຂອງຈີນ, ຮຽນແລະຮັບເອົາໝາກຜົນທີ່ດີເດັ່ນແຫ່ງຄວາມສິວິໄລຂອງມວນມະນຸດ ແລະ ບັນລຸຍຸດທະສາດພັດທະນາປະເທດແບບຕັ້ງຕົນເປັນເອກະລາດແລະເປັນເຈົ້າຕົນເອງແມ່ນຖືກຕ້ອງ, ຕ້ອງຍຶດໝັ້ນເປັນໄລຍະຍາວນານແລະເດັດດ່ຽວບໍ່ຫວັ່ນໄຫວໂດຍຕະຫຼອດໄປ.
ໃນພິທີດັ່ງກ່າວ, ທ່ານ ລີວຢຸນຊ່ານ ກຳມະການປະຈຳກົມການເມືອງສູນກາງພັກ, ເລຂາທິການສູນກາງພັກໄດ້ອ່ານ "ຂໍ້ຕົກລົງສູນກາງພັກກອມມູນິດຈີນກ່ຽວກັບການຍ້ອງຍໍສັນລະເສີນສະມາຊິກພັກຜູ້ດີເດັ່ນ, ພະນັກງານເຮັດວຽກພັກຜູ້ດີເດັ່ນແລະການຈັດຕັ້ງພັກຂັ້ນຮາກຖານທີ່ກ້າວໜ້າ" ໂດຍໄດ້ຕົກລົງໃຫ້ຄວາມຍ້ອງຍໍສັນລະເສີນຕໍ່ສະມາຊິກພັກ 100 ທ່ານ, ພະນັກງານເຮັດວຽກພັກ 100 ທ່ານ ແລະ ການຈັດຕັ້ງພັກຂັ້ນຮາກຖານ 300 ອົງການ.