ກອງປະຊຸມສຸດຍອດກຸ່ມ 20 ປະເທດຫຼື G20ຈະຈັດຂຶ້ນຢູ່ເມືອງຫັງໂຈ່ວ ແຂວງເຈີ້ຈ່ຽງ ສປ ຈີນແຕ່ວັນທີ 4 ຫາວັນທີ 5 ກັນຍານີ້ເຊິ່ງກອງປະຊຸມເທື່ອນີ້ຈະເນັ້ນບັນຫາການພັດທະນາໃຫ້ພົ້ນເດັ່ນໃນບັນດາວາລະກອງປະຊຸມ ທັງເປັນກອງປະຊຸມຄັ້ງໜຶ່ງທີ່ມີປະເທດພວມພັດທະນາເຂົ້າຮ່ວມຫຼາຍທີ່ສຸດໃນປະຫວັດສາດຂອງ G20. ນັກວິຊາການກຳປູເຈຍເຫັນວ່າ ກອງປະຊຸມສຸດຍອດ G20 ຫັງໂຈ່ວຈະນຳເອົາຜົນປະໂຫຍດໄປໃຫ້ປະເທດສະມາຊິກອາຊຽນ.
ທ່ານ ໂຊຕາ ນັກຄົ້ນຄວ້າທັງເປັນນັກເສດຖະສາດຂອງສະຖາບັນຄົ້ນຄວ້າພະລາຊະວັງກຳປູເຈຍຢືນຢັນວ່າ ກອງປະຊຸມສຸດຍອດ G20 ເທື່ອນີ້ຈະມີລັກສະຕະຕົວແທນແລະລັກສະນະເປີດກວ້າງຫຼາຍກວ່າເກົ່າ. ຈີນໃນຖານະເປັນປະເທດພວມພັດທະນາໃຫຍ່ທີ່ສຸດທີ່ມີຄວາມຮັບຜິດຊອບຈະສຸມໃສ່ການປົກປັກຮັກສາຜົນປະໂຫຍດຂອງບັນດາປະເທດພວມພັດທະນາໃຫ້ຫຼາຍກວ່າເກົ່າ ເພື່ອເຮັດໃຫ້ປະເທດພວມພັດທະນາສາມາດປະກອບຄຳຄິດເຫັນຂອງຕົນຢູ່ໃນເວທີດັ່ງກ່າວ.
ທ່ານກີ ເຊເຣວາດ ນັກຄົ້ນຄວ້າທັງເປັນຊ່ຽວຊານສາຍພົວພັນສາກົນຂອງສະຖາບັນຄົ້ນຄວ້າພະລາຊະວັງກຳປູເຈຍເຫັນວ່າ: ຜູ້ນຳລາວແລະໄທຈະເຂົ້າຮ່ວມກອງປະຊຸມສຸດຍອດ G20ຫັງໂຈ່ວ ໂດຍຈະຕາງໜ້າບັນດາປະເທດສະມາຊິກອາຊຽນແລະປະເທດສະມາຊິກກຸ່ມ 77 ປະເທດເຊິ່ງລວມທັງກຳປູເຈຍນັ້ນດຳເນີນການປຶກສາຫາລືແລະປະກອບຄຳຄິດເຫັນຕໍ່ບັນຫາທີ່ມີຄວາມສົນໃຈຮ່ວມເຊັ່ນການພັດທະນາການຄ້າແລະການອະນຸລັກສິ່ງແວດລ້ອມ. ດ້ວຍເຫດນີ້, ເຖິງວ່າຜູ້ນຳກຳປູເຈຍຈະບໍ່ເຂົ້າຮ່ວມກອງປະຊຸມສຸດຍອດເທື່ອນີ້ກໍຕາມ, ແຕ່ໝາກຜົນຂອງກອງປະຊຸມຍັງຄົງຈະເຮັດໃຫ້ກຳປູເຈຍໄດ້ຮັບຜົນປະໂຫຍດຫຼາຍ.
 |
