CRI ລາຍງານວ່າ: ວັນທີ 1 ກັນຍານີ້ ຢູ່ນະຄອນຫຼວງວຽງຈັນ ສປປ ລາວ, ທ່ານບຸນຍັງ ວໍລະຈິດ ປະທານປະເທດແຫ່ງ ສປປ ລາວໄດ້ໃຫ້ສຳພາດນັກຂ່າວຈີນໂດຍໄດ້ຕີລາຄາສູງຕໍ່ບົດບາດການນຳໜ້າຂອງຈີນໃນການຊຸກຍູ້ການພັດທະນາເສດຖະກິດໂລກທັງມີຄວາມຫວັງຢ່າງສູງຕໍ່ກອງປະຊຸມສຸດຍອດ G20 ຫັງໂຈ່ວ.
ພາຍຫຼັງລາວໄດ້ຮັບຄຳເຊີນເຂົ້າຮ່ວມກອງປະຊຸມສຸດຍອດ G20 ຫັງໂຈ່ວໃນຖານະເປັນປະເທດປະທານອາຊຽນ 2016, ທ່ານບຸນຍັງ ວໍລະຈິດໄດ້ຢືນຢັນວ່າ: ຂ້າພະເຈົ້າໃນນາມລັດຖະບານ ແລະປະຊາຊົນ ແຫ່ງ ສປປ ລາວ ຮູ້ສຶກປິຕິຍິນດີ ແລະຖືເປັນກຽດຢ່າງຍິ່ງທີ່ໄດ້ຮັບຄຳເຊີນຈາກພະນະທ່ານ ສີຈິ້ນຜິງ ປະທານປະເທດແຫ່ງ ສປ ຈີນ ເພື່ອເຂົ້າຮ່ວມກອງປະຊຸມສຸດຍອດຂອງກຸ່ມ G20ໃນຄັ້ງນີ້, ຂ້າພະເຈົ້າຂໍສະແດງຄວາມຂອບໃຈມາຍັງປະທານປະເທດສີຈິ້ນຜິງທີ່ເຫັນຄວາມສຳຄັນ ແລະບົດບາດຂອງອາຊຽນໃນກອງປະຊຸມຄັ້ງນີ້, ເຊິ່ງຂ້າພະເຈົ້າພ້ອມທີ່ຈະປະກຳອບສ່ວນເຂົ້າໃນການເຄື່ອນໄຫວ ແລະປຶກສາຫາລືໃນກອງປະຊຸມ G20 ດັ່ງກ່າວ.
ນອກນີ້,ທ່ານບຸນຍັງ ວໍລະຈິດຍັງເຫັນວ່າ ການປຶກສາຫາລື ແລະມາດຕະກຳນດ້ານເສດຖະກິດ-ການເງິນສາກົນ ທີ່ G20 ຈະຮັບຮອງເອົາຈະມີຜົນກະທົບໂດຍກົງຕໍ່ສະພາບເສດຖະກິດ ແລະການພັດທະນາໃນຫຼາຍປະເທດ ໃນພາກພື້ນ ແລະໃນໂລກ ລວມທັງ ສປປ ລາວ. ສະນັ້ນ, ສປປ ລາວ ຍິນດີຕໍ່ຂໍ້ລິເລີ່ມ ແລະແຜນປະຕິບັດງານຕ່າງໆ ທີ່ຜູ້ນຳ G20 ຈະພິຈາລະນາຮັບຮອງເອົາໃນກອງປະຊຸມຄັ້ງນີ້ ເປັນຕົ້ນ ວາລະການພັດທະນາແບບຍືນຍົງ 2030, ແຜນການການພັດທະນາຫັນເປັນອຸດສາຫະກຳຢູ່ອາຟຣິກາ ແລະປະເທດດ້ອຍພັດທະນາ. ພວກຂ້າພະເຈົ້າຫວັງວ່າບັນດາຂໍ້ລິເລີ່ມ ແລະແຜນປະຕິບັດງານດັ່ງກ່າວນີ້ ຈະໄດ້ຮັບການຈັດຕັ້ງປະຕິບັດຢ່າງມີປະສິດທິຜົນ ແລະນຳຜົນປະໂຫຍດໂດຍກົງມາສູ່ປະເທດກຳລັງພັດທະນາ ໂດຍສະເພາະປະເທດດ້ອຍພັດທະນາທີ່ຍັງປະເຊີນກັບສິ່ງທ້າທາຍຫຼາຍຢ່າງດ້ານເສດຖະກິດ ກໍ່ຄື ການຫຼຸດຜ່ອນຄວາມທຸກຍາກໃນປະຈຸບັນ. ທ່ານບຸນຍັງວໍລະຈິດຍັງກ່າວດ້ວຍຄວາມຫວັງຍິ່ງຕໍ່ກອງປະຊຸມສຸດຍອດG20ຫັງໂຈ່ວວ່າ:
ສປຈີນເປັນປະເທດທີ່ມີຄວາມເຂັ້ມແຂງ ດ້ານການເມືອງ,ເສດຖະກິດແລະສັງຄົມ, ອັນເຮັດໃຫ້ບົດບາດຂອງສປ ຈີນໃນພາກພື້ນແລະ ສາກົນພົ້ນເດັ່ນ.ດ້ວຍເຫດນີ້, ສປ ຈີນສາມາດເສີມຂະຫຍາຍບົດບາດສໍາຄັນໃນ ການຮ່ວມມືສາກົນເພື່ອແກ້ໄຂບັນຫາເຄັ່ງຮ້ອນຂອງໂລກ. ກອງປະຊຸມສຸດຍອດG20ຄັ້ງນີ້ກໍ່ແມ່ນອີກເວທີໜຶ່ງທີ່ ສປ ຈີນສາມາດເສີມຂະ ຫຍາຍບົດບາດນໍາໜ້າໃນຄວາມພະຍາຍາມຊອກມາດ ຕະການແກ້ໄຂບັນຫາເສດຖະກິດ-ການເງິນສາກົນ,ມາດຕະການຊ່ວຍເຫລືອປະເທດທີ່ດ້ວຍໂອກາດໃນໂລກ,ເປັນຕົ້ນປະເທດດ້ວຍພັດທະນາ ແລະອາຟຣີກາ.ອັນນີ້ໄດ້ສະແດງໃຫ້ເຫັນຢ່າງຈະແຈ້ງຕໍ່ນະໂຍບາຍການຮ່ວມມືສາກົນທີ່ຖືກຕ້ອງຂອງພັກແລະລັດຖະບານ ສປ ຈີນ.ຂ້າພະເຈົ້າຂໍຍ້ອງຍໍຊົມ ເຊີຍຕໍ່ບົດບາດການນໍາພາຂອງ ສປ ຈີນ.ສປປ ລາວເຊື່ອໝັ້ນວ່າດ້ວຍຄວາມພະຍາຍາມອັນຕັ້ງໜ້າຂອງລັດຖະບານ ສປ ຈີນແລະ ການຮ່ວມມືແລະຄວາມຜ່ອນສັ້ນຜ່ອນຍາວຂອງປະເທດສະມາຊິກ ແລະປະເທດ ທີ່ເປັນແຂກ,ກອງປະຊຸມສຸດຍອດຈີ 20 ໃນຄັ້ງນີ້ຈະບັນລຸຜົນສໍາເລັດທາງດ້ານເນື້ອໃນຕາມຄາດໝາຍແລະສ້າງຄວາມປະທັບໃຈທີ່ບໍ່ມີວັນລືມໃຫ້ແກ່ຄະນະຜູ້ແທນທັງໝົດ.ຂ້າພະເຈົ້າບໍອວຍພອນໄຊໃຫ້ກອງປະຊຸມສຸດຍອດ G20ຄັ້ງທີ11ຂອງ ສປ ຈີນໃນຄັ້ງນີ້ສົ່ງປະ ສົບຜົນສໍາເລັດ ຢ່າງຈົບງາມ.
ໃນໂອກາດປີ 2016 ເປັນປີຄົບຮອບ 55 ປີໃນການສ້າງສາຍພົວພັນທາງການທູດລະຫວ່າງລາວ-ຈີນ. ທ່ານບຸນຍັງວໍລະຈິດກໍໄດ້ຢືນຢັນວ່າ:ຕະຫລອດໄລຍະເຄິ່ງສັດຕະວັດ ມານີ້,ການພົວພັນສອງຝ່າຍລະຫວ່າງລາວ-ຈີນໄດ້ຮັບການຂະຫຍາຍຕົວ ແລະລົງເລິກໃນວຽກ ງານຕົວຈິງຫລາຍດ້ານ.ໃນນີ້, ທາງລົດໄຟລາວຈີນເຊິ່ງເປັນໂຄງການຮ່ວມມືສຳຄັນລະຫວ່າງສອງປະເທດໄດ້ສ່ອງແສງໃຫ້ເຫັນໝາກຜົນອັນອຸດົມສົມບູນຂອງການຮ່ວມມືລະຫວ່າງສອງປະເທດ. ນອກນີ້,ການຮ່ວມມືລະຫວ່າງສອງຝ່າຍໃນຂົງເຂດພະລັງງານໄຟຟ້າ, ບໍ່ແຮ່, ກະສິກຳແລະຂະແໜງການບໍລິການກໍໄດ້ຮັບຜົນສຳເລັດຢ່າງພົ້ນເດັ່ນ. ທ່ານບຸນຍັງວໍລະຈິດຊີ້ໃຫ້ເຫັນວ່າ ມິດຕະພາບລາວ-ຈີນເປັນສ່ວນປະກອບສຳຄັນຂອງການຮັກສາສັນຕິພາບ,ສະເຖຍລະພາບແລະການພັດທະນາຂອງໂລກ.
ທ່ານບຸນຍັງວໍລະຈິດກ່າວວ່າ:ໃນຕໍ່ໜ້ານີ້,ຂ້າພະເຈົ້າເຫັນວ່າ,ເພື່ອເຮັດໃຫ້ການພົວພັນ ດັ່ງກ່າວ ໄດ້ຮັບໝາກຜົນຫລາຍກວ່າເກົ່າ,ສອງຝ່າຍ ຈະໄດ້ເພີ່ມທະວີການຮ່ວມມືໃນຫລາຍດ້ານຕື່ມອີກ,ໂດຍສະເພາະແມ່ນການສືບຕໍ່ຮັກສາການແລກປ່ຽນຢ້ຽມຢາມຂອງການນໍາຂັ້ນສູງຂອງ ສອງພັກ,ສອງລັດຢ່າງເປັນປົກກະຕິເພື່ອແລກປ່ຽນຄໍາຄິດຮ່ວມກັນໃນວຽກງານການພົວພັນຮ່ວມມືສອງຝ່າຍ,ບົດຮຽນການກໍ່ສ້າງພັກຄຸ້ມ ຄອງລັດ,ການພັດທະນາດ້ານເສດຖະກິດ-ສັງຄົມ ແລະ ດ້ານອື່ນໆ ເພື່ອແນໃສ່ການສ້າງຄວາມເຊື່ອໝັ້ນແລະໄວ້ໃຈເຊິ່ງກັນແລະກັນໃຫ້ ໜັກແໜ້ນເຂັ້ມແຂງຍິ່ງໆຂຶ້ນ,ສືບຕໍ່ແລກປ່ຽນຂໍ້ມູນຂ່າວສານ, ປະສາມສົມທົບແລະສະໜັບສະໜູນເຊິ່ງກັນແລະກັນໃນການເຄື່ອນໄຫວ ວຽກງານຕ່າງປະເທດໃນຂອບການຮ່ວມມືພາກພື້ນແລະສາກົນຕໍ່ບັນຫາສໍາຄັນຕ່າງໆ ສືບຕໍ່ຈັດຕັ້ງປະຕິບັດບັນດາສັນຍາທີ່ທັງສອງຝ່າຍ ພວກເຮົາໄດ້ລົງນາມຮ່ວມກັນໃຫ້ປະກົດຜົນເປັນຈິງເພື່ອປະກອບສ່ວນຊຸກຍູ້ສົ່ງເສີມການພົວພັນຮ່ວມມືຂອງສອງປະເທດໃຫ້ນັບມື້ເຂົ້າສູ່ລວງ ເລິກແລະນໍາເອົນຜົນປະໂຫຍດຕົວຈິງມາສູ່ປະຊາຊົນສອງຊາດໃນຕໍ່ໜ້າ.ທັງໝົດເຫລົ່ານີ້ລ້ວນແລ້ວແຕ່ສອດຄ່ອງກັບທິດທາງນະໂຍບາຍ ຂອງພັກແລະລັດຖະບານໃນການສືບຕໍ່ເສີມຂະຫຍາຍສາຍພົວພັນຄູ່ຮ່ວມຍຸດທະສາດຮອບດ້ານໝັ້ນຄົງຍາວນານບົນພື້ນຖານການເປັນຄູ່ຮ່ວມ ຊະຕາກໍາແລະອຸດົມການອັນດຽວກັນທີ່ບໍ່ສາມາດຕັດແຍກອອກຈາກກັນໄດ້. ພ້ອມທັງເປັນການປະກອບສ່ວນຢ່າງຕັ້ງໜ້າໃຫ້ແກ່ການ ຮັກສາສັນຕິພາບ, ສະຖຽນລະພາບແລະການພັດທະນາຂອງພາກພື້ນແລະສາກົນອີກດ້ວຍ.
ຂະນະດຽວກັນ, ປີ 2016 ເປັນປີຄົບຮອບ 75 ປີແຫ່ງການສ້າງຕັ້ງວິທະຍຸສາກົນແຫ່ງປະເທດຈີນຫຼືCRI ແລະວິທະຍຸCRI FM 93 Mhz ອອກອາກາດຄົບຮອບ 10 ປີ ເຊິ່ງທ່ານປະທານບຸນຍັງ ວໍລະຈິດໄດ້ສະແດງຄວາມຂອບໃຈຢ່າງຈິງໃຈຕໍ່CRIທີ່ໄດ້ສົ່ງເສີມມິດຕະພາບທີ່ເປັນມູນເຊື້ອລະຫວ່າງລາວ-ຈີນແລະລາຍງານຂ່າວຢ່າງຮອບດ້ານຕໍ່ການພັດທະນາ ສປປ ລາວແລະເພື່ອຢືນຢັນອີກເທື່ອໜຶ່ງຕໍ່ຜົນສຳເລັດຂອງ CRI ນັ້ນ, ທ່ານຍັງໄດ້ຂຽນຄຳອວຍພອນດ້ວຍຄວາມຊົມຊື່ນຍິນດີໂດຍມີເນື້ອໃນວ່າ: ເນື່ອງໃນໂອກາດວັນສ້າງຕັ້ງ CRI ຄົບຮອບ 75 ປີ, CRI FM 93 ອອກອາກາດຄົບຮອບ 10 ປີ, ຂໍອວຍພອນໃຫ້ CRI ຈົ່ງປະສົບຜົນສຳເລັດໃຫຍ່ຫຼວງກວ່າເກົ່າແລະຫວັງວ່າ CRI ຈະເປັນສື່ກາງປະສານທາງຈິດໃຈລະຫວ່າງປະຊາຊົນລາວແລະປະຊາຊົນຈີນຕະຫຼອດໄປ.
