ຂປລ. ປັດຈຸບັນ ການກະກຽມຄວາມພ້ອມທາງດ້ານຕ່າງໆຂອງສູນຂ່າວ ທັງພາຍໃນ ແລະ ຕ່າງປະເທດ ແມ່ນສຳເລັດສົມບູນ ພ້ອມຮັບໃຊ້ກອງປະຊຸມສຸດຍອດອາຊຽນ ຄັ້ງທີ່ 28, 29 ແລະ ກອງປະຊຸມປິ່ນອ້ອມອື່ນໆທີ່ກ່ຽວຂ້ອງ ເພື່ອລາຍງານຂ່າວຢູ່ພາຍໃນ ແລະ ຕ່າງປະເທດ ໃຫ້ມີຄວາມສະດວກວ່ອງໄວ ແລະ ທັນການ.
ທ່ານ ພອນທະວີ ບຸດດາລາ， ຫົວໜ້າກົມການຂ່າວ，ກະຊວງການຕ່າງປະເທດ， ຫົວໜ້າສູນຂ່າວຕ່າງປະເທດ ອະນຸກຳມະການໂຄສະນາເຜີຍແຜ່ວັດທະນະທຳ ແລະ ຂ່າວສານ ເປີດເຜີຍວ່າ: ສູນຂ່າວ ທັງພາຍໃນ ແລະ ຕ່າງປະເທດ ແມ່ນຕັ້ງຢູ່ສູນການຮ່ວມມືສາກົນ ແລະ ຝຶກອົບຮົມ (ICTC) ຫລັກ 5 ນະຄອນຫລວງວຽງຈັນ ເຊິ່ງມີຄວາມພ້ອມ 100%, ປະກອບມີສິ່ງອຳນວຍຄວາມສະດວກຄົບຊຸດ ເປັນຕົ້ນແມ່ນຫ້ອງເຮັດວຽກຂອງນັກຂ່າວ, ຈຸດບໍລິການພາບໜິ້ງ-ພາບເໜັງ, ຈຸດຮັບລິ້ງສັນຍານພາບສົດ, ຫ້ອງຖະແຫລງຂ່າວ, ຫ້ອງປະກາດຂ່າວ, ຫ້ອງວາງສະແດງ ແລະ ບໍລິການການເງິນ, ການສື່ສານດ້ານໂທລະຄົມ, ອິນເຕີເນັດຄວາມໄວສູງ, ໂທລະສັບ, ແຟັກ, ລວມທັງສັນຍານໂທລະພາບດີຈີຕອນ.ພ້ອມນີ້ ຍັງມີຫ້ອງບໍ ລິການແພດສຸກເສີນ, ຫ້ອງອາຫານ ແລະ ເຄື່ອງດື່ມອີກດ້ວຍ.
ສະເພາະນັກຂ່າວຕ່າງປະເທດ ທີ່ໄດ້ລົງທະບຽນເຂົ້າມາຕິດຕາມລາຍງານຂ່າວກອງປະຊຸມສຸດຍອດອາຊຽນ ຄັ້ງນີ້ ມີຫລາຍກວ່າ 1.000ຄົນ, ຈາກ 256 ສຳນັກຂ່າວ ຂອງ 33 ປະເທດ ໃນນັ້ນ, ຫລາຍກວ່າໝູ່ ນັກຂ່າວຈາກຍີ່ປຸ່ນ 184 ຄົນ, ສ ເກົາຫລີ 152, ສປ ຈີນ 144 ຄົນ ຕາມລຳດັບ. ສະນັ້ນ ທາງກົມຂ່າວ ກະຊວງການຕ່າງປະເທດ ໄດ້ມີການຮ່ວມມື ແລະ ຄຸ້ມຄອງ ທັງອຳນວຍຄວາມສະດວກໃນດ້ານຕ່າງໆ, ສ່ວນໃນຂອບເຂດສູນ ຍັງມີການຈັດວາງຄວາມສະຫງົບປອດໄພເປັນຢ່າງດີ./.
