ກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ພວມດຳເນີນຢູ່ນະຄອນຫຼວງປັກກິ່ງ. ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ ໄດ້ນຳໃຊ້ສຳນວນຈີນຫຼາຍສຳນວນ ຂະນະສະເໜີບົດລາຍງານໃນກອງປະຊຸມ. ຕາມການສະເໜີຈາກເພື່ອນເນັດຊາວລາວ, ບັນນາທິການ We chat ໄດ້ຄັດເອົາຫຼາຍສຳນວນ ເພື່ອຮ່ວມກັບບັນດາທ່ານມາເຂົ້າໃຈຄວາມໝາຍຂອງສຳນວນພາສາຈີນ ແລະກໍຈະໄດ້ຄວາມຮູ້ໃນບົດລາຍງານຂອງກອງປະຊຸມພັກໃນຄັ້ງນີ້.
ຂູດກະດູກແກ້ພິດ
ໝາຍເຖິງເອົາມີດມາຂູດສານພິດທີ່ເຂົ້າເຖິງກະດູກນັ້ນອອກ ເພື່ອປິ່ນປົວໃຫ້ໄຄ. ໃນພົງສາວະດານສາມກົກ ທີ່ເປັນນິຍາຍປະຫວັດສາດທີ່ມີຊື່ສຽງຂອງຈີນ ໄດ້ພັນລະນາເຖິງເລື່ອງລາວກ່ຽວກັບຮວ້າໂຖ ແພດໝໍຜູ້ມີຊື່ສຽງໃນສະໄໝນັ້ນ ໄດ້ຂູດກະດູກແກ້ພິດໃຫ້ຂຸນພົນໃຫຍ່ກວນອູ ເຊິ່ງເລື່ອງມີຢູ່ວ່າ: ກວນອູ ຖືກລູກທະນູເຂົ້າແຂນ ໂດຍຫົວທະນູທີ່ແຫຼມຄົມ ໄດ້ຊອດແຂນຂວາ. ພາຍຫຼັງມາ, ເຖິງວ່າບາດແຜຢູ່ແຂນນັ້ນໄດ້ສ່ວງເຊົາແລ້ວກໍຕາມ, ແຕ່ເມື່ອໃດຄັນຟ້າບົດຝົນຕົກ, ກໍພົບກັບຄວາມເຈັບປວດເລື້ອຍໆ. ເມື່ອແພດໝໍເບິ່ງແລ້ວ ກໍໄດ້ກ່າວວ່າ: "ຫົວທະນູນີ້ມີສານພິດ ແລະ ໄດ້ເຂົ້າເຖິງໄຂກະດູກແລ້ວ. ພຽງແຕ່ປາດໜ້າແຂນຢູ່ຈຸດທີ່ເປັນບາດແຜນັ້ນອອກ ແລະຂູດສານພິດຢູ່ຕາມກະດູກນັ້ນອອກແລ້ວຈຶ່ງສາມາດປິ່ນປົວໃຫ້ສ່ວງເຊົາໄດ້ປານປິດຖິ້ມ". ກວນອູ ກໍເລີຍໃຫ້ແພດໝໍປິ່ນປົວຕາມຄຳເຫັນດັ່ງກ່າວ. ຂະນະນັ້ນ, ກວນອູ ກຳລັງດື່ມເຫຼົ້າຮ່ວມກັບແມ່ທັບນາຍກອງຕ່າງໆ ແລະເຖິງວ່າແຂນເພິ່ນອາບໄປດ້ວຍເລືອດກໍຕາມ, ແຕ່ກວນອູ ກໍດື່ມເຫຼົ້າກິນຊີ້ນ ແລະ ລົມກັບແມ່ທັບນາຍກອງເໝືອນເດີມ ໂດຍບໍ່ມີສີໜ້າປ່ຽນຫຍັງເລີຍ.
ເລື່ອງດັ່ງກ່າວກໍໄດ້ຖືກບັນທຶກໄວ້ໃນປື້ມ "ບັນທຶກເລື່ອງສາມກົກ" ເຊັ່ນດຽວກັນ ຕ່າງຢູ່ແຕ່ວ່າ ແພດໝໍທີ່ປິ່ນປົວໃຫ້ກວນອູ ນັ້ນບໍ່ແມ່ນຮວ້າໂຖ.
ຈາກນັ້ນ, ຄົນທັງຫຼາຍຈຶ່ງໃຊ້ສຳນວນ "ຂູດກະດູກແກ້ພິດ" ມາອຸປະມາເຖິງຄົນທີ່ມີມະນາຈິດອັນເດັດດ່ຽວໜຽວແໜ້ນ ແລະ ມີຄວາມຕັດສິນໃຈເດັດຂາດ, ບໍ່ຢ້ານກົວສິ່ງໃດເພື່ອບັນລຸເປົ້າໝາຍຂອງຕົນ.
ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ໄດ້ກ່າວໃນບົດລາຍງານກອງປະຊຸມໃຫຍ່ຜູ້ແທນທົ່ວປະເທດຂອງພັກຄັ້ງທີ 19 ວ່າ:
ປະຫວັດສາດໄດ້ຢັ້ງຢືນ ແລະ ຈະຢັ້ງຢືນຕໍ່ໄປວ່າ, ຖ້າບໍ່ມີການນຳພາຂອງພັກກອມມູນິດຈີນ, ການຟື້ນຟູຄວາມຈະເລີນຮຸ່ງເຮືອງຂອງປະຊາຊາດຈີນນັ້ນກໍຈະເປັນພຽງແຕ່ຄວາມເພີ້ຝັນລ້າໆເທົ່ານັ້ນ. ພັກເຮົາຕ້ອງເປັນກອງນຳໜ້າຂອງຍຸກສະໄໝ ແລະ ເປັນສັນຫຼັງຂອງຊົນຊາດຈີນຢ່າງສະເໝີຕົ້ນສະເໝີປາຍ, ຕ້ອງເປັນພັກກຳອຳນາດທີ່ປະຕິບັດຕາມລັດທິມາກຢ່າງສະເໝີຕົ້ນສະເໝີປາຍ ແລະ ສ້າງຕົນເອງໃຫ້ເຂັ້ມແຂງຢ່າງສະເໝີຕົ້ນສະເໝີປາຍ. ທົ່ວພັກຕ້ອງມີຄວາມຕື່ນຕົວຍຶດໝັ້ນຫຼັກການສະຕິພັກຢ່າງໝັ້ນໜຽວ, ກ້າຜະເຊີນໜ້າກັບບັນຫາໂດຍກົງ, ກ້າຂູດກະດູກເພື່ອລ້າງສານພິດ, ລົບລ້າງປັດໄຈທັງໝົດທີ່ຈະທຳລາຍລັກສະນະນຳໜ້າ ແລະ ຄວາມບໍລິສຸດຂອງພັກ, ລົບລ້າງພະຍາດທຸກຊະນິດທີ່ກັດດູດສຸຂະພາບຂອງພັກ, ເພີ່ມພູນຄູນສ້າງຄວາມສາມາດການນຳພາດ້ານການເມືອງ, ຄວາມສາມາດການຊີ້ນຳດ້ານແນວຄິດ, ຄວາມສາມາດດ້ານການຈັດຕັ້ງມະຫາຊົນ, ຄວາມສາມາດດ້ານການລະດົມຂົນຂວາຍສັງຄົມ, ຮັບປະກັນໃຫ້ພັກເຮົາຮັກສາພະລັງຊີວິດທີ່ເຂັ້ມແຂງ ແລະ ກຳລັງສູ້ຮົບທີ່ແຂງແຮງ.
