ເອົາການທະນຸຖະໜອມທາງຈິດໃຈແລະເຕັກນິກທັນສະໄໝມາສ້າງໂຮງຮຽນໃໝ່
-----------------------------------------------------------------------------------------------------------------
ໄພແຜ່ນດິນໄຫວຮຸນແຮງທີ່ເກີດຂຶ້ນຢູ່ແຂວງເສສວນ ພາກຕາເວັນຕົກສຽງໃຕ້ຂອງຈີນໃນວັນທີ12ພຶດສະພາປີກາຍນີ້ເຮັດໃຫ້ຄົນທ້ອງຖິ່ນນັ້ນເສຍບ້ານເຮືອນຂອງຕົນ, ໂຮງຮຽນຂອງນັກຮຽນທັງຫຼາຍກໍສູນຫາຍໄປນຳ. ປີໜຶ່ງຜ່ານໄປແລ້ວ, ເມື່ອນັກຂ່າວກ້າວເຂົ້າເຂດປະສົບໄພແຂວງເສສວນພັດເຫັນວ່າ, ໃນໂຮງຮຽນຊົ່ວຄາວແລະໂຮງຮຽນທີ່ສ້າງສາຄືນໃໝ່ນັ້ນມີສຽງອ່ານໜັງສືທີ່ມ່ວນຫູດັງຂຶ້ນອີກ, ຢູ່ເທິງໃບໜ້າຂອງນັກຮຽນທັງຫຼາຍກໍມີຮອຍຍິ້ມອີກເທື່ອໜຶ່ງ. ໃນລາຍການ ເສສວນທີ່ຟື້ນຟູຄືນໃໝ່ເພື່ອລະລຶກໄພແຜ່ນດິນໄຫວເສສວນເກີດຂຶ້ນຄົບຮອບໜຶ່ງປີ ພາກນີ້, ເຊີນຟັງບົດແຈ້ງຂ່າວທີ່ມີຫົວເລື່ອງວ່າ: ເອົາການທະນຸຖະໜອມທາງຈິດໃຈແລະເຕັກນິກທັນສະໄໝມາສ້າງໂຮງຮຽນໃໝ່.
ໂຮງຮຽນມັດທະຍົມເປສວນຕັ້ງຢູ່ເມືອງໝຽນຢາງ ເມືອງທີ່ປະສົບໄພໜັກໜ່ວງທີ່ສຸດຂອງແຂວງເສສວນ. ພາຍຫຼັງໄພແຜ່ນດິນໄຫວຜ່ານໄປ7ມື້, ນັກຮຽນຂອງໂຮງຮຽນມັດທະຍົມເປສວນໄດ້ຍ້າຍໄປຮຽນຕໍ່ຢູ່ສູນອົບຮົມແຫ່ງໜຶ່ງຂອງວິສາຫະກິດທີ່ຢູ່ໃກ້. ທ່ານຫຼີສົວອີ້ ຜູ້ຮັບຜິດຊອບໂຮງຮຽນເປສວນກ່າວວ່າ, ເດືອນກັນຍາປີກາຍນີ້, ມີອາສາສະໝັກຫຼາຍຄົນທີ່ມາຈາກວິທະຍາຄານດົນຕີມະຫາວິທະຍາໄລສ້າງຄູນະຄອນຫຼວງປັກກິ່ງໄດ້ມາຊ່ວຍສອນໜັງສືຢູ່ໂຮງຮຽນເປສວນ. ສະນັ້ນ, ໂຮງຮຽນດັ່ງກ່າວຈິ່ງລອງເປີດຫຼັກສູດສິນລະປະ ເຊັ່ນ ດົນຕີ, ວິຈິດຕະກຳແລະອື່ນໆ ເພື່ອໃຫ້ການສຶກສາສຸຂະພາບທາງຈິດໃຈຕໍ່ນັກຮຽນ.
