ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນເຊົ້າວັນທີ 29 ເມສານີ້, ທ່ານບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດລາວໄດ້ເດີນທາງຢ້ຽມຢາມບ້ານເສ້ຍຊີຕາແສງເສ້ຍປາຍເຊີເມືອງຟູອ່ານນະຄອນນິງເຕີແຂວງຟູຈ້ຽນຈີນ.
ບ້ານເສ້ຍຊີຕັ້ງຢູ່ເຂດທີ່ອ້ອມຮອບໄປໂດຍໜອງນ້ຳ ແລະສາຍພູເປັນເຂດຈັດສັນໃຫຍ່ທີ່ສຸດຂອງຊາວຫາປາຢູ່ພາກຕາເວັນອອກແຂວງຟູຈ້ຽນ. ກ່ອນນີ້ 20 ກວ່າປີ, ປະຊາຊົນທ້ອງຖິ່ນບໍ່ມີເຮືອນຢູ່ ພຽງອາໄສຢູ່ເຮືອແພເທິງທະເລ. ໃນຄວາມຊົງຈຳຂອງປະຊາຊົນຄາວນັ້ນ, ການມີເຮືອນຢູ່ເຖິງບົກໄດ້ເປັນຄວາມໃຝ່ຝັນໃຫຍ່ທີ່ສຸດ.
ໃນເວລານັ້ນ, ທ່ານສີຈິ້ນຜິງໄດ້ເດີນທາງໄປເຮັດວຽກຢູ່ແຂວງຟູຈ້ຽນ ທ່ານໄດ້ໄປຊອກຮູ້ສະພາບຄວາມທຸກຍາກຢູ່ພາກຕາເວັນອອກແຂວງຟູຈ້ຽນ ຄື: ບ້ານເສ້ຍຊີ ແລະບ້ານອື່ນໆຫຼາຍເທື່ອ ແລະໄດ້ສະເໜີທິດຊີ້ນຳເພື່ອໃຫ້ຊາວຫາປາຫຼຸດພົ້ນອອກຈາກຄວາມທຸກຍາກໂດຍການຈັດສັນຍົກຍ້າຍຖິ່ນທີ່ຢູ່ອາໄສຂອງຊາວຫາປາໄປຢູ່ເທິງບົກ, ມີເຮືອນຢູ່ ແລະສ້າງຄວາມຮັ່ງມີ. ປັດຈຸບັນນີ້, ຊາວຫາປາຫຼາຍກວ່າ 3000 ຄົນບໍ່ພຽງແຕ່ຖືກຈັດສັນຍົກຍ້າຍໄປຢູ່ເທິງບົກເທົ່ານັ້ນ, ເຂົາເຈົ້າຍັງມີເຮືອນພັກທີ່ແໜ້ນໜາອີກດ້ວຍ. ນອກນີ້ຍັງສາມາດສ້າງລາຍຮັບໄດ້ຫຼາຍກວ່າ 2 ໝື່ນຢວນຕໍ່ປີໂດຍສະເລ່ຍ ເຊິ່ງຕ່າງຈາກເມື່ອກ່ອນທີ່ລາຍຮັບບໍ່ເຖິງ 1000 ຢວນ.
ບົດບາດຂອງພັກກອມມູນິດຈີນໃນການຊຸກຍູ້ການຫຼຸດພົ້ນອອກຈາກຄວາມທຸກຍາກໄດ້ດຶງດູດຄວາມສົນໃຈຂອງທ່ານບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ທ່ານກ່າວວ່າ: ມື້ນີ້ຂ້າພະເຈົ້າໄດ້ເດີນທາງມາເຖິງບ້ານເສ້ຍຊີ ແລະໄດ້ເຫັນການປ່ຽນແປງໃໝ່ ແລະເຫັນຊີວິດການເປັນຢູ່ທີ່ດີຂອງປະຊາຊົນພາຍໃຕ້ການນຳພາຕາມທິດສະດີການຫຼຸດພົ້ນອອກຈາກຄວາມທຸກຍາກຂອງທ່ານສີຈິ້ນຜິງ. ຂ້າພະເຈົ້າຈະຕ້ອງຖອດຖອນເອົາບົດຮຽນດ້ານການຫຼຸດພົ້ນອອກຈາກຄວາມທຸກຍາກຂອງຈີນເພື່ອນຳໄປຈັດຕັ້ງປະຕິວັດຢູ່ລາວ.
ທ່ານບຸນຍັງ ວໍລະຈິດໄດ້ໃຫ້ສຳພາດຕໍ່ນັກຂ່າວວ່າ: ລາວມີຄວາມໃຝ່ຝັນໃນການພັດທະນາ ແລະຢາກໃຫ້ປະຊາຊົນສາມາດຫຼຸດພົ້ນອອກຈາກຄວາມທຸກຍາກ ແລະມີຄວາມຜາສຸກໂດຍໄວ. ສອງພັກ-ສອງລັດໄດ້ເພີ່ມທະວີການແລກປ່ຽນປະສົບການໃນການບໍລິຫານລັດ ແລະປົກຄອງປະເທດ ເຊິ່ງມີຄວາມໝາຍສຳຄັນທີ່ສຸດ.
ຄຳເຫັນ
0