ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນຄ່ຳວັນທີ 15 ພຶດສະພານີ້, ການີວານວັດທະນະທຳອາຊີໄດ້ຈັດຂຶ້ນຢູ່ສະໜາມກິລາແຫ່ງຊາດນະຄອນຫຼວງປັກກິ່ງ, ທ່ານສີຈີ້ນຜິງ ປະທານປະເທດຈີນໄດ້ໄຂພິທີຄືດັ່ງກ່າວຕໍ່ໄປນີ້.
ຮຽນບັນດາແຂກຜູ້ມີກຽດ, ທ່ານຍິງ, ທ່ານຊາຍ ແລະ ເພື່ອນມິດທັງຫຼາຍ:
ສະບາຍດີຕອນຄ່ຳ! ຕົ້ນລະດູຮ້ອນສົມກັບທ້ອງຟ້າຍາມຄ່ຳຄືນທີ່ກວ້າງໃຫຍ່. ໃນຍາມທີ່ທຸກສິ່ງທຸກຢ່າງລ້ວນແຕ່ມີຊີວິດຊີວານີ້, ແຂກຜູ້ມີກຽດ, ສິລະປິນ ແລະເພື່ອນມິດຊາວໜຸ່ມທີ່ມາຈາກບັນດາປະເທດອາຊີໄດ້ມາເຕົ້າໂຮມກັນຢູ່ປັກກິ່ງ, ສະຫຼອງວັນບຸນວັດທະນະທຳທີ່ມ່ວນຊື່ນ ແລະ ສິລິມຸງຄຸນຮ່ວມກັນດ້ວຍຮູບແບບການີວານ. ກ່ອນອື່ນໝົດ, ຂ້າພະເຈົ້າຂໍຕາງໜ້າລັດຖະບານ ແລະ ປະຊາຊົນຈີນ ສະແດງຄວາມຍິນດີຕ້ອນຮັບຢ່າງສຸດອົກສຸດໃຈຕໍ່ແຂກຜູ້ມີກຽດ ແລະ ສິລະປິນບັນດາທ່ານມາເຂົ້າຮ່ວມກິດຈະກຳຄັ້ງນີ້!
ດອກເບັ່ງບານເຕັມສວນ, ສິ່ງຕາງໆຮ່ວມກັນສ້າງຄວາມງາມ. ບັນດາປະເທດອາຊີລ້ວນແຕ່ມີວັດທະນະທຳອັນຮຸ່ງເຮືອງມາແຕ່ບູຮານນະການ, ມີເອກະລັກຂອງຕົນ ແລະ ມີລັກສະນະພິເສດ, ທັງພັດທະນາຢ່າງກົມກຽວກັນ ແລະສ່ອງແສງກັນ. ອາລະຍະທຳອາຊີທີ່ມີຫຼາຍເຄົ້າເຮັດໃຫ້ວັດທະນະທຳອາຊີມີຄວາມອຸດົມສົມບູນ ແລະ ຍິ່ງມີພະລັງຊີວິດຖາວອນ. ຕອນຄ່ຳມື້ນີ້, ດອກໄມ້ແຫ່ງວັດທະນະທຳອາຊີທີ່ມີຫຼາກຫຼາຍຮູບສີສັນຈະເບັ່ງບານຢ່າງເຕັມທີ່, ສິລະປະຈະຂ້າມຜ່ານຊົນເຜົ່າ, ເຂົ້າເຖິງດວງໃຈ, ເຊື່ອມຕໍ່ແນວຄິດ, ສະແດງໃຫ້ເຫັນເຖິງອາຊີທີ່ສວຍສົດງົດງາມ, ມີພະລັງຊີວິດ ມີສັນຕິພາບ ແລະ ກ້າວໜ້າຕໍ່ທົ່ວໂລກ.
ມາແຕ່ບູຮານນະການແລ້ວ, ຊາວຈີນໄດ້ເຊີດຊູແນວຄິດ “ມິດຕະພາບກັບປະເທດໃກ້ຄຽງ ເປັນມໍລະດົກຂອງຊາດ”, “ຍາດພີ່ນ້ອງອວຍພອນເຊິ່ງກັນແລະກັນ, ຜູ້ຢູ່ໃກ້ຄຽງອວຍພອນເຊິ່ງກັນແລະກັນ” ເປັນຕົ້ນ. ປະຊາຊົນຈີນຫວັງຢ່າງຈິງໃຈວ່າບັນດາປະເທດອາຊີຈະຊ່ວຍເຫຼືອເຊິ່ງກັນແລະກັນ, ຮ່ວມສຸກຮ່ວມທຸກ, ກ້າວໜ້າໄປຕາມບາດກ້າວຂອງທົ່ວໂລກ, ພັດທະນາໄປຕາມກະແສການພັດທະນາຂອງທົ່ວໂລກ, ເພື່ອຮ່ວມກັນສ້າງອະນາຄົດທີ່ດີງາມກວ່າເກົ່າຂອງອາຊີ ແລະ ໂລກ.
ທ່ານຍິງ ທ່ານຊາຍ ເພື່ອນມິດທັງຫຼາຍ!
ດຽວນີ້, ຂ້າພະເຈົ້າປະກາດ ການີວານວັດທະນະທຳອາຊີເລີ່ມຕົ້ນຢ່າງເປັນທາງການ!
ຄຳເຫັນ
0