ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ເດືອນພຶດສະພາປີ 1985, ທ່ານສີຈິ້ນຜິງໄດ້ຮັບການຊັບຊ້ອນອອກຈາກເມືອງເຈີ້ງຕິ້ງໄປເຮັດວຽກຢູ່ບ່ອນອື່ນ. ພະນັກງານຫຼາຍໆຄົນທີ່ເຄີຍເຮັດວຽກນຳກັນກັບທ່ານສີຈິ້ນຜິງຢູ່ຄະນະພັກເມືອງເຈີ້ງຕິ້ງໄດ້ຄົ້ນຄຶດມາໂດຍຕະຫຼອດວ່າ: ເລຂາຄະນະພັກເມືອງຜູ້ໜຸ່ມທີ່ເປັນຄົນປະຢັດມັດທະຍັດ ບໍ່ຖືການກິນການນຸ່ງ,ບໍ່ອວດອົ່ງຖືຕົວ, ເປັນຫຍັງຈິ່ງມີອິດທິພົນສູງແລະໄດ້ຮັບຄວາມເຊື່ອໝັ້ນຈາກພະນັກງານແລະປະຊາຊົນ? ເມື່ອເພິ່ນອອກຈາກເມືອງເຈີ້ງຕິ້ງໄປໄດ້ຫຼາຍປີແລ້ວ,ເປັນຫຍັງພະນັກງານແລະປະຊາຊົນທ້ອງຖິ່ນຍັງຈື່ເພິ່ນບໍ່ລືມຈັກເທື່ອ?
ປີ1983,ທ່ານສີຈິ້ນຜິງຢູ່ໃນຫ້ອງການເມືອງເຈິ້ງຕິ້ງ
ປີ 1988, ທ່ານວາງຢູ້ຖິງ ດຳລົງຕຳແໜ່ງເປັນເລຂາຄະນະພັກເມືອງເຈີ້ງຕິ້ງ, ທ່ານຫວນຄືນວ່າ: ທ່ານສີຈິ້ນຜິງດຳລົງຕຳແໜ່ງການນຳຢູ່ເມືອງເຈີ້ງຕິ້ງເປັນເວລາ 3 ປີປາຍ, ເຊິ່ງໄດ້ສ້າງພື້ນຖານທີ່ດີໃຫ້ແກ່ການພັດທະນາຂອງເມືອງເຈີ້ງຕິ້ງ. ພາຍຫຼັງຂຶ້ນດຳລົງຕຳແໜ່ງແລ້ວ, ໂດຍລວມແລ້ວ, ຕົນໄດ້ບໍລິຫານວຽກງານທຸກດ້ານຂອງເມືອງເຈີ້ງຕິ້ງຕາມແລວຄວາມຄິດຂອງທ່ານສີຈິ້ນຜິງ.
ໃນຊຸດຝຶກອົບຮົມສຳລັບເລຂາຄະນະພັກເມືອງທົ່ວແຂວງເຫີເປີຍ ທີ່ໂຮງຮຽນທິດສະດີພັກແຂວງເຫີເປີຍຈັດຂຶ້ນເມື່ອ ປີ 1989 ແລະປີ 1990,ຄະນະນຳເມືອງເຈີ້ງຕິ້ງໄດ້ແນະນຳບົດຮຽນຂອງເມືອງຕົນໃນການດ້ານການກໍ່ສ້າງອົງການຈັດຕັ້ງຂັ້ນຮາກຖານແລະບົດຮຽນບໍລິຫານວຽກງານຂອງຄະນະນຳຄະນະພັກເມືອງໃຫ້ເມືອງຕ່າງໆໃນທົ່ວແຂວງຮັບຊາບເພື່ອນຳໄປປະຕິບັດໃນເມືອງຂອງຕົນຕາມຄວາມເໝາະສົມ. ທ່ານວາງຢູ້ຖິງເວົ້າໂດຍກົງວ່າ: ທີ່ແທ້, ບົດຮຽນເຫຼົ່ານີ້ລ້ວນແຕ່ແມ່ນທ່ານສີຈີ້ນຜິງສ້າງຂຶ້ນຫຼືເກີດມາຈາກແຮງບັນດານໃຈຂອງທ່ານ. ສິ່ງທີ່ທ່ານສີຈິ້ນຜິງສ້າງໄວ້ນັ້ນ, ບາງຢ່າງຕົນຮຽນເອົາໄດ້, ແຕ່ມີບາງຢ່າງຕົນຮຽນແນວໃດກໍບໍ່ສາມາດເຮັດດີທໍ່ທ່ານສີຈິ້ນຜິງໄດ້. ຕົວຢ່າງເຊັ່ນ, ໃນດ້ານການສ້າງຄວາມສາມັກຄີ, ຄັນຢາກປະສານງານວຽກງານທຸກຢ່າງຂອງຄະນະນຳ, ລາວເຫັນວ່າ ມັນຍາກຫຼາຍ. ໃນຄະນະນຳຄະນະໜຶ່ງ, ຕ່າງຄົນຕ່າງມີນິດໄສໃຈຄໍຂອງຕົນ, ແຕ່ທ່ານສີຈິ້ນຜິງສາມາດສ້າງຄວາມສາມັກຄີກັບຄົນທັງຫຼາຍໃຫ້ຢູ່ອ້ອມຂ້າງຕົນແລະທຸກຄົນກໍເຊື່ອໝັ້ນເພິ່ນ, ຕ່າງກໍສະໜິດກັບເພິ່ນ. ພໍ່ແມ່ປະຊາຊົນສະໜັບສະໜູນເພິ່ນ, ພະນັກງານກໍສະໜັບສະໜູນເພິ່ນ ເຊິ່ງລ້ວນແຕ່ໃຫ້ການປະສານສົມທົບກັບເພິ່ນຢ່າງເຕັມຄວາມສາມາດ. ຕອນທີ່ທ່ານສີຈິ້ນຜິງເຮັດວຽກຢູ່ເມືອງເຈີ້ງຕິ້ງ, ເປັນໄລຍະທີ່ຄະນະນຳເມືອງມີຄວາມສາມັກຄີປະສານງານໄດ້ດີທີ່ສຸດ ທັງເປັນໄລຍະທີ່ພະນັກງານທົ່ວເມືອງມີຄວາມຫ້າວຫັ້ນໝັ້ນໃຈໃນການປະຕິບັດໜ້າທີ່ວຽກງານຫຼາຍທີ່ສຸດ, ທຸກຄົນຕ່າງກໍເຮັດວຽກຢ່າງຫ້າວຫັນຈົດຈໍ່ເພື່ອພັດທະນາເສດຖະກິດໂດຍບໍ່ມີແນວຄິດຫຍໍ້ທໍ້ແມ່ນແຕ່ໜ້ອຍດຽວ, ລ້ວນແຕ່ມີຄວາມສາມັກຄີເປັນຈິດໜຶ່ງໃຈດຽວກັນ, ບໍ່ມີຜູ້ໃດສ້າງກຸ່ມນ້ອຍຂອງຕົນ, ບໍ່ມີໃຜຈົ່ມຢູ່ເບື້ອງຫຼັງ. ເປັນຫຍັງທ່ານສີຈິ້ນຜິງຈຶ່ງເຮັດໄດ້ແນວນີ້ແທ້?
ທ່ານວາງຢູ້ຖິງກ່າວວ່າ: “ຂ້າພະເຈົ້າເຫັນວ່າ ສາເຫດສຳຄັນອັນໜຶ່ງກໍຄື ຜູ້ທີ່ບໍ່ເຫັນແກ່ຕົວຄືຜູ້ທີ່ມີຈິດໃຈກວ້າງຂວາງຈະໄດ້ຢູ່ໃນໂລກທີ່ກວ້າງຂວາງ”ທ່ານສີຈິ້ນຜິງໄດ້ທຸ້ມເທເຫື່ອແຮງຈິດໃຈແລະສະຕິປັນຍາທັງໝົດຂອງຕົນເຂົ້າໃນການປະຕິບັດໜ້າທີ່ວຽກງານເພື່ອການພັດທະນາຂອງເມືອງເຈີ້ງຕິ້ງ, ເປັນຜູ້ຊື່ກົງບໍລິສຸດແລະຂາວສະອາດ,ບໍ່ມີຄວາມເຫັນແກ່ຕົວແມ່ນແຕ່ໜ້ອຍດຽວ,ແນ່ນອນແລ້ວ, ຜູ້ທີ່ເຮັດວຽກນຳກັນ ກໍໄດ້ຮັບອິດທິພົນຈາກເພິ່ນ ໂດຍບໍ່ເຄີຍຄິດທີ່ຈະໄປເຮັດສິ່ງທີ່ບໍ່ດີ.
ເວົ້າໃນດ້ານການກຳກັບສະພາບການລວມແລ້ວ, ທ່ານວາງຢູ້ຖິງ ເຄົາລົບນັບຖືທ່ານສີຈິ້ນຜິງທີ່ສຸດ. ເພາະວ່າ ທ່ານສີຈິ້ນຜິງສາມາດຈັດວາງວຽກງານທຸກຢ່າງໃຫ້ເປັນລະບຽບແລະດຳເນີນໄປດ້ວຍດີ, ເຮັດວຽກທຸກຢ່າງ ເພິ່ນກໍສາມາດພິຈາລະນາເຖິງສະພາບການລວມຢ່າງຮອບຄອບເຊັ່ນວ່າ ມີຄົນເທົ່າໃດ,ມີວຽກຫຼາຍເທົ່າໃດ, ຄົນແບບໃດເຮັດວຽກແບບໃດ, ບັນຫາທີ່ອາດຈະພົບພໍ້. ທັງໝົດນີ້, ທ່ານສີຈິ້ນຜິງສາມາດພິຈາລະນາຢ່າງລະອຽດຮອບຄອບ,ມີການຄາດຄະເນແລະກຽມພ້ອມເປັນຢ່າງດີ. ສະນັ້ນ, ໃນກອງປະຊຸມຄະນະປະຈຳຄະນະພັກເມືອງທຸກຄັ້ງ, ທ່ານກໍສາມາດສະເໜີຍັດຕິເປັນເຈົ້າການ ແຕ່ບໍ່ແມ່ນລໍຖ້າບັນຫາເກີດຂຶ້ນແລ້ວຈິ່ງຄ່ອຍໄປແກ້ໄຂ.
ໃນສາຍຕາຂອງທ່ານເສີງປາວຮວຍ ເຈົ້າເມືອງເມືອງເຈີ້ງຕິ້ງໃນເວລານັ້ນ, ຈຸດເດັ່ນຂອງທ່ານສີຈິ້ນຜິງໃນດ້ານການປະພຶດຕົວແລະການເຮັດວຽກກໍຄື ທ່ານສາມາດເຂັ້ມງວດຕໍ່ຕົວເອງໃນການຝຶກຝົນຫຼໍ່ຫຼອມຕົນເອງໃຫ້ມີຄຸນທາດຄຸນສົມບັດແລະມີຄວາມເປັນເອກະພາບກັນໃນດ້ານການເວົ້າແລະການກະທຳ. ເພື່ອສ້າງສາພັດທະນາເມືອງເຈີ້ງຕິ້ງໃຫ້ຈະເລີນກ້າວໜ້າ, ທ່ານໄດ້ນຳໜ້າບຸກບືນສູ້ຊົນເຮັດວຽກແລະມີສ່ວນຮ່ວມທຸກຄັ້ງ, ເມື່ອເຮັດວຽກໃດກໍບໍ່ໄດ້ເວົ້າແຕ່ສິ່ງທີ່ດີງາມລ້າໆ, ຫາກແມ່ນເຮັດແທ້ທຳຈິງ,ເຮັດສິ່ງໃດກໍສຳເລັດສິ່ງນັ້ນ. ທ່ານສີຈິ້ນຜິງໄດ້ເນັ້ນໜັກໃຫ້ພະນັກງານທັງຫຼາຍຮູ້ຕະຫຼອດວ່າ: ເດັດຂາດບໍ່ໃຫ້ເວົ້າແລ້ວບໍ່ເຮັດ,ບໍ່ຮັກສາສັນຍາ, ບໍ່ໃຫ້ເຮັດແບບຫົວຊ້າງຫາງໜູ, ຍິ່ງບໍ່ຄວນເຮັດແບບງາມແຕ່ນອກທາງໃນເປັນໝາກເດື່ອຍ,ບໍ່ຕິດແທດຕົວຈິງແລະເຮັດແບບສໍ້ໂກງ. ເມື່ອຕັດສິນໃຈຈະເຮັດສິ່ງໃດກໍຕ້ອງກຳແໜ້ນສິ່ງນັ້ນເຮັດດ້ວຍຄວາມຮັບຜິດຊອບສູງແລະເຮັດໃຫ້ມີໝາກມີຜົນ.
ຫຼາຍໆວຽກທີ່ທ່ານສີຈິ້ນຜິງໄດ້ເຮັດຢູ່ເຈີ້ງຕິ້ງໃນເວລານັ້ນຕົວຢ່າງເຊັ່ນ: ພັດທະນາໂຄງການທ່ອງທ່ຽວ, ອອກແຮງຊຸກຍູ້ການພັດທະນາຂະແໜງການອຸດສາຫະກຳແລະຂະແໜງການສຳຮອງ, ເປີດກວ້າງຂະແໜງການບໍລິການ, ຕາມທີ່ເຫັນໃນປັດຈຸບັນແລ້ວມັນຖືວ່າເປັນເລື່ອງທຳມະດາ, ແຕ່ໃນຕອນນັ້ນ ພັດຖືວ່າເປັນເລື່ອງທີ່ຕ້ອງເຮັດດ້ວຍຄວາມກ້າຫານແລະມີຄວາມຮູ້ກວ້າງຂວາງຈິ່ງຈະສຳເລັດໄດ້.
ທ່ານຈ່າງອູຜູ ເລຂາຄະນະກວດກາວິໄນຄະນະພັກເມືອງເຈີ້ງຕິ້ງໃນເວລານັ້ນໄດ້ຫວນຄືນວ່າ: ຢູ່ໃນຫ້ອງການຂອງສະຫາຍສີຈິ້ນຜິງແມ່ນເຕັມໄປດ້ວຍເອກະສານແລະປຶ້ມ. ທ່ານໄດ້ອ່ານປຶ້ມຢ່າງຫຼວງຫຼາຍ, ອ່ານແລ້ວກໍຈື່ໄດ້ດີ ຖືວ່າມີຄວາມຈຳດີທີ່ສຸດ. ທ່ານມັກຊອກຮູ້ຮ່ຳຮຽນ, ແຕ່ທ່ານບໍ່ໄດ້ຮຽນສະເພາະແຕ່ຄວາມຮູ້ຈາກປຶ້ມເທົ່ານັ້ນ, ທ່ານຍັງເອົາໃຈໃສ່ການຮ່ຳຮຽນຈກາການປະຕິບັດຕົວຈິງ, ຈາກການສຳຫຼວດແລະຄົ້ນຄວ້າເພື່ອໄດ້ຮັບຄວາມຮູ້ແລະບົດຮຽນໃຫ້ຫຼາຍກວ່າເກົ່າ.
ຕົ້ນຊຸມປີ 1980, ໂທລະພາບແລະອິນເຕີເນັດຍັງບໍ່ທັນໄດ້ຮັບການເຜີຍແຜ່ນຳໃຊ້ໂດຍທົ່ວເຖິງຢູ່ຈີນ, ຄົນທັງຫຼາຍພຽງແຕ່ອາໄສໜັງສືພິມ,ວາລະສານແລະວິທະຍຸເພື່ອຮັບຮູ້ໂລກພາຍນອກ, ຫຼືບໍ່ນັ້ນກໍແມ່ນອາໄສການສື່ສານແລກປ່ຽນກັນແບບປາກຕໍ່ປາກ, ສະນັ້ນ,ການໂອ້ລົມສົນທະນາກັນລະຫວ່າງໝູ່ເພື່ອນກໍໄດ້ກາຍເປັນຊ່ອງທາງສຳລັບຮັບຮູ້ຂໍ້ມູນຂ່າວສານສຳຄັນຂອງທ່ານສີຈິ້ນຜິງ.
ທ່ານໂຈ່ວເວີຍຊື ນັກຂ່າວວາລະສານ “ຊາວໜຸ່ມເຫີເປີຍ”ບອກວ່າ: ເມື່ອພົບປະກັບໝູ່ເພື່ອນ, ທ່ານສີຈິ້ນຜິງເວົ້າໜ້ອຍ, ມັກຈະຕັ້ງໃຈຮັບຟັງການໂອ້ລົມກັນຂອງຄົນທັງຫຼາຍດ້ວຍໃບໜ້າຍີ້ມແຍ້ມສະເໝີ, ບາງເທື່ອ ທ່ານກໍຈະຕັ້ງຄຳຖາມຫຼືປະກອບຄວາມຄິດເຫັນໂດຍແນ່ໃສ່ບັນຫາໃດໜຶ່ງ. ແຕ່ວ່າ ບໍ່ວ່າໝູ່ເພື່ອນທັງຫຼາຍຈະປະກອບຄຳເຫັນຫຍັງກໍຕາມ, ທ່ານກໍຈະຕັ້ງໃຈຮັບຟັງໃຫ້ເຂົາເຈົ້າເວົ້າຈົນຈົບໂດຍບໍ່ໄປຕັດຄວາມຕັດຈັງຫວະຂອງຜູ້ອື່ນຕາມໃຈຕົນເອງ.
ທ່ານສີຈິ້ນຜິງຊ່າງນຳໃຊ້ໂອກາດຕ່າງໆເພື່ອຮັບເອົາສິ່ງໃໝ່ໆ, ຮັບຮູ້ການປ່ຽນແປງທຸກຢ່າງຂອງຈີນກໍຄືຂອງໂລກ, ໂດຍສະເພາະແມ່ນເອົາໃຈໃສ່ທ່າອ່ຽງໃໝ່ຂອງ ການພັດທະນາດ້ານເສດຖະກິດແລະວິທະຍາສາດເຕັກໂນໂລຊີ. ຈິດໃຈຕິດແທດຕົວຈິງ ແລະສາຍຕາທີ່ມີຍຸທະສາດເບິ່ງກວ້າງມອງໄກຂອງທ່ານໄດ້ມີສ່ວນເສີມສ້າງຄວາມສາມາດທີ່ບໍ່ທຳມະດາ. ໃນເວລານັ້ນ, ທ່ານເປັນພຽງແຕ່ເລຂາຄະນະພັກເມືອງເທົ່ານັ້ນ, ແຕ່ວ່າສາຍຕາຂອງທ່ານບໍ່ໄດ້ສຸມໃສ່ແຕ່ເລື່ອງໃຫຍ່ເລື່ອງນ້ອຍຂອງເມືອງເທົ່ານັ້ນ, ແຕ່ໄດ້ກຳນົດເອົາເມືອງເຈີ້ງຕິ້ງເປັນຈຸດທົດລອງແຫ່ງໜຶ່ງຂອງຊົນນະບົດຈີນເພື່ອນຳເອົາແນວຄວາມຄິດໃນໃຈຂອງຕົນໄປຈັດຕັ້ງປະຕິບັດໃຫ້ເປັນຮູບປະທຳເພື່ອໃຫ້ໄດ້ຮັບປະສິດທິຜົນຕົວຈິງ.
ຈາກເລຂາຄະນະພັກເມືອງເຈີ້ງຕິ້ງຮອດ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ,ປະທານປະເທດຈີນ, ຫຼາຍສິບປີຜ່ານມາ, ທ່ານສີຈິ້ນຜິງໄດ້ຍຶດໝັ້ນອຸດດົມການແຕ່ຫົວທີຢ່າງສະເໝີຕົ້ນສະເໝີປາຍ. ຄວາມຈິງໃຈ, ຄວາມຕິດແທດຕົວຈິງ, ລຽບງ່າຍ ຂອງທ່ານ, ຈິດໃຈຮັບໃຊ້ປະຊາຊົນຢ່າງສຸດໃຈຂອງທ່ານ, ຈິດໃຈບຸກເບີກສູ້ຊົນເພື່ອຄວາມກ້າວໜ້າ, ຄວາມອົງອາດກ້າຫານໃນການປະຕິຮູບ, ມົນສະເໜ່ດ້ານບຸກຄະລິກທີ່ໃຫ້ຄວາມສຳຄັນແກ່ຄວາມຮັກແພງລະຫວ່າງຄົນກັບຄົນ, ແລວຄວາມຄິດການເຮັດວຽກຕາມຫຼັກວິທະຍາສາດ, ທັກສະການນຳພາທີ່ຍອດຢ້ຽມຂອງທ່ານສີຈິ້ນຜິງ ທັງໝົດນີ້ລ້ວນແຕ່ໄດ້ຝັງເລິກໃນຈິດໃຈຂອງພະນັກງານແລະປະຊາຊົນທົ່ວເມືອງເຈີ້ງຕິ້ງ. ຄວາມຮັກແພງຢ່າງດູດດື່ມຕໍ່ເມືອງເຈີ້ງຕິ້ງທີ່ບໍ່ສາມາດຕັດຂາດຈາກທ່ານສີຈິ້ນຜິງ ບໍ່ພຽງແຕ່ເປັນຄວາມສະໜິດສະໜົມຮັກແພງກັນແບບສະຫາຍ, ແບບເພື່ອນນັກຮົບເທົ່ານັ້ນ ຍິ່ງເປັນຄວາມຮັກແພງຢ່າງເລິກເຊິ່ງໃນຂວັ້ນໃຈທີ່ມີຕໍ່ພໍ່ແມ່ປະຊາຊົນ.
ທ່ານສີຈິ້ນຜິງເວົ້າວ່າ: ຂ້າພະເຈົ້າເຫັນວ່າ ຕົນເອງເປັນຄົນທີ່ມີຄວາມຫ້າວຫັນພະຍາຍາມພໍສົມຄວນ, ເປັນຄົນທີ່ສາມາດເຕືອນໃຈຕົນເອງ,ເຂັ້ມງວດຕໍ່ຕົນເອງ, ພະຍາຍາມສູ້ຊົນໃນການປະຕິບັດຕົວຈິງເພື່ອບັນລຸເປົ້າໝາຍທີ່ຕັ້ງໄວ້ແລະຈົນມາເຖິງປັດຈຸບັນ ຂ້າພະເຈົ້າກໍໄດ້ສືບຕໍ່ຍຶດໝັ້ນໃນຫຼັກການນີ້ດ້ວຍຄວາມໝຸ້ງໝັ້ນຄືເກົ່າ. ຂ້າພະເຈົ້າຫວັງວ່າ ຕົນເອງຈະສາມາດຍຶດໝັ້ນເຮັດແບບນີ້ຕະຫຼອດຊີວິດເພື່ອສຳເລັດເປົ້າໝາຍຊີວິດທີ່ໄດ້ຕັ້ງໄວ້. ສ່ວນເປົ້າໝາຍນີ້ຂ້າພະເຈົ້າເຫັນວ່າມັນບໍ່ຫຼາຍດອກ, ພຽງແຕ່ເລື່ອງດຽວເທົ່ານັ້ນ, ຄື ເຮັດສິ່ງທີ່ເປັນຜົນປະໂຫຍດແກ່ປະຊາຊົນໃຫ້ຫຼາຍກວ່າເກົ່າ.
ຄຳເຫັນ
0