ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 20 ທັນວາ ປີ 2019,ພໍດີແມ່ນວັນສະຫຼີມສະຫຼອງມາກາວກັບຄືນສູ່ປະເທດຊາດຄົບຮອບ 20 ປີ. ເນື່ອງໃນໂອກາດທີ່ໜ້າປະຕິຊົມຊື່ນນີ້, ເດັກນ້ອຍ ແລະ ຜູ້ເຖົ້າບຳນານກຸ່ມໜຶ່ງໄດ້ຮັບຈົດໝາຍຕອບຄືນຈາກທ່ານສີຈິ້ນຜິງ ປະທານປະເທດຈີນ. ຄວາມເວົ້າທີ່ຈິງໃຈໃນຈົດໝາຍໄດ້ສະແດງໃຫ້ເຫັນເຖິງຄວາມເອົາໃຈໃສ່ຂອງທ່ານສີຈິ້ນຜິງຕໍ່ປະຊາຊົນມາກາວ. ແຕ່ລະເທື່ອທ່ານສີຈິ້ນຜິງໄດ້ເດີນທາງໄປສຳຫຼວດກວດເບິ່ງວຽກງານຢູ່ມາກາວ, ທ່ານສີຈິ້ນຜິງຈະຍາດເວລາລົງຮາກຖານໃນວຽກງານທາງການຈຳນວນຫຼາຍ, ເພື່ອໄປພົບປະໂອ້ລົມ ແລະ ຖາມເຖິງທຸກສຸກກ່ຽວກັບຊີວິດປະຈຳວັນຂອງປະຊາຊົນທົ່ວໄປ, ນັ່ງສົນທະນາກັບນັກຮຽນນັກສຶກສາ, ແລກປ່ຽນຄວາມຄິດເຫັນແບບເຊິ່ງໜ້າກັບກຳມະກອນ ແລະ ນັກທຸລະກິດ, ເພື່ອຮັບຮູ້ຄວາມທຸກຄວາມສຸກຂອງປະຊາຊົນມາກາວ, ເຊິ່ງມີເລື່ອງລາວທີ່ໜ້າປະທັບໃຈ ແລະ ອົບອຸ່ນຢ່າງຫຼວງຫຼາຍ.
ປີ 2009, ເພງ “ເພງລູກ 7ຄົນ”ໄດ້ສ້າງຄວາມຕື້ນຕັນໃຈໃຫ້ແກ່ລູກຫຼານເຊື້ອຊາດຈີນ ແລະໄດ້ກາຍເປັນເພງ ຫຼັກໃນໂອກາດຄຳນັບຮັບຕ້ອນມາກາວກັບຄືນສູ່ປະເທດຊາດ. ຫຼັງຈາກນັ້ນອີກ 20 ປີ ຄືປີ 2019, ນັກຮຽນຂອງໂຮງຮຽນປະຖົມຢິ່ງໄຊທີ່ຂຶ້ນກັບໂຮງຮຽນມັດທະຍົມຫາວຈ່ຽງມາກາວໄດ້ສົ່ງຈົດໝາຍໄປເຖິງທ່ານປະທານສີຈິ້ນຜິງ, ໂດຍໄດ້ເລົ່າເຖິງຄວາມເຂົ້າໃຈຂອງຕົນເອງກ່ຽວກັບຄວາມໝາຍຂອງຄຳວ່າ “ປະເທດຊາດ”, ໃນຈົດໝາຍທີ່ຕອບຄືນນັ້ນ, ທ່ານສີຈິ້ນຜິງໄດ້ຍົກເອົາ “ເພງ ລູກ 7ຄົນ” ຂຶ້ນມາກ່າວວ່າ, “ໃນເພງໄດ້ສະທ້ອນໃຫ້ເຫັນເຖິງຄວາມມຸ່ງມາດປາຖະໜາອັນແຮງກ້າຂອງລູກພະເນຈອນທີ່ຢາກກັບຄືນສູ່ອ້ອມກອດຂອງມານດາ,ເມື່ອຟັງແລ້ວຮູ້ສຶກຕື້ນຕັນໃຈຫຼາຍ. ນັບແຕ່ມາກາວກັບຄືນສູ່ປະເທດຊາດເປັນເວລາ 20 ປີຜ່ານມາ, ມາກາວໄດ້ຮັບການພັດທະນາຢ່າງວ່ອງໄວໃນແຕ່ລະວັນ ແຕ່ລະເດືອນ, ພີ່ນ້ອງຮ່ວມຊາດມາກາວມີວຽກເຮັດງານທຳ ແລະ ຊີວິດການເປັນຢູ່ກໍນັບມື້ນັບດີຂຶ້ນ. ປະເທດຊາດເປັນກຳລັງໜູນຫຼັງທີ່ເຂັ້ມແຂງໃຫ້ມາກາວ. ພວກຫຼານເຂົ້າໃຈເລື່ອງນີ້ຕັ້ງແຕ່ນ້ອຍເນາະ, ຂ້າພະເຈົ້າຮູ້ສຶກຊຶ້ງໃຈຫຼາຍ.”
ຈົດໝາຍທີ່ຕອບຄືນພວກເດັກນ້ອຍນັ້ນຖືເປັນພຽງແຕ່ຕົວຢ່າງໜຶ່ງເທົ່ານັ້ນທີ່ທ່ານສີຈິ້ນຜິງເອົາໃຈໃສ່ຊີວິດການເປັນຢູ່ຂອງປະຊາຊົນມາກາວ. ໃນ 10 ປີຜ່ານມາ, ທ່ານສີຈິ້ນຜິງເຄີຍໄປມາກາວ 2 ເທື່ອ, ຄວາມຜາສຸກຂອງປະຊາຊົນມາກາວ, ການພັດທະນາເສດຖະກິດສັງຄົມຂອງມາກາວແບບຍືນຍົງ, ລ້ວນແຕ່ເປັນເລື່ອງທີ່ທ່ານສີຈິ້ນຜິງໄດ້ເອົາໃຈໃສ່ຢູ່ສະເໝີ.
ຄອບຄົວຂອງນາງຖັນອີ້ເອີ
ທ່ານສີຈິ້ນຜິງ: ສະບາຍດີ, ນີ້ແມ່ນລູກສາວຂອງເຈົ້າໝົດບໍ?
ປະຊາຊົນ: ໂດຍ 3 ຄົນແມ່ນ ລູກສາວຂ້າພະເຈົ້າໝົດ
ທ່ານສີຈິ້ນຜິງ: ດີຫຼາຍ,ໄດ້ລູກສາວ 3 ຄົນປານວ່າໄດ້ດອກໄມ້ຄຳ 3 ດອກ.
ປີ2014, ທ່ານສີຈິ້ນຜິງໄປຢ້ຽມຢາມຄອບຄົວຂອງນາງຖັນອີ້ເອີ
ປີ 2014 ແມ່ນປີທີ່ມາກາວກັບຄືນສູ່ປະເທດຊາດຄົບຮອບ 15 ປີ, ທ່ານປະທານສີຈິ້ນຜິງໄດ້ເດີນທາງໄປເຖິງເຮືອນສາທາລະນະຊືພາຍວ່ານທີ່ເປັນໂຄງການເຮືອນນະໂຍບາຍຂະໜາດໃຫຍ່ທີ່ສຸດຢູ່ມາກາວ, ເພື່ອຢື້ຢາມຖາມຂ່າວປະຊາຊົນສາມັນຢູ່ມາກາວ, ຮັບຮູ້ສະພາບການເຮັດວຽກ ແລະ ການດຳລົງຊີວິດຂອງເຂົາເຈົ້າ. ເມື່ອທ່ານຮູ້ວ່າຄອບຄົວຂອງນາງຖັນອີ້ເອີໄດ້ຍ້າຍເຂົ້າໄປຢູ່ເຮືອນໃໝ່ເປັນເວລາ 8 ເດືອນປາຍແລ້ວ, ທ່ານປະທານສີຈິ້ນຜິງກ່າວວ່າ,ເມື່ອເຫັນຄອບຄົວນີ້ຢູ່ຮ່ວມກັນດ້ວຍຄວາມປອງດອງ ແລະ ສາມັກຄີກັນແບບນີ້, ຄິດວ່າຂໍພຽງແຕ່ທຸກຄົນໃນຄອບຄົວພ້ອມພຽງຮຽງໜ້າກັນ, ໂດຍສະເພາະແມ່ນເມື່ອມີຄວາມມຸ່ງຫວັງ ແນ່ນອນກໍຕ້ອງມີອະນາຄົດທີ່ດີກວ່າເກົ່າແນ່ນອນ.
ທ່ານສີຈິ້ນຜິງໄດ້ປຽບທຽບການຢ້ຽມຢາມຄັ້ງນັ້ນວ່າເປັນ “ການເປີດປ່ອງຢ້ຽມປ່ອງໜຶ່ງ”. ທ່ານກ່າວວ່າ:ເຖິງວ່າຂ້າພະເຈົ້າບໍ່ໄດ້ນັ່ງລົມດົນຢູ່ເຮືອນຂອງເຂົາເຈົ້າ, ແຕ່ກໍເໝືອນກັບວ່າໄດ້ເປີດປ່ອງຢ້ຽມປ່ອງໜຶ່ງຢູ່ມາກາວ, ເຮັດໃຫ້ຂ້າພະເຈົ້າໄດ້ເຫັນເຖິງສະພາບອັນອົບອຸ່ນທີ່ປະຊາຊົນມາກາວຢູ່ເຢັນເປັນສຸກ. ໃນອີກດ້ານໜຶ່ງກໍສະແດງໃຫ້ເຫັນວ່າ ຢູ່ມາກາວເສດຖະກິດໄດ້ຮັບການພັດທະນາ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງໃຫ້ດີຂຶ້ນ, ສັງຄົມມີຄວາມສະຫງົບ, ເຮັດໃຫ້ຄົນຮູ້ສຶກໄດ້ເຖິງບັນຍາກາດແຫ່ງຄວາມປອງດອງຢູ່ມາກາວ ເຊິ່ງເປັນເມືອງນ້ອຍທີ່ມີຫຼາຍເລື່ອງລາວທີ່ ເຕັມໄປດ້ວຍຄວາມເບີກບານມ່ວນຊື່ນ”.
ປີ 2014,ທ່ານສີຈິ້ນຜິງໄປຢ້ຽມຢາມຄອບຄົວຂອງທ່ານລຽງຈື້ຮວາ
ກໍແມ່ນຢູ່ໃນໄລຍະດຽວກັນຂອງການເດີນທາງໄປຢ້ຽມຢາມມາກາວເມື່ອປີ 2014 ເຊັ່ນກັນ, ທ່ານສີຈິ້ນຜິງໄດ້ເຂົ້າໄປໃນເຮືອນຂອງລຽງຈື້ຮວາທີ່ເປັນກຳມະກອນຕາມທ່າກຳປັ່ນ, ທ່ານສີຈິ້ນຜິງໄດ້ຊີ້ໃສ່ໂຖດອກໄມ້ ແລະ ພາຊະນະໃສ່ອາຫານທີ່ຜະລິດຢູ່ເມືອງຈິງເຕີເຈີ້ນ ໂດຍກ່າວວ່າ:ລຽງເອີ້ຍ, ຂ້ອຍຂໍມອບເຄື່ອງທີ່ລະນຶກໃຫ້ເຈົ້າ, ອວຍພອນໃຫ້ເຈົ້າ ແລະ ຄອບຄົວມີຄວາມສຸກ, ມີຊີວິດການເປັນຢູ່ທີ່ນັບມື້ນັບດີຂຶ້ນ, ຂໍໃຫ້ລູກຂອງເຈົ້າເຕີບໃຫຍ່ຂຶ້ນ ແລະ ມີສຸຂະພາບແຂງແຮງ, ກາຍເປັນຜູ້ມີຄວາມຮູ້ຄວາມສາມາດໂດຍໄວ, ເພື່ອແບກຫາບໜ້າທີ່ຮັບຜິດຊອບຂອງຄອບຄົວເຊັ່ນກັນ.
ໃນການສົນທະນາກັນ, ທ່ານສີຈິ້ນຜິງໄດ້ຮູ້ວ່າ ລຽງຈື້ຮວາຍ້າຍຈາກເມືອງໄທສ່ານແຂວງກວາງຕຸ້ງໄດ້ມາເຮັດວຽກ ແລະຕັ້ງພູມລຳເນົາຢູ່ມາກາວ, ທ່ານສີຈິ້ນຜິງຮູ້ສຶກດີໃຈຫຼາຍ ແລະເວົ້າວ່າ, ຄຽງຄູ່ກັບການສ້າງສາເຂດສາມຫຼ່ຽມປາກແມ່ນໍ້າຈູ່ຈ່ຽງໃຫ້ເປັນອັນໜຶ່ງອັນດຽວກັນ, ການໄປມາຫາສູ່ກັນລະຫວ່າງສອງແຫ່ງນີ້ຈະນັບມື້ນັບສະດວກສະບາຍຂຶ້ນ.
ວັນທີ 23 ຕຸລາປີ 2018,ທ່ານສີຈິ້ນຜິງກ່າວໃນພິທີເປີດນຳໃຊ້ຂົວໃຫຍ່ຮົງກົງ-ຈູ່ໄຫ-ມາກາວ
ປະຈຸບັນ, ຂົວໃຫຍ່ທີ່ເຊື່ອມຈອດຮົງກົງ-ຈູ່ໄຫ-ມາກາວໄດ້ເປີດນຳໃຊ້ຢ່າງເປັນທາງການແລ້ວໃນເດືອນຕຸລາປີ 2018, ທ່ານສີຈິ້ນຜິງໄດ້ເຂົ້າຮ່ວມພິທີເປີດນຳໃຊ້ ແລະກ່າວວ່າ:ການເປີດນຳໃຊ້ຂົວໃຫຍ່ແຫ່ງນີ້ມີຄວາມໝາຍສຳຄັນຢ່າງຍິ່ງ. ເພາະມັນເປັນເຄື່ອງມືສຳຄັນຂອງຊາດ, ເປັນໂຄງການລະດັບໂລກຂອງປະເທດໃຫຍ່; ອີກຢ່າງໜຶ່ງ, ຢູ່ເຂດອ່າວໃຫຍ່ກວາງຕຸ້ງ-ຮົງກົງ-ມາກາວຈະສ້າງກຸ່ມຕົວເມືອງລະດັບໂລກ; ມັນທັງເປັນຂົວໃຫຍ່ທີ່ເຊື່ອມຕໍ່ 3 ທ້ອງຖິ່ນ ພາຍໃນຂອບ “ປະເທດດຽວ ສອງລະບອບ”, ສະນັ້ນມັນມີຄວາມໝາຍຫຼາຍດ້ານ, ມີຄວາມສຳຄັນຢ່າງຍິ່ງ. ມື້ນີ້ຂ້າພະເຈົ້າມາຢືນຢູ່ນະທີ່ນີ້ກໍພໍດີກັບຈຸດເວລາທີ່ພວກເຮົາເຮັດໃຫ້ຄວາມໃຝ່ຝັນເປັນຈິງ.
ສູນອີຈຸ້ນຂອງສະມາຄົມຊຸມຊົນມາກາວສ້າງຕັ້ງຂຶ້ນໃນປີ 2007, ເປັນອົງການບໍລິການສະເພາະສຳລັບຜູ້ເຖົ້າ. ເດືອນມັງກອນປີ 2009, ທ່ານສີຈິ້ນຜິງໃນຖານະເປັນຮອງປະທານປະເທດໃນເວລານັ້ນ, ເຄີຍໄດ້ໄປຢ້ຽມຢາມພວກຜູ້ເຖົ້າຢູ່ສູນດັ່ງກ່າວ. ເມື່ອບຸນໄຫວ້ພະຈັນປີ 2019, ຜູ້ເຖົ້າ 30 ຄົນຂອງໜ່ວຍອາສາສະໝັກເບິ່ງແຍງຜູ້ເຖົ້າຂອງສູນອີຈຸ້ນໄດ້ຂຽນຈົດໝາຍສົ່ງເຖິງທ່ານປະທານສີຈິ້ນຜິງ, ໂດຍກ່າວເຖິງການປ່ຽນແປງ ແລະ ການພັດທະນາຢູ່ມາກາວຫຼັງຈາກກັບຄືນສູ່ປະເທດຊາດ, ທັງສະແດງຄວາມພາກພູມໃຈໃນຖານະເປັນຊາວຈີນ ແລະ ສະແດງຄວາມຕັດສິນໃຈທີ່ຈະສືບທອດຈິດໃຈຮັກຊາດ ແລະ ຮັກມາກາວ. ເນື່ອງໃນໂອກາດທີ່ບຸນຊົງຢາງທີ່ເປັນບຸນປະເພນີເຄົາລົບຜູ້ເຖົ້າຂອງຈີນໄດ້ໝູນວຽນມາເຖິງ, ທ່ານສີຈິ້ນຜິງໄດ້ຕອບຈົດໝາຍໃຫ້ແກ່ພວກຜູ້ເຖົ້າເຫຼົ່ານັ້ນ, ໂດຍໄດ້ອວຍພອນໃຫ້ພວກເພິ່ນ ແລະ ຜູ້ເຖົ້າທົ່ວປະເທດຈົ່ງມີສຸຂະພາບເຂັ້ມແຂງອາຍຸຍືນຍາວ ແລະ ຊີວິດມີຄວາມຜາສຸກ.
ໃນການຕອບຈົດໝາຍຕໍ່ພວກຜູ້ເຖົ້າ, ທ່ານສີຈິ້ນຜິງກ່າວວ່າ, ໃນຖານະເປັນຜູ້ທີ່ເກີດໃນໄລຍະດຽວກັນກັບສປຈີນສະຖາປະນາຂຶ້ນ, ບັນດາທ່ານໄດ້ເປັນສັກຂີພິຍານໃຫ້ແກ່ການປ່ຽນແປງແບບໜ້າມືເປັນຫຼັງມືຂອງປະເທດຊາດໃນຫຼາຍສິບປີຜ່ານມາ, ທັງເປັນສັກຂີພິຍານໃຫ້ແກ່ພຶດຕິກຳທີ່ສຳເລັດຜົນຂອງ “ປະເທດດຽວ ສອງລະບອບ”ຢູ່ມາກາວ. ຫວັງວ່າບັນດາທ່ານຈະສືບຕໍ່ຍຶດໝັ້ນໃນການສ້າງຜົນງານໃນໄວຊະລາ, ສືບຕໍ່ເສີມຂະຫຍາຍບົດບາດຂອງຕົນ, ເລົ່າເລື່ອງຂອງມາກາວກ່ອນການກັບຄືນ ແລະ ຫຼັງການກັບຄືນສູ່ປະເທດຊາດໃຫ້ແກ່ຊາວໜຸ່ມຟັງ, ສົ່ງເສີມໃຫ້ເຂົາເຈົ້າສືບທອດຈິດໃຈຮັກຊາດ ແລະ ຮັກມາກາວໃຫ້ດີ, ຕັ້ງໜ້າເຂົ້າຮ່ວມການສ້າງສາເຂດອ່າວໃຫຍ່ກວາງຕຸ້ງ-ຮົງກົງ-ມາກາວ, ຮ່ວມມືກັນສ້າງມາກາວໃຫ້ຈະເລີນຮຸ່ງເຮືອງ ແລະ ສວຍງາມກວ່າເກົ່າ.
ຄຳເຫັນ
0