ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 20 ທັນວາ ປີ 2019, ແມ່ນວັນລະນຶກທີ່ມາກາວກັບຄືນສູ່ປະເທດຊາດຄົບຮອບ 20 ປີ. ຕະຫຼອດໄລຍະ 20 ປີຜ່ານມາ, ທ່ານສີຈິ້ນຜິງໄດ້ເອົາໃຈໃສ່ຕໍ່ຄວາມຢູ່ເຢັນເປັນສຸກຂອງປະຊາຊົນມາກາວ, ຄວາມໝັ້ນຄົງ ແລະຄວາມຈະເລີນຮຸ່ງເຮືອງຂອງມາກາວຕະຫຼອດມາ. ບາດກ້າວເດີນທີ່ໜັກແໜ້ນ, ຄວາມເວົ້າທີ່ອົບອຸ່ນທຸກແຫ່ງຫົນທີ່ທ່ານເດີນທາງໄປເຖິງ, ໄດ້ສ່ອງແສງເຖິງຄວາມຜູກພັນທີ່ໜ້າປະທັບໃຈລະຫວ່າງທ່ານສີຈິ້ນຜິງ ກັບປະຊາຊົນມາກາວ.
ວັນທີ 10 ມັງກອນປີ 2009, ທ່ານສີຈິ້ນຜິງກ່າວຄຳປາໄສຢູ່ສະໜາມຫຼວງດ່ານກົງເປີຍ
“ຂ້າພະເຈົ້າມາ ມາກາວເທື່ອນີ້, ຈິດໃຈກໍແມ່ນເພື່ອມາຢ້ຽມຢາມຖາມຂ່າວພີ່ນ້ອງຮ່ວມຊາດມາກາວ, ມາໃຫ້ກຳລັງໃຈແກ່ບັນດາພີ່ນ້ອງຮ່ວມຊາດໃຫ້ຮ່ວມແຮງຮ່ວມໃຈກັນເພື່ອຮັບມືກັບວິກິດການທາງດ້ານການເງິນສາກົນ!”
ຕອນເຊົ້າວັນທີ 10 ມັງກອນ ປີ 2009, ຢູ່ຕາມສະໜາມຫຼວງດ່ານກົງເປີຍ, ທ່ານສີຈິ້ນຜິງໄດ້ສະແດງຄວາມຢື້ຢາມຖາມຂ່າວຕໍ່ປະຊາຊົນທີ່ເຕົ້າໂຮມກັນຢູ່ທີ່ນັ້ນ. ໃນເວລານັ້ນ, ວິກິດການທາງດ້ານການເງິນໄດ້ສ້າງຜົນກະທົບຢ່າງຮຸນແຮງ, ດັ່ງນັ້ນ, ການເດີນທາງໄປຢ້ຽມຢາມມາກາວຂອງທ່ານສີຈິ້ນຜິງໃນຖານະເປັນຮອງປະທານປະເທດຈີນທີ່ຮັບຜິດຊອບວຽກງານຮົງກົງ ແລະ ມາກາວໃນເວລານັ້ນໄດ້ເຮັດໃຫ້ຝ່າຍຕ່າງໆໃຫ້ຄວາມສົນໃຈໃນລະດັບສູງ. ໃນເວລາໃຫ້ສຳພາດຕໍ່ສື່ມວນຊົນຈີນ ແລະ ຕ່າງປະເທດ, ທ່ານສີຈິ້ນຜິງໄດ້ບອກເຖິງຄວາມເປັນຫ່ວງເປັນໃຍ ແລະ ຄວາມເອົາໃຈໃສ່ໂດຍກົງໂລດວ່າ:
“ຂ້າພະເຈົ້າຈະໃຊ້ເວລາທີ່ມີຈຳກັດໃນໂອກາດທີ່ມາຢ້ຽມຢາມມາກາວເພື່ອໄປຍ່າງ ແລະ ເລາະເບິ່ງຫຼາຍບ່ອນ, ເພື່ອຊອກຮູ້ສະພາບຄວາມເປັນຈິງ ແລະ ສ້າງສາຍສຳພັນກັບປະຊາຊົນໃຫ້ຫຼາຍແດ່, ຕ່າງສຳຜັດກັບການປ່ຽນແປງທີ່ເລິກເຊິ່ງຕັ້ງແຕ່ມາກາວກັບຄືນສູ່ປະເທດຊາດ, ແລະ ຮັບຮູ້ສະພາບການພັດທະນາເສດຖະກິດ ແລະ ຊີວິດການເປັນຢູ່ຂອງປະຊາຊົນມາກາວໃນປະຈຸບັນ.”
ໃນຄວາມເປັນຈິງແລ້ວ, ນີ້ບໍ່ແມ່ນຄັ້ງທຳອິດທີ່ທ່ານສີຈິ້ນຜິງໄປຢ້ຽມຢາມມາກາວ. ໃນປີທີ 2 ທີ່ມາກາວຫາກໍກັບຄືນສູ່ປະເທດຊາດ, ທ່ານສີຈິ້ນຜິງທີ່ເປັນເຈົ້າແຂວງແຂວງຟູຈ້ຽນໃນຂະນະນັ້ນກໍເຄີຍໄດ້ໄປຢ້ຽມຢາມມາກາວມາແລ້ວ. ໃນເວລານັ້ນ, ທ່ານສີຈິ້ນຜິງເຄີຍກ່າວປາຖະກະຖາໂດຍເວົ້າເຖິງແຜນການກ່ຽວກັບການເພີ່ມທະວີການຮ່ວມມືດ້ານເສດຖະກິດການຄ້າລະຫວ່າງແຂວງຟູຈ້ຽນ ກັບມາກາວ; ຫຼັງຈາກນັ້ນ 1 ປີ, ທ່ານສີຈິ້ນຜິງໄດ້ນຳພາຄະນະຜູ້ແທນໄປຢ້ຽມຢາມມາກາວອີກເທື່ອໜຶ່ງ, ແລະໄດ້ບັນລຸຄວາມເຫັນເປັນເອກະພາບກັນກັບອົງການປົກຄອງເຂດບໍລິຫານພິເສດມາກາວກ່ຽວກັບການເພີ່ມທະວີການພົວພັນລະຫວ່າງແຂວງຟູຈ້ຽນກັບມາກາວ, ເພື່ອຊຸກຍູ້ການແລກປ່ຽນ ແລະການຮ່ວມມືດ້ານເສດຖະກິດການຄ້າ, ການທ່ອງທ່ຽວ ການສຶກສາ ແລະ ວັດທະນະທຳເປັນຕົ້ນ.
ປີ 2009, ພໍດີແມ່ນປີທີ່ມາກາວກັບຄືນສູ່ປະເທດຊາດຄົບຮອບ 10 ປີ. ໂດຍຜະເຊີນກັບວິກິດການທາງດ້ານການເງິນທີ່ຂະຫຍາຍວົງກວ້າງອອກ ແລະ ຮຸນແຮງຂຶ້ນ, ລັດຖະບານຈີນໄດ້ໃຊ້ 9 ມາດຕະການເພື່ອສະໜັບສະໜູນມາກາວໃນການແກ້ໄຂບັນຫາຫຍຸ້ງຍາກລຳບາກນີ້. ການສ້າງເຂດນິຄົມອຸດສາຫະກຳຈູ່ໄຫ-ມາກາວ, ກໍເປັນມາດຕະການສຳຄັນຂອງລັດຖະບານຈີນເພື່ອສະໜັບສະໜູນການພັດທະນາອຸດສາຫະກຳ ແລະ ການພັດທະນາເສດຖະກິດທີ່ມີຄວາມຫຼາກຫຼາຍຕາມຄວາມເໝາະສົມຂອງມາກາວ, ທັງແມ່ນມາດຕະການທີ່ປະດິດສ້າງໃໝ່ພາຍໃຕ້ແນວທາງ “ປະເທດດຽວ ສອງລະບອບ”. ໃນການໄປຢ້ຽມຢາມເມື່ອປີ 2009, ທ່ານສີຈິ້ນຜິງໄດ້ລົງສຳຫຼວດຕົວຈິງຢູ່ເຂດນິຄົມອຸດສາຫະກຳຈູ່ໄຫ-ມາກາວ, ທ່ານໄດ້ໃຫ້ທິດຊີ້ນຳວ່າຕ້ອງພັດທະນາເຂດນິຄົມອຸດສາຫະກຳດັ່ງກ່າວໃຫ້ດີ, ເພື່ອຮັບມືກັບຜົນກະທົບຈາກວິກິດການທາງດ້ານການເງິນສາກົນຢ່າງເຂັ້ມແຂງ ແລະ ເພີ່ມ ການປະກອບອາຊີບໃຫ້ປະຊາຊົນມາກາວ. ເຂດບໍລິຫານພິເສດມາກາວຄວນເດີນຕາມທິດທາງພັດທະນາເສດຖະກິດທີ່ມີຄວາມຫຼາກຫຼາຍໃນລະດັບເໝາະສົມຢ່າງເດັດດ່ຽວໜຽວແໜ້ນ.
ການພັດທະນາເກາະເຮີງຊິນຂອງນະຄອນຈູ່ໄຫມີການພົວພັນຢ່າງໃກ້ຊິດກັບມາກາວ, ແລະໄດ້ຮັບຄວາມສົນໃຈຢ່າງກວ້າງຂວາງຈາກວົງການຕ່າງໆຂອງມາກາວ. ໃນການຢ້ຽມຢາມເມື່ອປີ 2009 ຄັ້ງນັ້ນ, ທ່ານສີຈິ້ນຜິງໄດ້ປະກາດຂ່າວດີວ່າ: ລັດຖະບານຈີນໄດ້ຕົກລົງເຫັນດີພັດທະນາເກາະເຮີງຊິນ, ແລະໃນຂະບວນການພັດທະນາ,ລັດຖະບານຈີນຈະພິຈາລະນາຢ່າງເຕັມທີເຖິງຄວາມຮຽກຮ້ອງຕ້ອງການຂອງມາກາວໃນການພັດທະນາເສດຖະກິດທີ່ມີຄວາມຫຼາກຫຼາຍໃນລະດັບເໝາະສົມ. ທ່ານຊີ້ອອກວ່າ, ນີ້ຈະເປັນການສ້າງໂອກາດອັນໃໝ່ ແລະ ຊ່ອງທາງອັນໃໝ່ໃຫ້ແກ່ການພັດທະນາມາກາວ, ມີຜົນດີຕໍ່ຄວາມໝັ້ນຄົງ ການພັດທະນາ ແລະ ຄວາມຈະເລີນຮຸ່ງເຮືອງໃນໄລຍະຍາວຂອງເສດຖະກິດມາກາວ. ແລະກໍແມ່ນປີ 2009ນີ້ເອງ, ເຂດໃໝ່ເຮີງຊິນກໍໄດ້ກາຍເປັນເຂດໃໝ່ລະດັບຊາດແຫ່ງທີ 3 ໂດຍຖັດຈາກເຂດໃໝ່ພູຕົ່ງຊຽງໄຮ, ເຂດໃໝ່ປິ່ງໄຫທຽນສິນ.
ວັນທີ 10 ມັງກອນປີ 2009, ທ່ານສີຈິ້ນຜິງພົບປະກັບຜູ້ແທນວົງການຕ່າງໆຂອງມາກາວ
ໃນເວລາສະຫຼຸບການເດີນທາງໄປຢ້ຽມຢາມມາກາວໃນປີ 2009, ທ່ານສີຈິ້ນຜິງກ່າວວ່າ: ກ່ຽວກັບຄວາມໃນໃຈທີ່ໄດ້ແລກປ່ຽນກັບບຸກຄົນວົງການຕ່າງໆໃນ 2 ມື້ຜ່ານມາ, ຂ້າພະເຈົ້າຈະຂໍສະຫຼຸບເປັນ 3 ປະໂຫຍກສັ້ນ, ຄື: ມີຄວາມຫຍຸ້ງຍາກ, ມີວິທີແກ້ໄຂ, ແລະມີຄວາມຫວັງ.
“ຄວາມໝັ້ນໃຈ”, ເປັນຄຳສັບສຳຄັນທີ່ທ່ານສີຈິ້ນຜິງເວົ້າອອກມາຫຼາຍຄັ້ງໃນການໄປຢ້ຽມຢາມມາກາວໃນປີ 2009. ເຮັດແນວໃດຈະເຮັດໃຫ້ສິ່ງທ້າທາຍກາຍເປັນກາລະໂອກາດໃນການພັດທະນາຂອງມາກາວ? ທ່ານສີຈິ້ນຜິງກ່າວເນັ້ນວ່າ, ມາກາວຕ້ອງເດີນຕາມເສັ້ນທາງການພັດທະນາທີ່ມີຄວາມຫຼາກຫຼາຍໃນລະດັບທີ່ເໝາະສົມທ, ຕ້ອງບັນລຸການພັດທະນາແບບຍືນຍົງຢ່າງຮອບດ້ານ ແລະ ມີການປະສານສົມທົບກັນ, ພະຍາຍາມສູ້ຊົນສ້າງສະພາບການໃໝ່ໃນການພັດທະນາເສດຖະກິດສັງຄົມມາກາວ. ທ່ານສີຈິ້ນຜິງຮຽກຮ້ອງໃຫ້ຄະນະນຳເຂດບໍລິຫານພິເສດມາກາວຕ້ອງສືບຕໍ່ຮັກສາຄວາມໝັ້ນໃຈໃຫ້ໜັກແໜ້ນ, ກຳແໜ້ນໂອກາດການພັດທະນາໃນອະນາຄົດ. ທ່ານກ່າວວ່າ:
ອົງການປົກຄອງເຂດບໍລິຫານພິເສດມາກາວຄວນປະຕິບັດຕາມແນວຄວາມຄິດການບໍລິຫານໂດຍຖືຄົນເປັນຫຼັກ, ນຳໃຊ້ນະໂຍບາຍ ແລະມາດຕະການທຸກຢ່າງທີ່ສາມາດກະຕຸກຊຸກຍູ້ເສດຖະກິດໃຫ້ມີປະສິດທິຜົນບົນພື້ນຖານມາດຕະການເສດຖະກິດ ແລະ ນະໂຍບາຍປັບປຸງຊີວິດການເປັນຢູ່ຂອງປະຊາຊົນທີ່ມີຢູ່ໃນໄລຍະຜ່ານມາ, ຮັກສາຄວາມໝັ້ນຄົງດ້ານການທະນາຄານ, ສະໜັບສະໜູນວິສາຫະກິດ ແລະ ເພີ່ມການປະກອບອາຊີບໃຫ້ຫຼາຍຂຶ້ນ, ພະຍາຍາມສ້າງຈຸດເຕີບໂຕໃໝ່ດ້ານເສດຖະກິດ.
ທ່ານສີຈິ້ນຜິງໄປຢາມຜູ້ເຖົ້າໃນສະມາຄົມຊຸມຊົນມາກາວ
ໃນວາລະການຢ້ຽມຢາມທີ່ດຳເນີນໄປເປັນເວລາ 30 ກວ່າຊົ່ວໂມງ, ທ່ານສີຈິ້ນຜິງໄດ້ໄປຢ້ຽມຢາມໂຮງງານຕັດຫຍິບ, ເຂົ້າເບິ່ງເຮືອນຂອງຄູສອນໂຮງຮຽນລູກກຳມະກອນ,ຢ້ຽມຢາມສະໂມສອນຊາວໜຸ່ມ, ແລະສະມາຄົມຊຸມຊົນ, ທ່ານຄິດຢູ່ສະເໝີວ່າ: “ຄວນຢ້ຽມຢາມໃຫ້ຫຼາຍ, ເບິ່ງໃຫ້ຫຼາຍ ແລະຊອກຮູ້ສະພາບການໃຫ້ຫຼາຍ”. ຕອນນັ້ນປະຊາຊົນມາກາວມີຄວາມປະທັບໃຈຢ່າງເລິກເຊິ່ງ ແລະພາກັນເວົ້າວ່າ ທ່ານສີຈິ້ນຜິງເປັນຄົນທີ່ “ບໍ່ຖືໂຕ ບໍ່ອວດອົ່ງຟຸມເຟືອຍ”, ທ່ານເປັນຜູ້ນຳປະເທດ, ແຕ່ຄືກັບໝູ່ສະຫາຍເກົ່າທີ່ຮູ້ຈັກກັນມາຫຼາຍປີແລ້ວ. ທ່ານສີຈິ້ນຜິງບອກປະຊາຊົນມາກາວວ່າ: “ຂໍພຽງແຕ່ຈິດໃຈບໍ່ອ່ອນແອ ແລະ ທໍ້ຖອຍ, ກໍຈະມີວິທີແກ້ໄຂ ຫຼາຍກວ່າບັນຫາຫຍຸ້ງຍາກ. ໂດຍມີການສະໜັບສະໜູນຈາກລັດຖະບານ, ຄວາມພະຍາຍາມຂອງອົງການປົກຄອງເຂດບໍລິຫານພິເສດມາກາວ, ແລະມີການສະໜັບສະໜູນຢ່າງເຕັມອົກເຕັມໃຈຈາກວົງການຕ່າງໆໃນສັງຄົມ, ພີ່ນ້ອງຮ່ວມຊາດມາກາວຈະສາມາດຜ່ານຜ່າຄວາມຫຍຸ້ງຍາກໄດ້ຢ່າງແນ່ນອນ.”
ສື່ມາກາວເຄີຍລົງພິມບົດຄວາມວ່າ, ການຢ້ຽມຢາມມາກາວຂອງທ່ານສີຈິ້ນຜິງເມື່ອປີ 2009ເປັນການກະທຳທີ່ສະໜັບສະໜູນມາກາວຢ່າງແຂງແຮງ ແລະ ມີປະສິດທິຜົນຢ່າງແທ້ຈິງ, ເຊິ່ງເປັນຄຳອວຍພອນ, ເປັນການສ້າງຄວາມໝັ້ນໃຈ ແລະ ເປັນການໃຫ້ກຳລັງໃຈທີ່ດີທີ່ສຸດ.
ຕົວເລກສະຖິຕິໄດ້ສະແດງໃຫ້ເຫັນວ່າ ມາກາວໄດ້ບັນລຸການພັດທະນາທີ່ໄວທີ່ສຸດ ແລະ ດີທີ່ສຸດຕັ້ງແຕ່ກັບຄືນສູ່ປະເທດຊາດເປັນຕົ້ນມາ: GDP ຂອງມາກາວໄດ້ເພີ່ມຂຶ້ນຈາກ 51,9 ຕື້ປາຕາກາສະກຸນເງິນມາກາວໃນໄລຍະເບື້ອງຕົ້ນທີ່ມາກາວຫາກໍກັບຄືນສູ່ປະເທດຊາດ, ເພີ່ມຂຶ້ນເປັນ 440 ຕື້ກວ່າປາຕາກາມາກາວເມື່ອປີ 2018, ລາຍໄດ້ສະເລ່ຍຕໍ່ຫົວຄົນບັນລຸເຖິງ 83 ພັນໂດລາສະຫະລັດ, ເປັນອັນດັບ 2 ຂອງໂລກ. ປະຊາຊົນມາກາວໄດ້ປະກອບອາຊີບຢ່າງເຕັມສ່ວນ, ອັດຕາວ່າງງານໄດ້ຫຼຸດຈາກ 6,3%ຂອງໄລຍະເບື້ອງຕົ້ນທີ່ຫາກໍກັບຄືນສູ່ປະເທດຊາດ ລົງເຫຼືອ1,8%ເມື່ອປີ 2018, ຄືດັ່ງທີ່ທ່ານສີຈິ້ນຜິງເຄີຍກ່າວໄວ້ວ່າ:
ມາກາວໃນມື້ອື່ນ, ເສດຖະກິດສັງຄົມຈະມີຄວາມຈະເລີນຮຸ່ງເຮືອງ ແລະ ມີຄວາມໝັ້ນຄົງກວ່າເກົ່າ, ຊີວິດການເປັນຢູ່ຂອງປະຊາຊົນມາກາວຈະມີຄວາມຜາສຸກ ແລະ ມີຄວາມສະຫງົບຫຼາຍກວ່າເກົ່າ.
ຄຳເຫັນ
0