ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ແຕ່ວັນທີ 18 ຫາ ວັນທີ 20 ທັນວາ ປີ 2019, ທ່ານສີຈິ້ນຜິງ, ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ, ປະທານປະເທດ ທັງເປັນປະທານຄະນະກຳມະການການທະຫານສູນກາງຈີນໄດ້ເດີນທາງໄປມາກາວເພື່ອເຂົ້າຮ່ວມພິທີສະເຫຼີມສະຫຼອງມາກາວກັບຄືນສູ່ປະເທດຊາດຄົບຮອບ 20 ປີ ທັງແມ່ນພິທີຂຶ້ນຮັບຕຳແໜ່ງຂອງອົງການປົກຄອງເຂດບໍລິຫານພິເສດມາກາວຊຸດທີ 5, ທັງຢ້ຽມຢາມເຮັດວຽກຢູ່ເຂດບໍລິຫານພິເສດມາກາວ. ເມື່ອ 5 ປີກ່ອນ, ທ່ານສີຈິ້ນຜິງກໍເຄີຍໄດ້ເດີນທາງໄປມາກາວ ເພື່ອຮ່ວມກັນກັບພີ່ນ້ອງຮ່ວມຊາດມາກາວສະເຫຼີມສະຫຼອງມາກາວກັບຄືນສູ່ປະເທດຊາດເຊິ່ງແມ່ນ “ເຫດການທີ່ເປັນໜ້າປິຕິຊົມຊື່ນຂອງມາກາວ ທັງເປັນເຫດການສຳຄັນຂອງຊາດ”.
“ການສືບຕໍ່ຊຸກຍູ້ພາລະກິດ “ປະເທດດຽວ ສອງລະບອບ”, ເປັນພາລະໜ້າທີ່ຮ່ວມຂອງລັດຖະບານກາງ, ອົງການປົກຄອງເຂດບໍລິຫານພິເສດມາກາວ ແລະ ປະຊາຊົນບັນດາເຜົ່າທົ່ວປະເທດ ເຊິ່ງລວມທັງພີ່ນ້ອງຮ່ວມຊາດຮົງກົງ ແລະ ມາກາວ, ບໍ່ວ່າຈະພົບກັບຄວາມຫຍຸ້ງຍາກ ແລະ ສິ່ງທ້າທາຍປະການໃດກໍຕາມ, ພວກເຮົາມີຄວາມໝັ້ນໃຈ ແລະ ມີຄວາມຕັດສິນໃຈຕໍ່ແນວທາງ “ປະເທດດຽວ ສອງລະບອບ” ຢ່າງເດັດດ່ຽວໜຽວແໜ້ນ, ທັງມີຄວາມໝັ້ນໃຈ ແລະ ຄວາມຕັດສິນໃຈໃນການຊຸກຍູ້ພຶດຕິກຳ “ປະເທດດຽວ ສອງລະບອບ”ຢ່າງເດັດດ່ຽວໜຽວແໜ້ນເຊັ່ນກັນ.”
ວັນທີ 20 ທັນວາ ປີ 2014, ທ່ານສີຈິ້ນຜິງກ່າວຄຳປາໄສໃນພິທີສະເຫຼີມສະຫຼອງມາກາວກັບຄືນສູ່ປະເທດຊາດຄົບຮອບ 15 ປີ ທັງເປັນພິທີຂຶ້ນຮັບຕຳແໜ່ງຂອງອົງການປົກຄອງເຂດບໍລິຫານພິເສດມາກາວຊຸດທີ 4
ວັນທີ 20 ທັນວາ ປີ 2014, ພິທີສະເຫຼີມສະຫຼອງມາກາວກັບຄືນສູ່ປະເທດຊາດຄົບຮອບ 15 ປີ ທັງເປັນພິທີຂຶ້ນຮັບຕຳແໜ່ງຂອງອົງການປົກຄອງເຂດບໍລິຫານພິເສດມາກາວຊຸດທີ 4 ໄດ້ຈັດຂຶ້ນຢູ່ສະໜາມກິລາ “ອາຊີຕາເວັນອອກ”ທີ່ມາກາວ. ຄຳປາໄສຂອງທ່ານປະທານສີຈິ້ນຜິງໄດ້ຮັບສຽງຕົບມືຢ່າງສະໜັ່ນຫວັ່ນໄຫວຈາກຜູ້ເຂົ້າຮ່ວມພິທີສະເຫຼີມສະຫຼອງດັ່ງກ່າວ.
ຫຼັງຈາກກັບຄືນສູ່ປະເທດຊາດເປັນຕົ້ນມາ, ພຶດຕິກຳຕາມແນວທາງ“ປະເທດດຽວ ສອງລະບອບ” ແລະ ກົດໝາຍພື້ນຖານໄດ້ຮັບຜົນສຳເລັດຢູ່ມາກາວ,ເປັນການວາງແຜນແມ່ບົດທີ່ຖືກຕ້ອງສວຍງາມໃຫ້ແກ່ການພັດທະນາມາກາວ. ໃນເວລານັ້ນ, ມາກາວໄດ້ຜະເຊີນກັບບັນຫາທີ່ສຳຄັນ ຄື ຈະເຮັດແນວໃດເພື່ອກຳແໜ້ນໂອກາດຈາກການພັດທະນາຂອງປະເທດຊາດໃນຍຸກໃໝ່, ເພື່ອສືບຕໍ່ພັດທະນາກ້າວໄປໜ້າ.
ວັນທີ 20 ທັນວາ ປີ 2014, ທ່ານຊຸຍຊືອ່ານ ຜູ້ວ່າການເຂດບໍລິຫານພິເສດມາກາວຊຸດທີ 4 ສາບານຕົວຂຶ້ນຮັບຕຳແໜ່ງພາຍໃຕ້ການເປັນສັກຂີພິຍານຂອງທ່ານສີຈິ້ນຜິງ ປະທານປະເທດ
ໃນພິທີສະເຫຼີມສະຫຼອງມາກາວກັບຄືນສູ່ປະເທດຊາດຄົບຮອບ 15 ປີ, ທ່ານສີຈິ້ນຜິງໄດ້ສະເໜີຄວາມມຸ່ງມາດປາຖະໜາ 4 ຂໍ້, ໂດຍຮຽກຮ້ອງໃຫ້ພີ່ນ້ອງຮ່ວມຊາດມາກາວເສີມຂະຫຍາຍທ່າແຮງຂອງນະໂຍບາຍ “ປະເທດດຽວ ສອງລະບອບ” ຢ່າງເຕັມສ່ວນ, ນຳໃຊ້ໂອກາດແຫ່ງການປະຕິຮູບ ແລະການພັດທະນາຂອງປະເທດຊາດໃຫ້ໄດ້ດີ.
“ນະທີ່ນີ້, ຂ້າພະເຈົ້າຂໍສະເໜີຄວາມມຸ່ງມາດປາຖະໜາ 4 ຂໍ້ ຄື: ໜຶ່ງ,ສືບຕໍ່ ສູ້ຊົນຜ່ານຜ່າ, ຍົກສູງຄວາມສາມາດ ແລະ ລະດັບການບໍລິຫານຂອງເຂດບໍລິຫານພິເສດມາກາວຢ່າງບໍ່ຢຸດຢັ້ງ. ສອງ, ສືບຕໍ່ວາງແຜນໃຫ້ເປັນເອກະພາບກັນ, ຕັ້ງໜ້າຊຸກຍູ້ມາກາວໃຫ້ເດີນຕາມເສັ້ນທາງການພັດທະນາເສດຖະກິດທີ່ມີຄວາມຫຼາກຫຼາຍໃນລະດັບທີ່ເໝາະສົມ ແລະ ຍືນຍົງ. ສາມ, ສືບຕໍ່ສ້າງພື້ນຖານໃຫ້ໜັກແໜ້ນ, ພະຍາຍາມຊຸກຍູ້ຄວາມປອງດອງ ແລະ ຄວາມສະຫງົບຂອງສັງຄົມ. ສີ່, ສືບຕໍ່ມຸ່ງໜ້າສູ່ອະນາຄົດ, ເພີ່ມທະວີການສຶກສາອົບຮົມຊາວໜຸ່ມເຍົາວະຊົນ.”
ຊາວໜຸ່ມເຍົາວະຊົນເປັນຄວາມຫວັງຂອງມາກາວ, ກໍຄືຄວາມຫວັງຂອງປະເທດເຊັ່ນກັນ, ເຊິ່ງພົວພັນເຖິງອະນາຄົດຂອງມາກາວ ແລະ ປະເທດຊາດ. ການເດີນທາງໄປຫາວຈ່ຽງເມື່ອ 5 ປີກ່ອນ, ທ່ານສີຈິ້ນຜິງເຄີຍໄປຍ່າງສຳຫຼວດຢູ່ເຂດໃໝ່ຂອງມະຫາວິທະຍາໄລມາກາວຢູ່ເຮີງຊິນ ທີ່ເປັນໂຄງການແບບຢ່າງລະຫວ່າງແຂວງກວາງຕຸ້ງ ແລະ ມາກາວພາຍໃຕ້ຂອບ “ປະເທດດຽວ ສອງລະບອບ”. ທ່ານສີຈິ້ນຜິງໄດ້ແລກປ່ຽນທັດສະນະໃນການອ່ານປື້ມກັບພວກນັກສຶກສາ, ແລະຫວນຄືນເຖິງຕຳລາວັດທະນະທຳຈີນທີ່ຕົນເອງມັກອ່ານໃນໄວໜຸ່ມ, ທັງລົມກ່ຽວກັບຊີວິດ ແລະ ຄວາມໃຝ່ຝັນ, ແລະກ່າວເຖິງຈິດໃຈໜັກແໜ້ນ ແລະ ຄວາມເປັນຊາດຂອງຊາວຈີນ.
“ບັນດາທ່ານຜູ້ທີ່ຢູ່ມາກາວ, ຈະມີຄວາມເຂົ້າໃຈ ແລະ ມີຄວາມຮູ້ສຶກໄດ້ຢ່າງເລິກເຊິ່ງກວ່າກ່ຽວກັບ “ເພງ ລູກ 7ຄົນ”, ຈະໄດ້ຮູ້ແຈ້ງກ່ຽວກັບຄວາມໝາຍອັນໃໝ່ຂອງເພງນີ້, ແລະ ຈະຮູ້ສຶກຊາບຊຶ້ງຢູ່ສະເໝີ. ຕອນຄໍ່າມື້ວານນີ້, ຂ້າພະເຈົ້າໄດ້ຟັງພວກນັກສຶກສາຮ້ອງ “ເພງລູກ7ຄົນ” ໃນນັ້ນມີເນື້ອໃນເພງປະໂຫຍກໜຶ່ງ “ເຈົ້າສາມາດປຸ້ນເອົາຮ່າງກາຍຂອງຂ້ອຍໄປໄດ້, ແຕ່ບໍ່ສາມາດປຸ້ນເອົາຈິດໃຈຂອງຂ້ອຍໄປໄດ້.” ຈິດໃຈນີ້ກໍແມ່ນຈິດໃຈແຫ່ງຄວາມເປັນຊາດຈີນ. ສະນັ້ນໃນຖານະເປັນ ຊາວໜຸ່ມລຸ້ນໃໝ່ຂອງມາກາວ, ການເຊີດຊູຈິດໃຈລັດທິຮັກຊາດກໍຄວນໃຫ້ກາຍເປັນພື້ນຖານແຫ່ງການຄົງຕົວຂອງພວກເຮົາ.”
ວັນທີ 20 ທັນວາ ປີ 2014, ຄະນະອົງການປົກຄອງເຂດບໍລິຫານພິເສດມາກາວຊຸດທີ 5 ສາບານຕົວຂຶ້ນຮັບຕຳແໜ່ງພາຍໃຕ້ການເປັນສັກຂີພິຍານຂອງທ່ານສີຈິ້ນຜິງ ປະທານປະເທດ
28 ຊົ່ວໂມງ, 15 ກິດຈະກຳທີ່ສຳຄັນ, ທ່ານສີຈິ້ນຜິງໄດ້ພົບປະແລກປ່ຽນກັບວົງການຕ່າງໆຂອງມາກາວຢ່າງກວ້າງຂວາງ, ໂດຍຊີ້ອອກວ່າ, ການຍຶດໝັ້ນຫຼັກການ “ປະເທດດຽວ ສອງລະບອບ”ຢ່າງເດັດດ່ຽວໜຽວແໜ້ນ ເປັນຄວາມຮຽກຮ້ອງທີ່ຈຳເປັນເພື່ອບັນລຸຄວາມໝັ້ນຄົງ ແລະ ຄວາມຈະເລີນຮຸ່ງເຮືອງທີ່ຍືນຍົງຂອງຮົງກົງ ແລະ ມາກາວ, ກໍເປັນພາກສ່ວນທີ່ສຳຄັນໃນການບັນລຸຄວາມໃຝ່ຝັນຂອງຈີນທີ່ຈະຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງຊາດຈີນ, ເຊິ່ງສອດຄ່ອງກັບຜົນປະໂຫຍດພື້ນຖານຂອງປະເທດຊາດ, ທັງສອດຄ່ອງກັບຜົນປະໂຫຍດກວມລວມ ແລະ ຜົນປະໂຫຍດໄລຍະຍາວຂອງຮົງກົງ ແລະ ມາກາວ.
ເພື່ອເພີ່ມກຳລັງໃຈໃຫ້ແກ່ວົງການຕ່າງໆຂອງມາກາວໄດ້ສືບຕໍ່ສ້າງຜົນງານອັນດີງາມໃນການຈັດຕັ້ງປະຕິບັດຕາມແນວທາງ “ປະເທດດຽວ ສອງລະບອບ”, ທ່ານສີຈິ້ນຜິງໄດ້ໃຊ້ຄຳປຽບທຽບຢ່າງມີຊີວິດຊີວາ:“ພຶດຕິກຳຫຼັງຈາກມາກາວກັບຄືນສູ່ປະເທດຊາດເປັນເວລາ 15 ປີຜ່ານມາໄດ້ພິສູດແລ້ວວ່າ, ຂໍແຕ່ມີເສັ້ນທາງທີ່ຖືກຕ້ອງ, ນະໂຍບາຍທີ່ດີ, ວິທີທີ່ຄ່ອງແຄ້ວ, ແລະຮ່ວມຈິດຮ່ວມໃຈກັນ, ເຖິງຈະຢູ່ເທິງໂຕະນ້ອຍໆກໍຈະສະແດງງິ້ວສິລະປະໄດ້. ພວກເຮົາຕ້ອງຮັກສາຄວາມໝັ້ນໃຈ ແລະ ເພີ່ມກຳລັງແຮງຈາກຄວາມຄືບໜ້າ ແລະ ຜົນສຳເລັດຂອງມາກາວ, ພ້ອມທັງມີສະຕິທີ່ຮັບຮູ້ການປ່ຽນແປງໃໝ່ຂອງສະແວດລ້ອມລ້ອມທັງພາຍໃນ ແລະ ຢູ່ນອກມາກາວ, ຊຳນານໃນການວາງແຜນລວມ, ຮ່ວມແຮງຮ່ວມໃຈກັນ, ແລະ ກ້າວໄປໜ້າຕາມກະແສລວມ.”
ກ່ຽວກັບບັນຫາທີ່ວ່າເຮັດແນວໃດເພື່ອຊຸກຍູ້ໃຫ້ພາລະກິດ “ປະເທດດຽວ ສອງລະບອບ”ກ້າວໄປໜ້າຢ່າງໜັກແໜ້ນ, ທ່ານສີຈິ້ນຜິງກ່າວວ່າ:“ຕ້ອງກຳແໜ້ນຈຸດປະສົງພື້ນຖານຂອງ ປະເທດດຽວ ສອງລະບອບ” ຢ່າງໜັກແໜ້ນ, ຮ່ວມກັນປົກປັກຮັກສາອະທິປະໄຕ, ຄວາມໝັ້ນຄົງ ແລະ ຜົນປະໂຫຍດດ້ານການພັດທະນາຂອງຊາດ, ຮັກສາຄວາມຈະເລີນຮຸ່ງເຮືອງ ແລະ ສະເຖຍລະພາບຍາວນານຂອງຮົງກົງ ແລະ ມາກາວ; ຕ້ອງຍຶດໝັ້ນການປົກຄອງຮົງກົງ ແລະ ມາກາວຕາມກົດໝາຍ, ຮັບປະກັນການຈັດຕັ້ງປະຕິບັດແນວທາງ “ປະເທດດຽວ ສອງລະບອບ”ຕາມກົດໝາຍ; ຕ້ອງຍຶດໝັ້ນເອົາຫຼັກການປະເທດດຽວໄປປະສົມປະສານກັບການເຄົາລົບຄວາມແຕກຕ່າງລະຫວ່າງສອງລະບອບ, ເອົາການຮັກສາບົດບາດອຳນາດຂອງລັດຖະບານກາງ ປະສົມປະສານກັບການປົກປ້ອງສິດປົກຄອງຕົນເອງໃນລະດັບສູງຂອງເຂດບໍລິຫານພິເສດ, ເອົາການສະແດບົດບາດຂອງແຜ່ນດິນໃຫຍ່ປະເທດຊາດທີ່ເປັນກຳລັງໜູນຫຼັງທີ່ເຂັ້ມແຂງປະສົມປະສານກັບການຍົກສູງກຳລັງແຂ່ງຂັນຂອງຮົງກົງ ແລະ ມາກາວ, ເຊິ່ງຍາມໃດກໍບໍ່ຄວນຫຼົງລືມດ້ານໃດດ້ານໜຶ່ງ.”
“ໃບບົວຂຽວອຸ່ມທຸ່ມກວ້າງສຸດຂອບຟ້າ, ດອກບົວຍິ່ງທີ່ສວຍງາມເມື່ອຖືກສະທ້ອນແສງຈາກດວງອາທິດ”. ເມື່ອ 5 ປີກ່ອນ, ທ່ານສີຈິ້ນຜິງເຄີຍເລົ່າບົດກະວີນີ້ໄດ້ຢ່າງຊຶ້ງໃຈ, ໂດຍຝາກຄວາມຫວັງວ່າ ພຶດຕິກຳຂອງ “ປະເທດດຽວ ສອງລະບອບ”ຍ່ອມຈະໄດ້ຮັບຜົນສຳເລັດອັນໃໝ່ຢ່າງຈົບງາມ. ສູ່ມື້ນີ້, ໃນກະແສລວມທີ່ຈະຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງຊາດຈີນ, ມາກາວກໍເໝືອນກັບດອກບົວ ຂອງປະເທດຊາດ, ພວມເບັ່ງບານຢ່າງສວຍສົດງົດງາມ.
ຄຳເຫັນ
0