ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນຄ້າຍແລງຂອງວັນທີ 5 ພະຈິກປີ 2019, ຢູ່ສວນອຸທິຍານຢູ້ຢວນກຳແພງນະຄອນຊຽງໄຮ້, ທ່ານສີຈິ້ນຜິງ ປະທານປະເທດຈີນພ້ອມທ່ານນາງ ເຜີງລີ້ຢວນ ພັນລະຍາຂອງທ່ານໄດ້ຕ້ອນຮັບ ທ່ານ ເອມມານູແອນ ມາຄຣົງ ປະທານາທິບໍດີຝຣັ່ງພ້ອມພັນລະຍາ.
ເມື່ອທົບທວນຄືນວຽກງານການຕ່າງປະເທດຂອງຈີນໃນປີ 2019 ຜ່ານມາ ເຊິ່ງໃນປີຜ່ານມາ, ກິດຈະກຳການຕ່າງປະເທດທີ່ຈີນເປັນເຈົ້າພາບ 4 ຄັ້ງ, ທ່ານສີຈິ້ນຜິງອອກເດີນທາງໄປຢ້ຽມຢາມຕ່າງປະເທດ 7 ເທື່ອ, ກິດຈະກຳການຕ່າງປະເທດສອງຝ່າຍແລະຫຼາຍຝ່າຍຈຳນວນຮ້ອຍກວ່າຄັ້ງ ທັງໝົດນີ້ໄດ້ສະແດງໃຫ້ເຫັນວ່າ ຈີນກ້າວເດີນໄປໜ້າຢ່າງເດັດດ່ຽວໂດຍບໍ່ຢ້ານກົວຕໍ່ຟ້າຝົນລົມແດງໃນຍຸກໃໝ່.
ເມື່ອຜະເຊີນໜ້າກັບສະພາບການປ່ຽນແປງແບບບໍ່ເຄີຍມີມາກ່ອນໃນຮອບ 100 ປີ, ທ່ານສີຈິ້ນຜິງກ່າວວ່າ: ບໍ່ມີປະເທດໃດຈະສາມາດແກ້ໄຂບັນຫາດ້ວຍຕົນເອງໄດ້, ການເປີດປະຕູສູ່ພາຍນອກແລະການຮ່ວມມືຈຶ່ງເປັນທາງເລືອກທີ່ຖືກຕ້ອງພຽງໜຶ່ງດຽວຂອງບັນດາປະເທດໃນໂລກ. “ແຜນການແກ້ໄຂຂອງຈີນ”ທີ່ເຕັມໄປດ້ວຍສະຕິປັນຍານັ້ນ ບໍ່ພຽງແຕ່ເຮັດໃຫ້ປະເທດຕ່າງໆໄດ້ຮັບໝາກຜົນຕົວຈິງເທົ່ານັ້ນ ຍັງສາມາດຮັບຮູ້ແລະເຂົ້າໃຈຈີນອີກດ້ວຍ.
ຕອນຄ້າຍແລງຂອງວັນທີ 5 ພະຈິກປີ 2019, ຢູ່ສວນອຸທິຍານຢູ້ຢວນກຳແພງນະຄອນຊຽງໄຮ້, ທ່ານສີຈິ້ນຜິງ ປະທານປະເທດຈີນພ້ອມທ່ານນາງ ເຜີງລີ້ຢວນ ພັນລະຍາຂອງທ່ານໄດ້ຕ້ອນຮັບແຂກພິເສດຄືທ່ານ ເອມມານູແອນ ມາຄຣົງ ປະທານາທິບໍດີຝຣັ່ງພ້ອມພັນລະຍາທີ່ເດີນທາງມາຢ້ຽມຢາມຈີນ ພ້ອມທັງນຳທາງທ່ຽວສວນ ແລະຊົມການສະແດງສິລະປະງີ້ວຄຸນສູ ແລະງີ້ວເຢ້ຈູ່ ເຊິ່ງເປັນງີ້ວພື້ນເມືອງຂອງຈີນ. ທ່ານສີຈິ້ນຜິງໄດ້ເລົ່າສູ່ທ່ານມາຄຣົງ ທີ່ມາຢ້ຽມຢາມຊຽງໄຮ້ເປັນຄັ້ງທຳອິດວ່າ ຊຽງໄຮເໝືອນດັ່ງພາບຈຳລອງແຫ່ງການປະຕິຮູບ,ເປີດປະຕູສູ່ພາຍນອກແລະການພັດທະນາທີ່ກ້າວໜ້າຂອງຈີນ ເຊິ່ງໄດ້ສະແດງໃຫ້ເຫັນເຖິງຂະບວນວິວັດແຫ່ງການຂະຫຍາຍຕົວຂອງສາຍພົວພັນລະຫວ່າງຈີນກັບໂລກນັບແຕ່ກາງສະຕະວັດທີ 19 ເປັນຕົ້ນມາ. ຫວັງວ່າ ການຢ້ຽມຢາມເທື່ອນີ້ຈະຊ່ວຍໃຫ້ທ່ານໄດ້ຮັບຮູ້ຊຽງໄຮ້ ແລະຮັບຮູ້ຈີນ. ທ່ານມາຄຣົງກ່າວວ່າ: “ຊຽງໄຮເຮັດໃຫ້ຂ້າພະເຈົ້າຮູ້ສຶກງຶດງໍ້ອັດສະຈັນຫຼາຍ, ຢູ່ຊຽງໄຮ້ຂ້າພະເຈົ້າໄດ້ເຫັນເຖິງການເປີດປະຕູສູ່ພາຍນອກແລະອະນາຄົດຂອງຈີນ.”
ການຕ້ອນຮັບແບບພິເສດນີ້ໄດ້ສ່ອງແສງໃຫ້ເຫັນວ່າທ່ານສີຈິ້ນຜິງມີການຄົ້ນຄຶດຢ່າງເລິກເຊິ່ງແລະວາງແຜນຢ່າງມີສະຕິປັນຍາກ່ຽວກັບການເສີນຂະຫຍາຍສາຍພົວພັນຈີນ-ຝຣັ່ງ.ໃນການພົບປະເຈລະຈາລະຫວ່າງປະມຸກລັດສອງປະເທດຈີນ-ຝຮັ່ງໃນມື້ຕໍ່ມາ, ທ່ານສີຈິ້ນຜິງກ່າວວ່າ:
“ເມື່ອຜະເຊີນໜ້າກັບສະພາບການປ່ຽນແປງແບບບໍ່ເຄີຍມີມາກ່ອນໃນຮອບ 100 ປີຜ່ານມາ, ຈີນແລະຝຣັ່ງໃນຖານະເປັນປະເທດສະມາຊິກຖາວອນຂອງສະພາຄວາມໝັ້ນຄົງອົງການສະຫະປະຊາຊາດແລະຕ່າງກໍເປັນຕົວແທນຂອງອະລິຍະທຳຕາເວັນອອກແລະຕາເວັນຕົກ, ສົມຄວນແບກຫາບພາລະໜ້າທີ່ຫຼາຍກວ່າເກົ່າເພື່ອສະແດງໃຫ້ເຫັນເຖິງຄວາມຮັບຜິດຊອບຂອງປະເທດໃຫຍ່. ຂ້າພະເຈົ້າຍິນດີຮ່ວມກັບທ່ານມຸ້ງໜ້າໄປສູ່ໂລກ,ມຸ້ງໜ້າໄປສູ່ອະນາຄົດແລະມຸ້ງໜ້າສູ່ປະຊາຊົນ, ຊຸກຍູ້ສາຍພົວພັນຄູ່ຮ່ວມຍຸດທະສາດຮອບດ້ານຈີນ-ຝຣັ່ງໃຫ້ຂະຫຍາຍຕົວຂຶ້ນສູ່ລະດັບສູງຕື່ມອີກ ເພື່ອສືບຕໍ່ກ້າວເດີນໄປຢູ່ແຖວໜ້າໃນດ້ານການເສີມຂະຫຍາຍສາຍພົວພັນລະຫວ່າງປະເທດໃຫຍ່.”
ວັນທີ 24 ມີນາປີ 2019, ທ່ານສີຈິ້ນຜິງ ປະທານປະເທດຈີນໄດ້ພົບພັບກັບທ່ານເອມມານູແອນ ມາຄຣົງ ປະທານາທິບໍດີຝຮັ່ງ ຢູ່ນະຄອນນີສປະເທດຝຮັ່ງ. ກ່ອນພົບປະກັນ, ທ່ານມາຄຣົງໄດ້ຖືເອົາປຶ້ມ “ລຸນຢວີ” ສະບັບພາສາຝຣັ່ງຕົ້ນສະບັບທີ່ໄດ້ພິມຈຳໜ່າຍຢູ່ຝຮັ່ງໃນປີ 1688 ເປັນຂອງຂວັນລະດັບຊາດມອບໃຫ້ແກ່ທ່ານສີຈິ້ນຜິງ.
ປີ 2019, ຜົນາສຳເລັດຂອງການເສີມຂະຫຍາຍສາຍພົວພັນຈີນ-ຝຣັ່ງເປັນທີ່ປະຈັກຕາຕໍ່ຊາວໂລກໄດ້ດີສົມຄວນ ເຊິ່ງສາມາດເຫັນໄດ້ຈາກປະມຸກລັດສອງປະເທດໄດ້ເດີນທາງຢ້ຽມຢາມເຊິ່ງກັນແລະກັນໃນປີ 2019 ເຊິ່ງເປັນປີທີ່ສອງປະເທດສ້າງຕັ້ງສາຍພົວພັນທາງການທູດຄົບຮອບ 55 ປີທີ່ເປັນນິມິດໝາຍສຳຄັນ ໂດຍສອງຝ່າຍໄດ້ເນັ້ນວ່າ: ໃນຖານະເປັນສອງປະເທດທີ່ມີສາຍພົວພັນຄູ່ຮ່ວມຍຸດທະສາດຮອບດ້ານແລະເປັນປະເທດໃຫຍ່ທີ່ມີຄວາມຮັບຜິດຊອບນັ້ນ,ຈີນແລະຝຣັ່ງຄວນປະກອບສ່ວນພະລັງແຮງທາງບວກເພື່ອສັນຕິພາບ,ສະຖຽນລະພາບແລະການພັດທະນາຂອງໂລກໃຫ້ຫຼາຍກວ່າເກົ່າ, ໃນຂະບວນການແລກປ່ຽນການຢ້ຽມຢາມກັນລະຫວ່າງປະມຸກລັດສອງປະເທດກໍໄດ້ມີເລື່ອງລາວ ທີ່ໜ້າສົນໃຈຫຼາຍເລື່ອງເກີດຂຶ້ນຕົວຢ່າງເຊັ່ນ: ເດືອນມີນາ, ທ່ານສີຈິ້ນຜິງເດີນທາງໄປຢ້ຽມຢາມຝຣັ່ງ, ທ່ານມາຄຣົງກໍເດີນທາງໄປນະຄອນນີສເປັນການສະເພາະເພື່ອຕ້ອນຮັບເພື່ອນເກົ່າ, ປະມຸກລັດສອງປະເທດໄດ້ໂອ້ລົມສົນທະນາຢ່າງເປີດອົກເປີດໃຈເປັນເວລາຫຼາຍຊົ່ວໂມງຢູ່ເຮືອນວິນລາເກຣີລຸສທີ່ຕັ້ງຢູ່ແຄມຝັ່ງທະເລສີຄາມທີ່ສວຍງາມ. ທ່ານມາຄຣົງໄດ້ຖືເອົາ ປຶ້ມ “ລຸນຢວີ”ສະບັບພາສາຝຣັ່ງຕົ້ນສະບັບຂອງສະບັບທຳອິດເຊິ່ງເປັນປຶ້ມຕຳລາບັນທຶກສຳນວນຂອງຂົງຈື້ພ້ອມລູກສິດນັ້ນເປັນຂອງຂວັນລະດັບຊາດມອບໃຫ້ແກ່ທ່ານສີຈິ້ນຜິງທີ່ເປັນແຂກຜູ້ມີກຽດມາຈາກຈີນ, ທ່ານສີຈິ້ນຜິງກ່າວວ່າ, ນີ້ເປັນຂອງຂວັນອັນລ້ຳຄ່າທີ່ສຸດ. ເດືອນພະຈິກ, ທ່ານມາຄຣົງໄດ້ເດີນທາງໄປຢ້ຽມຢາມຈີນ ທັງເປັນຜູ້ນຳປະເທດສະມາຊິກກຸ່ມ G7 ຜູ້ທຳອິດທີ່ເຂົ້າຮ່ວມງານວາງສະແດງສິນຄ້ານຳເຂົ້າສາກົນຈີນ ເຊິ່ງໄດ້ສ່ອງແສງໃຫ້ເຫັນທ່າແຮງພິເສດແລະຄຸນຄ່າດ້ານຍຸດທະສາດຂອງການພົວພັນຈີນ-ຝຣັ່ງຢ່າງຈະແຈ້ງຕື່ມອີກໃນຍຸກທີ່ເຕັມໄປດ້ວຍຄວາມບໍ່ແນ່ນອນ.
ວັນທີ 5 ພະຈິກປີ 2019, ທ່ານສີຈິ້ນຜິງໄດ້ກ່າວປາໄສໃນງານວາງສະແດງສິນຄ້ານຳເຂົ້າສາກົນຈີນຄັ້ງທີ 2 ຈັດຂຶ້ນຢູ່ສູນປະຊຸມແຫ່ງຊາດນະຄອນຊຽງໄຮ.
ຕອນຫົວຄ່ຳວັນທີ 4 ພະຈິກປີ 2019 ຢູ່ທີ່ວ້າຍທານນະຄອນຊຽງໄຮ້, ທ່ານປະທານສີຈິ້ນຜິງພ້ອມທ່ານນາງ ເຜີງລີ້ຢວນ ພັນລະຍາຂອງທ່ານໄດ້ຈັດງານລ້ຽງຢູ່ໂຮງແຮມເຫີຜິງຫຼືໂຮງແຮມສັນຕິພາບເພື່ອຕ້ອນຮັບແຂກຜູ້ມີກຽດປະເທດຕ່າງໆທີ່ມາເຂົ້າຮ່ວມງານວາງສະແດງສິນຄ້ານຳເຂົ້າສາກົນຈີນຄັ້ງທີ 2. ທ່ານສີຈິ້ນຜິງໄດ້ປະກອບຄຳເຫັນໃນງານລ້ຽງ ໂດຍກ່າວສະແດງຄວາມຍິນດີຕ້ອນຮັບແຂກຜູ້ມີກຽດຂອງປະເທດຕ່າງໆຢ່າງສຸດໃຈແລະສະແດງຄວາມຈິງໃຈຢ່າງເຕັມປ່ຽມວ່າຈີນຍິນດີຮ່ວມມືກັບໂລກເພື່ອພ້ອມກັນກ້າວໄປໜ້າ.
“ຜ່ານຈາກຂະບວນວິວັດແຫ່ງການພັດທະນາຂອງຈີນ,ພວກເຮົາສາມາດຮັບຮູ້ໄດ້ຢ່າງເລິກເຊິ່ງວ່າ ເມື່ອໂລກດີແລ້ວ, ຈີນຈິ່ງຈະດີຂຶ້ນ, ເມື່ອຈີນດີແລ້ວ, ໂລກຈິ່ງຈະດີຂຶ້ນກວ່າເກົ່າ. ງານວາງສະແດງສິນຄ້ານຳເຂົ້າສາກົນຈີນເປັນເວທີແລກປ່ຽນສິນຄ້າແລະການບໍລິການ, ແລກປ່ຽນວັດທະນະທຳແລະແນວຄວາມຄິດ, ເປັນການຕ້ອນຮັບແຂກຄົນຕ່າງໆມາຈາກທົ່ວທຸກມູມໂລກເພື່ອສ້າງຜົນປະໂຫຍດໃຫ້ແກ່ໂລກ,ທັງເປັນການຕອບສະໜອງກັບຄວາມມຸ້ງຫວັງຂອງປະຊາຊົນບັນດາປະເທດທີ່ຢາກມີຊີວິດອັນດີງາມ. ”
ການຈັດງານວາງສະແດງສິນຄ້ານຳເຂົ້າສາກົນຈີນເປັນນະໂຍບາຍສຳຄັນຂອງຈີນໃນການສຸມໃສ່ຊຸກຍູ້ການເປີດປະຕູສູ່ພາຍນອກໃນລະດັບສູງອີກຮອບໃໝ່ ທັງເປັນມາດຕະການສຳຄັນຂອງຈີນໃນການເປັນເຈົ້າການເປີດຕະຫຼາດໃຫ້ໂລກ. ທ່ານສີຈິ້ນຜິງໄດ້ທຸ້ມເທເຫື່ອແຮງແລະສະຕິປັນຍາຢ່າງຫຼວງຫຼາຍເຂົ້າໃນງານວາງສະແດງສິນຄ້ານຳເຂົ້າສາກົນຈີນໂດຍໄດ້ວາງແຜນ, ສະເໜີຂໍ້ລິເລີ່ມແລະລົງມືຊຸກຍູ້ດ້ວຍຕົນເອງ. ສື່ຕ່າງປະເທດໄດ້ຕີລາຄາສູງວ່າ: ທ່ານປະທານສີຈິ້ນຜິງເຂົ້າຮ່ວມງານວາງສະແດງສິນຄ້ານຳເຂົ້າສາກົນຈີນອີກຄັ້ງຫຼັງຈາກເຂົ້າຮ່ວມງານຄັ້ງປະຖົມມະເລີກ ເຊິ່ງສະແດງໃຫ້ເຫັນວ່າທ່ານໃຫ້ຄວາມສຳຄັນຢ່າງສູງຕໍ່ງານວາງສະແດງດັ່ງກ່າວ. ໃນພິທີເປີດງານວາງສະແດງທີ່ຈັດຂຶ້ນໃນວັນທີ 5 ພະຈິກປີ 2019, ທ່ານສີຈິ້ນຜິງໄດ້ກ່າວຄຳ ເຊີນຊວນຕໍ່ທົ່ວໂລກດ້ວຍຄວາມຈິງໃຈວ່າ:
“ຕະຫຼາດຈີນກວ້າງໃຫຍ່ໄພສານປານນີ້, ຍິນດີຕ້ອນຮັບທຸກທ່ານມາເບິ່ງນຳກັນ.”
ພາຍຫຼັງຮັບຟັງການປາຖະກະຖາຂອງທ່ານສີຈິ້ນຜິງແລ້ວ, ທ່ານມາຄຣົງ ປະທນາທິບໍດີຝຣັ່ງກ່າວວ່າ, ຜົນສຳເລັດຂອງຈີນແມ່ນໄດ້ມາຈາກຄວາມພະຍາຍາມຂອງຕົນເອງ ທັງໄດ້ຜົນປະໂຫຍດຈາກເສດຖະກິດໂລກາພິວັດ. ເລື່ອງລາວກ່ຽວກັບຜົນສຳເລັດຂອງຈີນສະແດງໃຫ້ເຫັນວ່າ ຈີນຕ້ອງການເປີດປະຕູສູ່ໂລກ,ຂະນະທີ່ໂລກກໍຕ້ອງການເປີດປະຕູສູ່ຈີນເຊັ່ນກັນ.
“ຈີນຍຶດໝັ້ນການປະຕິຮູບແລະເປີດປະຕູສູ່ພາຍນອກ ເຊິ່ງມີຄວາມໝາຍສຳຄັນຕໍ່ໂລກ. ຂອບໃຈທ່ານປະທານສີຈິ້ນຜິງທີ່ບໍ່ພຽງແຕ່ໄດ້ແນະນຳໃຫ້ຮູ້ສະພາບຄວາມຄືບໜ້າຂອງງານວາງສະແດງສິນຄ້ານຳເຂົ້າສາກົນຈີນຄັ້ງທຳອິດໃນໄລຍະ 1 ປີຜ່ານມາ, ທັງໄດ້ກຳນົດຢ່າງຈະແຈ້ງວ່າໃນຕໍ່ໜ້າ,ຈີນຈະສືບຕໍ່ຍຶດໝັ້ນທິດທາງການເປີດປະຕູສູ່ພາຍນອກ ເຊິ່ງບໍ່ພຽງແຕ່ໄດ້ສ່ອງແສງໃຫ້ເຫັນເຖິງວິໄສທັດເບິ່ງກວ້າງມອງໄກຂອງທ່ານກໍຄືຂອງປະຊາຊົນຈີນ ເທົ່ານັ້ນຍັງ ຈະຊຸກຍູ້ການປະຕິຮູບເສດຖະກິດສັງຄົມທີ່ພັດທະນາຢ່າງວ່ອງໄວແລະຍິ່ງໃຫຍ່ທີ່ສຸດໃນປະຫວັດສາດຂອງມວນມະນຸດໃຫ້ສຳເລັດຜົນ.”
ວັນທີ 22 ພະຈິກປີ 2019, ທ່ານສີຈິ້ນຜິງ ປະທານປະເທດຈີນໄດ້ພົບປະກັບຜູ້ແທນຕ່າງປະເທດທີ່ເຂົ້າຮ່ວມກອງປະຊຸມເວທີປຶກສາຫາລືເສດຖະກິດແບບປະດິດສ້າງປີ 2019.
ວົງການພາຍນອກໄດ້ສັງເກດເຫັນເຖິງຄວາມລະອຽດຢ່າງໜຶ່ງຄື ເຖິງວ່າທ່ານສີຈິ້ນຜິງຈະມີພາລະກິດປະຈຳວັນຢ່າງຫຼວງຫຼາຍກໍຕາມ, ແຕ່ປີ 2019, ທ່ານກໍໄດ້ບິແບ່ງເວລາເຂົ້າຮ່ວມການພົບປະຫຼາຍຄັ້ງຄື: ກ່ອນພິທີເປີດງານວາງສະແດງສິນຄ້ານຳເຂົ້າສາກົນຈີນໄຂຂຶ້ນ, ທ່ານສີຈິ້ນຜິງໄດ້ພົບປະກັບຜູ້ຕາງໜ້າ 500 ວິສາຫະກິດຊັ້ນນຳຂອງໂລກ; ໃນໄລຍະທ້າຍປີ, ທ່ານສີຈິ້ນຜິງໄດ້ພົບປະກັບຜູ້ແທນຕ່າງປະເທດທີ່ເຂົ້າຮ່ວມກອງປະຊຸມເວທີປຶກສາຫາລືເສດຖະກິດແບບປະດິດສ້າງປີ 2019, ກໍຄືແຂກຜູ້ມີກຽດຈາກຕ່າງປະເທດທີ່ເຂົ້າຮ່ວມກອງປະຊຸມເວທີປຶກສາຫາລືສາກົນເສິງຕູ່2019. ຜູ້ມີກຽດເຫຼົ່ານີ້ເປັນບຸກຄົນສຳຄັນໃນວົງການການເມືອງ,ທຸລະກິດແລະຄັງປັນຍາຂອງບັນດາປະເທດ ເຊິ່ງເປັນຜູ້ມີສ່ວນຮ່ວມ,ເປັນສັກຂີພິຍານແລະຜູ້ໄດ້ຮັບຜົນປະໂຫຍດຈາກການປະຕິຮູບແລະເປີດປະຕູສູ່ພາຍນອກຂອງຈີນ. ໃນເວລາພົບປະກັນ, ທ່ານສີຈິ້ນຜິງໄດ້ກ່າວເຖິງການປະຕິຮູບແລະເປີດປະຕູສູ່ພາຍນອກຂອງຈີນຫຼາຍເທື່ອ:
“ການດຳເນີນການປະຕິຮູບແລະເປີດປະຕູສູ່ພາຍນອກເປັນເວລາ 40 ປີເຮັດໃຫ້ພວກເຮົາ ມີຄວາມໝັ້ນໃຈ, ນີ້ຄືເສັ້ນທາງທີ່ຕ້ອງເດີນຜ່ານຂອງຈີນ.ພວກເຮົາຈະເດີນຕາມເສັ້ນທາງນີ້ຕະຫຼອດໄປ, ຍິ່ງມີກຳລັງຂັດຂວາງ, ຍິ່ງມີອຸປະສັກກີດຂວາງທີ່ກໍ່ຂຶ້ນດ້ວຍນ້ຳມືຂອງກຸ່ມຄົນໃດໜຶ່ງກໍຕາມ, ພວກເຮົາຍິ່ງຕ້ອງຜ່ານຜ່າຄວາມຫຍຸ້ງຍາກແລະບຸກບືນກ້າວໄປໜ້າໃຫ້ໄດ້, ເປີດປະຕູໃຫ້ກວ້າງອອກຕື່ມອີກ. ຈີນເປັນປະເທດທີ່ເຮັດແທ້ທຳຈິງເມື່ອເວົ້າຄຳໃດອອກມາກໍຕ້ອງມີຄວາມໜ້າເຊື່ອຖື, ເມື່ອເວົ້າແລ້ວກໍຕ້ອງເຮັດໃຫ້ໄດ້ຢ່າງແນ່ນອນ. ”
ການເປີດປະຕູສູ່ພາຍນອກຂອງຈີນມີແຕ່ຈະນັບມືື້ນັບເປີດກວ້າງອອກເທົ່ານັ້ນ. ທ່ານຫວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນກ່າວໃນຫວ່າງກ່ອນນີ້ບໍ່ດົນວ່າ, ປີ 2019, ຈີນໄດ້ຍຶດໝັ້ນໃນຫຼັກການຕ່າງຝ່າຍຕ່າງມີຜົນປະໂຫຍດ, ປະກາດມາດຕະການໃໝ່ທີ່ສຳຄັນໃນການເປີດປະຕູສູ່ພາຍນອກ ເຊິ່ງໄດ້ປະກອບສ່ວນອັນໃໝ່ເຂົ້າໃນການປົກປ້ອງການຄ້າເສລີ ແລະການສ້າງເສດຖະກິດໂລກແບບເປີດກວ້າງ. ໃນປີໃໝ່ 2020 ນີ້, ຈີນຈະສືບຕໍ່ເປີດກວ້າງການຮ່ວມມືກັບສາກົນຕື່ມອີກ.
ຄຳເຫັນ
0