ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຢູ່ບ້ານເຕີເຊີ້ງຕາແສງສຽວເອີໄທ, ທ່ານສີຈິ້ນຜິງໄດ້ຢ້ຽມຢາມເຮືອນຂອງຜູ້ທຸກຍາກ
“ສິ່ງສຳຄັນທີ່ສຸດໃນການບໍລິຫານປະເທດແມ່ນໃຫ້ປະຊາຊົນມີຄວາມສະຫງົບສຸກ, ວິທີການທີ່ຈະເຮັດໃຫ້ປະຊາຊົນມີຄວາມສະຫງົບສຸກຄືຕ້ອງຮັບຮູ້ທຸກສຸກຂອງປະຊາຊົນ” ທ່ານສີຈິ້ນຜິງໄດ້ກ່າວຄຳອວຍພອນປີໃໝ່ 2016 ວ່າ: ການສ້າງສັງຄົມທີ່ອີ່ມໜຳສຳລານໃຫ້ສຳເລັດຢ່າງຮອບດ້ານ, ປະຊາຊົນ 1,3 ຕື້ຄົນຕ້ອງຈັບມືຖືແຂນກັນກ້າວໄປໜ້າ, ການໃຫ້ຜູ້ທຸກຍາກຢູ່ຊົນນະບົດຫຼາຍສິບລ້ານ ຄົນມີຊີວິດການເປັນຢູ່ດີຂຶ້ນແມ່ນເລື່ອງທີ່ຂ້າພະເຈົ້າມີຄວາມເປັນຫ່ວງ.” ປະຊາຊົນຜູ້ທຸກຍາກແມ່ນກຸ່ມຄົນທີ່ທ່ານສີຈິ້ນຜິງໃຫ້ຄວາມສຳຄັນທີ່ສຸດ ແລະເຂດທຸກຍາກແມ່ນດິນແດນທີ່ທ່ານໄປຢ້ຽມຢາມຫຼາຍທີ່ສຸດກ່ອນບຸນກຸດຈີນ.
ກ່ອນບຸນກຸດຈີນປີ 2017 ໃກ້ຈະໝູນວຽນມາເຖິງ, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ, ປະທານປະເທດຈີນ, ປະທານຄະນະກຳມະການການທະຫານສູນກາງຈີນໄດ້ເດີນທາງເຖິງນະຄອນຈ່າງເຈ່ຍໂຂແຂວງເຮີເປີຍ ເພື່ອຢ້ຽມຢາມຖາມຂ່າວປະຊາຊົນ ແລະພະນັກງານຂັ້ນຮາກຖານ, ສຳຫຼວດກວດເບິ່ງວຽກງານບັ້ນລົບລ້າງຄວາມທຸກຍາກ ແລະສົ່ງຄວາມອວຍພອນປີໃໝ່ອັນປະເສີດໃຫ້ປະຊາຊົນບັນດາເຜົ່າໃນທົ່ວປະເທດ.
ໃນຕອນເຊົ້າວັນທີ 24 ມັງກອນປີ 2017, ທ່ານສີຈິ້ນຜິງໄດ້ຂີ່ລົດໄປເຖິງເຂດຊົນນະບົດຂອງເມືອງຈ່າງເປີຍໃຊ້ເວລາເດີນທາງຫຼາຍກວ່າ 1 ຊົ່ວໂມງ.
ຢູ່ບ້ານເຕີເຊີ້ງຕາແສງສຽວເອີໄທ, ທ່ານສີຈິ້ນຜິງໄດ້ຢ້ຽມຢາມເຮືອນຂອງຜູ້ທຸກຍາກຄືທ່ານຊູຍວັ້ນ, ທ່ານຊູຍຊີໄຫ ແລະທ່ານຊູຍໄຫເຊີງ. ທ່ານໄດ້ສຳຫຼວດກວດເບິ່ງສະພາບເຮືອນຊານລານແປ້ນ, ອຸປະກອນຮັບໃຊ້ຊີວິດການເປັນຢູ່ ແລະເຂົ້າຂອງເຄື່ອງໃຊ້ທີ່ກະກຽມເພື່ອສະເຫຼີມສະຫຼອງບຸນກຸດຈີນ, ຊອກຮູ້ລາຍຮັບລາຍຈ່າຍຂອງແຕ່ລະຄອບຄົວ, ຖາມເຖິງສະພາບການຈັດຕັ້ງປະຕິບັດມາດຕະການຫຼຸດຜ່ອນຄວາມທຸກຍາກ ແລະຄວາມຫຍຸ້ງຍາກຕົວຈິງໃນເວລານັ້ນ.
ຢູ່ເຮືອນຂອງຊູຍໄຫເຊີງ, ທ່ານສີຈິ້ນຜິງກ່າວຢ່າງຈິງໃຈວ່າ: ຂ້າພະເຈົ້າຄິດ ວ່າເດີ່ນບ້ານຍັງເກ້ງກ້າງບໍ່ເປັນລະບຽບປານໃດ. ເມື່ອຮັບຮູ້ວ່າບ້ານນີ້ພວມມີແຜນການສ້າງຊົນນະບົດທີ່ສວຍງາມນັ້ນ, ທ່ານສີຈິ້ນຜິງໄດ້ສະເໜີວ່າ:
“ເຂດຊີວິດການເປັນຢູ່, ເຂດການຜະລິດ ແລະເຂດລ້ຽງສັດຕ້ອງຈັດວາງຢ່າງເໝາະສົມ, ສ່ວນຫ້ອງນ້ຳກໍຕ້ອງອອກແບບຕາມຫຼັກວິທະຍາສາດ, ເລື່ອງເຫຼົ່ານີ້ຄວນປຶກສາຫາລືກັນຕື່ມອີກ. ບໍ່ພຽງແຕ່ວາງແຜນຕາມຫຼັກວິທະຍາສາດເທົ່ານັ້ນ, ຍັງຕ້ອງເຄົາລົບຄວາມເຫັນຂອງປະຊາຊົນອີກດ້ວຍ, ໃຫ້ປະຊາຊົນເລືອກ ແລະເຜີຍແຜ່ ແລະບອກຕໍ່ໆກັນໄປ.”
ທ່ານສີຈິ້ນຜິງໄດ້ຈັດການພົບປະໂອ້ລົມກັບພະນັກງານທ້ອງຖິ່ນ ແລະຊາວບ້ານ
ຫຼັງຈາກນັ້ນ, ທ່ານສີຈິ້ນຜິງໄດ້ຈັດການພົບປະໂອ້ລົມກັບພະນັກງານທ້ອງຖິ່ນ ແລະຊາວບ້ານ. ເມື່ອໄດ້ຮັບຮູ້ສະພາບລະອຽດກ່ຽວກັບວຽກງານຫຼຸດພົ້ນອອກຈາກຄວາມທຸກຍາກແລ້ວ, ທ່ານກ່າວເນັ້ນວ່າ: ການລົບລ້າງຄວາມທຸກຍາກ, ປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ ແລະບັນລຸຄວາມຮັ່ງມີຮ່ວມກັນແມ່ນຄວາມຮຽກຮ້ອງຕ້ອງການອັນຈຳເປັນຂອງສັງຄົມນິຍົມ, ແມ່ນເປົ້າໝາຍສູ້ຊົນຢ່າງໝັ້ນໜຽວບໍ່ປ່ຽນແປງຂອງພັກກອມມູນິດຈີນ. ການສູ້ຊົນຍາດເອົາໄຊຊະນະບັ້ນລົບລ້າງຄວາມທຸກຍາກແມ່ນໜ້າທີ່ພື້ນຖານຂອງການສ້າງສັງຄົມທີ່ອີ່ມໜຳສຳລານໃຫ້ສຳເລັດຢ່າງຮອບດ້ານ.
“ປັດຈຸບັນນີ້, ພວກເຮົາໄດ້ເພີ່ມທະວີການຊ່ວຍເຫຼືອຜູ້ທຸກຍາກ, ພວກເຮົາມີໜ່ວຍງານ ແລະພະນັກງານການຊ່ວຍເຫຼືອຜູ້ທຸກຍາກ. ທັງໝົດເຫຼົ່ານີ້ຕ້ອງຈັດຕັ້ງປະຕິບັດຕົວຈິງໃຫ້ມີປະສິດທິຜົນ, ສາມາດເສີມຂະຫຍາຍບົດບາດໄດ້, ບໍ່ແມ່ນເຮັດໄດ້ແຕ່ຮູບການແຕ່ບໍ່ມີຜົນສຳເລັດຕົວຈິງ, ຕ້ອງເຮັດແທ້ທຳຈິງ. ສູນກາງໄດ້ໃຫ້ຄວາມສຳຄັນຕໍ່ວຽກງານການຫຼຸດຜ່ອນຄວາມທຸກຍາກ ແລະຈັດເຂົ້າໄວ້ໃນແຜນການວຽກງານທີ່ສຳຄັນພໍສົມຄວນຂອງຂ້າພະເຈົ້າ, ສະນັ້ນ, ການນຳຂັ້ນຕ່າງໆແຮ່ງຕ້ອງຈັດຕັ້ງປະຕິບັດໃຫ້ໄດ້ດີ. ໃນການບັນລຸເປົ້າໝາຍການສ້າງສັງຄົມທີ່ອີ່ມໜຳສຳລານໃຫ້ສຳເລັດຢ່າງຮອບດ້ານໃນປີ 2020, ການຫຼຸດຜ່ອນຄວາມທຸກຍາກເປັນໜ້າທີ່ພື້ນຖານ. ຄວາມມຸ້ງຫວັງຢາກມີຊີວິດການເປັນຢູ່ທີ່ດີຂອງປະຊາຊົນແມ່ນເປົ້າໝາຍສູ້ຊົນຂອງພັກກອມມູນິດຈີນ. ປັດຈຸບັນ, ພວກເຮົາມີຄວາມຕັດສິນໃຈ, ມີເປົ້າໝາຍ, ມີມາດຕະການລະອຽດແລ້ວ, ສິ່ງທີ່ສຳຄັນທີ່ສຸດແມ່ນການຈັດຕັ້ງປະຕິບັດໃຫ້ເປັນຮູບປະທຳ.”
ທ່ານສີຈິ້ນຜິງກ່າວເນັ້ນວ່າ: ຖ້າຢາກລົບລ້າງຄວາມທຸກຍາກ, ບໍ່ແມ່ນເຮັດໝົດທຸກຢ່າງ, ແຕ່ຄວນສຸມໃສ່ “ເປົ້າໝາຍທີ່ຖືກຕ້ອງ", ເຮັດໃຫ້ເປົ້າໝາຍ, ຂະແໜງການ, ວິທີ ແລະປະສິດທິຜົນຂອງການຫຼຸດຜ່ອນຄວາມທຸກຍາກຖືກຕ້ອງຕາມເປົ້າໝາຍທີ່ແນ່ນອນ. ຄວນເພີ່ມທະວີການກໍ່ສ້າງອົງການຈັດຕັ້ງຂັ້ນຮາກຖານຢູ່ຊົນນະບົດ, ໃຫ້ຄະນະພັກເສີມຂະຫຍາຍບົດບາດເປັນປ້ອມດ້ານໜ້າ ແລະເປັນກຳລັງຫຼັກແຫຼ່ງໃນການນຳພາປະຊາຊົນຫຼຸດພົ້ນອອກຈາກຄວາມທຸກຍາກ ແລະສ້າງຄວາມຮັ່ງມີຂຶ້ນ, ແກ້ໄຂບັນຫາຂອງຊາວບ້ານໃຫ້ໄດ້ດີ.
ທ່ານສີຈິ້ນຜິງກ່າວຄຳອວຍພອນປີໃໝ່ບຸນກຸດຈີນໃຫ້ປະຊາຊົນຈົ່ງມີຊີວິດການເປັນຢູ່ທີ່ຜາສຸກ ແລະນັບມື້ນັບດີຂຶ້ນ
ກ່ອນອຳລາ, ຊາວບ້ານກໍເຂົ້າມາທັກທາຍ ແລະກ່າວຄຳອວຍພອນໃຫ້ທ່ານສີຈິ້ນຜິງ, ທ່ານກໍກ່າວຄຳອວຍພອນປີໃໝ່ບຸນກຸດຈີນໃຫ້ປະຊາຊົນຈົ່ງມີຊີວິດການເປັນຢູ່ທີ່ຜາສຸກ ແລະນັບມື້ນັບດີຂຶ້ນ.
“ສະບາຍດີ! ບຸນກຸດຈີນໃກ້ຈະໝູນວຽນມາເຖິງ, ປີລະກາໃກ້ຈະມາເຖິງແລ້ວ, ຂ້າພະເຈົ້າມາຢ້ຽມຢາມ ແລະສົ່ງຄຳອວຍພອນໃຫ້ທຸກທ່ານ ກໍຄືປະຊາຊົນບັນດາເຜົ່າໃນທົ່ວປະເທດ! ໂຊກດີປີໃໝ່! ແລະອວຍພອນໃຫ້ປະເທດຈີນພວກເຮົາຈົ່ງມີຄວາມຈະເລີນຮຸ່ງເຮືອງ, ປະຊາຊົນບັນດາເຜົ່າມີສຸຂະພາບເຂັ້ມແຂງ ແລະມີຄວາມຜາສຸກຫຼາຍຂຶ້ນ ປີໃໝ່ປີລະກາທຸກທ່ານມີໂຊກໃຫຍ່ໄຊງາມ!”
ໃນຕອນບ່າຍມື້ດຽວກັນ, ທ່ານສີຈິ້ນຜິງໄດ້ຈັດກອງປະຊຸມສົນທະນາ ເຊິ່ງໄດ້ຟັງບົດລາຍງານວຽກງານຂອງແຂວງເຮີເປີຍ ແລະນະຄອນຈ່າງເຈ່ຍໂຂ. ທ່ານສີຈິ້ນຜິງກ່າວເນັ້ນວ່າ: ເພື່ອກຳຈັດການຜະລິດທີ່ເຫຼືອເຟືອເກີນຄວາມຕ້ອງການກໍຄ້າຍຄືກັບການລ່ອງເຮືອທວນກະແສນ້ຳໄຫຼ ຖ້າບໍ່ກ້າວໄປໜ້າເຮືອກໍຈະໄຫຼລົງ. ຕ້ອງຊອກຫາຈຸດອ່ອນຂອງວຽກງານ, ເພື່ອຮັບປະກັນການລົບລ້າງການຜະລິດທີ່ຫຼ້າຫຼັງ, ຢຸດຕິການດຳເນີນງານຂອງວິສາຫະກິດຜີດິບ ຫຼືວິສາຫະກິດທີ່ໄຮ້ປະສິດທິຜົນ, ຫ້າມການກະທຳທີ່ເປັນການປອມແປງ ແລະຫຼອກລວງ, ຫ້າມວິສາຫະກິດທີ່ຜະລິດເກີນຄວາມຕ້ອງການທີ່ໄດ້ຮັບການຊຳລະໄປແລ້ວນັ້ນ ບໍ່ໃຫ້ກັບຄືນມາຜະລິດອີກ. ປິດກິດຈະການຂອງວິສາຫະກິດທີ່ຜະລິດຫຼ້າຫຼັງຢ່າງເດັດຂາດ ແລະບໍ່ອະນຸຍາດໃຫ້ສ້າງໂຄງການໃໝ່ມາປ່ຽນແທນອີກ, ແລະຫ້າມສ້າງໂຄງການໃໝ່ທີ່ຜິດກົດໝາຍຜິດລະບຽບການ.
ທ່ານສີຈິ້ນຜິງຍັງຊີ້ໃຫ້ເຫັນວ່າ: ເມື່ອໃກ້ຈະສຳເລັດໜ້າທີ່ໃນບັ້ນລົບລ້າງຄວາມທຸກຍາກຈະຜະເຊີນໜ້າກັບຄວາມຫຍ້ງຍາກຫຼາຍຂຶ້ນ. ຕ້ອງຖືເອົາການຫຼຸດຜ່ອນຄວາມທຸກຍາກຢ່າງຖືກຕ້ອງຕາມເປົ້າໝາຍທີ່ແນ່ນອນ ແລະການຫຼຸດພົ້ນອອກຈາກຄວາມທຸກຍາກຢ່າງຖືກຕ້ອງຕາມເປົ້າໝາຍເປັນວຽກງານຕົ້ນຕໍ, ປະຕິບັດນະໂຍບາຍຕາມແຕ່ລະປະເພດ, ເຮັດແທ້ທຳຈິງ, ຮັບປະກັນໃຫ້ຜູ້ທຸກຍາກສາມາດບັນລຸການຫຼຸດພົ້ນອອກຈາກຄວາມທຸກຍາກໄດ້ຕາມເວລາກຳນົດ. ຄະນະພັກ ແລະອົງການປົກຄອງທຸກຂັ້ນຄວນແບກຫາບໜ້າທີ່ຮັບຜິດຊອບດັ່ງກ່າວ, ຮັບປະກັນໃຫ້ວຽກງານທຸກຢ່າງຕ້ອງມີຜູ້ຮັບຜິດຊອບການຈັດຕັ້ງປະຕິບັດ ແລະຮັບປະກັນໃຫ້ຜູ້ທຸກຍາກສາມາດບັນລຸເປົ້າໝາຍການຫຼຸດພົ້ນອອກຈາກຄວາມທຸກຍາກໄດ້ຕາມເວລາກຳນົດ, ຫ້າມບໍ່ໃຫ້ມີປາກົດການຫຼຸດພົ້ນອອກຈາກຄວາມທຸກຍາກແບບຈອມປອມ ແລະລາຍງານຕົວເລກປອມ.
ຄຳເຫັນ
0