ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ເປັນຫຍັງຕ້ອງເຮັດວຽກເພື່ອຜົນປະໂຫຍດຂອງປະຊາຊົນ? ເພາະວ່າ “ອຳນາດການປົກຄອງຈະມີຄວາມຈະເລີນຂຶ້ນຢູ່ກັບການເອົາໃຈໃສ່ຄວາມມຸ່ງມາດປາຖະໜາຂອງປະຊາຊົນ”, ສະນັ້ນຕ້ອງຖືການສ້າງຜົນປະໂຫຍດໃຫ້ແກ່ປະຊາຊົນເປັນຜົນງານການບໍລິຫານໃຫຍ່ທີ່ສຸດ. ເມື່ອເວົ້າເຖິງການຖືຄວາມສົນໃຈຂອງປະຊາຊົນເປັນເປົ້າໝາຍຂອງຕົນ ແລະ ຕິດພັນກັບຈິດໃຈປະຊາຊົນຢ່າງໃກ້ຊິດນັ້ນ, ວິລະກຳຂອງສະຫາຍຈ່ຽວອີ້ລູ້ ອະດີດເລຂາຄະນະພັກເມືອງລານຄາວແຂວງເຮີນານຈີນເປັນແບບຢ່າງທີ່ພົ້ນເດັ່ນ ແລະ ໜ້າປະທັບໃຈທີ່ສຸດ.
ແຕ່ເດືອນທັນວາປີ 1962 ຫາປີ 1964, ເມືອງລານຄາວໄດ້ປະສົບໄພນໍ້າຖ້ວມ, ໄພພາຍຸຊາຍ, ແລະ ດິນດັ່ງ, ສະຫາຍຈ່ຽວອີ້ລູ້ຍຶດໝັ້ນສາມັກຄີຮ່ວມກັບພະນັກງານ ແລະ ປະຊາຊົນທົ່ວເມືອງລານຄາວ, ສູ້ຊົນກັບໄພທຳມະຊາດທີ່ໜັກໜ່ວງຢ່າງເຂັ້ມແຂງກ້າຫານ, ເພື່ອຫັນປ່ຽນໂສມໜ້າຂອງເມືອງລານຄາວ. ໃນເວລານັ້ນ, ສະຫາຍຈ່ຽວອີ້ລູ້ເປັນພະຍາດມະເຮັງຕັບ, ແຕ່ຍັງອົດທົນຕໍ່ຄວາມເຈັບປວດທີ່ຮຸນແຮງ ແລະ ຍຶດໝັ້ນເຮັດວຽກຕໍ່. ກ່ອນການເສຍຊີວິດ, ເພິ່ນມີຄຳຮຽກຮ້ອງແຕ່ຢ່າງດຽວ, ຄື: “ຫຼັງຈາກຂ້າພະເຈົ້າເສຍຊີວິດແລ້ວ ຊ່ວຍສົ່ງສົບຂອງຂ້າພະເຈົ້າກັບຄືນສູ່ເມືອງລານຄາວ ແລະ ຝັງຢູ່ເທິງໂນນຊາຍເດີ້. ເພາະວ່າຕອນທີ່ຂ້າພະເຈົ້າຍັງມີຊີວິດຢູ່ ບໍ່ທັນສາມາດບຳບັດໂນນຊາຍໄດ້ຊ້ຳ, ຫຼັງຈາກເສຍຊີວິດໄປແລ້ວກໍຕ້ອງການເປັນສັກຂິພິຍານເພື່ອເບິ່ງບັນດາສະຫາຍບຳບັດໂນນຊາຍໃຫ້ໄດ້.”
ສາມາດເວົ້າໄດ້ວ່າ,ປະຊາຊົນຈີນເກືອບໝົດທຸກຄອບຄົວໄດ້ຮັບຮູ້ເລື່ອງວິລະກຳຂອງ ສະຫາຍຈ່ຽວອີ້ລູ້ໂດຍທົ່ວໄປ. ໃນເວລາທີ່ທ່ານສີຈິ້ນຜິງເວົ້າເຖິງຈຸດປະສົງຂອງພັກກອມມູນິດຈີນທີ່ຮັບໃຊ້ປະຊາຊົນຢ່າງສຸດອົກສຸດໃຈ, ກຳອຳນາດເພື່ອປະຊາຊົນ, ຖືປະຊາຊົນຢູ່ຖານະສູງສຸດ ແລະ ຖືປະຊາຊົນເປັນໃຈກາງນັ້ນ, ກໍໄດ້ກ່າວເຖິງ ສະຫາຍຈ່ຽວອີ້ລູ້ຕັ້ງຫຼາຍເທື່ອ. ປີ 1990, ທ່ານສີຈິ້ນຜິງເປັນເລຂາຄະນະພັກນະຄອນຟູໂຈ່, ເຄີຍຂຽນບົດກະວີບົດໜຶ່ງທີ່ມີຫົວເລື່ອງວ່າ “ນ້ຽນນູຈ່ຽວ-ໄວ້ອາໄລຈ່ຽວອີ້ລູ້”. ໃນນັ້ນມີປະໂຫຍກໜຶ່ງລະບຸວ່າ “ຕອນມີຊີວິດຢູ່ກັບໂນນຊາຍ, ຕອນເສຍຊີວິດໄປກໍຢູ່ກັບໂນນຊາຍ”, “ເປັນເຈົ້າໜ້າທີ່ການນຳວາລະໜຶ່ງ, ແຕ່ກໍໄດ້ສ້າງຄວາມຜາສຸກໃຫ້ແກ່ທ້ອງຖິ່ນທີ່ຕົນບໍລິຫານ”, ເຊິ່ງສະແດງໃຫ້ເຫັນເຖິງຈຸດປະສົງຂອງພັກກອມມູນິດຈີນທີ່ຮັບໃຊ້ປະຊາຊົນຢ່າງສຸດອົກສຸດໃຈ.
ວັນທີ 7 ກຸມພາ ປີ 1966, ສຳນັກຂ່າວສານຊິນຮວາໄດ້ລົງພິມບົດຄວາມທີ່ພາດຫົວເລື່ອງວ່າ “ຈ່ຽວອີ້ລູ້ - ແບບຢ່າງຂອງເລຂາຄະນະພັກເມືອງ” ທີ່ຂຽນໂດຍທ່ານມູ້ຊິ່ງ. ໃນເວລານັ້ນ, ທ່ານສີຈິ້ນຜິງເປັນນັກຮຽນມັດທະຍົມປີ 1, ຕອນອາຈານທີ່ສອນວິຊາການເມືອງ-ແນວຄິດອ່ານບົດນີ້ໃນໂມງຮຽນ, ຮູ້ສຶກສະເທືອນໃຈຈົນສະອຶກສະອຶ້ນ ຫຼາຍເທື່ອ. ນັກຮຽນທັງຫຼາຍກໍນໍ້າຕາໄຫຼອອກມາໂດຍບໍ່ຮູ້ສຶກໂຕ.
ຈິດໃຈຂອງ ສະຫາຍຈ່ຽວອີ້ລູ້, ໄດ້ມີອິດທິພົນຢ່າງເລິກເຊິ່ງຕໍ່ທ່ານສີຈິ້ນຜິງ. ໃນເວລາທ່ານສີຈິ້ນຜິງເຮັດວຽກຢູ່ແຂວງເຈີ້ຈ່ຽງ, ເຄີຍໃຊ້ນາມປາກກາວ່າ “ເຈີຊິ່ນ”, ລົງພິມບົດວິຈານສັ້ນ 232 ບົດ, ໂດຍຕອບຄຳຖາມທີ່ປະຊາຊົນສົນໃຈທີ່ສຸດ. ທ່ານຍັງເຄີຍກ່າວວ່າ, ຖືການສ້າງຄວາມຜາສຸກໃຫ້ແກ່ປະຊາຊົນເປັນຜົນງານການບໍລິຫານໃຫຍ່ທີ່ສຸດ, ຖືບັນຫາທີ່ປະຊາຊົນເປັນຫ່ວງຢ່າງຮີບຮ້ອນນັ້ນເປັນວຽກງານຮີບດ່ວນຂອງຕົນ, ຄົ້ນຄິດບັນຫາທີ່ປະຊາຊົນສົນໃຈ. ສະນັ້ນບາງພາກສ່ວນສະເໜີວ່າ, ລົງມືເຮັດໃນທັນທີ; ບາງພາກສ່ວນສະເໜີວ່າ, ຕ້ອງແລ່ນເທື່ອດຽວ, ເຂົ້າປະຕູດຽວ. ເຮັດໃຫ້ປະຊາຊົນແລ່ນໜ້ອຍ, ພະນັກງານເຮັດວຽກຫຼາຍ, ເຮັດໃຫ້ປະຊາຊົນມີຄວາມພໍໃຈ, ໄວ້ວາງໃຈ ແລະ ສະບາຍໃຈ.
ວັນທີ 7 ມີນາປີ 2018, ທ່ານສີຈິ້ນຜິງໄດ້ເຂົ້າຮ່ວມການປືກສາຫາລືຂອງຄະນະຜູ້ແທນແຂວງກວາງຕຸ້ງໃນກອງປະຊຸມຄັ້ງທີ 1 ຂອງສະພາປະຊາຊົນແຫ່ງຊາດສະໄໝທີ 13
ວັນທີ 7 ມີນາປີ 2018, ທ່ານສີຈິ້ນຜິງໄດ້ເຂົ້າຮ່ວມການປືກສາຫາລືຂອງຄະນະຜູ້ແທນແຂວງກວາງຕຸ້ງໃນກອງປະຊຸມຄັ້ງທີ 1 ຂອງສະພາປະຊາຊົນແຫ່ງຊາດສະໄໝທີ 13 ໂດຍກ່າວເນັ້ນວ່າ, ພັກກອມມູນິດຕ້ອງສະແຫວງຫາຄວາມຜາສຸກໃຫ້ແກ່ປະຊາຊົນ. ປະຊາຊົນຮູ້ສຶກບໍ່ມີຄວາມສຸກ ບໍ່ດີໃຈ ແລະ ບໍ່ພໍໃຈໃນດ້ານໃດ, ພວກເຮົາກໍຕ້ອງທຳຄວາມພະຍາຍາມໃນດ້ານນັ້ນ, ຊອກຫາທຸກວິທີເພື່ອແກ້ໄຂບັນຫາຫຍຸ້ງຍາກໃຫ້ແກ່ປະຊາຊົນ.
ດັ່ງນັ້ນພວກເຮົາເຫັນໄດ້ວ່າ, ດ້ານໜຶ່ງຖືການສ້າງຄວາມຜາສຸກໃຫ້ແກ່ປະຊາຊົນເປັນຜົນງານການບໍລິຫານໃຫຍ່ທີ່ສຸດ, ອີກດ້ານໜຶ່ງກໍຄື ຊອກຫາທຸກວິທີເພື່ອແກ້ໄຂບັນຫາຫຍຸ້ງຍາກໃຫ້ແກ່ປະຊາຊົນ, ທັງນີ້ກໍຄືແນວຄິດການພັດທະນາຂອງຊາວພັກກອມມູນິດຈີນທີ່ຖືປະຊາຊົນເປັນໃຈກາງ, ກໍເປັນຫຼັກໝັ້ນ ແລະ ຈິດໃຈເພື່ອປະຊາຊົນຂອງຊາວພັກກອມມູນິດຈີນ. ຄວາມຮູ້ສຶກໄດ້ຮັບຜົນປະໂຫຍດ ຄວາມຮູ້ສຶກມີຄວາມຜາສຸກ ແລະ ຄວາມຮູ້ສຶກປອດໄພຂອງປະຊາຊົນເປັນມາດຕະຖານສູງສຸດໃນການກວດສອບຜົນໄດ້ຜົນເສຍ ໃນການປະຕິບັດວຽກງານໃນທຸກຂົງເຂດວຽກງານ.
ຄັນຊັ້ນ, ແນວຄິດການພັດທະນາທີ່ຖືປະຊາຊົນເປັນໃຈກາງແບບນີ້, ເຮັດແນວໃດຈຶ່ງຈະສາມາດຈັດຕັ້ງປະຕິບັດຢ່າງເປັນຮູບປະທຳໃນວຽກງານຕົວຈິງຂອງພວກເຮົາ?
“ລີ້ມິນຈື່ຊື້, ຊື່ຟ້າປີ້ຊິ່ງ; ລີ້ມິນຈື່ຊື້, ຮາວໂມ້ປີ້ຊຸ້ຍ”, ນີ້ໝາຍຄວາມວ່າ“ສິ່ງທີ່ເປັນປະໂຫຍດແກ່ປະຊາຊົນ, ເຖິງຈະເປັນສິ່ງເລັກໜ້ອຍກໍຕາມກໍຕ້ອງປະຕິບັດ; ສິ່ງທີ່ເປັນຜົນຮ້າຍແກ່ປະຊາຊົນ, ເຖິງຈະເປັນສິ່ງເລັກໜ້ອຍກໍຕາມກໍຕ້ອງກຳຈັດໃຫ້ໄດ້”. ປະຫວັດສາດແມ່ນປະຊາຊົນເປັນຜູ້ບັນທຶກໄວ້, ຜົນສຳເລັດທຸກຢ່າງທີ່ໄດ້ມາແມ່ນມາຈາກປະຊາຊົນ. ຂໍແຕ່ພວກເຮົາເຂົ້າເຖິງຈິດໃຈປະຊາຊົນ, ອາໄສປະຊາຊົນຢ່າງແໜ້ນແຟ້ນ, ກໍຈະໄດ້ຮັບກຳລັງແຮງທີ່ບໍ່ມີວັນເຫືອດແຫ້ງ, ຜ່ານຜ່າຟ້າຝົນລົມແດງ, ບຸກບືນກ້າວໄປໜ້າຢ່າງກ້າຫານ.
ທ່ານສີຈິ້ນຜິງໄດ້ຍົກເອົາສຳນວນຈາກຕຳລາບູຮານ, ຄື: “ລີ້ມິນຈື່ຊື້, ຊື່ຟ້າປີ້ຊິ່ງ; ລີ້ມິນຈື່ຊື້, ຮາວໂມ້ປີ້ຊຸ້ຍ”. ເຊິ່ງມີຕົວໜັງສື “ລີ້” ສອງຕົວ, ຕ່າງກໍໝາຍເຖິງ “ເປັນປະໂຫຍດ” ແລະ “ເປັນຜົນຮ້າຍ”, ເຊິ່ງໃນ 2 ກໍລະນີທີ່ແຕກຕ່າງກັນ, ກໍຕ້ອງມີວິທີເຮັດທີ່ແຕກຕ່າງກັນໝົດເຊັ່ນກັນ.
2 ປະໂຫຍກດັ່ງກ່າວມາຈາກປື້ມຂອງທ່ານວ້ານຊື່ຕ້າ ນັກປາດຕຳລາປັດຊະຍາຂົງຈືທີ່ອະມະຕະທີ່ມີຊື່ສຽງຂອງລາຊະວົງຊິ່ງ. ທ່ານວ້ານຊື່ຕ້າມີຜົນງານປື້ມໜຶ່ງ ຊື່ວ່າ “ໂຈ່ກ່ວນປ້ຽນເຟີ່ຍ” ແປວ່າ “ຈຳແນກຂໍ້ຜິດພາດໃນປື້ມລະບຽບການເຈົ້າໜ້າທີ່ລາຊະວົງໂຈ່”, ໃນນັ້ນມີພາກໜຶ່ງໄດ້ເວົ້າເຖິງ 2 ປະໂຫຍກດັ່ງກ່າວ. ຄື “ລີ້ມິນຈື່ຊື້, ຊື່ຟ້າປີ້ຊິ່ງ; ລີ້ມິນຈື່ຊື້, ຮາວໂມ້ປີ້ຊຸ້ຍ”, “ສິ່ງທີ່ເປັນປະໂຫຍດແກ່ປະຊາຊົນ, ເຖິງຈະເປັນສິ່ງເລັກໜ້ອຍກໍຕາມກໍຕ້ອງປະຕິບັດ; ສິ່ງທີ່ເປັນຜົນຮ້າຍແກ່ປະຊາຊົນ, ເຖິງຈະເປັນສິ່ງເລັກໜ້ອຍກໍຕາມກໍຕ້ອງກຳຈັດໃຫ້ໄດ້”. ສະນັ້ນ, ຕ້ອງປະຕິບັດສິ່ງທີ່ເປັນປະໂຫຍດແກ່ປະຊາຊົນ, ແລະກຳຈັດສິ່ງທີ່ເປັນຜົນຮ້າຍແກ່ປະຊາຊົນ.
ໃນປະຫວັດສາດຂອງຈີນຍັງມີເລື່ອງລາວໜຶ່ງທີ່ມີຊື່ສຽງເປັນການຢືນຢັນຕໍ່ທັດສະນະດັ່ງກ່າວ. ພະເອກໃນເລື່ອງນີ້ຊື່ວ່າ ລິວຊົງ, ທັງມີນາມມະຍົດວ່າ “ເຈົ້າຄອງນະຄອນໜຶ່ງຫຼຽນ”. ລິວຊົງເປັນຂຸນນາງຜູ້ໜຶ່ງ, ຕອນເພິ່ນດຳລົງຕຳແໜ່ງ ເພິ່ນມີຄວາມຮັກແພງປະຊາຊົນຫຼາຍທີ່ສຸດ. ສຳລັບສິ່ງທີ່ເປັນປະໂຫຍດແກ່ປະຊາຊົນ ເພິ່ນຈະປະຕິບັດທັງໝົດ, ສຳລັບສິ່ງທີ່ເປັນຜົນຮ້າຍແກ່ປະຊາຊົນນັ້ນ, ເພິ່ນກໍໄດ້ກຳຈັດໄປໝົດ, ສະນັ້ນເພິ່ນຈຶ່ງໄດ້ຮັບຄວາມເຄົາລົບຮັກແພງ ແລະ ໄດ້ຮັບການສະໜັບສະໜູນຈາກປະຊາຊົນທ້ອງຖີ່ນ. ຕອນເພິ່ນດຳລົງຕຳແໜ່ງເຈົ້າຄອງນະຄອນຄວ້າຍຈີ່, ຍ້ອນມີຜົນງານທີ່ພົ້ນເດັ່ນ ຈຶ່ງໄດ້ເລື່ອນຕຳແໜ່ງໄປເປັນຂຸນນາງຢູ່ລາຊະສຳນັກ. ເມື່ອຮູ້ຂ່າວນີ້ແລ້ວ, ຜູ້ເຖົ້າຫ້າຫົກຄົນໄດ້ເອົາເງິນຫຼຽນຜູ້ລະ 100 ຫຼຽນມາໃຫ້ເພິ່ນ.
ຜູ້ເຖົ້າເຫຼົ່ານີ້ພົບລິວຊົງແລ້ວເວົ້າວ່າ, ໃນເມື່ອກ່ອນ,ຂຸນນາງມາຮອດບ່ອນນີ້ແລ້ວຍິນແຕ່ສຽງໝາເຫົ່າໃນກາງຄືນຈົນໝົດຄືນກໍມີ. ຍ້ອນຫຍັງ? ຍ້ອນວ່າຂຸນນາງ ຈະລໍຖ້າຮອດສະເພາະແຕ່ຕອນກາງຄືນທີ່ປະຊາຊົນພັກຢູ່ເຮືອນ, ເພື່ອໄປເກັບພາສີອາກອນ ແລະ ເງິນຄ່າຕ່າງໆນຳປະຊາຊົນ. ໃນຜ່ານມາທີ່ຂຸນນາງຜູ້ອື່ນເປັນຜູ້ປົກຄອງຢູ່ນີ້, ໄດ້ຍິນສຽງໝາເຫົ່າໝົດຄືນ, ດຽວນີ້ທ່ານເປັນຂຸນນາງຢູ່ນີ້ມາຫຼາຍປີ, ແຕ່ບໍ່ໄດ້ຍິນສຽງໝາເຫົ່າໃນກາງຄືນແລ້ວ, ຖືວ່າພາລະຂອງປະຊາຊົນຫຼຸດຜ່ອນລົງຢ່າງຫຼວງຫຼາຍ. ບາດນີ້ທ່ານຈະລາໄປແລ້ວ, ພວກເຮົາຂໍສະແດງຄວາມຮູ້ບຸນຄຸນຢ່າງຍິ່ງ, ເຖິງວ່າຈະບໍ່ສາມາດຮັກສາທ່ານຢູ່ບ່ອນເກົ່າໄດ້ກໍຕາມ, ແຕ່ກໍຂໍສະແດງນໍ້າໃຈໜ້ອຍໜຶ່ງ.
ລິວຊົງຮູ້ສຶກຕື້ນຕັນໃຈຫຼາຍ, ແລະເວົ້າວ່າ, ຖ້າບໍ່ຮັບກໍຈະເສຍນໍ້າໃຈຂອງບັນດາທ່ານ, ຖ້າຮັບກໍບໍ່ສາມາດຮັບໄດ້ຫຼາຍປານນີ້. ຄັນຊັ້ນ, ຂ້າພະເຈົ້າຂໍຮັບເອົາຫຼຽນໜຶ່ງເດີ້. ນີ້ກໍຄືທ່ານລິວຊົງ ທີ່ຖືກເອີ້ນວ່າ “ເຈົ້າຄອງນະຄອນຫຼຽນໜຶ່ງ”, ເຊິ່ງເປັນບຸກຄົນທີ່ມີຊື່ສຽງໃນປະຫວັດສາດຂອງຈີນ. ເຊິ່ງເງິນໜຶ່ງຫຼຽນນີ້, ໄດ້ສ່ອງແສງເຖິງເຫື່ອແຮງຈິດໃຈ ແລະສະຕິປັນຍາທີ່ຊອກຫາທຸກວິທີເພື່ອສ້າງຜົນປະໂຫຍດໃຫ້ແກ່ປະຊາຊົນ; ເງິນໜຶ່ງຫຼຽນນີ້, ທຸ້ມເທເຫື່ອແຮງຈິດໃຈ, ລົບລ້າງປະກົດການທີ່ຂຸນນາງຜູ້ໂຫດຮ້າຍກົດຂີ່ຂູດຮີດປະຊາຊົນຢ່າງຮ້າຍແຮງ; ເງິນໜຶ່ງຫຼຽນນີ້, ກໍປຽບເໝືອນຊັບສິນເງິນຄຳເປັນພັນເປັນໝື່ນຢ່າງລໍ້າຄ່າ.
ປະຫວັດສາດເໝືອນກັບແວ່ນແຍງ, ພວກເຮົາຄວນຖອດຖອນບົດຮຽນຈາກປະຫວັດສາດ. ເວົ້າສຳລັບປະເທດໜຶ່ງແລ້ວ, ປະຊາຊົນອັນໄພສານ, ເຊິ່ງລວມທັງນັກຮຽນນັກສຶກສາ, ໂດຍສະເພາະແມ່ນພະນັກງານທີ່ເປັນສະມາຊິກພັກ, ຄວນລົງເລິກຊອກຮູ້ຮ່ຳຮຽນຮູ້ປະຫວັດສາດເພື່ອຖອດຖອນເອົາສະຕິປັນຍາ ແລະ ບົດຮຽນດ້ານການບໍລິຫານປະເທດ, ປະກອບສ່ວນຫຼາຍກວ່າເກົ່າ ແລະ ດີກວ່າເກົ່າເຂົ້າສູ່ພາລະກິດສ້າງສາພັດທະນາສັງຄົມ ແລະ ປະເທດຊາດ.
ຄຳເຫັນ
0