ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ໃນວັດທະນະທຳຈີນທີ່ມີມູນເຊື້ອມາແຕ່ສະໄໝບູຮານໂດຍສະເພາະແມ່ນໃນວັດທະນະທຳປັດຊະຍາຂົງຈືໄດ້ເນັ້ນ ຄຳວ່າ “ ເຢີນ” ແປວ່າ “ເມດຕາ” ຕະຫຼອດມາ. ຄຳວ່າ “ ເຢີນ” ຫຼື “ເມດຕາ” ກໍໝາຍເຖິງ ຮັກຄົນ, ສະນັ້ນ ຈຶ່ງສາມາດສະຫຼຸບຄວາມໝາຍວ່າ ຜູ້ປົກຄອງຮັກແພງເອົາໃຈໃສ່ປະຊາຊົນ ກໍຄືຄວາມເອົາໃຈໃສ່ຕໍ່ສາຍພົວພັນກົມກຽວປອງດອງລະຫວ່າງຄົນກັບຄົນທີ່ສ້າງຕັ້ງຂຶ້ນໃນຂະບວນການພັດທະນາຂອງສັງຄົມມະນຸດ. ດ້ວຍເຫດນີ້, ໃນເວລາດົນນານ 2 000 ກວ່າປີຜ່ານມາ, ແນວຄິດ “ເມດຕາ” ແລະແນວຄິດການປົກຄອງດ້ວຍຄວາມເມດຕາໃນວັດທະນະທຳປັດຊະຍາຂົງຈື ໄດ້ກາຍເປັນປັດໄຈທີ່ດີເດັ່ນໃນວັດທະນະທຳການເມືອງທີ່ມີມູນເຊື້ອຂອງຈີນ.
ຈົນມາເຖິງປັດຈຸບັນ, ໃນແນວຄິດບໍລິຫານປະເທດຂອງທ່ານສີຈິ້ນຜິງ, ສຳລັບແນວຄິດການປົກຄອງດ້ວຍຄວາມເມດຕາທີ່ເປັນມູນເຊື້ອຂອງຈີນນັ້ນ ກໍໄດ້ມີການຫັນປ່ຽນແລະຂະຫຍາຍຕົວຢ່າງມີການປະດິດສ້າງຫຼາຍຢ່າງ. ສະນັ້ນ, ຫົວຂໍ້ຂອງລາຍການພາກນີ້ຈະປິ່ນອ້ອມກັບຄຳວ່າ “ການປົກຄອງດ້ວຍຄວາມເມດຕາ”
ນັບແຕ່ກອງປະຊຸມໃຫຍ່ຄັ້ງທີ 18 ຂອງພັກກອມມູນິດຈີນເມື່ອປີ 2012 ເປັນຕົ້ນມາ, ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນໄດ້ກ່າວຄຳປາໄສສຳຄັນຕ່າງໆ, ຜ່ານຈາກການເຊື່ອມຊຶມບົດປາໄສສຳຄັນຕ່າງໆຂອງທ່ານສີຈິ້ນຜິງໂດຍປະສານສົມທົບກັບວັດທະນະທຳທີ່ມີມູນເຊື້ອອັນດີງາມຂອງຈີນ,ສາມາດສະຫຼຸບໄດ້ຂໍ້ຄິດ 3 ຂໍ້ຄື
ໜຶ່ງ: ໃຫ້ຄວາມສຳຄັນຕໍ່ຊີວິດການເປັນຢູ່ຂອງປະຊາຊົນ
ສອງ: ອົບຮົມບົ່ມສອນຈິດໃຈປະຊາຊົນ
ສາມ: ໄດ້ຮັບຄວາມເຫຼືອມໃສສັດທາຈາກປະຊາຊົນກ່ຽວກັບບັນຫາທີໜຶ່ງ ຄື ການໃຫ້ຄວາມສຳຄັນຕໍ່ຊີວິດການເປັນຢູ່ຂອງປະຊາຊົນ.
ອຸດົມການແຕ່ຫົວທີແລະພາລະກຳຂອງພັກກອມມູນິດຈີນກໍຄືສະແຫວງຫາຄວາມຜາສຸກໃຫ້ແກ່ປະຊາຊົນຈີນ, ສະແຫວງຫາການຟື້ນຟູຄວາມຈະເລີນຮຸ່ງເຮືອງຂອງປະຊາຊາດຈີນ ເພື່ອໃຫ້ປະຊາຊົນມີຊີວິດການເປັນຢູ່ທີ່ດີງາມແລະມີຄວາມສຸກ. ແນ່ນອນແລ້ວ, ການທີ່ໃຫ້ປະຊາຊົນມີຊີວິດການເປັນຢູ່ທີ່ດີງາມແລະມີຄວາມຜາສຸກນັ້ນ ເດັດຂາດຈະບໍ່ເປັນຄຳເວົ້າລ້າໆ, ແຕ່ຄວນສະແດງໃຫ້ເຫັນໃນການແກ້ໄຂບັນຫາຊີວິດການເປັນຢູ່ຕົວຈິງທີ່ປະຊາຊົນສົນໃຈທີ່ສຸດ ແລະສະແດງໃຫ້ເຫັນໃນການຈັດຕັ້ງປະຕິບັດລະບຽບການ,ນະໂຍບາຍ,ກົດໝາຍກົດລະບຽບໃຫ້ເປັນຮູບປະທຳແລະໃຫ້ມີປະສິດທິຜົນ. ເວົ້າລວມແລ້ວກໍຄືໃຫ້ປະຊາຊົນສາມາດຮ່ວມກັນຊົມໃຊ້ໝາກຜົນແຫ່ງການປະຕິຮູບແລະເປີດປະຕູສູ່ພາຍນອກ, ໃຫ້ປະຊາຊົນໄດ້ຮັບຜົນປະໂຫຍດຕົວຈິງຢ່າງຫຼວງຫຼາຍຍິ່ງໆຂຶ້ນ, ໃຫ້ປະຊາຊົນມີຄວາມຮູ້ສຶກໄດ້ຮັບຜົນປະໂຫຍດ,ຮູ້ສຶກມີຄວາມຜາສຸກ ແລະຮູ້ສຶກມີຄວາມປອດໄພ ຫຼາຍຂຶ້ນກວ່າເກົ່າ. ຄັນຊັ້ນ, ກ່ຽວກັບຊີວິດການເປັນຢູ່ຂອງປະຊາຊົນ,ມາຟັງຄວາມເຫັນຂອງທ່ານສີຈິ້ນຜິງນຳກັນເລີຍ.
“ການບໍລິຫານບ້ານເມືອງມີຫຼັກການ, ສິ່ງສຳຄັນທີ່ສຸດຄືສ້າງຜົນປະໂຫຍດໃຫ້ແກ່ປະຊາຊົນ.ແນວຄິດການພັດທະນາທີ່ຖືປະຊາຊົນເປັນໃຈກາງ ມັນບໍ່ແມ່ນນິຍາມທີ່ເປັນນາມມະທຳແລະເລິກລັບ,ເຂົ້າໃຈຍາກ. ບໍ່ຄວນເວົ້າແຕ່ປາກລ້າໆແລະຢຸດຈຶ້ງຢູ່ແຕ່ດ້ານແນວຄິດເທົ່ານັ້ນ, ແຕ່ຄວນສະແດງໃຫ້ເຫັນໃນທຸກຂອດແຫ່ງການພັດທະນາເສດຖະກິດສັງຄົມ. ຕ້ອງຍຶດໝັ້ນຖານະຕົ້ນຕໍຂອງປະຊາຊົນ”, ຕອບສະໜອງກັບຄວາມມຸ້ງຫວັງຂອງປະຊາຊົນຕໍ່ຊີວິດທີ່ດີງາມ. ບັນລຸເປົ້າໝາຍເພື່ອໃຫ້ປະຊາຊົນອັນໄພສານທີ່ສຸດໃຫ້ໄດ້ຮັບຜົນປະໂຫຍດພື້ນຖານ ທັງປົກປັກຮັກສາແລະເສີມຂະຫຍາຍຜົນປະໂຫຍດພື້ນຖານຂອງເຂົາເຈົ້າໃຫ້ຫຼາຍເທົ່າທີ່ຈະຫຼາຍໄດ້ຢ່າງບໍ່ຢຸດຢັ້ງ ຕ້ອງບັນລຸເປົ້າໝາຍ ການພັດທະນາເພື່ອປະຊາຊົນ, ການພັດທະນາແມ່ນອາໄສປະຊາຊົນແລະໃຫ້ປະຊາຊົນຮ່ວມກັນຊົມໃຊ້ໝາກຜົນແຫ່ງການພັດທະນານັ້ນໃຫ້ໄດ້ຢ່າງສຳເລັດຜົນ.
ທີ່ຟັງມານັ້ນ ແມ່ນຄວາມເວົ້າຂອງທ່ານສີຈິ້ນຜິງທີ່ກ່າວໃນການສຳມະນາພາຍໃຕ້ຫົວຂໍ້ເຊື່ອມຊຶມແລະຜັນຂະຫຍາຍເນື້ອໃນຈິດໃຈກອງປະຊຸມຄົບຄະນະເທື່ອທີ 5 ສະໄໝທີ 18 ຂອງຄະນະກຳມະການສູນກາງພັກກອມມູນິດຈີນສຳລັບພະນັກງານການນຳຂັ້ນແຂວງແລະກະຊວງເມື່ອວັນທີ 18 ມັງກອນ 2016.
ທ່ານສີຈິ້ນຜິງກ່າວໃນການສຳມະນາພາຍໃຕ້ຫົວຂໍ້ເຊື່ອມຊຶມແລະຜັນຂະຫຍາຍເນື້ອໃນຈິດໃຈກອງປະຊຸມຄົບຄະນະເທື່ອທີ 5 ສະໄໝທີ 18 ຂອງຄະນະກຳມະການສູນກາງພັກກອມມູນິດຈີນສຳລັບພະນັກງານການນຳຂັ້ນແຂວງແລະກະຊວງເມື່ອວັນທີ 18 ມັງກອນ 2016
ໃນຄວາມເວົ້າດັ່ງກ່າວຂອງທ່ານສີຈິ້ນຜິງໄດ້ຍົກເອົາສຳນວນອະມະຕະໃນຕຳລາບູຮານຂອງຈີນຄື “ຈື້ໂກວໂຢສາງ, ເອີລີ້ມິນເວີຍເປີນ”ຄຳນີ້ບັນທຶກໄວ້ໃນປຶ້ມ “ຮວາຍນານຈື ຮັ້ນລຸນຊຸ້ນ” ທີ່ຮຽບຮຽງແລະປະດິດຄິດແຕ່ງໂດຍ ລິວອ່ານ ນັກວັນນະຄະດີທີ່ມີຊື່ສຽງໃນສະໄໝລາຊະວົງຮັ້ນຕາເວັນຕົກ (ກ່ອນຄສ ປີ202—ຄສປີ 8) ເຊິ່ງປະໂຫຍກດັ່ງກ່າວມີຄວາມໝາຍວ່າ : ການບໍລິຫານບ້ານເມືອງມີຫຼັກການ, ສິ່ງສຳຄັນທີ່ສຸດຄືສ້າງຜົນປະໂຫຍດໃຫ້ແກ່ປະຊາຊົນ. ເປັນປະໂຫຍດຕໍ່ປະຊາຊົນ ກໍໝາຍຄວາມວ່າ ຕ້ອງເຮັດໃຫ້ປະຊາຊົນໄດ້ຮັບຜົນປະໂຫຍດຕົວຈິງ.
ຕົວຢ່າງເຊັ່ນ: ປຶ້ມ “ສືຈີ່”ແປວ່າ “ບັນທຶກປະຫວັດສາດ” ແລະປຶ້ມ “ຈ້ານໂກວເຊີ້” ແປວ່າ ຍຸທະວິທີຈ້ານກົກ ເຊິ່ງໄດ້ປະດິດຄິດແຕ່ງຂຶ້ນໃນສະໄໝລາຊະວົງຮັ້ນຕາເວັນຕົກ, ເມື່ອກ່າວເຖິງເລື່ອງລາວຂອງເຈົ້າຊີວິດອູລິງ ຂອງແຄວ້ນຈ້າວທີ່ນຳເຂົ້າຊຸດຕ່າງເຜົ່າແລະເຕັກນິກການຍິງທະນູ,ຂີ່ມ້າ ເຂົ້າສູ່ແຄວ້ນຕົນນັ້ນກໍໄດ້ນຳໃຊ້ປະໂຫຍກດັ່ງກ່າວຄື “ຈື້ໂກວໂຢສາງ, ເອີລີ້ມິນເວີຍເປີນ, ເຈີ້ງຈ້ຽວໂຢວຈິ່ງ ເອີ ລິ້ງສິງເວີຍຊາງ ”ແປວ່າ ການບໍລິຫານບ້ານເມືອງມີຫຼັກການ, ສິ່ງສຳຄັນທີ່ສຸດຄືສ້າງຜົນປະໂຫຍດໃຫ້ແກ່ປະຊາຊົນ. ການອົບຮົມບົ່ມສອນຈິດໃຈດ້ານການເມືອງທີ່ມີຫຼັກການ, ສິ່ງສຳຄັນທີ່ສຸດແມ່ນຄຳສັ່ງຂອງລັດໄດ້ຮັບການປະຕິບັດ. ເລື່ອງລາວນີ້ມັນເປັນແນວນີ້: ໃນແຄວ້ນຕ່າງໆຂອງຈີນໃນສະໄໝນັ້ນ, ແຄວ້ນຈ້າວ ເປັນແຄວ້ນໜຶ່ງທີ່ຢູ່ຕິດກັບພາກເໜືອ, ຢູ່ພາກເໜືອກໍໝາຍຄວາມວ່າ ປະຊາຊົນແຄວ້ນນີ້ໄດ້ດຳລົງຊີວິດແບບສະຫຼັບຊັບຊ້ອນກັບຊົນເຜົ່າລ້ຽງສັດແບບເຄື່ອນທີ່ຕາມທົ່ງຫຍ້າ. ເຜົ່າລ້ຽງສັດແບບເຄື່ອນທີ່ແມ່ນຊົນເຜົ່າທີ່ມີຄວາມຊຳນານໃນການຂີ່ມ້າ, ສະນັ້ນ, ກອງທັບຂອງເຂົາເຈົ້າຈິ່ງເຄື່ອນໄຫວໄດ້ດ້ວຍໄຫວພິບວ່ອງໄວທີ່ສຸດ. ສະນັ້ນ, ໃນເວລາທີ່ປະຊາຊົນແຄວ້ນຈ້າວດຳລົງຊີວິດແບບອາໄສຢູ່ຢ່າງສະຫຼັບຊັບຊ້ອນກັບເຜົ່າລ້ຽງສັດແບບເຄື່ອນທີ່ນັ້ນກໍເສຍປຽບເລື້ອຍໆ. ພາຍຫຼັງປະສົບກັບຄວາມປະລາໄຊເລື້ອຍໆໃນການຕໍ່ສູ້ກັບເຜົ່າລ້ຽງສັດແບບເຄື່ອນທີ່ແລ້ວ, ເຈົ້າຊີວິດອູລິງແຄວ້ນຈ້າວກໍເລີຍຕັດສິນໃຈນຳເຂົ້າເຕັກນິກຂີ່ມ້າແລະເຕັກນິກຍິງທະນູເພື່ອກໍ່ສ້າງກອງທະຫານມ້າຂອງຕົນ.
ໃນນີ້ ຄຳວ່ານຳເຂົ້າເຕັກນິກການຂີ່ມ້າແລະຍິງທະນູ ກໍໝາຍຄວາມວ່າ ທະຫານຂອງແຄວ້ນຈ້າວຕ້ອງຮຽນຂີ່ມ້າ. ເວົ້າເລື່ອງຂີ່ມ້າຄັນຢູ່ໃນປັດຈຸບັນຄືວ່າເປັນເລື່ອງງ່າຍທີ່ສຸດ. ແຕ່ວ່າໃນສະໄໝນັ້ນ,ມັນເປັນເຕັກນິກສຳຄັນທີ່ສຸດທີ່ຕ້ອງນຳເຂົ້າແທ້ໆ.
ເມື່ອນຳເຂົ້າເຕັກນິກຂີ່ມ້າແລ້ວ, ກໍໝາຍຄວາມວ່າ ຊຸດທະຫານມ້າກໍຕ້ອງປ່ຽນໝົດ. ເວົ້າສຳລັບຊົນເຜົ່າທີ່ຢູ່ພາກກາງຈີນແລ້ວ, ມັນເປັນສິ່ງທ້າທາຍອັນໃຫຍ່ຫຼວງບໍ່ວ່າໃນດ້ານວັດທະນະທຳກໍຄືດ້ານຈິດໃຈ.
ແຕ່ວ່າ ເຈົ້າຊີວິດອູລິງຄິດແລ້ວຄິດອີກ ໃນທີ່ສຸດກໍໄດ້ຕັດສິນໃຈໂດຍຄຳນຶງວ່າ “ການບໍລິຫານບ້ານເມືອງມີຫຼັກການ, ສິ່ງສຳຄັນທີ່ສຸດຄືສ້າງຜົນປະໂຫຍດໃຫ້ແກ່ປະຊາຊົນ.” ໃນເມື່ອການນຳເຂົ້າຊຸດຕ່າງເຜົ່າແລະວິທີການຂີ່ມ້າ,ຍິງທະນູ ເປັນສິ່ງທີ່ສາມາດປົກປ້ອງການຜະລິດແລະຊີວິດການເປັນຢູ່ຂອງປະຊາຊົນແຄວ້ນຈ້າວ, ມັນເປັນສິ່ງທີ່ເປັນປະໂຫຍດຕໍ່ປະຊາຊົນ, ຄັນຊັ້ນ ເຖິງຈະຕ້ອງຜ່ານຜ່າຄວາມຫຍຸ້ງຍາກຕ່າງໆນານາກໍຕາມກໍຕ້ອງປະຕິບັດໃຫ້ໄດ້. ຈາກນີ້, ຂະບວນການນຸ່ງຊຸດຕ່າງເຜົ່າແລະຮຽນເຕັກນິກຂີ່ມ້າແລະຍິງທະນູ ທີ່ລິເລີ່ມສົ່ງເສີມໂດຍເຈົ້າຊີວິດອູລິງຈິ່ງໄດ້ດຳເນີນໄປຢ່າງເປັນຂະບວດຟົດຟື້ນໃນທົ່ວແຄວ້ນຈ້າວ ເຊິ່ງເຮັດໃຫ້ກຳລັງແຮງສັງລວມຂອງແຄວ້ນຈ້າວຂະຫຍາຍຕົວແລະເຂັ້ມແຂງທີ່ສຸດໃນປະຫວັດສາດ.
“ການບໍລິຫານບ້ານເມືອງມີຫຼັກການ, ສິ່ງສຳຄັນທີ່ສຸດຄືສ້າງຜົນປະໂຫຍດໃຫ້ແກ່ປະຊາຊົນ.” ເປັນເຫດຜົນທີ່ງ່າຍທີ່ສຸດ. ແຕ່ເມື່ອເບິ່ງໃນດ້ານປະຫວັດສາດແລ້ວ, ຢາກປະຕິບັດໃຫ້ເປັນຮູບປະທຳຢ່າງແທ້ຈິງນັ້ນຫາກບໍ່ແມ່ນເລື່ອງງ່າຍ. ຄືດັ່ງທີ່ພວກເຮົາໄດ້ເລົ່າເລື່ອງໃນມື້ກີ້ຫັ້ນລະ, ຢາກໃຫ້ທະຫານມ້າຮຽນຮູ້ການສູ້ຮົບເທິງຫຼັງມ້າມັນເປັນສິ່ງທີ່ເປັນປະໂຫຍດຕໍ່ປະຊາຊົນແທ້. ແຕ່ວ່າ ການປະຕິບັດຕົວຈິງໃນສະໄໝນັ້ນພັດຕ້ອງປະສົບຄວາມສ່ຽງແນ່ນອນ. ເວົ້າຮອດນີ້ກໍຄິດພໍ້ທຸກມື້ນີ້ທີ່ຈີນປະຕິບັດນະໂຍບາຍລົງເລິກການປະຕິຮູບຢ່າງຮອບດ້ານ, ພວກເຮົາໄດ້ເວົ້າຕະຫຼອດວ່າ ມັນເປັນການສູ້ຊົນຜ່ານຜ່າຄວາມຫຍຸ້ງຍາກລຳບາກປຽບເໝືອນການຂ້າມແກ້ງສ່ຽງອັນຕະລາຍ ເຊິ່ງສະແດງໃຫ້ເຫັນວ່າ ການຢາກເຮັດສິ່ງທີ່ເປັນປະໂຫຍດແກ່ປະຊາຊົນຢ່າງແທ້ຈິງນັ້ນບໍ່ແມ່ນເລື່ອງງ່າຍແທ້ໆ.
ດັ່ງທີ່ທ່ານສີຈິ້ນຜິງໄດ້ເວົ້າວ່າ: ການເຮັດໃຫ້ປະຊາຊົນມີຊີວິດການເປັນຢູ່ທີ່ດີງາມ ເດັດຂາດມັນບໍ່ແມ່ນຄຳເວົ້າທີ່ເປັນພຽງຮູບປະທຳເທົ່ານັ້ນ, ແຕ່ຕ້ອງເຮັດແທ້ທຳຈິງດ້ວຍຄວາມມຸ້ງໝັ້ນຢ່າງເດັດດ່ຽວໜຽວແໜ້ນຈຶ່ງຈະສຳເລັດຜົນໄດ້.
ຄຳເຫັນ
0