黄理春

ຕາລາງລາຍການ FM93Mhz

ດາວໂຫຼດ App CRI-FM93 ລະບົບ IOS

ດາວໂຫຼດ App CRI-FM93 ລະບົບ Android

FM93

ບໍ່ຄວນເຮັດໃຫ້ຂ່າວລືແລະຄວາມ​ລຳອຽງທໍາລາຍການປ້ອງກັນແລະຄວບຄຸມ​ການ​ແຜ່​ລະບາດ​ຂອງພະ​ຍາດ​

2020-02-10 16:52:12 cri

     ວັນທີ 8 ກຸມພານີ້, ທ່ານ ເຕໂດຣສ ອັດຮາໂນມ ເກເບຣເຢຊຸສ ຜູ້ອໍານວຍການໃຫຍ່ອົງການອະນາໄມໂລກ ຫຼື WHO ກ່າວວ່າ: ອົງການຕົນບໍ່ພຽງແຕ່ພວມພະຍາຍາມສະກັດກັ້ນການແຜ່ລະບາດ​ຂອງພະ​ຍາດອັກ​ເສບ​ປອດ​ຈາກ​ເຊື້ອ​ຈຸ​ລະ​ໂລກ​ສາຍ​ພັນ​ໃໝ່ເທົ່ານັ້ນ, ​ແຕ່ຍັງຕໍ່ສູ້ກັບມື​ຍຸຍົງ​ສົ່ງ​ເສີມ​ທາງ​ອິນ​ເຕີ​ເນັດ(Web hyper) ແລະ ຜູ້​ໂຄສະນາ​ຊວນ​ເຊື່ອຕໍ່​ຖ້ອຍ​ຄຳ​ທີ່​ວ່າ​ເປັນ “​ເຫດການທີ່​ມີກົນອຸບາຍ” ທີ່ໄດ້ເຜີຍແຜ່ຂ່າວຜິດພາດ, ທໍາລາຍການຮັບມືກັບສະພາບການ​ແຜ່​ລະບາດ​ຂອງພະຍາດອີກດ້ວຍ.   ທ່ານກ່າວເນັ້ນວ່າ: ຂ່າວ​ທີ່ຜິດພາດ​ໄດ້ເຮັດໃຫ້ວຽກງານຂອງພະນັກງານສາທາລະນະ​ສຸກ​ປະສົບຄວາມຫຍຸ້ງຍາກຫຼາຍກວ່າເກົ່າ, ຍັງໄດ້ຫັນ​ເຫ​ຄວາມ​ສົນ​ໃຈຂອງຜູ້ຕັດສິນນະໂຍບາຍອີກ, ເປັນການສ້າງຄວາມວຸ້ນວາຍໃຫ້ແກ່ສັງຄົມ, ສ້າງ​ຄວາມ​ຫວາດ​ຫວັ່ນ​ໃຫ້​ຄົນ​ທົ່ວ​ໄປ. ສະນັ້ນ, ອົງການຕົນພວມສ້າງຕັ້ງທີມເປີດເຜີຍເລື່ອງຄວາມ​ເປັນຈິງທີມຫນຶ່ງ ເພື່ອສະກັດ​ກັ້ນການເຜີຍແຜ່ຂ່າວຜິດພາດ. ທ່າທີດັ່ງກ່າວກໍ່ຄືມາດຕະການທີ່ກ່ຽວຂ້ອງຂອງອົງການອະນາ​ໄມ​ໂລກ ​ໄດ້ມີຄວາມຫມາຍສໍາຄັນຕໍ່ການສະກັດກັ້ນການເຜີຍແຜ່ຂ່າວລືແລະສະກັດກັ້ນບໍ່ໃຫ້ມີກໍາລັງບໍ່​ເປັນ​ການ​ສ້າງສັນລົບກວນການປ້ອງກັນແລະຄວບຄຸມການ​ແຜ່​ລະບາດ​ຂອງພະຍາດອັກເສບປອດສາຍພັນໃຫມ່.

     ຫຼັງຈາກເກີດການ​ແຜ່​ລະບາດ​ຂອງພະຍາດອັກ​ເສບ​ປອດ​ຈາກ​ເຊື້ອ​ຈຸ​ລະ​ໂລກ​ສາຍ​ພັນ​ໃໝ່, ຈີນບໍ່ພຽງແຕ່ສາມາດຄົ້ນຄວ້າ​ແລະຈໍາແນກເຊື້ອຈຸລະ​ໂລກ​ໄດ້ໃນເວລາສັ້ນ​ເປັນ​ການສ້າງສະຖິຕິໃຫມ່ ແລະ ໄດ້​ແຈ້ງ​ລຳດັບແຊນຂອງເຊື້ອຈຸລະໂລກດັ່ງກ່າວ​ໃຫ້ອົງການອະນາໄມໂລກແລະປະເທດອື່ນໆຊາບຢ່າງເປັນເຈົ້າການ ແລະທັນການ, ທັງແຈ້ງສະພາບການ​ແຜ່​ລະບາດ​ຂອງພະຍາດຕໍ່ພາຍນອກຢ່າງເປີດເຜີຍແລະໂປ່ງໃສ, ຂະນະດຽວກັນກໍ່ໄດ້ໃຊ້ມາດຕະການແບບຂາດຕົວເພື່ອສະກັດກັ້ນບໍ່ໃຫ້ພະຍາດແຜ່ລະບາດຂະຫຍາຍ​ວົງ​ກວ້າງ​ອອກ ເຊິ່ງໄດ້ຮັບການ​ຢືນຢັນແລະການສະຫນັບສະຫນູນໂດຍທົ່ວໄປຈາກປະຊາໂຄມໂລກ. ແຕ່ວ່າ, ນັກການເມືອງ ແລະ ສື່ມວນຊົນຂອງບາງປະເທດຕາເວັນຕົກໄດ້ປັ້ນຂ່າວ​ເທັດ​ຂຶ້ນ​ເລື້ອຍໆ, ຍິ່ງກວ່ານັ້ນຍັງໄດ້ຕັ້ງ​ໃຈກໍ່​ເລື່ອງຂຶ້ນວ່າ ​ເປັນ​ “ເຫດການ​ທີ່​ມີກົນອຸບາຍ”, ໃສ່ຮ່າຍປ້າຍສີແລະກ່າວໂຈມຕີຕໍ່ຈີນ, ​ໄດ້​ສ້າງຄວາມຢ້ານກົວຮຸນ​ແຮງຂຶ້ນຕື່ມ, ລ່ວງລໍ້າສິດແລະຜົນປະໂຫຍດຂອງຊາວຈີນຕ່າງດ້າວກໍ​ຄືບຸກຄົນເຊື້ອສາຍປະ​ເທດອາຊີ, ທັງເປັນການລົບກວນຢ່າງໜັກໜ່ວງຕໍ່ການຮ່ວມມືສາກົນ​ໃນ​ການສະກັດ​ກັ້ນການ​ແຜ່​ລະບາດ​ຂອງພະຍາດອີກ​ດ້ວຍ.

     ເຊື້ອພະຍາດແມ່ນສັດຕູຮ່ວມກັນຂອງມວນມະນຸດ. ຈີນໃຊ້ມາດຕະການປ້ອງກັນ ແລະ ຄວບຄຸມທີ່ຮອບດ້ານທີ່​ສຸດແລະເຄັ່ງຄັດທີ່ສຸດ, ບໍ່ພຽງແຕ່ແມ່ນເພື່ອປ້ອງກັນປະຊາຊົນຂອງປະເທດຕົນເທົ່ານັ້ນ, ຫາກຍັງເພື່ອປ້ອງກັນປະຊາຊົນປະ​ເທດ​ຕ່າງໆໃນໂລກອີກດ້ວຍ.

 

ຄຳ​ເຫັນ

0