ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
“ຂ້າພະເຈົ້າໄດ້ກ່າວມາຕະຫຼອດວ່າ, ທົ່ວມວນມະນຸດຄືປະຊາຄົມຮ່ວມຊາຕາກຳ” ນີ້ແມ່ນຄຳເວົ້າຂອງທ່ານປະທານສີຈີ້ນຜິງທີ່ກ່າວໃນຈົດໝາຍຕອບທ່ານບິວ ເກດ ປະທານມູນນິທິເກດອາເມລິກາໃນຫວ່າງກ່ອນນີ້ບໍ່ດົນ. ກ່ອນນີ້ ທ່ານບິວ ເກດໄດ້ສົ່ງຈົດ ໝາຍເຖິງທ່ານປະທານສີຈິ້ນຜິງ ເພື່ອສະແດງຄວາມຊົມເຊີຍຕໍ່ລັດຖະບານແລະປະຊາຊົນຈີນທີ່ໄດ້ຕໍ່ສູ້ຕ້ານກັບ ພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ ແລະ ໄດ້ຮັບຜົນທີ່ດີ.
ຄັນຊັ້ນ ປະຊາຄົມຮ່ວມຊາຕາກຳຄືປະຊາຄົມແບບໃດ? ການເກີດສະພາບພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ຄັ້ງນີ້ໄດ້ເຮັດໃຫ້ມວນມະນຸດມີຄວາມຮັບຮູ້ຕໍ່ປະຊາຄົມຮ່ວມຊາຕາກຳຢ່າງເລິກເຊິ່ງກວ່າເກົ່າ ເຊິ່ງການແຜ່ລະບາດຂອງເຊື້ອພະຍາດແມ່ນບໍ່ມີພົມແດນ, ການເອົາຊະນະພະຍາດຮ້າຍນີ້ ຕ້ອງການໃຫ້ປະເທດຕ່າງໆສາມັກຄີຮ່ວມມືກັນ, ຄຽງບ່າຄຽງໄຫຼ່ສູ້ຊົນຮ່ວມກັນ. ນອກຈາກນີ້ແລ້ວ ບໍ່ມີທາງເລືອກອື່ນໃດ.
ຈາກການນຳໃຊ້ມາດຕະການທີ່ຮອບດ້ານທີ່ສຸດ, ເຂັ້ມງວດທີ່ສຸດແລະເຖິງຖອງທີ່ສຸດ ເພື່ອຊຸກຍູ້ໃຫ້ວຽກງານປ້ອງກັນແລະຄວບຄຸມໄດ້ຮັບໝາກຜົນທີ່ສຳຄັນ, ຈົນກ້າວໄປເຖິງການແຈ້ງຂໍ້ມູນຕາມຄວາມເປັນຈິງໃຫ້ອົງການອະນາໄມໂລກກໍຄືບັນດາປະເທດແລະເຂດແຄວ້ນທີ່ກ່ຽວຂ້ອງໄດ້ຮັບຮູ້ຢ່າງທັນການ ເພື່ອຍາດເອົາໂອກາດອັນມີຄ່າໃຫ້ກັບໂລກໄດ້ມີເວລາໃນການປ້ອງກັນແລະຄວບຄຸມພະຍາດຢ່າງທັນການ, ເຊິ່ງທັງໝົດເຫຼົ່ານີ້ລ້ວນແຕ່ສະແດງໃຫ້ເຫັນວ່າ ຈີນພວມສຸມຄວາມພະຍາຍາມຢ່າງສຸດຂີດເພື່ອເຮັດວຽກຂອງຕົນເອງໃຫ້ດີ, ປົກປ້ອງຊີວິດແລະສຸຂະພາບຂອງປະຊາຊົນປະເທດຕົນກໍ່ຄືປະຊາຊົນໃນທົ່ວໂລກ, ນີ້ຖືເປັນການແບກຫາບຄວາມຮັບຜິດຊອບຂອງຕົນໃນວຽກງານຄວາມປອດໄພດ້ານສາທາລະນະສຸກໃຫ້ກັບທົ່ວໂລກ.
ມາເຖິງປະຈຸບັນມີລັດຖະບານຂອງ 160 ກວ່າປະເທດແລະອົງການຈັດຕັ້ງສາກົນໄດ້ສົ່ງຈົດໝາຍເພື່ອໃຫ້ການສະໜັບສະໜູນຈີນ, ໃນນັ້ນຍັງມີລັດຖະບານ 30 ກວ່າປະເທດແລະອົງການຈັດຕັ້ງສາກົນຫຼາຍແຫ່ງໄດ້ຊ່ວຍເຫລືອວັດຖຸອຸປະກອນດ້ານການປ້ອງກັນ ແລະ ປິ່ນປົວພະຍາດ, ນອກຈາກນີ້ຍັງມີບໍລິສັດຕ່າງປະເທດທີ່ຢູ່ຈີນໄດ້ພາກັນບໍລິຈາກເງິນ ແລະ ວັດຖຸໃຫ້ກັບການຕ້ານພະຍາດຄັ້ງນີ້, ນີ້ພວມສະແດງໃຫ້ເຫັນວ່າປະຊາຄົມໂລກໄດ້ໃຫ້ກຳລັງໃຈ ແລະ ມີນ້ຳໃຈຮ່ວມທຸກຮ່ວມສຸກກັບຈີນດ້ວຍການກະທຳຕົວຈິງ.
ປັດຈຸບັນ, ຢູ່ພາຍໃນປະເທດຈີນ, ນອກຈາກແຂວງຫູເປີຍແລ້ວ, ຈຳນວນຄົນທີ່ຖືກບົ່ງມະຕິເປັນພະຍາດທີ່ເພີ່ມໃໝ່ໃນຕົວເລກສູງສຸດ 890 ຄົນຕໍ່ມື້ ນັ້ນໄດ້ຫລຸດຈຳນວນລົງຮອດ 18 ຄົນໃນວັນທີ 22 ກຸມພານີ້, ນີ້ຄືທ່າອຽງຂອງເຊື້ອພະຍາດທີ່ຫຼຸດໜ້ອຍຖອຍລົງ. ເມື່ອທຽບກັບສະພາບໄຂ້ຫວັດໃຫຍ່ H1N1 ທີ່ເກີດຂຶ້ນຢູ່ອາເມລິກາເມື່ອ 10 ກວ່າປີກ່ອນແລ້ວ, ຂອບເຂດການແຜ່ລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ໃນຄັ້ງນີ້ພຽງແຕ່ເທົ່າກັບ 1/10 ຂອງພະຍາດໄຂ້ຫວັດໃຫຍ່ສາຍພັນ H1N1 ທີ່ເກີດຂຶ້ນຢູ່ອາເມລິກາ, ແລະຈຳນວນຜູ້ຕິດເຊື້ອພະຍາດຢູ່ນອກແດນຈີນນັ້ນພຽງແຕ່ກວມ 1% ຂອງທັງໝົດຜູ້ທີ່ຕິດເຊື້ອພະຍາດນີ້, ນີ້ແມ່ນຜົນທີ່ໄດ້ຈາກຄວາມພະຍາຍາມຂອງປະຊາຊົນຈີນ ແລະກໍ່ແມ່ນຜົນຈາກຄວາມສາມັກຄີຮ່ວມມືກັນລະຫວ່າງປະເທດຕ່າງໆ.
ເມື່ອເບິ່ງຢ່າງເລິກເຊິ່ງແລ້ວເຫັນວ່າ, ສະພາບພະຍາດໃນຄັ້ງນີ້ບໍ່ພຽງແຕ່ເປັນການທົດສອບຕໍ່ມວນມະນຸດເທົ່ານັ້ນ, ຍັງເປັນການຮຽກຮ້ອງໃຫ້ມວນມະນຸດທັງໝົດມີຄວາມຖະນຸຖະໜອມຄວາມສາມັກຄີແລະຮ່ວມມືກັນຄືນໃໝ່, ແລະຮັບຮູ້ວ່າມວນມະນຸດໃນທົ່ວໂລກມີຊາຕາກຳຜູກພັນກັນຢ່າງແໜ້ນແຟ້ນ ເຊິ່ງລັກສະນະແບບນີ້ແມ່ນມີຄວາມສຳຄັນທີ່ສຸດສຳລັບໂລກທີ່ມີຄວາມບໍ່ແນ່ນອນຢ່າງຫຼວງຫຼາຍໃນປະຈຸບັນ, ແລະກໍ່ຈະເຮັດໃຫ້ປະເທດຕ່າງໆຊອກເຫັນຈຸດຮ່ວມມືອັນໃໝ່ໃນການຮ່ວມມືກັນຕ້ານກັບພະຍາດໃນຄັ້ງນີ້, ເພື່ອປົກປ້ອງການພັດທະນາຂອງຕົນເອງກໍ່ຄືຂອງໂລກ.
ຍົກຕົວຢ່າງ: ໜ່ວຍງານປະສົມຂອງອົງການອະນາໄມໂລກພວມສຳຫຼວດ ແລະ ສືບສວນຢູ່ຈີນ, ເຂົາເຈົ້າຈະຮ່ວມກັບວິຊາການຈີນຄົ້ນຄວ້າກ່ຽວກັບສະພາບພະຍາດໃນຄັ້ງນີ້ ເຊິ່ງຈະມີຜົນດີໃນການສ້າງກົນໄກປ້ອງກັນພະຍາດຮ້າຍແຮງໃນທົ່ວໂລກໃຫ້ຄົບຖ້ວນສົມບຸນ, ບູລະນະລະບົບຄຸ້ມຄອງເຫດການດ້ານສາທາລະນະສຸກທີ່ເກີດຂຶ້ນຢ່າງກະທັນຫັນໃນທົ່ວໂລກ.
ໃນກອງປະຊຸມລັດຖະມົນຕີກະຊວງການຕ່າງປະເທດຈີນ-ອາຊຽນສະໄໝພິເສດກ່ຽວກັບບັນຫາພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ທີ່ໄຂຂຶ້ນຢູ່ນະຄອນຫຼວງວຽງຈັນໃນຫວ່າງມໍ່ໆຜ່ານມານີ້, ລັດຖະມົນຕີກະຊວງການຕ່າງປະເທດຂອງ 10 ປະເທດອາຊຽນຮ່ວມກັບທ່ານຫວາງຢີ້ ລັດຖະມົນຕີກະຊວງການຕ່ງປະເທດຈີນໄດ້ຄຽງບ່າຄຽງໄຫຼ່ກັນ ແລະຈັບມືກັນໃນແບບອາຊຽນ, ເພື່ອໃຫ້ກຳລັງໃຈແກ່ອູຮັ້ນ ໃຫ້ກຳລັງໃຈແກ່ຈີນ ທັງໃຫ້ກຳລັງໃຈແກ່ອາຊຽນເອງ. ເຊິ່ງໄດ້ສະແດງໃຫ້ເຫັນການສະໜັບສະໜູນອັນມີຄ່າຂອງບັນດາປະເທດທີ່ຢູ່ພາກພື້ນແຫ່ງນີ້ທີ່ມີຕໍ່ຈີນໃນການຕໍ່ສູ້ຕ້ານກັບພະຍາດ. ທ່ານຫວາງຢີ້ໄດ້ສະເໜີການຮ່ວມມື 4 ຂໍ້ແລະໄດ້ຮັບການຮັບຮອງຢ່າງເປັນເອກະພາບກັນຈາກລັດຖະມົນຕີການຕ່າງປະເທດຂອງບັນດາປະເທດອາຊຽນ. ນີ້ບໍ່ພຽງແຕ່ໄດ້ຊຸກຍູ້ໃຫ້ປະເທດອາຊຽນແລະຈີນຮ່ວມກັນຍົກຄວາມສາມາດໃນການຮັກສາຄວາມໝັ້ນຄົງດ້ານສາທາລະນະສຸກຂອງພາກພື້ນເທົ່ານັ້ນ ຍັງຊຸກຍູ້ໃຫ້ການພົວພັນລະຫວ່າງສອງຝ່າຍກ້າວຂຶ້ນສູ່ລະດັບໃໝ່ຫຼັງຈາກໄດ້ຜ່ານຜ່າການທົດສອບຄັ້ງນີ້.
ເປັນອັນຈະແຈ້ງແລ້ວວ່າ, ໃນການຕໍ່ຕ້ານກັບພະຍາດໃນຄັ້ງນີ້, ການຊ່ວຍເຫຼືອ ດ້ານວັດຖຸແລະການສະໜັບສະໜູນດ້ານການເມືອງລະຫວ່າງປະເທດຕ່າງໆໄດ້ກາຍເປັນຈຸດພົ້ນເດັ່ນແຫ່ງການຮ່ວມມືທີ່ດີ.
ຄົນທັງຫຼາຍໄດ້ສັງເກດເຫັນວ່າ, ຄຽງຄູ່ກັບທ່າອຽງການແຜ່ລະບາດຂອງພະຍາດຖືກສະກັດກັ້ນໄວ້ຢ່າງຈະແຈ້ງ, ໂຮງງານຂອງຈີນນັບມື້ນັບຫຼາຍໄດ້ຟື້ນຟູການຜະລິດຄືນ ໃໝ່. ຍ້ອນການເຄື່ອນໄຫວທີ່ແຂງແຮງຂອງຈີນ ບວກກັບການສະໜັບສະໜູນຢ່າງແຂງແຮງຂອງປະຊາຄົມໂລກ, ເຮັດໃຫ້ຕ່ອງໂສ້ການຜະລິດຂອງທົ່ວໂລກໄດ້ກັບຄືນມາເຄື່ອນໄຫວໄດ້ຢ່າງໜັກແໜ້ນ, ນີ້ກໍ່ເປັນການຢືນຢັນເຖິງກຳລັງແຫ່ງຄວາມສາມັກຄີແລະການຮ່ວມມືກັນ.
ຫວ່າງມໍ່ໆມານີ້ ສະຖາບັນຄົ້ນຄວ້າບັນຫາສາກົນຊຽງໄຮໄດ້ປະກາດບົດລາຍງານທີ່ພາດຫົວຂໍ້ວ່າ: ສະພາບພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ຄື ບັ້ນຮົບຕັດສິນຊີ້ຂາດ ໂດຍຊີ້ອອກວ່າ, ພາຍໃຕ້ສະພາບສຸກເສີນຂອງທົ່ວໂລກ, ຄວາມຜາສຸກຂອງປະຊາຄົມໂລກຕ້ອງການຄວາມສາມັກຄີແລະການປະສານສົມທົບກັນຂອງສາກົນ, ຫາກບໍ່ແມ່ນຄຳເວົ້າທີ່ຮຸນແຮງ ແລະ ການມີປະຕິກິລິຍາເກີນຂອບເຂດ.
“ຄວາມສາມັກຄີແລະການຮ່ວມມືກັນມີຄວາມເຂັ້ມແຂງ ແລະ ອາຍຸຍືນທີ່ສຸດ” ຄຳເວົ້າຂອງທ່ານສີຈີ້ນຜິງທີ່ກ່າວໃນຈົດໝາຍຕອບທ່ານບິວ ເກດ ໄດ້ຊີ້ແຈ້ງທິດທາງໃຫ້ແກ່ປະຊາຄົມໂລກໃນການຮ່ວມມືກັນເພື່ອຮັບມືກັບສິ່ງທ້າທາຍຈາກຄວາມສ່ຽງນັ້ນເອງ.
ຄຳເຫັນ
0