ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 20 ກຸມພານີ້, ພະນັກງານ 53 ຄົນຂອງ “ໜັງສືພິມວອນສະຕຣີດລາຍວັນ” ໄດ້ສົ່ງອີເມວລົງນາມຮ່ວມໄປເຖິງຄະນະນຳຂອງໜັງສືພິມດັ່ງກ່າວ ໂດຍຮຽກຮ້ອງໃຫ້ດັດແກ້ຫົວຂໍ້ບົດວິເຄາະ “ຈີນຄືຄົນປ່ວຍອາຊີຕາເວັນອອກທີ່ແທ້ຈິງ” ທີ່ໜັງສືພິມວອນສະຕຣີດລາຍວັນໄດ້ລົງພິມໃນຫວ່າງກ່ອນນີ້ບໍ່ດົນ ທັງສະແດງຄວາມຂໍໂທດທີ່ໄດ້ພິມບົດຄວາມໃນລັກສະນະທີ່ຢຽບຫຍາມຈີນ. ພະນັກງານເຫຼົ່ານີ້ກ່າວວ່າ: ນີ້ບໍ່ແມ່ນບັນຫາກ່ຽວກັບເສລີພາບໃນການບັນນາທິການຂ່າວ ແລະ ກໍບໍ່ແມ່ນຄວາມຕ່າງກັນລະຫວ່າງການລາຍງານຂ່າວກັບການວິເຄາະຂ່າວ, ຫາກແມ່ນຫົວຂໍ້ທີ່ຜິດພາດ ເຊິ່ງໄດ້ແຕະຕ້ອງເຖິງກຽດສັກສີຂອງຫຼາຍໆຄົນເຊິ່ງລວມທັງປະຊາຊົນຈີນ. ແຕ່ວັນທີ 22 ກຸມພານີ້, ໂຄສົກໜັງສືພິມວອນສະຕຣີດລາຍວັນ ກ່າວວ່າ: ຈຸດຢືນຂອງໜັງສືພິມຕົນບໍ່ມີການປ່ຽນແປງ.
ວັນທີ 3 ກຸມພານີ້, “ໜັງສືພິມວອນສະຕຣີດລາຍວັນ” ໄດ້ພິມບົດຄວາມໃນລັກສະນະດູຖູກຢຽບຫຍາມດ້ວຍການພາດຫົວບົດວ່າ “ຈີນຄືຄົນປ່ວຍອາຊີຕາເວັນອອກທີ່ແທ້ຈິງ”, ນອກຈາກໄດ້ໃສ່ຮ້າຍປ້າຍສີຄວາມພະຍາຍາມຂອງຈີນໃນການຕ້ານກັບການແຜ່ລະບາດຂອງພະຍາດແລ້ວ, ຍັງໄດ້ປ່າວປະກາດວ່າເສດຖະກິດຈີນຈະຊຸດໂຊມລົງໂດຍຂາດຫຼັກອ້າງອີງ ເຊິ່ງເລື້ອງດັ່ງກ່າວໄດ້ເຮັດໃຫ້ປະຊາຊົນຈີນຄຽດແຄ້ນທີ່ສຸດ ແລະ ຖືກປະຊາຄົມໂລກກ່າວປະນາມຢ່າງກວ້າງຂວາງ. ໂດຍແນ່ໃສ່ການກະທຳຂອງ “ໜັງສືພິມວອນສະຕຣີດລາຍວັນ”, ໃນກອງປະຊຸມຖະແຫຼງຂ່າວທາງອິນເຕີເນັດທີ່ຈັດຂຶ້ນໃນວັນທີ 19 ກຸມພານີ້, ທ່ານເກິງສວງ ໂຄສົກກະຊວງການຕ່າງປະເທດຈີນກ່າວວ່າ: ຈີນໄດ້ຖອນບັດນັກຂ່າວຂອງນັກຂ່າວໜັງສືພິມວອນສະຕຣີດ 3 ຄົນປະຈຳຈີນ. ທ່ານເກິງສວງເປີດເຜີຍວ່າ, “ໜັງສືພິມວອນສະຕຣີດລາຍວັນ” ໄດ້ຫຼົບລີ້ນປີ້ນຄວາມເລື້ອຍໆ, ບໍ່ໄດ້ສະແດງຄວາມຂໍໂທດຢ່າງເປີດເຜີຍແລະເປັນທາງການ, ທັງບໍ່ໄດ້ລົງໂທດຕໍ່ຜູ້ກ່ຽວຂ້ອງໃດໆ.
ວັນທີ 9 ກຸມພານີ້, ທ່ານເວີນເຕີມີດ ຜູ້ຂຽນບົດຄວາມດັ່ງກ່າວ, ທັງເປັນຜູ້ຊ່ຽວຊານດ້ານການທູດຂອງພັກອານຸລັກນິຍົມອາເມຣິກາໄດ້ລົງຂໍ້ຄວາມໃນທວິດເຕີວ່າ: ໃນໜັງສືພິມອາເມຣິກາ, ສຳລັບຜູ້ຂຽນ “ບໍ່ມີສິດ” ຂຽນ ຫຼື ກວດແກ້ຫົວຂໍ້ຂ່າວ, ບັນຫາຫົວຂໍ້ແມ່ນຕ້ອງປຶກສາຫາລືກັບບັນນາທິການ. ແຕ່ເຈົ້າໜ້າທີ່ “ໜັງສືພິມວອນສະຕຣີດລາຍວັນ” ພັດກ່າວວ່າ, ພາກຂ່າວແລະພາກວິເຄາະສະຖານະການເປັນ “ພາກສ່ວນທຸລະກິດອິດສະຫຼະ”, ຂະນະດຽວກັນ, ຍັງໄດ້ເວົ້າແກ້ຕົວດ້ວຍຖ້ອຍຄຳ “ເສລີພາບໃນການປາກເວົ້າ”.
ນັກວິເຄາະ CRI ເຫັນວ່າ, ຄະນະນຳໜັງສືພິມດັ່ງກ່າວຄວນສຳຫຼວດຕົນເອງຄືນຢ່າງເລິກເຊິ່ງ, ຄວນໃຫ້ຄຳຕອບແກ່ພະນັກງານຈຳນວນ 53 ຄົນທີ່ໄດ້ສົ່ງອີເມວລົງນາມຮ່ວມໄປເຖິງຕົນໂດຍໄວດ້ວຍການກະທຳຕົວຈິງ, ໃຫ້ຄຳຕອບແກ່ຈີນແລະໃຫ້ຄຳຕອບແກ່ໂລກ, ຢ່າເຮັດຕາມລຳພັງໃຈຕົນ, ເຮັດໃຫ້ “ໜັງສືພິມວອນສະຕຣີດລາຍວັນ” ທີ່ສ້າງຕັ້ງຂຶ້ນມາເປັນເວລາຮ້ອຍກວ່າປີຕ້ອງເຊື່ອມເສຍຊື່ສຽງຂອງຕົນທັງເສຍຈັນຍາບັນ ແລະ ຈະລິຍະທຳພື້ນຖານຂອງຕົນ.
ຄຳເຫັນ
0