ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ເນື່ອງໃນໂອກາດວັນແມ່ຍິງສາກົນ8 ມີນາ ໄດ້ໝູນວຽນມາເຖິງ, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ, ປະທານປະເທດຈີນ, ປະທານຄະນະກຳມະການການທະຫານສູນກາງຈີນໄດ້ສະແດງຄວາມຢື້ຢາມຖາມຂ່າວຢ່າງສຸດໃຈຕໍ່ພີ່ນ້ອງຮ່ວມຊາດແມ່ຍິງອັນໄພສານທີ່ສູ້ຊົນຢູ່ແນວໜ້າແລະແນວຮົບຕ່າງໆໃນການປ້ອງກັນແລະຄວບຄຸມພະຍາດ COVID- 19 ແລະ ທັງກ່າວສະບາຍດີວັນແມ່ຍິງສາກົນຕໍ່ພີ່ນ້ອງແມ່ຍິງວົງການຕ່າງໆແລະແມ່ຍິງບັນດາເຜົ່າທົ່ວປະເທດ.
ທ່ານສີຈິ້ນຜິງກ່າວວ່າ: ພາຍຫຼັງເກີດການແຜ່ລະບາດຂອງພະຍາດ COVID- 19ແລ້ວ, ພະນັກງານການແພດຍິງທັງຫຼາຍໄດ້ບຸກບືນສູ້ຊົນຢ່າງກ້າຫານທັງເວັນທັງຄືນ,ເຝົ້າປະຈຳການເພື່ອປະຕິບັດໜ້າທີ່ຢູ່ແນວໜ້າໃນການປ້ອງກັນແລະຄວບຄຸມພະຍາດ ເຊິ່ງໄດ້ສະແດງໃຫ້ເຫັນເຖິງຈິດໃຈອັນສູງສົ່ງໃນການປິ່ນປົວແລະກອບກູ້ຊີວິດຄົນເຈັບດ້ວຍນ້ຳໃຈມະນຸດສະທຳ. ພີ່ນ້ອງແມ່ຍິງທັງຫຼາຍໃນວົງການສະມາຊິກພັກ-ພະນັກງານ, ຕຳຫຼວດ, ພະນັກງານຄວບຄຸມພະຍາດຕິດແປດ, ພະນັກງານເຂດຊຸມຊົນ, ພະນັກງານສື່ມວນຊົນ, ອາສາສະໝັກແລະອື່ນໆໄດ້ປະຕິບັດໜ້າທີ່ຕຳແໜ່ງດ້ວຍຄວາມບໍລິສຸດ, ບຸກບືນສູ້ຊົນ ເຮັດວຽກທີ່ຫຍຸ້ງຍາກລຳບາກຢ່າງຫຼວງຫຼາຍ ເຊິ່ງເປັນການປະກອບສ່ວນອັນສຳຄັນເຂົ້າໃນການສູ້ຊົນປ້ອງກັນແລະຄວບຄຸມພະຍາດດ້ວຍການກະທຳຕົວຈິງຂອງຕົນ. ຫວັງວ່າ ພີ່ນ້ອງແມ່ຍິງທັງຫຼາຍຈະຍຶດໝັ້ນຄວາມໝັ້ນໃຈທີ່ຈະເອົາຊະນະພະຍາດໄດ້ຢ່າງແນ່ນອນ,ຮັກສາຈິດໃຈສູ້ຊົນຢ່າງສູງ, ປົກປ້ອງຕົນເອງຕາມຫຼັກວິທະຍາສາດເພື່ອມີສຸຂະພາບແຂງແຮງທີ່ສາມາດສືບຕໍ່ປະກອບສ່ວນເຂົ້າໃນການສູ້ຊົນເພື່ອເອົາຊະນະພະຍາດຄັ້ງນີ້.
ທ່ານສີຈິ້ນຜິງກ່າວເນັ້ນວ່າ: ຄະນະພັກແລະອົງການປົກຄອງທຸກຂັ້ນຕ້ອງເອົາໃຈໃສ່ຮັກແພງພີ່ນ້ອງແມ່ຍິງທີ່ສູ້ຊົນຢູ່ແນວໜ້າກໍຄືແນວຮົບຕ່າງໆໃນການປ້ອງກັນແລະຄວບຄຸມພະຍາດ, ສຸມທຸກຄວາມພະຍາຍາມໃນການໂຄສະນາ ແບບຢ່າງແມ່ຍິງດີເດັ່ນທີ່ປາກົດຂຶ້ນໃນແນວໜ້າປ້ອງກັນແລະຄວບຄຸມພະຍາດ, ກະຕຸກຊຸກຍູ້ແລະສະໜັບສະໜູນແມ່ຍິງອັນໄພສານປະກອບສ່ວນໃນດ້ານສະຕິປັນຍາແລະເຫື່ອແຮງຂອງຕົນເພື່ອສູ້ຊົນຍາດເອົາໄຊຊະນະໃນສົງຄາມປະຊາຊົນເພື່ອປ້ອງກັນແລະຄວບຄຸມພະຍາດ,ບັ້ນຮົບທົ່ວປວງຊົນແລະບັ້ນສະກັດກັ້ນແລະຕ້ານພະຍາດຄັ້ງນີ້ໃນທີ່ສຸດ.
ຄຳເຫັນ
0