ຕອນຄ່ຳວັນທີ 12 ມີນານີ້, ໃນເວລາສົນທະນາກັບທ່ານອັນໂຕນີໂອ ກູເຕີເຣັສ ເລຂາທິການໃຫຍ່ອົງການສະຫະປະຊາຊາດທາງໂທລະສັບ, ທ່ານສີຈິ້ນຜິງ ຜູ້ນຳສູງສຸດຂອງຈີນໄດ້ໃຫ້ຂໍ້ສະເໜີກ່ຽວກັບການຕໍ່ຕ້ານການແຜ່ລະບາດຂອງພະຍາດໂຄວິດ-19 ໃນທົ່ວໂລກ ແລະ ໄດ້ສະເໜີແຜນການແກ້ໄຂຂອງຈີນຄື: “ປະຊາຄົມໂລກຄວນເລັ່ງລັດການປະຕິບັດການເຄື່ອນໄຫວ, ດຳເນີນການຮ່ວມມືເພື່ອປ້ອງກັນແລະຄວບຄຸມຮ່ວມກັນຢ່າງມີປະສິດທິຜົນ, ເຕົ້າໂຮມກຳລັງທີ່ເຂັ້ມແຂງໃນການຕໍ່ຕ້ານກັບການແຜ່ລະບາດຂອງພະຍາດໂຄວິດ-19”.
ປັດຈຸບັນ, ໂດຍຜ່ານຄວາມພະຍາຍາມອັນທຸກຍາກລຳບາກຂອງປະຊາຊົນຈີນ, ສະພາບການປ້ອງກັນແລະຄວບຄຸມການແຜ່ລະບາດຂອງພະຍາດສືບຕໍ່ດີຂຶ້ນ, ຊີວິດການເປັນຢູ່ແລະການຜະລິດໄດ້ເລັ່ງລັດຟື້ນຟູຄືນໃໝ່. ແຕ່ວ່າພະຍາດດັ່ງກ່າວພວມແຜ່ລະບາດຢູ່ທົ່ວໂລກຢ່າງວ່ອງໄວ, ການຕ້ານກັບການແຜ່ລະບາດຂອງພະຍາດໂຄວິດ-19 “ເລີ່ມເຂົ້າສູ່ໄລຍະໃໝ່”.
ພາຍຫຼັງເຂົ້າສູ່ໄລຍະໃໝ່ແລ້ວ, ທົ່ວໂລກຄວນຕ້ານກັບການແຜ່ລະບາດຂອງພະຍາດແນວໃດ? ທ່ານບຣຸສ໌ ແອວເວີດ, ທີ່ປຶກສາລະດັບສູງຂອງຜູ້ອຳນວຍການໃຫຍ່ອົງການອະນາໄມໂລກເຫັນວ່າ: ບົດຮຽນສຳຄັນທີ່ສຸດຂອງຈີນໃນການຕ້ານກັບການແຜ່ລະບາດຂອງພະຍາດໂຄວິດ-19 ແມ່ນ “ຄວາມໄວ”. ການຕອບໂຕ້ຢ່າງວ່ອງໄວຂອງຈີນໄດ້ສ້າງໂອກາດໃຫ້ແກ່ການສະກັດກັ້ນເພື່ອບໍ່ໃຫ້ເຊື້ອພະຍາດແຜ່ລະບາດແລະທັງສາມາດເຮັດວຽກກະກຽມເພື່ອຕ້ານກັບການແຜ່ລະບາດຂອງພະຍາດໃນທົ່ວໂລກ.
ແຕ່ວ່າສິ່ງທີ່ໜ້າເສຍດາຍກໍຄື, ໂອກາດອັນລ້ຳຄ່າທີ່ໃຫ້ໂລກໄດ້ມີເວລາໃນການຕ້ານກັບການແຜ່ລະບາດຂອງພະຍາດທີ່ຈີນຍາດມາໄດ້ ບໍ່ໄດ້ຮັບການທະນຸຖະໜອມຈາກປະເທດຕ່າງໆ. ອົງການອະນາໄມໂລກໄດ້ສະແດງຄວາມເປັນຫ່ວງຕໍ່ບາງປະເທດທີ່ບໍ່ເອົາໃຈໃສ່ ແລະ ຂາດການກະກຽມທີ່ຮອບຄອບໃນການຕ້ານກັບການແຜ່ລະບາດຂອງພະຍາດ. ຕົວຢ່າງວ່າ ໃນປະເທດເອີຣົບ, ປັດຈຸບັນເຊື້ອພະຍາດໂຄວິດ-19 ເກືອບວ່າໄດ້ແຜ່ລະບາດໄປທົ່ວທຸກໆປະເທດໃນເອີຣົບ, ຍິ່ງກວ່ານັ້ນຍັງໄດ້ປາກົດມີຜູ້ເປັນພະຍາດດັ່ງກ່າວໂດຍບໍ່ຮູ້ແຫຼ່ງທີ່ມາຂອງເຊື້ອພະຍາດ. ນີ້ບໍ່ພຽງແຕ່ຍ້ອນວ່າປະເທດເອີຣົບມີພູມສັນຖານຕິດຕໍ່ກັນ, ທັງໄດ້ສະແດງໃຫ້ເຫັນວ່າ ໃນທົ່ວຂອບເຂດເອີຣົບມີຈຸດອ່ອນດ້ານການປ້ອງກັນແລະຄວບຄຸມການແຜ່ລະບາດຂອງພະຍາດ. ສິ່ງທີ່ໜ້າສົນໃຈກໍຄື, ຕອນເຊົ້າວັນທີ 13 ມີນານີ້, ຈີນ ແລະ ສ.ເກົາຫຼີໄດ້ສ້າງກົນໄກຮ່ວມມືເພື່ອປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19 ແລະ ໄດ້ຈັດກອງປະຊຸມທາງວິດີໂອຄັ້ງທຳອິດ. ນີ້ແມ່ນມາດຕະການທີ່ຈຳເປັນ ແລະ ທັນການ, ເຊິ່ງຈະຊ່ວຍໃຫ້ສອງປະເທດຮັບມືກັບການປ່ຽນແປງຂອງສະພາບການແຜ່ລະບາດຂອງພະຍາດໄດ້ທັນການ, ທັງຈະສະໜອງບົດຮຽນກ່ຽວກັບການຕ້ານກັບການແຜ່ລະບາດຂອງພະຍາດໂຄວິດ-19 ໃຫ້ກັບໂລກ ແລະ ມີຜົນດີຕໍ່ການເຕົ້າໂຮມທຸກໆກຳລັງສາກົນໃນການຕ້ານກັບການແຜ່ລະບາດຂອງພະຍາດ.
ຂະນະດຽວກັນ, ຈີນພວມແບ່ງປັນບົດຮຽນປ້ອງກັນແລະຄວບຄຸມການແຜ່ລະບາດຂອງພະຍາດໃຫ້ແກ່ປະເທດທີ່ກ່ຽວຂ້ອງ ແລະ ໄດ້ສະໜອງການຊ່ວຍເຫຼືອຈົນສຸດຄວາມສາມາດຂອງຕົນໃຫ້ແກ່ປະເທດຈຳນວນໜຶ່ງທີ່ເກີດມີການແຜ່ລະບາດຂອງພະຍາດໂຄວິດ-19. ນອກນັ້ນ, ຈີນຍັງໄດ້ບໍລິຈາກເງິນ 20 ລ້ານໂດລາສະຫະລັດໃຫ້ແກ່ອົງການອະນາໄມໂລກ, ເພື່ອສະໜັບສະໜູນອົງການອະນາໄມໂລກດຳເນີນການເຄື່ອນໄຫວຕ້ານກັບການແຜ່ລະບາດຂອງພະຍາດ.
ຄວາມພະຍາຍາມຂອງຈີນໄດ້ຮັບການຕີລາຄາຢ່າງສູງຈາກປະຊາຄົມໂລກ. ວັນທີ 12 ມີນານີ້, ຄະນະຜູ້ຊ່ຽວຊານຈີນທີ່ສົ່ງໄປຊ່ວຍເຫລືອອີຕາລີໄດ້ຮັບການຕ້ອນຮັບຢ່າງອົບອຸ່ນຈາກເຈົ້າໜ້າທີ່ລັດຖະບານອີຕາລີ. ຊາວເນັດອີຕາລີຫຼາຍຄົນໄດ້ສະແດງຄວາມຂອບໃຈຕໍ່ປະຊາຊົນຈີນໂດຍຜ່ານສື່ສັງຄົມອອນລາຍ.
ໃນຍຸກເສດຖະກິດໂລກາພິວັດ, ເຫດການສຸກເສີນທີ່ໜັກໜ່ວງຄ້າຍຄືກັບການແຜ່ລະບາດຂອງພະຍາດໂຄວິດ-19 ໃນຄັ້ງນີ້ ຈະບໍ່ແມ່ນຄັ້ງສຸດທ້າຍ, ບັນຫາຄວາມປອດໄພແບບເກົ່າແລະແບບໃໝ່ຍັງຈະສ້າງສະພາບການໃໝ່ເພື່ອໃຫ້ທົດສອບຢ່າງບໍ່ຢຸດຢັ້ງ. ແຕ່ສຳລັບມວນມະນຸດແລ້ວ, ບໍ່ວ່າຈະຜະເຊີນກັບການທົດສອບໃດໆ, ກໍຄືກັບຄຳເຫັນຂອງທ່ານສີຈິ້ນຜິງກ່າວໄວ້ວ່າ: ການຮ່ວມມືບົນຈິດໃຈສາມັກຄີແມ່ນອາວຸດທີ່ມີອານຸພາບທີ່ສຸດ.
ຄຳເຫັນ
0