ໃນງານຟັງຄຳໃຫ້ການກ່ຽວກັບພະຍາດໂຄວິດ-19ທີ່ສະພາຕ່ຳອາເມຣິກາຈັດຂຶ້ນໃນເມື່ອບໍ່ດົນມານີ້, ທ່ານຮາລີ ຣດູດາ ສະມາຊິກສະພາຕ່ຳອາເມຣິກາຖາມວ່າ: “ປະຊາຊົນອາເມຣິກາຈຳນວນໜຶ່ງເສຍຊີວິດເບິ່ງຄືວ່າຍ້ອນໄຂ້ຫວັດໃຫຍ່, ແຕ່ທີ່ຈິງແລ້ວອາດແມ່ນເສຍຊີວິດຍ້ອນພະຍາດໂຄວິດ-19 ແມ່ນບໍ່?” ທ່ານໂຣເບີດ ເຣດເຟວ ຫົວໜ້າສູນປ້ອງກັນແລະຄວບຄຸມພະຍາດອາເມຣິກາຫຼື CDC ຕອບວ່າ: “ທີ່ຈິງແລ້ວມາຮອດປັດຈຸບັນ, ອາເມຣິກາໄດ້ບົ່ງມະຕິຜູ້ເປັນພະຍາດໂຄວິດ-19ຫຼາຍກໍລະນີຍ້ອນສາເຫດດັ່ງກ່າວ.”
ຂ່າວດັ່ງກ່າວໄດ້ເຮັດໃຫ້ຫາງສຽງປະຊາຊົນມີການວິພາກວິຈານກັນຢ່າງໜາຫູ. ຄຳຕອບດັ່ງກ່າວມີຄວາມໝາຍວ່າອາເມຣິກາມີສະພາບການທີ່ຜູ້ເສຍຊີວິດຍ້ອນເປັນພະຍາດໂຄວິດ-19ແຕ່ຖືກບົ່ງມະຕິເສຍຊີວິດຍ້ອນເປັນໄຂ້ຫວັດໃຫຍ່, ໄດ້ເປັນຫຼັກຖານອີກປະການໜຶ່ງທີ່ປະເທດຕ່າງໆໃນໂລກສົງໄສວ່າເຊື້ອພະຍາດໂຄວິດ-19 ແມ່ນເກີດຂຶ້ນຢູ່ອາເມຣິກາ. ຄຽງຄູ່ກັບອາເມຣິກາເລີ່ມເຜີຍແຜບບຈຸດອ່ອນດ້ານການປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19ຢ່າງບໍ່ຢຸດຢັ້ງ, ບັນດາປະເທດທີ່ສົງໄສວ່າພະຍາດໂຄວິດ-19ເກີດຂຶ້ນຢູ່ອາເມຣິກາກໍນັບມື້ນັບຫຼາຍຂຶ້ນແລະສຸມສາຍຕາໃສ່ອາເມຣິກາ.
ຫວ່າງກ່ອນນີ້ບໍ່ດົນ, “ການຄົ້ນຄວ້າທົ່ວໂລກ” ເຊິ່ງເປັນຄັງປັນຍາຂອງການາດາໄດ້ພິມບົດຄວາມລົງເວັບໄຊຂອງຕົນ. ບົດຄວາມໄດ້ອ້າງອີງຕາມຕົວເລກການວິເຄາະຂອງນັກລະບາດວິທະຍາເຂດໄຕ້ຫວັນຈີນຕໍ່ແຫຼ່ງກຳເນີດພະຍາດໂຄວິດ-19ຂອງອີຣານແລະອີຕາລີເຊິ່ງເປັນປະເທດທີ່ມີພະຍາດແຜ່ລະບາດຢ່າງໜັກໜ່ວງ, ໂດຍຊີ້ອອກວ່າສອງປະເທດດັ່ງກ່າວໄດ້ເປີດເຜີຍລຳດັບແຊນຂອງເຊື້ອພະຍາດທີ່ແຜ່ລະບາດຢູ່ທ້ອງຖິ່ນ, ວ່າມັນຕ່າງກັນກັບລຳດັບແຊນຂອງເຊື້ອພະຍາດຢູ່ຈີນ, ນີ້ໝາຍຄວາມວ່າເຊື້ອພະຍາດດັ່ງກ່າວບໍ່ແມ່ນເກີດຂຶ້ນຢູ່ປະເທດຈີນ.
ນັກວິທະຍາສາດນັບມື້ນັບຫຼາຍໄດ້ມີການພົບເຫັນຫຼາຍກວ່າເກົ່າໂດຍຜ່ານການຄົ້ນຄວ້າ. ໃນວັນທີ 24 ມັງກອນປີນີ້, ວາລະສານ The Lancet ໄດ້ເຜີຍແຜ່ບົດນິພົນການຄົ້ນຄວ້າບົດໜຶ່ງທີ່ຂຽນຮ່ວມໂດຍແພດໝໍປິ່ນປົວພະຍາດ 7 ທ່ານຈາກໂຮງໝໍຈິ່ນຢິນຖານນະຄອນອູຮັ້ນຂອງຈີນໃນເວັບໄຊຂອງຕົນ,ໂດຍຖືເອົາຜູ້ຖືກບົ່ງມະຕິເປັນພະຍາດອັກເສບປອດສາຍພັນໃໝ່(COVID-19) 41 ຄົນທີ່ໄດ້ຮັບການປິ່ນປົວຢູ່ໂຮງໝໍໃນໄລຍະເບື້ອງຕົ້ນເປັນຕົວຢ່າງການຄົ້ນຄວ້າ,ແລ້ວໄດ້ພົບເຫັນວ່າໃນນັ້ນມີຜູ້ເປັນພະຍາດ 13 ຄົນບໍ່ມີປະຫວັດການສຳຜັດກັບຕະຫຼາດສັດທະເລຫົວໜານ. ໃນວັນທີ 26 ມັງກອນປີນີ້,ວາລະສານວິທະຍາສາດ “Science” ໄດ້ພິມບົດຄວາມທີ່ພາດຫົວຂໍ້ວ່າ “ຕະຫຼາດສັດທະເລຫົວໜານອູຮັ້ນອາດຈະບໍ່ແມ່ນແຫຼ່ງກຳເນີດຂອງເຊື້ອພະຍາດອັກເສບປອດຈາກໄວຣັສໂຄໂຣນາສາຍພັນໃໝ່ຫຼື COVID-19” ແລະໄດ້ອ້າງອີງຕາມທັດສະນະຂອງທ່ານ ດານິວ ລູຊີ ຜູ້ຊ່ຽວຊານດ້ານພະຍາດຕິດແປດຂອງມະຫາວິທະຍາໄລຈອດທາວ Georgetown ຂອງອາເມຣິກາໂດຍຊີ້ໃຫ້ເຫັນວ່າ: “ຜູ້ເປັນພະຍາດ 13 ຄົນດັ່ງກ່າວບໍ່ມີການພົວພັນໃດໆກັບຕະຫຼາດສັດທະເລດັ່ງກ່າວ,ນີ້ບໍ່ແມ່ນຈຳນວນໜ້ອຍ.” ທ່ານເຫັນວ່າ:ຖ້າຫາກເປັນສະພາບແບບນີ້,ແຫຼ່ງກຳເນີດຂອງເຊື້ອພະຍາດ COVID-19 ໃນເບື້ອງຕົ້ນອາດຈະແມ່ນສະຖານທີ່ແຫ່ງອື່ນ.
ປັດຈຸບັນ,ບັນດານັກວິທະຍາສາດໃນໂລກພວມເລັ່ງລັດຄົ້ນຄວ້າຫາຕົ້ນກຳເນີດຂອງເຊື້ອພະຍາດ. ປະຊາຄົມໂລກກໍມີຄວາມເຫັນຕ່າງກັນກ່ຽວກັບເລື່ອງນີ້. ແຕ່ຄວາມລະແວງສົງໄສແລະການຄາດເດົາທັງໝົດລ້ວນແຕ່ຕ້ອງຢູ່ບົນພື້ນຖານຈິດໃຈວິທະຍາສາດແລະມີເຫດຜົນຕາມຄວາມເປັນຈິງ,ຫາກບໍ່ແມ່ນປ່າວຂ່າວໂລເລເພື່ອຈຸດປະສົງໃດໜຶ່ງ,ເຊິ່ງສວຍໂອກາດໃສ່ຮ້າຍປ້າຍສີແລະໂຈມຕີຜູ້ອື່ນ. ຫວັງວ່າອາເມຣິກາຈະດຳເນີນການຮ່ວມມືກັບປະຊາຄົມໂລກບົນພື້ນຖານຫຼັກການທີ່ວິທະຍາສາດ,ວິຊາການແລະມີສະຕິໃນຂະນະທີ່ເຮັດວຽກປ້ອງກັນແລະຄວບຄຸມການແຜ່ລະບາດຂອງພະຍາດ COVID-19 ໃຫ້ດີ, ຊອກຮູ້ບັນຫາທີ່ສໍາຄັນຄື:ແຫຼ່ງກຳເນີດຂອງເຊື້ອພະຍາດແມ່ນຢູ່ໃສ,ເພື່ອຕອບຂໍ້ລະແວງສົງໄສຂອງຊາວໂລກດ້ວຍຄວາມຈິງ.
ຄຳເຫັນ
0