ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 28 ມີນານີ້, ເວັບໄຊຂອງວາລະສານ ເດີ ອັດລັງຕິກ (The Atlantic) ອາເມຣິກາໄດ້ພິມບົດຄວາມທີ່ພາດຫົວຂໍ້ວ່າ: “ທ່ານທຣຳສ້າງຄວາມຂັດແຍ້ງກັບຈີນໄດ້ສົ່ງຜົນສະທ້ອນຢ້ອນຫຼັງໃຫ້ອາເມຣິກາເອງຢ່າງໜັກໜ່ວງ”.
ບົດຄວາມຊີ້ໃຫ້ເຫັນວ່າ: ໂດຍຜະເຊີນໜ້າກັບການແຜ່ລະບາດຂອງພະຍາດໂຄວິດ-19, ນັກການເມືອງແລະນັກວິເຄາະອາເມຣິກາຈຳນວນໜຶ່ງເຫັນວ່າ: “ອາເມຣິກາຕ້ອງແຍກອອກຈາກປະເທດຈີນ.” ແຕ່ໃນຄວາມເປັນຈິງແລ້ວ, ບົດຮຽນທີ່ອາເມຣິກາໄດ້ຮັບຈາກການແຜ່ລະບາດຂອງພະຍາດໂຄວິດ-19 ນັ້ນກໍຄື: ບໍ່ຄວນຢຸດຕິການຮ່ວມມືກັບຈີນ, ຫາກຄວນສ້າງການຮ່ວມມືດ້ານສາທາລະນະສຸກອາເມຣິກາ-ຈີນທີ່ຖືກລັດຖະບານທຣຳທຳລາຍໄປນັ້ນໃຫ້ກັບຄືນມາໃໝ່.
ບົດຄວາມລະບຸວ່າ: ໃນຂະບວນການຕໍ່ຕ້ານການແຜ່ລະບາດຂອງພະຍາດຊາສເມື່ອປີ 2003, ໄຂ້ຫວັດໃຫຍ່ H1N1 ເມື່ອປີ 2009 ແລະ ພະຍາດອີໂບລາເມື່ອປີ 2014, ການຮ່ວມມືລະຫວ່າງຈີນກັບອາເມຣິກາເຄີຍໄດ້ເສີມຂະຫຍາຍບົດບາດສຳຄັນໃນການເອົາຊະນະການແຜ່ລະບາດຂອງພະຍາດເຫລົ່ານັ້ນ. ແຕ່ຄວາມເຫັນພາຍໃນລັດຖະບານຊຸດປັດຈຸບັນຂອງອາເມຣິກາແມ່ນ: “ຖ້າວ່າດຳເນີນການຄົ້ນຄວ້າຮ່ວມກັບນັກວິທະຍາສາດຈີນ, ກໍເທົ່າກັບວ່າເປັນການເພີ່ມກຳລັງແຮງໃຫ້ກັບປະເທດຈີນ, ນີ້ບໍ່ມີຜົນດີຕໍ່ອາເມຣິກາ, ຍ້ອນວ່າຈີນແມ່ນຄູ່ແຂ່ງທາງຍຸດທະສາດ.”
ທ່ານທອມ ອິນໂກສະບີ ຫົວໜ້າສູນຄວາມປອດໄພດ້ານສຸຂະອະນາໄມຂອງສະຖາບັນສາທາລະນະສຸກບຣູມເປີກຂອງມະຫາວິທະຍາໄລຈອນ ຮອຟກິນສ໌ ກ່າວວ່າ: ເມື່ອເບິ່ງຈາກດ້ານການຕໍ່ຕ້ານການແຜ່ລະບາດຂອງພະຍາດໃນປັດຈຸບັນ, ຄວາມສຳຄັນຂອງການພົວພັນລະຫວ່າງອາເມຣິກາກັບຈີນແມ່ນຕີລາຄາສູງສ່ຳໃດກໍບໍ່ແມ່ນເກີນຄວາມຈິງ.” ທ່ານກ່າວວ່າ: ຍ້ອນວ່າຈີນໄດ້ຄວບຄຸມການແຜ່ລະບາດຂອງພະຍາດຢ່າງສຳເລັດຜົນ, “ພວກເຮົາຄວນຮ່ຳຮຽນກັບຈີນວ່າຄວນເຮັດແນວໃດ.”
ປັດຈຸບັນ, ຈີນໄດ້ສົ່ງເຄື່ອງອຸປະກອນປ້ອງກັນພະຍາດຢ່າງຫຼວຍຫຼາຍໄປໃຫ້ປະເທດເອີຣົບ. ແພດໝໍແລະພະຍາບານອາເມຣິກາຕ້ອງການຜ້າປິດປາກ, ແວ່ນຕາປ້ອງກັນພະຍາດ, ຖົງມື, ຊຸດປ້ອງກັນພະຍາດ ແລະ ບາຫຼອດຄືກັນ ແຕ່ອາເມຣິກາຂຶ້ນພາສີຕໍ່ສິນຄ້າຈີນໄດ້ສົ່ງຜົນເຮັດໃຫ້ການຈັດຊື້ເຄື່ອງອຸປະກອນເຫຼົ່ານີ້ຍາກກວ່າເກົ່າ, ສິ່ງທີ່ໜ້າຕະຫຼົກກໍຄື: ທ່ານຈິມ ແບງສ໌ ສະມາຊິກສະພາຕ່ຳອາເມຣິກາຍັງຮຽກຮ້ອງໃຫ້ຂຶ້ນພາສີຕໍ່ສິນຄ້າຈີນເພື່ອແກ້ແຄ້ນອັນທີ່ເອີ້ນວ່າ: “ໄວຣັສຈີນ”.
ບົດຄວາມຊີ້ໃຫ້ເຫັນວ່າ: ເຊື້ອພະຍາດໂຄວິດ-19 ໄດ້ພິສູດໃຫ້ເຫັນຄວາມຈິງສອງຢ່າງທີ່ກົງກັນຂ້າມກັບໂລກະທັດຂອງທ່ານໂດໂນ ທຣຳ ນັ້ນກໍຄື: ໜຶ່ງ, ໃນໂລກທີ່ມີການພົວພັນກັນ, ການເພີ່ມທະວີການຮ່ວມມືທົ່ວໂລກສາມາດປ້ອງກັນຄວາມປອດໄພໃຫ້ປະຊາຊົນອາເມຣິກາທຸກຖ້ວນໜ້າໄດ້ດີກວ່າເກົ່າ. ການລົງເລິກການຮ່ວມມືລະຫວ່າງອາເມຣິກາກັບຈີນ ແມ່ນການຮັບມືກັບໄພຂົ່ມຂູ່ທີ່ໃຫຍ່ຫຼວງເຫຼົ່ານີ້ໄດ້ຢ່າງສົມເຫດສົມຜົນ.
ສອງ, ຄວາມດຸນດ່ຽງດ້ານຄັງປັນຍາແລະພະລັງງານໃນປັດຈຸບັນທີ່ເປັນຍຸກໂລກາພິວັດໄດ້ປ່ຽນແປງໄປແລ້ວ. ປີ 2003 ເມື່ອເກີດການແຜ່ລະບາດຂອງພະຍາດຊາສ, ອາເມຣິກາເປັນອາຈານຂອງຈີນ. ແຕ່ໃນປັດຈຸບັນ, ແພດໝໍແລະນັກວິທະຍາສາດອາເມຣິກາຢາກຮູ້ຈັກຢ່າງຮີບດ່ວນວ່າ ແພດໝໍຈີນໄດ້ເອົາຊະນະເຊື້ອພະຍາດໂຄວິດ-19 ຢູ່ນະຄອນອູຮັ້ນໄດ້ແນວໃດ. ຂະນະທີ່ໃນປັດຈຸບັນທີ່ພະຍາດໂຄວິດ-19 ພວມແຜ່ລະບາດຢ່າງໃຫຍ່ໃນທົ່ວໂລກ, ໂຮງງານຂອງຈີນຈະກາຍເປັນສາງອາວຸດດ້ານສາທາລະນະສຸກຂອງໂລກ.
ຄຳເຫັນ
0