ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 5 ມີນາຂອງທຸກປີ, ເປັນ “ວັນຮ່ຳຮຽນນຳເຫຼີຍເຟີ່ງ” ທີ່ມີຄວາມໝາຍພິເສດຂອງຈີນ. ຄຽງຄູ່ກັບການພັດທະນາຂອງຍຸກສະໄໝ, ວັນດັ່ງກ່າວກໍມີຄວາມໝາຍໃໝ່ ແມ່ນ ວັນອາສາສະໝັກຊາວໜຸ່ມ. ບໍ່ວ່າຈະເອີ້ນຊື່ແນວໃດກໍຕາມ, ລ້ວນແຕ່ເປັນການປະຕິບັດ ແລະ ສົ່ງເສີມຄ່ານິຍົມແກນກາງຂອງສັງຄົມນິຍົມ.
ເຫຼີຍເຟີ່ງ
ເຫຼີຍເຟີ່ງ, ຊື່ເດີມແມ່ນ ເຫຼີຍເຈີ້ງຊິ່ງ, ເກີດເມື່ອປີ 1940 ໃນຄອບຄົວຊາວກະສິກອນທຸກຍາກຢູ່ເມືອງວ້າງເສີງແຂວງຫູນານ. ກ່ອນການປົດປ່ອຍ, ຄອບຄົວຂອງເຫຼີຍເຟີ່ງໄດ້ເສຍຊີວິດໄປຕາມໆກັນ. ເຫຼີຍເຟີ່ງທີ່ມີອາຍຸບໍ່ທັນຮອດ 7 ປີ ໃນເວລານັ້ນໄດ້ກາຍເປັນກຳພອຍ, ມີຊີວິດທີ່ທຸກຍາກລຳບາກທີ່ສຸດ.
ປີ 1949, ຫຼັງຈາກແຂວງຫູນານໄດ້ຮັບການປົດປ່ອຍແລ້ວ, ພາຍໃຕ້ການເອົາໃຈໃສ່ ແລະການສະໜັບສະໜູນຂອງພັກກອມມູນິດຈີນ ແລະລັດຖະບານຈີນ, ເຫຼີຍເຟີ່ງໄດ້ເຂົ້າໂຮງຮຽນ, ທັງໄດ້ເຂົ້າເປັນສະມາຊິກຊາວໜຸ່ມກອມມູນິດຈີນ. ຫຼັງຈາກຮຽນຈົບຈາກໂຮງຮຽນປະຖົມແລ້ວ, ເຫຼີຍເຟີ່ງໄດ້ກາຍເປັນຜູ້ຊ່າງຂັບລົດໄຖນາລຸ້ນທຳອິດຂອງຈີນ. ລາວໄດ້ຕັ້ງອຸດົມການວ່າຈະອຸທິດຕະຫຼອດຊີວິດຂອງຕົນໃຫ້ແກ່ພາລະກິດສ້າງສາສັງຄົມນິຍົມທີ່ຍິ່ງໃຫຍ່ສະຫງ່າງາມທີ່ສຸດຂອງປະເທດຊາດ.
ປີ 1958, ເຫຼີຍເຟີ່ງໄດ້ເດີນທາງຈາກແຂວງຫູນານຂຶ້ນເໜືອໄປເປັນກຳມະກອນຢູ່ໂຮງງານຜະລິດເຫຼັກກ້າອ່ານຊ່ານຕາມຄຳຮຽກຮ້ອງຂອງລັດຖະບານ. ເດືອນທັນວາປີ 1959, ເຫຼີຍເຟີ່ງໄດ້ສະໝັກໄປເປັນທະຫານ. ຫຼັງຈາກເຂົ້າສູ່ກອງທັບແລ້ວ,ເຫຼີຍເຟີ່ງໄດ້ໝັ່ນເຝິກຊ້ອມຍຸດທະວິທີສູ້ຮົບຕ່າງໆໃນແຕ່ລະມື້; ໃນເວລາພັກຜ່ອນ, ລາວໄດ້ຊ່ວຍຊັກເຄື່ອງຕາບຜ້າຫົ່ມໃຫ້ເພື່ອນນັກຮົບ, ເປັນຜູ້ຊ່ວຍອົບຮົມການເມືອງແນວຄິດໃຫ້ເດັກນ້ອຍນອກໂມງຮຽນ, ທັງເຮັດຄວາມດີມີປະໂຫຍດຊ່ວຍປະຊາຊົນ ເຊັ່ນ: ຊ່ວຍແມ່ຕູ້ຊອກລູກຊາຍ, ສົ່ງຢາປົວພະຍາດໃຫ້ພີ່ນ້ອງປະຊາຊົນ ແລະອື່ນໆ. ໃນຕອນນັ້ນໃນສັງຄົມມີຄວາມເວົ້າປະໂຫຍກໜຶ່ງຄື: ເຫຼີຍເຟີ່ງເດີນທາງ 500 ກິໂລແມັດໄປວຽກຕ່າງຖິ່ນ,ກໍໄດ້ເຮັດເລື່ອງດີໆຢ່າງຫຼວງຫຼາຍຕະຫຼອດໄລຍະເວລາທີ່ລາວຂີ່ລົດໄຟຂະບວນໜຶ່ງ. ເມື່ອເຫຼີຍເຟີ່ງເຮັດຄວາມດີແລ້ວບໍ່ເຄີຍອ້າງຊື່ຕົນຈັກເທື່ອ, ສະນັ້ນ ທຸກຄົນທີ່ເຄີຍໄດ້ຮັບການຊ່ວຍເຫຼືອຈາກລາວ ພຽງແຕ່ຮູ້ວ່າລາວແມ່ນທະຫານໃນກອງທັບປົດປ່ອຍປະຊາຊົນຈີນ.
ວິລະກຳແລະ ແນວຄິດສູງສົ່ງທີ່ຄວນເອົາເປັນແບບຢ່າງຂອງເຫຼີຍເພີ່ງໄດ້ເປັນແວ່ນແຍງອັນໃຫຍ່ຫຼວງໃຫ້ກອງທັບກໍຄືວົງການຕ່າງໆໃນສັງຄົມ. ວັນທີ 5 ມີນາປີ 1963, ທ່ານເໝົາເຈີຕົ່ງໄດ້ຂຽນຄຳຈາກລຶກເຖິງສະຫາຍເຫຼີຍເຟີ່ງແລະຄຳຮຽກຮ້ອງໃຫ້ທົ່ວສັງຄົມຮ່ຳຮຽນເອົາເຫຼີຍເຟີ່ງເປັນແບບຢ່າງ, ຫຼັງຈາກນັ້ນວັນທີ 5 ມີນາຂອງທຸກປີຈຶ່ງໄດ້ກາຍເປັນ “ວັນຮ່ຳຮຽນນຳເຫຼີຍເຟີ່ງ”.
“ສືບທອດນໍ້າໃຈເຫຼີຍເຟີ່ງໄປທຸກເຊັ່ນຄົນ”,ນີ້ຄືຄຳຮຽກຮ້ອງຫຼາຍເທື່ອຂອງທ່ານສີຈິ້ນຜິງ ໃຫ້ສົ່ງເສີມນໍ້າໃຈເຫຼີຍເຟີ່ງ, ຮຽນແບບແຜນວິທີເຮັດວຽກຂອງເຫຼີຍເຟີ່ງນັບແຕ່ກອງປະຊຸມໃຫຍ່ຄັ້ງທີ 18 ຂອງພັກກອມມູນິດຈີນເປັນຕົ້ນມາ. ວັນທີ 4 ພຶດສະພາປີ 2013, ໃນງານສົນທະນາກັບຜູ້ຕາງໜ້າຊາວໜູ່ມດີເດັ່ນ, ທ່ານສີຈິ້ນ ຜິງໄດ້ຮຽກຮອ້ງໃຫ້ຊາວໜຸ່ມຈົ່ງຮຽນແບບແຜນວິທີເຮັດວຽກຂອງເຫຼີຍເຟີ່ງ, ຕັ້ງໜ້າເຂົ້າຮ່ວມການເຄື່ອນໄຫວວຽກອາສາສະໝັກ, ເປັນເຈົ້າການແບກຫາບຄວາມຮັບຜິດຊອບທາງສັງຄົມ, ຊ່ວຍເຫຼືອຮັກແພງຜູ້ອື່ນດ້ວຍຈິດໃຈເອື້ອເຟື້ອເຜື່ອແຜ່, ເຮັດຄວາມດີດ້ວຍການຊ່ວຍເຫຼືອຜູ້ທຸກຍາກ ແລະກຸ່ມຄົນດ້ອຍໂອກາດ, ໃຊ້ການກະທຳຕົວຈິງເພື່ອຊຸກຍູ້ຄວາມກ້າວໜ້າທາງສັງຄົມ.
ວັນທີ 28 ກັນຍາປີ 2018, ທ່ານສີຈິ້ນຜິງໄດ້ຢ້ຽມຢາມຫໍລະນຶກເຫຼີຍເຟີ່ງ
ວັນທີ 28 ກັນຍາປີ 2018, ຫຼັງຈາກຢ້ຽມຢາມຫໍລະນຶກເຫຼີຍເຟີ່ງແລ້ວ, ທ່ານສີຈິ້ນຜິງຊີ້ອອກວ່າ, ເຫຼີຍເຟີ່ງເປັນຕົວແບບຂອງຍຸກສະໄໝ, ນໍ້າໃຈເຫຼີຍເຟີ່ງເປັນຄຸນທາດທີ່ອຳມະຕະ. ການຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງປະຊາຊາດຈີນ, ຕ້ອງການຕົວແບບຂອງຍຸກສະໄໝຫຼາຍກວ່າເກົ່າ.
ເຫຼີຍເຟີ່ງ ກໍເປັນຕົວແບບແຫ່ງຍຸກສະໄໝ, ນໍ້າໃຈເຫຼີຍເຟີ່ງກໍເປັນຄຸນທາດອຳມະຕະ, ໂດຍເຊື່ອມສານວັດທະນະທຳອັນເປັນມູນເຊື້ອທີ່ດີງາມຂອງຈີນທີ່ມີປະຫວັດສາດຫຼາຍກວ່າ 5000 ປີ ກັບວັດທະນະທຳປະຕິວັດແດງຂອງພວກເຮົາ, ສະສົມຄວາມດີນ້ອຍໃຫ້ກາຍເປັນຄວາມດີໃຫຍ່, ນີ້ເປັນຄວາມດີທີ່ຍິ່ງໃຫຍ່ທີ່ສຸດ. ນີ້ເປັນທາດແທ້ດຽວກັນກັບຈິດໃຈຮັບໃຊ້ປະຊາຊົນ ແລະເປັນຜູ້ບໍລິການປະຊາຊົນ. ສະນັ້ນ,ຈິດໃຈເຫຼີຍເຟີ່ງສົມຄວນເຊີດຊູສົ່ງເສີມຕະຫຼອດໄປ.
ວັນທີ24 ກໍລະກົດປີ 2019, ທ່ານສີຈິ້ນຜິງໄດ້ສົ່ງສານຊົມເຊີຍເຖິງກອງປະຊຸມໃຫຍ່ຜູ້ແທນສະມາຊິກສະຫະພັນອາສາສະໝັກຈີນຄັ້ງທີ 2, ໂດຍຢືນຢັນຢ່າງເຕັມສ່ວນວ່າ: ນັບແຕ່ກອງປະຊຸມໃຫຍ່ ຂອງພັກກອມມູນິດຈີນຄັ້ງທີ 18 ເປັນຕົ້ນມາ, ອາສາສະໝັກອັນໄພສານ, ອົງການອາສາສະໝັກ ແລະ ຜູ້ໃຫ້ບໍລິການເປັນອາສາສະໝັກໄດ້ເຊີດຊູ ແລະ ປະຕິບັດຕາມຄ່ານິຍົມແກນກາງຂອງສັງຄົມນິຍົມ, ມອບຄວາມອົບອຸ່ນໃຫ້ແກ່ຜູ້ອື່ນ ແລະປະກອບສ່ວນຕໍ່ສັງຄົມ. ໃນສານຊົມເຊີຍຍັງລະບຸວ່າ: ການເຮັດໜ້າທີ່ອາສາສະໝັກໃຫ້ບໍລິການເປັນຂີດໝາຍສຳຄັນແຫ່ງຄວາມກ້າວໜ້າ ແລະຄວາມສິວິໄລຂອງສັງຄົມ, ຫວັງວ່າອາສາສະໝັກຂອງອົງການອາສາສະໝັກ ແລະຜູ້ໃຫ້ບໍລິການເປັນອາສາສະໝັກຈະມີການກະທຳທີ່ສອດຄ່ອງກັບຍຸກສະໄໝ, ສ້າງຜົນງານອັນ ໃໝ່, ເຊີດຊູຈິດໃຈອາສາສະໝັກດ້ວຍການອຸທິດຕົນ, ຮັກແພງກັນດ້ວຍຈິດໃຈມິດຕະພາບ, ຊ່ວຍເຫຼືອກັນ ແລະ ກ້າວໜ້າ, ສືບຕໍ່ໃຊ້ການກະທຳຕົວຈິງເພື່ອບັນທຶກຄວາມດີແບບເຫຼີຍເຟີ່ງໃນຍຸກໃໝ່.
ໃນບົດລາຍງານກອງປະຊຸມໃຫຍ່ ຂອງພັກກອມມູນິດຈີນຄັ້ງທີ 19, ທ່ານສີຈິ້ນຜິງຊີ້ອອກວ່າ: ຕ້ອງເຊີດຊູຈິດໃຈຊາດຈີນ ແລະ ຈິດໃຈແຫ່ງຍຸກສະໄໝ, ກະຕຸກຊຸກຍູ້ປະຊາຊົນໃຫ້ສະແຫວງຫາຄວາມກ້າວໜ້າ ແລະ ຄຸນສົມບັດທີ່ສູງສົ່ງ, ມີຄວາມກະຕັນຍູ ແລະ ຮັກແພງຄອບຄົວຍາດຕິພີ່ນ້ອງ, ຊຸກຍູ້ການເສີມສ້າງຄວາມໜ້າເຊື່ອຖືດ້ວຍຄວາມຊື່ສັດ ແລະເຮັດໃຫ້ການປະຕິບັດໜ້າທີ່ອາສາສະໝັກໃຫ້ບໍລິການມີລະບຽບແບບແຜນ, ເພີ່ມທະວີສະຕິຮັບຜິດຊອບຕໍ່ສັງຄົມ, ສະຕິເຄົາລົບຕໍ່ລະບຽບການ ແລະ ສະຕິອຸທິດຕົນ.
ເດືອນມັງກອນປີ 2019, ທ່ານສີຈິ້ນຜິງໄດ້ໄປສຳຫຼວດກວດເບິ່ງເຂດຊຸມຊົນຊາວຢາງລີນະຄອນທຽນສິນທີ່ເປັນບ່ອນກຳເນີດຂອງອົງການອາສາສະໝັກເຂດຊຸມຊົນແຫ່ງທຳອິດຂອງປະເທດຈີນ
ເດືອນມັງກອນປີ 2019, ທ່ານສີຈິ້ນຜິງໄດ້ໄປສຳຫຼວດກວດເບິ່ງເຂດຊຸມຊົນຊາວຢາງລີນະຄອນທຽນສິນທີ່ເປັນບ່ອນກຳເນີດຂອງອົງການອາສາສະໝັກເຂດຊຸມຊົນແຫ່ງທຳອິດຂອງປະເທດຈີນ. ຫຼັງຈາກຮັບຮູ້ສະພາບການພັດທະນາຂອງການປະຕິບັດໜ້າທີ່ອາສາສະໝັກເຂດຊຸມຊົນມາເປັນເວລາ 30 ກວ່າປີແລ້ວ, ທ່ານສີຈິ້ນຜິງ ໄດ້ກ່າວຍ້ອງຍໍຊົມເຊີຍວ່າ: ພາລະກິດອາສາສະໝັກຈະຖືກບັນທຶກໄວ້ໃນປື້ມປະຫວັດສາດ.
ອາສາສະໝັກເປັນສ່ວນໜຶ່ງທີ່ສຳຄັນໃນພາລະກິດການຄຸ້ມຄອງແບບທັນສະໄໝ, ຈິດໃຈເມດຕາກະລຸນາທີ່ອາສາສະໝັກບຸກບືນສ້າງຂຶ້ນໃນສັງຄົມເປັນສິ່ງສຳຄັນທີ່ສຸດຂອງຄ່ານິຍົມແກນກາງສັງຄົມນິຍົມພວກເຮົາ, ພວກສະຫາຍເປັນຜູ້ກ້າວໜ້າ ແລະ ຜູ້ນຳໜ້າໃນການປະກອບສ່ວນດ້ານນີ້, ຂໍກົດໄລ້ໃຫ້ພວກສະຫາຍ!
ບໍ່ວ່າຍຸກສະໄໝຈະພັດທະນາໄປແນວໃດກໍຕາມ, ນໍ້າໃຈເຫຼີຍເຟີ່ງຈະສືບທອດໄປຕະຫລອດການ, ຊັກຈູງໃຫ້ພວກເຮົາເຊື່ອມສານອຸດົມການ ທັດສະນະຄຸນຄ່າທີ່ສູງສົ່ງ ເຂົ້າສູ່ການເຮັດວຽກ ກໍຄື ຊີວິດປະຈຳວັນ; ໃຫ້ກຳລັງໃຈແກ່ພວກເຮົາອຸທິດສະຕິປັນຍາ ແລະ ກຳລັງແຮງຂອງຕົນປະກອບສ່ວນເຂົ້າໃນການພັດທະນາພາລະກິດຂອງພັກ ແລະ ລັດ, ຈົນກ້າວໄປເຖິງການບັນລຸເປົ້າໝາຍຄຸນຄ່າຂອງພວກເຮົາເອງ. ປະຈຸບັນຢູ່ປະເທດຈີນ, ປະຊາຊົນນັບມື້ນັບຫຼາຍຂຶ້ນໄດ້ເຂົ້າຮ່ວມຖັນແຖວອາສາສະໝັກ. ອີງຕາມສະຖິຕິ, ໄດ້ມີອົງການອາສາສະໝັກຫຼາຍກວ່າ 580 ພັນອົງການໃນຂອບເຂດທົ່ວປະເທດ, ອາສາສະໝັກທີ່ລົງທະບຽນດ້ວຍຊື່ຈິງມີເຖິງ 110 ລ້ານຄົນ, ການປະຕິບັດໜ້າທີ່ອາສາສະໝັກໃຫ້ບໍລິການໄດ້ກາຍເປັນພາບວີວທິວທັດທີ່ສວຍງາມໃນຊີວິດປະຈຳວັນຂອງປະຊາຊົນ.
ຄຳເຫັນ
0