ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວາລະສານ “ຊິວຊື້” ສະບັບວັນທີ 1 ເມສານີ້ໄດ້ລົງພິມບົດຄວາມເຫັນຂອງທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ປະທານປະເທດຈີນ ປະທານຄະນະກຳມະການການທະຫານສູນກາງຈີນທີ່ມີຫົວຂໍ້ວ່າ “ຄວາມເຫັນໃນເວລາທີ່ສຳຫຼວດກວດເບິ່ງວຽກງານປ້ອງກັນ ແລະ ຄວບຄຸມພະຍາດCOVID-19ຢູ່ແຂວງຫູເປີຍ”.
ໃນບົດຄວາມເຫັນກ່າວເນັ້ນວ່າ, ແຂວງຫູເປີຍ ແລະ ນະຄອນອູຮັ້ນເປັນຈຸດສຸມ ແລະ ສະໜາມຮົບທີ່ຈະຕ້ອງເອົາຊະນະໃນຂັ້ນສຸດທ້າຍໃນບັ້ນຕ້ານພະຍາດຄັ້ງນີ້. ໂດຍຜ່ານການສຸມທຸກຄວາມພະຍາຍາມຢ່າງລຳບາກ, ສະພາບການປ້ອງກັນ ແລະ ຄວບຄຸມພະຍາດຢູ່ແຂວງຫູເປີຍ ແລະ ນະຄອນອູຮັ້ນໄດ້ພັດທະນາໄປໃນທິດທາງທີ່ດີ, ໄດ້ຮັບໝາກຜົນສຳຄັນເປັນໄລຍະໆ, ແຕ່ໜ້າທີ່ປ້ອງກັນ ແລະ ຄວບຄຸມພະຍາດຍັງໜັກໜ່ວງຢູ່. ຍິ່ງໃນເວລານີ້, ຍິ່ງຕ້ອງຮັກສາສະມາທິໄວ້, ສືບຕໍ່ຖືເອົາການປ້ອງກັນ ແລະ ຄວບຄຸມພະຍາດເປັນວຽກບູລິມະສິດອັນດັບໜຶ່ງໃນປະຈຸບັນ, ປະຕິບັດວຽກງານປ້ອງກັນ ແລະ ຄວບຄຸມພະຍາດທຸກປະການໃຫ້ໜັກແໜ້ນ ມີຜົນຕົວຈິງ ແລະ ລະອຽດຢ່າງບໍ່ລົດລະ, ເດັດດ່ຽວເອົາຊະນະບັ້ນປ້ອງກັນແຂວງຫູເປີຍ ແລະ ບັ້ນປ້ອງກັນນະຄອນອູຮັ້ນ.
ບົດຄວາມເຫັນຍັງຊີ້ອອກວ່າ, ນັບແຕ່ເກີດການແຜ່ລະບາດຂອງພະຍາດCOVID-19 ເປັນຕົ້ນມາ, ສູນກາງພັກກອມມູນິດຈີນໄດ້ໃຫ້ຄວາມສຳຄັນຢ່າງສູງ, ຖືເອົາຄວາມປອດໄພດ້ານຊີວິດ ແລະ ສຸຂະພາບຮ່າງກາຍຂອງປະຊາຊົນເປັນສິ່ງສຳຄັນກວ່າໝູ່, ສຸມໃສ່ໃຫ້ການສະໜັບສະໜູນແຂວງຫູເປີຍ ແລະ ນະຄອນອູຮັ້ນປະຕິບັດວຽກງານປ້ອງກັນ ແລະ ຄວບຄຸມພະຍາດ, ໃຊ້ມາດຕະການປ້ອງກັນ ແລະຄວບຄຸມທີ່ຮອບດ້ານທີ່ສຸດ ເຂັ້ມງວດທີ່ສຸດ ແລະ ເຖິງຖອງທີ່ສຸດ, ເດັດດ່ຽວສະກັດກັ້ນທ່ວງທ່າແຜ່ລະບາດຂອງພະຍາດ.
ໃນບົດຄວາມເຫັນດັ່ງກ່າວຍັງລະບຸວ່, ຕ້ອງຖືເອົາວຽກງານປິ່ນປົວຄົນເຈັບໄວ້ຢູ່ອັນດັບໜຶ່ງ. ສຸມຄວາມພະຍາຍາມໃນການປິ່ນປົວຕາມຫຼັກວິທະຍາສາດຢ່າງຖືກຕ້ອງກັບເປົ້າໝາຍທີ່ແນ່ນອນ, ຍົກສູງອັດຕາປິ່ນປົວໃຫ້ຫາຍຂາດຈາກພະຍາດ ແລະ ຫຼຸດອັນຕາການຕາຍຍ້ອນພະຍາດຢ່າງຫຼາຍຍິ່ງດີ. ຕ້ອງອາໄສປະຊາຊົນຢ່າງໃກ້ຊິດ, ປຸກລະດົມປະຊາຊົນຢ່າງເຕັມສ່ວນ, ຍົກສູງຄວາມສາມາດຂອງປະຊາຊົນໃນການບໍລິການ ແລະ ປ້ອງກັນຕົນເອງ. ຕ້ອງເພີ່ມທະວີການປ້ອງກັນ ແລະ ຄວບຄຸມພະຍາດຢູ່ເຂດທີ່ມີກຳລັງບໍ່ເຂັ້ມແຂງ, ປັບປຸງເງື່ອນໄຂສາທາລະນະສຸກຢູ່ຊົນນະບົດ, ເພີ່ມທະວີການອົບຮົມໃຫ້ແກ່ພະນັກງານການແພດ ແລະ ພະນັກງານຢູ່ຂັ້ນຮາກຖານຊົນນະບົດ, ສະໜອງອຸປະກອນປ້ອງກັນພະຍາດທີ່ຈຳເປັນ. ຕ້ອງຮັບປະກັນການດຳລົງຊີວິດຂັ້ນພື້ນຖານຂອງປະຊາຊົນ, ພິຈາລະນາເຖິງຄວາມຕ້ອງການດ້ານການດຳລົງຊີວິດຂັ້ນພື້ນຖານຂອງປະຊາຊົນຢ່າງເຕັມສ່ວນ, ຮັບປະກັນການສະໜອງເຄື່ອງບໍລິໂພກທີ່ຈຳເປັນ. ຕ້ອງເພີ່ມທະວີການຊ່ວຍເຫຼືອທາງດ້ານຈິດໃຈ, ເພີ່ມການນຳພາຫາງສຽງ, ຍຶດໝັ້ນການປ້ອງກັນ ແລະ ຄວບຄຸມຕາມກົດໝາຍ, ແກ້ໄຂບັນຫາທຸກປະເພດທີ່ອາດຈະເກີດຂຶ້ນໃນການປ້ອງກັນ ແລະ ຄວບຄຸມພະຍາດ, ປົກປັກຮັກສາຄວາມໝັ້ນຄົງໂດຍລວມຂອງສັງຄົມ.
ໃນບົດຄວາມຍັງຊີ້ອອກວ່າ, ຕ້ອງສ້າງລະບຽບການການເຄື່ອນໄຫວທາງດ້ານຂອງເສດຖະກິດສັງຄົມທີ່ສອດຄ່ອງກັບການປ້ອງກັນ ແລະ ຄວບຄຸມພະຍາດ. ພາຍໃຕ້ປະຖົມປັດໄຈທີ່ເພີ່ມທະວີການປ້ອງກັນ ແລະ ຄວບຄຸມພະຍາດ, ໃຊ້ນະໂຍບາຍທີ່ມີຄວາມແຕກຕ່າງກັນ, ຟື້ນຟູການເຮັດວຽກ ແລະ ການຜະລິດຕາມຄວາມເປັນຈິງຂອງທຸກທ້ອງຖິ່ນທີ່ມີຄວາມສ່ຽງໃນລະດັບທີ່ແຕກຕ່າງກັນ, ແລະ ຕາມປະເພດ ແລະ ໄລຍະເວລາຕາມໂອກາດທີ່ເໝາະສົມ.
ຄຳເຫັນ
0