ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ການຝຶກຝົນຫຼໍ່ຫຼອມຄຸນສົມບັດຂອງຕົນຢ່າງເຂັ້ມງວດເປັນວຽກທີ່ຕ້ອງເຮັດເປັນປະຈຳຂອງພັກກອມມູນິດຈີນໃນການຄຸ້ມຄອງພັກຢ່າງເຂັ້ມງວດແລະຮອບດ້ານ . ນັບແຕ່ກອງປະຊຸມໃຫຍ່ຄັ້ງທີ 18 ຂອງພັກກອມມູນິດຈີນເປັນຕົ້ນມາ, ພັກກອມມູນິດຈີນໄດ້ມີແນວຄວາມຄິດໃໝ່,ວິທີການໃໝ່ແລະມາດຕະການໃໝ່ໃນການຄຸ້ມຄອງພັກຢ່າງເຂັ້ມງວດແລະຮອບດ້ານ.ຕົວຢ່າງເຊັ່ນ, ປາບປາມການສໍ້ລາດບັງຫຼວງທຸກປະການບໍ່ວ່າຈະເປັນການ “ຕີເສືອ”ຫຼື “ຕົບແມງວັນ” ທີ່ໝາຍເຖິງພວກສໍ້ລາດບັງຫຼວງໂດຍ ບໍ່ມີເຂດຍົກເວັ້ນ, ປົກຄຸມຢ່າງທົ່ວເຖິງ ແລະ ປາບປາມປະກົດການສໍ້ລາດບັງຫຼວງທຸກປະການ, ຈັດຕັ້ງໜ່ວຍກວດກາສະເພາະກິດແລະ “ກວດກາຄືນໂດຍບໍ່ແຈ້ງການລ່ວງໜ້າ”. ຖ້າຢາກເຮັດໄດ້ຄືແນວນີ້, ບາດກ້າວທຳອິດກໍຄືຮຽກຮ້ອງໃຫ້ປະຕິບັດຈາກການຝຶກຝົນຫຼໍ່ຫຼອມຄຸນສົມບັດຂອງຕົນເອງ. ດ້ວຍເຫດນີ້, ການຝຶກຝົນຫຼໍ່ຫຼອມຄຸນສົມບັດໃຫ້ແກ່ຕົນເອງບໍ່ພຽງແຕ່ເປັນວຽກທີ່ຕ້ອງເຮັດເປັນປະຈຳໃນການຄຸ້ມຄອງພັກຢ່າງເຂັ້ມງວດຮອບດ້ານເທົ່ານັ້ນ ຍັງເປັນວຽກທຳອິດທີ່ຕ້ອງເຮັດໃຫ້ດີໃນດ້ານນີ້,ແຕ່ວ່າ, ການຝຶກຝົນຫຼໍ່ຫຼອມຄຸນສົມບັດໃຫ້ແກ່ຕົນເອງມັນບໍ່ແມ່ນເລື່ອງຈິດຕະນາການ, ບໍ່ແມ່ນນາມມະທຳ,ແຕ່ເປັນຮູບປະທຳແລະເປັນພຶດຕິກຳຕົວຈິງ, ເຊິ່ງຕ້ອງສະແດງອອກໃນດ້ານການຮ່ຳຮຽນ, ການດຳລົງຊີວິດແລະການເຄື່ອນໄຫວວຽກງານຕ່າງໆຂອງຕົນ.
ທ່ານຫຼີວານຈຸ່ນຖືກຄັດເລືອກໃຫ້ເປັນ “ນາຍຊ່າງໃຫຍ່ດ້ານການຈອດໂລຫະລົດໄຟຄວາມໄວສູງ” ທັງຖືກປະກວດເປັນບຸກຄົນດີເດັ່ນທີ່ສ້າງຄວາມປະທັບໃຈໃຫ້ແກ່ປະຊາຊົນຈີນປີ 2016 ທີ່ສະຖານີໂທລະພາບສູນກາງຈີນເປັນຜູ້ຈັດຂຶ້ນ
ພວກເຮົາຈະແນະນຳສະມາຊິກພັກກອມມູນິດຈີນຜູ້ດີເດັ່ນຜູ້ໜຶ່ງ ເຊິ່ງສະມາຊິກພັກກອມມູນິດຈີນຜູ້ນີ້ຊື່ວ່າ ຫຼີວານຈຸ່ນ ເພິ່ນເປັນຊ່າງຈອດໂລຫະຂອງບໍລິສັດລົດໄຟໂດຍສານສາງຊຸ່ນທີ່ຂຶ້ນກັບກຸ່ມບໍລິສັດຈົ່ງເຊີຈີນ, ຕຳແໜ່ງວຽກຂອງເພິ່ນແມ່ນຈອດໂບກີ(bogie), ໃນນີ້ ໂບກີ ເປັນເຄື່ອງອາໄຫຼ່ຮອງຮັບນ້ຳໜັກແລະແຮງສັ່ນສະເທືອນ ເຊິ່ງເປັນເຄື່ອງອາໄຫຼ່ພາກສ່ວນສຳຄັນຂອງລົດໄຟ. ສ່ວນ ເຕັກນິກການຜະລິດໂບກີ ເປັນໜຶ່ງໃນເຕັກນິກແກນກາງສຳຄັນ 9 ຢ່າງຂອງລົດໄຟຄວາມໄວສູງ. ລົດໄຟຄວາມໄວສູງຂອງຈີນສາມາດແລ່ນດ້ວຍຄວາມໄວສູງ,ສາເຫດຕົ້ນຕໍອັນໜຶ່ງກໍແມ່ນຍ້ອນເຕັກນິກດ້ານໂບກີໄດ້ຮັບຄວາມຄືບໜ້າແບບບຸກທະລຸອັນສຳຄັນ. ທ່ານຫຼີວານຈຸ່ນໄດ້ມີສ່ວນຮ່ວມໃນການທົດລອງຜະລິດແລະຈອດໂບກີທີ່ໃຊ້ໃນລົດໄຟໂດຍສານລະຫວ່າງຕົວເມືອງ,ລົດໄຟຄວາມໄວສູງຫຼາຍສິບຊະນິດຂອງຈີນ ທັງໄດ້ສະຫຼຸບແລະສ້າງແບບແຜນວິທີການຈອດໂບກີ 30 ກວ່າຊະນິດ, ສາມາດບຸກທະລຸເຕັກນິກ 150 ກວ່າລາຍການ, ໃນນັ້ນມີ 27 ລາຍການໄດ້ຮັບສິດທິບັດລະດັບຊາດ. ອາໄສເຕັກນິກຂັ້ນສຸດຍອດໃນການຈອດໂລຫະ, ທ່ານຫຼີວານຈຸ່ນຖືກຄັດເລືອກໃຫ້ເປັນ “ນາຍຊ່າງໃຫຍ່ດ້ານການຈອດໂລຫະລົດໄຟຄວາມໄວສູງ” ທັງຖືກປະກວດເປັນບຸກຄົນດີເດັ່ນທີ່ສ້າງຄວາມປະທັບໃຈໃຫ້ແກ່ປະຊາຊົນຈີນປີ 2016 ທີ່ສະຖານີໂທລະພາບສູນກາງຈີນເປັນຜູ້ຈັດຂຶ້ນ. ນອກນີ້ຍັງໄດ້ຮັບເລືອກຕັ້ງໃຫ້ເປັນຜູ້ແທນກອງປະຊຸມຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19, ເປັນສະມາຊິກພັກກອມມູນິດຈີນຜູ້ດີເດັ່ນທົ່ວປະເທດ.
ທ່ານຫຼີວານຈຸ່ນມີຄຳຄົມວ່າ: ພັດທະນາເຕັກນິກໃຫ້ເຖິງຂັ້ນສຸດຍອດ, ຖືຜະລິດຕະພັນທຸກອັນເປັນສິລະປະກຳ. ຕາມເພິ່ນເຫັນວ່າ: ໂບກີກໍປຽບເໝືອນຂາສອງເບື້ອງຂອງລົດໄຟຄວາມໄວສູງ ເຊິ່ງພົວພັນເຖິງຄວາມໄວແລະຄວາມປອດໄພຂອງລົດໄຟຄວາມໄວສູງໃນເວລາລົດແລ່ນ.ໃນທຸກມື້ນີ້, ຄວາມໄວຂອງລົດໄຟຄວາມໄວສູງຂອງຈີນໄດ້ບັນລຸເຖິງ 300ກວ່າກິໂລແມັດຕໍ່ຊົ່ວໂມງ ເທົ່າກັບຄວາມໄວບິນຂຶ້ນສູ່ທ້ອງຟ້າຂອງເຮືອບິນ, ສະນັ້ນ, ໃນການແລ່ນລົດດ້ວຍຄວາມໄວສູງຄືແນວນີ້, ຮອຍຈອດແຕ່ລະບ່ອນຈະບໍ່ໃຫ້ມີການຜຸຜ່ອຍຢ່າງເດັດຂາດ, ແມ່ນແຕ່ເສດເຫຼັກຈອດໜ້ອຍດຽວກໍຈະສ້າງຄວາມສ່ຽງຕໍ່ຄວາມປອດໄພໃນການແລ່ນລົດຂອງລົດໄຟທົ່ວຂະບວນ. ນີ້ຈຶ່ງຮຽກຮ້ອງໃຫ້ເຂົາເຈົ້າຕ້ອງຜະລິດຜະລິດຕະພັນທຸກອັນໃຫ້ເປັນສິລະປະກຳທີ່ຈົບງາມປານີດດ້ວຍຈິດໃຈທີ່ຮອບຄອບຂອງຊ່າງສີມືທີ່ມີຈັນຍາບັນສູງ.
ແຕ່ວ່າ ພວກເຮົາກໍຮູ້ດີວ່າ ສິລະປະກຳແມ່ນວັດຖຸເພື່ອນຳມາວາງສະແດງໃຫ້ຄົນທັງຫຼາຍໄດ້ຊື່ນຊົມ, ແຕ່ວ່າ ໃນຄວາມເປັນຈິງແລ້ວ, ເຄື່ອງອາໄຫຼ່ທີ່ທ່ານຫຼີວານຈຸ່ນຈອດເຫຼົ່ານີ້, ຄົນທັງຫຼາຍຈະບໍ່ມີໂອກາດໄດ້ເຫັນ, ຄັນຊັ້ນ,ເປັນຫຍັງເພິ່ນຍັງວາງມາດຕະຖານທີ່ເຂັ້ມງວດໃຫ້ກັບຕົນເອງ? ທ່ານຫຼີວານຈຸ່ນຕອບວ່າ: ເຮັດແນວນີ້ບໍ່ແມ່ນເພື່ອຢາກໄດ້ຄວາມຍ້ອງຍໍສັນລະເສີນ, ແຕ່ເປັນຈັນຍາບັນໃນການປະຕິບັດໜ້າທີ່ໃຫ້ດີດ້ວຍຄວາມຕັ້ງໃຈແລະມີຄວາມລະອຽດປານີດ ເຊິ່ງເປັນຄວາມຮັບຜິດຊອບຢ່າງໜຶ່ງ.
ທ່ານຫຼີວ້ານຈຸ່ນ ເປັນຊ່າງສີມືຂັ້ນຍຸດຍອດຂອງຊາດໃຫຍ່ທີ່ບໍ່ລົດລະຄວາມພະຍາຍາມຈັກເທື່ອ, ເພິ່ນກຳລັງໃຊ້ການກະທຳຕົວຈິງເພື່ອສະແດງໃຫ້ເຫັນເຖິງຄວາມຮັບຜິດຊອບຂອງສະມາຊິກພັກກອມມູນິດຈີນ. ຢູ່ປະເທດຈີນຍັງມີສະມາຊິກພັກກອມມູນິດຈີນຈຳນວນຫຼວງຫຼາຍທີ່ມີການປະພຶດຄືທ່ານຫຼີວານຈຸ່ນ ດ້ວຍການຍຶດໝັ້ນການສູ້ຊົນແລະປະດິດສ້າງໃໝ່ຢູ່ຕາມຕຳແໜ່ງວຽກງານຂອງຕົນຢ່າງງຽບໆ, ເຂົາເຈົ້າໄດ້ໃຊ້ການກະທຳຕົວຈິງເປັນສິ່ງທີ່ສະທ້ອນໃຫ້ຮູ້ວ່າ: ການຝຶກຝົນຫຼໍ່ຫຼອມຄຸນສົມບັດໃຫ້ແກ່ຕົນເອງນັ້ນຈຸດປະສົງແມ່ນເພື່ອສ້າງຄ່ານິຍົມ, ຝຶກຝົນໃຫ້ຕົນເອງເປັນຜູ້ທີ່ມີມະໂນທຳແລະມີອຸດົມຄະຕິ, ແຕ່ຖ້າເວົ້າສຳລັບສະມາຊິກພັກກອມມູນິດຈີນແລ້ວ, ກໍແມ່ນເພື່ອສ້າງໃຫ້ມີສະຕິພັກ.
ກ່ຽວກັບເລື່ອງຝຶກຝົນຫຼໍ່ຫຼອມຄຸນສົມບັດຂອງສະມາຊິກພັກກອມມູນິດຈີນ, ທ່ານສີຈິ້ນຜິງມີຄວາມເຫັນວ່າ:
“ຕ້ອງສຳນຶກຢູ່ຕະຫຼອດເວລາວ່າ ຕ້ອງປະຕິບັດຕາມກົດລະບຽບພັກແລະຖືກຕ້ອງຕາມມາດຕະຖານສະມາຊິກພັກກອມມູນິດ,ຕ້ອງປະຕິບັດຕາມຈິດໃຈທີ່ ‘ບໍ່ຕຳໜິແລະຮຽກຮ້ອງໃຫ້ຄົນອື່ນສົມບູນແບບເກີນໄປ, ແຕ່ຕ້ອງສຳຫຼວດກວດກາຕົນເອງຢູ່ສະເໝີ’, ເວລາໃດກໍຕ້ອງມີວິໄນຕໍ່ຕົນເອງ,ສຳຫຼວດກວດາຕົນເອງ,ເຕືອນສະຕິຕົນເອງແລະກະຕຸ້ນໃຈຕໍ່ຕົນເອງ”
ສຳນວນດັ່ງກ່າວແມ່ນຄວາມເຫັນຂອງທ່ານສີຈິ້ນຜິງທີ່ທ່ານປາໄສໃນກອງປະຊຸມວຽກງານການຈັດຕັ້ງທົ່ວປະເທດຈີນທີ່ຈັດຂຶ້ນເມື່ອວັນທີ 28 ມິຖຸນາປີ 2013. ໃນຄວາມເວົ້າດັ່ງກ່າວ, ທ່ານສີຈິ້ນຜິງໄດ້ຍົກເອົາສຳນວນອຳມະຕະໃນສະໄໝບູຮານຈີນຄື “ຢວີເຢີນປູ້ສິວເປີ້ຍ,ຈຽນເຊີນໂຢ້ປູ້ຈີ”ແປວ່າ ບໍ່ຕຳໜິແລະຮຽກຮ້ອງໃຫ້ຄົນອື່ນສົມບູນແບບເກີນໄປ, ແຕ່ຕ້ອງສຳຫຼວດກວດກາຕົນເອງຢູ່ສະເໝີ. ເຊິ່ງຄຳນີ້ມາຈາກປຶ້ມ “ຊ່າງຊູ” ທີ່ເປັນປຶ້ມຕຳລາອຳມະຕະໃນປັດຊະຍາຂົງຈື້. ຕາມທັດສະນະຂອງຄົນເຮົາໃນຍຸກປັດຈຸບັນແລ້ວ, ຄວາມໝາຍຕົ້ນຕໍຂອງຄຳດັ່ງກ່າວກໍຄື ຕ້ອງເຂັ້ມງວດຕໍ່ຕົນເອງແລະ ໂຍະຍານຕໍ່ຄົນອື່ນ. ຄວາມຈິງແລ້ວ, ການທີ່ເຂັ້ມງວດຕໍ່ຕົນເອງແລະໂຍະຍານຕໍ່ຄົນອື່ນ, ບໍ່ວ່າສຳລັບໃຜຜູ້ໃດກໍຕາມກໍແມ່ນສິ່ງທີ່ເຮັດໄດ້ຍາກທີ່ສຸດ. ຢູ່ຈີນມີເລື່ອງປະຫວັດສາດເລື່ອງໜຶ່ງທີ່ບັນທຶກໄວ້ໃນປຶ້ມ 《ຊົ້ງສື·ລວີເມີງເຈີ້ງຈ້ວນ》ແປວ່າ “ປະຫວັດສາດລາຊະວົງຊົ້ງ, ປະຫວັດລວີເມີງເຈີ້ງ”.
ລວີເມີງເຈີ້ງ ເປັນຜູ້ຊ່ວຍຜູ້ປົກຄອງ ເຊິ່ງເທົ່າກັບຕຳແໜ່ງເປັນຮອງອັກຄະເສນາບໍດີໃນລາຊະວົງຊົ້ງ（ປີ960—ປີ1279）. ໃນມື້ທຳອິດທີ່ເພິ່ນເດີນທາງໄປ ພະລາຊະວັງເພື່ອເຂົ້າເຝົ້າເຈົ້າຊີວິດ, ກໍໄດ້ຍິນເສນາບໍດີຄົນໜຶ່ງເວົ້າດ້ວຍສຽງດັງວ່າ ຄົນນັ້ນເປັນຮອງອັກຄະເສນາບໍດີພຸ້ນຫວະ? ລວີເມີງເຈີ້ງໄດ້ຍິນເຕັມຫູ, ແຕ່ເພິ່ນທຳທ່າເຮັດຄືບໍ່ໄດ້ຍິນຫຍັງເລີຍ ແລ້ວຍ່າງຕໍ່ໄປປານບໍ່ມີຫຍັງເກີດຂຶ້ນ. ໝູ່ຮ່ວມທາງຮູ້ສຶກຄຽດແຄ້ນໂມໂຫແທນ ກໍເລີຍເວົ້າກັບລວີເມີງເຈີ້ງວ່າ, ໄປຖາມເບິ່ງດຸ ວ່າຄົນນັ້ນຊື່ຫຍັງແທ້? ລວີເມີງເຈີ້ງກໍບອກວ່າ ຢ່າສູ່ໄປຖາມເດັດຂາດ,ຄັນໄປຖາມແທ້, ເຮົາກໍບໍ່ສາມາດລືມຊື່ນັ້ນຕະຫຼອດໄປ. ຄັນບໍ່ຖາມ, ເລື່ອງມັນກໍແລ້ວໄປ. ລວີເມີງເຈີ້ງບໍ່ໄດ້ຖາມ, ເພິ່ນກໍບໍ່ຮູ້ວ່າ ຜູ້ນັ້ນແມ່ນໃຜ, ແລ້ວເລື່ອງນີ້ກໍຜ່ານໄປ.
ຍັງອີກເລື່ອງໜຶ່ງ. ພາຍຫຼັງລວີເມີງເຈີ້ງຂຶ້ນດຳລົງຕຳແໜ່ງເປັນຜູ້ຊ່ວຍຜູ້ປົກຄອງແລ້ວ, ມີອຳນາດສູງຫຼາຍ. ຕອນນັ້ນມີເສນາບໍດີຜູ້ໜຶ່ງຢາກເອົາໃຈລວີເມີງເຈີ້ງ ຈິ່ງໄດ້ມອບແວ່ນທອງອັນໜຶ່ງໃຫ້ເພິ່ນເພື່ອເປັນຂອງຂວັນ, ທັງບອກວ່າ ແວ່ນອັນນີ້ເປັນແວ່ນປະເສີດ ເຊິ່ງສາມາດແຍງເຫັນສັບພະສິ່ງໃນຂອບເຂດລັດສະໝີ 200 ລີ້(ເທົ່າກັບ100 ກິໂລແມັດ). ລວີເມີງເຈີ້ງກໍເວົ້າວ່າ ໃບໜ້າຂ້ອຍນີ້ນ່າ, ໃຫຍ່ສົມຄວນ, ແຕ່ໃຫຍ່ສຸດກໍ ສ່ຳຈານເທົ່ານັ້ນ, ຊິຈຳເປັນອີ່ຫຍັງທີ່ຕ້ອງການແວ່ນແຍງທີ່ສາມາດແຍງເຫັນສິ່ງຂອງໃນຂອບເຂດລັດສະໝີ 200 ລີ້? ຂ້ອຍບໍ່ຕ້ອງການໃຊ້ແວ່ນແຍງໃຫຍ່ປານນັ້ນດອກ. ຄືແນວນີ້ຫຼະ, ເພິ່ນໄດ້ປະຕິເສດຂອງຂວັນດັ່ງກ່າວ.
ສອງເລື່ອງລາວກ່ຽວກັບທ່ານລວີເມີງເຈີ້ງດັ່ງກ່າວນີ້, ເລື່ອງໜຶ່ງແມ່ນກ່ຽວກັບການໂຍະຍານຕໍ່ຜູ້ອື່ນ, ອີກເລື່ອງໜຶ່ງແມ່ນເວົ້າກ່ຽວກັບການເຂັ້ມງວດຕໍ່ຕົນເອງ, ສອງເລື່ອງນີ້ເປັນພຽງເລື່ອງທຳມະດາໃນຕະຫຼອດຊີວິດຂອງທ່ານລວີເມີງເຈີ້ງເທົ່ານັ້ນ, ລ້ວນແຕ່ໄດ້ບັນທຶກໄວ້ໃນປຶ້ມ “ປະຫວັດສາດລາຊະວົງຊົ້ງ, ປະຫວັດລວີເມີງເຈີ້ງ”.ສາມາດເຫັນໄດ້ວ່າ,ການທີ່ບໍ່ຕຳໜິແລະຮຽກຮ້ອງໃຫ້ຄົນອື່ນສົມບູນແບບເກີນໄປ, ແຕ່ຕ້ອງສຳຫຼວດກວດກາຕົນເອງຢູ່ສະເໝີ. ເວົ້າສຳລັບການຝຶກຝົນຫຼໍ່ຫຼອມຄຸນສົມບັດແລ້ວ, ເປັນມາດຕະຖານທີ່ຍາກທີ່ສຸດທີ່ຈະບັນລຸໄດ້. ຄົນຜູ້ໜຶ່ງຫາກສາມາດເຮັດໄດ້ໃນລັກສະນະດັ່ງກ່າວ, ກໍອາດເວົ້າໄດ້ວ່າ ສຸດຍອດແລ້ວໃນດ້ານການຝຶກຝົນຫຼໍ່ຫຼອມຄຸນສົມບັດໃຫ້ແກ່ຕົນເອງ.
ຄຳເຫັນ
0