ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ໃນເດືອນຕຸລາປີ 2017, ຫຼັງຈາກກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ໄດ້ປິດລົງ, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນພ້ອມດ້ວຍຄະນະປະຈຳກົມການເມືອງສູນກາງພັກກອມມູນິດຈີນຊຸດໃໝ່ໄດ້ພົບປະກັບນັກຂ່າວສື່ມວນຊົນຈີນແລະຕ່າງປະເທດ, ໃນເວລາກ່າວຄຳປາໄສໃນໂອກາດຄັ້ງນັ້ນ, ທ່ານສີຈິ້ນຜິງໄດ້ຍົກເອົາກອນບູຮານຈີນມາກ່າວວ່າ: “ບໍ່ຢາກໃຫ້ຄົນຍ້ອງວ່າມີສີສົດໃສສວຍງາມ,ຂໍພຽງແຕ່ສົ່ງກິ່ນຫອມໄປທົ່ວເມືອງມະນຸດກໍພໍ” ເຊິ່ງຄຳກອນນີ້ໄດ້ຄັດຈາກກອນບູຮານທີ່ແຕ່ງໂດຍ ຫວາງມຽນ ນັກກະວີແລະຈິດຕະກອນໃນສະໄໝລາຊະວົງຢວນຂອງຈີນ（ປີ1271—ປີ1368），ໃນບົດກອນດັ່ງກ່າວໄດ້ລະບຸວ່າ: ເວລາໃດ ດອກເມີຍກໍບໍ່ໄດ້ອວດອົ່ງ ສີສົດໃສສວຍງາມຂອງຕົນເພື່ອໃຫ້ຄົນອື່ນຍ້ອງຍໍສັນລະເສີນ, ພຽງແຕ່ປາຖະໜາຢາກສົ່ງກິ່ນຫອມໄປທົ່ວເມືອງມະນຸດກໍພໍ. ທ່ານສີຈິ້ນຜິງໄດ້ຍົກເອົາກອນບູຮານສອງປະໂຫຍກດັ່ງກ່າວເພື່ອສະແດງອຸດົມການຂອງຕົນ ເຊິ່ງສ່ອງແສງໃຫ້ເຫັນທາດແທ້ທີ່ມີຄວາມໝັ້ນໃຈຕົນເອງຂອງພັກກອມມູນິດຈີນທີ່ເປັນພັກໃຫຍ່ແລະຈີນໃນຖານະເປັນປະເທດໃຫຍ່, ໄດ້ຖ່າຍທອດທາດແທ້ທີ່ຕິດແທດຕົວຈິງທີ່ເຮັດວຽກຢ່າງອົດທົນແລະເຮັດແທ້ທຳຈິງ, ທັງໄດ້ວາງມາດຕະຖານສູງ ສຳລັບສະມາຊິກພັກກອມມູນິດຈີນໃນຍຸກໃໝ່ໃນການຝຶກຝົນຫຼໍ່ຫຼອມຄຸນສົມບັດຂອງຕົນຢ່າງເຂັ້ມງວດ.
ຄວາມຈິງແລ້ວ, ຊາດຈີນເປັນຊົນຊາດທີ່ໃຫ້ຄວາມສຳຄັນເປັນພິເສດຕໍ່ການຝຶກຝົນຫຼໍ່ຫຼອມຄຸນສົມບັດຂອງຕົນເອງ. ໃນວັດທະນະທຳຈີນທີ່ມີມູນເຊື້ອທີ່ດີງາມ ກໍໃຫ້ຄວາມສຳຄັນແລະເນັ້ນໜັກເປັນພິເສດຕໍ່ການຝຶກຝົນຫຼໍ່ຫຼອມຄຸນສົມບັດຂອງຕົນເອງ. ຈີນມີຄຳບູຮານວ່າ: “ຊິວເຊີນ,ສີເຈ່ຍ,ຈື້ໂກ,ຜິງທຽນເຊ້ຍ” ແປວ່າ ຝຶກຝົນຫຼໍ່ຫຼອມຄຸນສົມບັດໃຫ້ແກ່ຕົນເອງ, ຄຸ້ມຄອງຄອບຄົວໃຫ້ດີ, ບໍລິຫານບ້ານເມືອງໃຫ້ຈະເລີນຮຸ່ງເຮືອງ, ເຮັດໃຫ້ປະຊາຊົນຢູ່ເຢັນເປັນສຸກແລະປະເທດຊາດມີຄວາມສະຫງົບປອດໄພ.ໃນນີ້, ການຝຶກຝົນຫຼໍ່ຫຼອມຄຸນສົມບັດໃຫ້ແກ່ຕົນເອງເປັນອັນດັບໜຶ່ງ, ແລະຍັງມີຄວາມໝາຍສຳຄັນເປັນພິເສດຕໍ່ຊີວິດສັງຄົມ, ພຶດຕິກຳສັງຄົມແລະການພັດທະນາສັງຄົມໃນທຸກມື້ນີ້.
ຕົວຢ່າງເຊັ່ນ: ຫຼັງຈາກກອງປະຊຸມໃຫຍ່ຄັ້ງທີ 18 ຂອງພັກກອມມູນິດຈີນ, ທົ່ວປະເທດຈີນໄດ້ດຳເນີນບັ້ນສຶກສາອົບຮົມໃນຫົວຂໍ້ “3 ເຂັ້ມງວດ 3 ຕິດແທດຕົວຈິງ” (ຝຶກຝົນຫຼໍ່ຫຼອມຄຸນສົມບັດຂອງຕົນຢ່າງເຂັ້ມງວດ, ໃຊ້ສິດອຳນາດຢ່າງເຂັ້ມງວດ ແລະ ປະຕິບັດຕາມວິໄນຢ່າງເຂັ້ມງວດ; ວາງແຜນວຽກງານຕ້ອງຕິດແທດຕົວຈິງ, ສ້າງພາລະກິດຕ້ອງຕິດແທດຕົວຈິງ ແລະ ຕ້ອງເປັນຄົນທີ່ຊື່ສັດໜັກແໜ້ນ), ໃນນີ້, ການຝຶກຝົນຫຼໍ່ຫຼອມຄຸນສົມບັດຂອງຕົນຢ່າງເຂັ້ມງວດກໍຖືກວາງໄວ້ຢູ່ໃນອັນດັບໜຶ່ງເຊັ່ນກັນ. ຢາກເປັນເຈົ້າໜ້າທີ່ການນຳຕ້ອງປະພຶດຕົວຕາມຫຼັກການຂອງຄວາມເປັນຄົນ, ເປັນຄົນຕ້ອງຝຶກຝົນຫຼໍ່ຫຼອມຄຸນສົມບັດໃຫ້ແກ່ຕົນເອງສາກ່ອນ. ໃນສະໄໝບູຮານ, ຄຳວ່າ ການຝຶກຝົນຫຼໍ່ຫຼອມຄຸນສົມບັດໃຫ້ແກ່ຕົນເອງ ເວົ້າສຳລັບໃນທຸກມື້ນີ້ແລ້ວ, ກໍໝາຍເຖິງ ການມີອຸດົມຄະຕິແລະຝຶກຝົນຫຼໍ່ຫຼອມສະຕິພັກ.
ທັດສະນະຕ່າງໆຂອງທ່ານສີຈິ້ນຜິງກ່ຽວກັບການຝຶກຝົນຫຼໍ່ຫຼອມຄຸນສົມບັດໃຫ້ແກ່ຕົນເອງ, ບໍ່ພຽງແຕ່ເປັນການສືບທອດວັດທະນະທຳຈີນທີ່ມີມູນເຊື້ອອັນດີງາມເທົ່ານັ້ນ, ສິ່ງສຳຄັນກວ່ານັ້ນມັນມີລັກສະນະຍຸກສະໄໝ, ຄວາມຮຽກຮ້ອງຂອງຍຸກສະໄໝແລະເນື້ອໃນທີ່ຖືກຕ້ອງຕາມຍຸກສະໄໝຢ່າງຈະແຈ້ງ ເຊິ່ງເປັນການສົມທົບກັນແບບກາຍອິນຊີລະຫວ່າງປະຫວັດສາດກັບສະພາບຄວາມເປັນຈິງໃນປັດຈຸບັນ ແລະເປັນເອກະພາບຢ່າງສັດຈະວິພາກລະຫວ່າງມູນເຊື້ອກັບຄວາມເປັນທັນສະໄໝ. ກ່ຽວກັບເລື່ອງນີ້,ທ່ານສີຈິ້ນຜິງມີຄວາມເຫັນວ່າ:
“ດັ່ງຄຳກອນບູຮານໄດ້ກ່າວໄວ້ວ່າ: ‘ບໍ່ຢາກໃຫ້ຄົນຍ້ອງວ່າມີສີສົດໃສສວຍງາມ,ຂໍພຽງແຕ່ສົ່ງກິ່ນຫອມໄປທົ່ວເມືອງມະນຸດກໍພໍ’. ສະມາຊິກພັກ-ພະນັກງານຢາກເພີ່ມທະວີການຝຶກຝົນຫຼໍ່ຫຼອມຄຸນສົມບັດຂອງຕົນແມ່ນມີຫຼາຍວິທີ, ໃນນັ້ນ ວິທີສຳຄັນທີ່ສຸດກໍຄື ເຊື່ອມຊຶມສິ່ງຍອດຍິ່ງຈາກວັດທະນະທຳຈີນທີ່ມີມູນເຊື້ອອັນດີງາມ, ຮຽນນຳປະຊາຊົນຢ່າງແທ້ຈິງ, ບໍ່ວ່າຢູ່ບ່ອນໃດ,ເວລາໃດ,ເມື່ອພົບເຫັນຄົນທີ່ມີທັງຄວາມຮູ້ຄວາມສາມາດແລະຄຸນສົມບັດກໍຈະຮ່ຳຮຽນເອົາເປັນແບບຢ່າງ,ເພີ່ມທະວີຄວາມເຂັ້ມງວດຕໍ່ຕົນເອງດ້ວຍມາດຕະຖານທີ່ເຂັ້ມງວດແລະຮັບເອົາການຕິຊົມກວດກາຈາກຜູ້ອື່ນແລະປະຕິບັດຕາມລະບຽບວິໄນ”
ຄວາມເວົ້າດັ່ງກ່າວຂອງທ່ານສີຈິ້ນຜິງໄດ້ຍົກເອົາສຳນວນຄຳໜຶ່ງຄື “ຈ້ຽນສຽນຊືສີ”,ແປວ່າ, ພົບເຫັນຄົນທີ່ມີທັງຄວາມຮູ້ຄວາມສາມາດແລະຄຸນສົມບັດກໍຮ່ຳຮຽນເອົາເປັນແບບຢ່າງນຳ. ເຊິ່ງ ຄຳນີ້ແມ່ນມາຈາກປະໂຫຍກໜຶ່ງທີ່ບັນທຶກໄວ້ໃນປຶ້ມ “ລຸນຢວີ,ລີເຢິນ”ຂອງຂົງຈື້ ຄື “ຈ້ຽນສຽນຊືສີຢ່ຽນ,ຈ້ຽນປູ້ສຽນເອີເນ້ຈື້ສິງເຢ” “ຈ້ຽນສຽນຊືສີ” ໃນຄວາມຈິງແລ້ວແມ່ນເນັ້ນໜັກເຖິງມາດຕະຖານສຳຄັນຢ່າງໜຶ່ງໃນການຝຶກຝົນຫຼໍ່ຫຼອມຄຸນສົມບັດ ຄື ເມື່ອພົບເຫັນຜູ້ທີ່ມີທັງຄວາມຮູ້ຄວາມສາມາດແລະຄຸນສົມບັດ ແລ້ວກໍຄວນຮ່ຳຮຽນເອົາເປັນແບບຢ່າງນຳ. ຄັນຊັ້ນ, ຖ້າພົບເຫັນຄົນບໍ່ດີທີ່ບໍ່ມີຄຸນສົມບັດເດ, ເຮົາຄວນເຮັດແນວໃດ? ເຮົາຄວນພິຈາລະນາຄືນຕໍ່ຕົນເອງວ່າ ຕົນເອງໄດ້ມີການປະພຶດທີ່ບໍ່ດີໃນລັກສະນະຄ້າຍຄືກັນກັບຄົນນັ້ນຫຼືບໍ່? ສະນັ້ນຈິ່ງວ່າ ເມື່ອພົບເຫັນຄົນທີ່ມີທັງຄວາມຮູ້ຄວາມສາມາດແລະຄຸນສົມບັດ ກໍຮ່ຳຮຽນເອົາເປັນແບບຢ່າງນຳ,ເມື່ອພົບເຫັນຄົນບໍ່ດີທີ່ບໍ່ມີຄຸນສົມບັດກໍຄວນທົບທວນຕົນເອງຄືນ, ຄວາມຈິງແລ້ວ ມັນເປັນຂອດສຳຄັນທີ່ສຸດໃນການຝຶກຝົນຫຼໍ່ຫຼອມຄຸນສົມບັດຂອງຕົນ.
ໃນສະໄໝເຈົ້າຈັກກະພັດເຈ່ຍຈິ້ງປີທີ 5 ຂອງລາຊະວົງມິງ ຄືປີ 1522, ຢູ່ນະຄອນຢູນິງ ຄື ເມືອງຢູນານແຂວງເຫີນານໃນປັດຈຸບັນ, ເຊິ່ງເປັນບ່ອນທີ່ມີທີ່ຕັ້ງພູມສາດທີ່ສຳຄັນທີ່ສຸດເປັນສູນກາງການຄົມມະນາຄົມແຫ່ງໜຶ່ງ. ໃນເວລານັ້ນ, ກົມມະຫັດໄທຂອງລາຊະສຳນັກຂັ້ນສູນກາງໄດ້ຄັດເລືອກຂຸນນາງຜູ້ໜຶ່ງຊື່ວ່າ ຫວາງຢູເສຂອງເມືອງຢູນິງໄປດຳລົງຕຳແໜ່ງເປັນເຈົ້າຄອງນະຄອນຢູນິງ. ເມື່ອລາຊະສຳນັກປະກາດຄຳສັ່ງແຕ່ງຕັ້ງຕຳແໜ່ງນີ້ແລ້ວ, ປະຊາຊົນທັງຫຼາຍກໍດີໃຈທີ່ສຸດພາກັນເວົ້າວ່າ ເທື່ອນີ້ ກົມມະຫັດໄທເລືອກຖືກຄົນແລ້ວ ເພາະໄດ້ເລືອກຜູ້ທີ່ມີຄວາມຮູ້ຄວາມສາມາດທີ່ແທ້ຈິງໄປດຳລົງຕຳແໜ່ງເຈົ້າຄອງນະຄອນ. ແຕ່ກໍມີບາງຄົນເປັນຫ່ວງວ່າ ລາຊະວົງພວກເຮົາມີຂໍ້ກຳນົດວ່າ, ຜູ້ໃດເຮັດໄດ້ດີຈະໄດ້ເລື່ອນຊັ້ນຕຳແໜ່ງ, ຜູ້ໃດເຮັດບໍ່ດີກໍຈະຕ້ອງປົດອອກຈາກຕຳແໜ່ງ. ຄັນຊັ້ນ, ເມື່ອຫວາງຢູເສມີຄວາມສາມາດສູງປານນີ້,ລາວຈະດຳລົງຕຳແໜ່ງຢູ່ນະຄອນຢູນິງພຽງບໍ່ເທົ່າໃດປີກໍຈະຍ້າຍໄປດຳລົງຕຳແໜ່ງສູງກວ່າ, ຄັນລາວຈາກໄປແລ້ວຊິເຮັດຈັ່ງໃດ? ຕໍ່ກັບເລື່ອງນີ້, ມີນັກຮຽນຮູ້ປັນຍາຊົນຜູ້ໜຶ່ງຊື່ວ່າ ເຫີຖັງ ໄດ້ຂຽນບົດຄວາມບົດໜຶ່ງໂດຍລະບຸວ່າ: ບໍ່ຕ້ອງກັງວົນ, ໃນເມື່ອໃຜໆເຫັນຜູ້ມີຄວາມຮູ້ຄວາມສາມາດທັງມີຄຸນສົມບັດກໍຮ່ຳຮຽນເອົາເປັນແບບຢ່າງນຳ, ຄັນຊັ້ນ, ພວກເຮົາຊິຄາດຄະເນໄດ້ແນວໃດວ່າ ຜູ້ທີ່ຈະມາຂຶ້ນດຳລົງຕຳແໜ່ງເຈົ້າຄອງນະຄອນຢູນິງຄົນໃໝ່ຈະບໍ່ດີສ່ຳຫວາງຢູເສ? ດ້ວຍເຫດນີ້, ຈຶ່ງບໍ່ຕ້ອງເປັນຫ່ວງດອກ, ພວກເຮົາຈົ່ງຊົມໃຊ້ຄວາມສົມບູນພູນສຸກທີ່ຂຸນນາງຄົນໃໝ່ສ້າງຂຶ້ນໃຫ້ແກ່ປະຊາຊົນໃນໄລຍະທີ່ເພິ່ນບໍລິຫານທ້ອງຖິ່ນເຮົາກໍແລ້ວກັນ.
ທ່ານຜູ້ຟັງ, ທີ່ດວງມະນີເລົ່າສູ່ຟັງຜ່ານມາເປັນເລື່ອງລາວທີ່ມີຊື່ສຽງໃນປະຫວັດສາດຈີນ ທັງເປັນເລື່ອງລາວທຳມະດາເລື່ອງໜຶ່ງ ເຊິ່ງສາມາດສະແດງໃຫ້ເຫັນວ່າ ທັດສະນະຄະຕິ“ຈ້ຽນສຽນຊືສີ”ແປວ່າ ເມື່ອເຫັນຜູ້ມີຄວາມຮູ້ຄວາມສາມາດທັງມີຄຸນສົມບັດກໍຮ່ຳຮຽນເອົາເປັນແບບຢ່າງນຳນັ້ນໄດ້ຝັງເລິກເຂົ້າໃນຈິດໃຈຂອງປະຊາຊົນມາແຕ່ດົນແລ້ວ.
ເວົ້າສຳລັບເລື່ອງການຝຶກຝົນຫຼໍ່ຫຼອມຄຸນສົມບັດຂອງສະມາຊິກພັກກອມມູນິດຈີນໃນຍຸກໃໝ່, ບົດບາດທີ່ກະຕຸກຊຸກຍູ້ທາງບວກແລະບົດບາດທີ່ເປັນແບບຢ່າງທີ່ດີແມ່ນມີຄວາມສຳສຳຄັນຫຼາຍ, ສ່ວນຄະຕິເຕືອນໃຈຈາກແບບຢ່າງດ້ານລົບແລະການພິຈາລະນາຕົນເອງຄືນໃໝ່ກໍມີຄວາມສຳຄັນເຊັ່ນກັນ ທັງໝົດເລົ່ານີ້ລ້ວນແຕ່ເປັນຄວາມຮຽກຮ້ອງຕ້ອງການໃນຕົວຂອງການຝຶກຝົນຫຼໍ່ຫຼອມຄຸນສົມບັດໃຫ້ແກ່ຕົນເອງຢ່າງເຂັ້ມງວດ, ສ່ວນການຝຶກຝົນຫຼໍ່ຫຼອມຄຸນສົມບັດໃຫ້ແກ່ຕົນເອງຢ່າງເຂັ້ມງວດ ກໍເປັນເງື່ອນໄຂອັນຈຳເປັນໃນການສ້າງລະບົບນິເວດທາງການເມືອງພາຍໃນພັກທີ່ບໍລິສຸດຜຸດຜ່ອງ.
ວັນທີ 10 ມີນາປີ 2018, ທ່ານສີຈິ້ນຜິງເຂົ້າຮ່ວມກອງປະຊຸມພິຈາລະນາຂອງຄະນະຜູ້ແທນກຳແພງນະຄອນຈຸ່ງກິ່ງທີ່ເຂົ້າຮ່ວມກອງປະຊຸມຄັ້ງທຳອິດຂອງສະພາປະຊາຊົນແຫ່ງຊາດຈີນຊຸດທີ 13
ວັນທີ 10 ມີນາປີ 2018, ໃນເວລາເຂົ້າຮ່ວມກອງປະຊຸມພິຈາລະນາຂອງຄະນະຜູ້ແທນກຳແພງນະຄອນຈຸ່ງກິ່ງທີ່ເຂົ້າຮ່ວມກອງປະຊຸມຄັ້ງທຳອິດຂອງສະພາປະຊາຊົນແຫ່ງຊາດຈີນຊຸດທີ 13, ທ່ານສີຈິ້ນຜິງຊີ້ໃຫ້ເຫັນວ່າ ລະບົບນິເວດທາງການເມືອງຄືກັນກັບລະບົບນິເວດທຳມະຊາດ, ຫາກບໍ່ມີສະຕິລະວັງຕົວແມ່ນແຕ່ໜ້ອຍດຽວກໍຈະຖືກມົນລະພິດໄດ້. ສ່ວນເມື່ອໃດບັນຫາເກີດຂຶ້ນແລ້ວຢາກຈະປົວແປງຟື້ນຟູຄືນໃໝ່ກໍຈະຕ້ອງເສຍສິ່ງຕອບແທນຢ່າງໃຫຍ່ຫຼວງ. ນີ້ເຮັດໃຫ້ດວງມະນີຄິດພໍ້ບົດກອນຂອງທ່ານຫວາງຢາງມິງ ນັກຄິດແລະນັກປັດຊະຍາທີ່ມີຊື່ສຽງຂອງສະໄໝລາຊະວົງມິງຂອງຈີນທີ່ລະບຸໄວ້ວ່າ ທຸກຄົນຕ່າງມີເຂັມທິດຂອງຕົນເອງສຳລັບຈຳແນກອັນໃດຖືກອັນໃດຜິດ, ພື້ນຖານຂອງທຸກສິ່ງວັດຖຸແລະປາກົດການແມ່ນຕັດສິນຊີ້ຂາດຢູ່ນຳທີ່ໃຈ. ທີ່ນີ້, ຄຳວ່າ “ໃຈ” ໝາຍເຖິງມະໂນທຳ, ທັງເປັນຄຸນທາດຄຸນສົມບັດຂອງຄົນ. ຄຸນທາດຄຸນສົມບັດແລະສະຕິພັກ, ອຸດົມຄະຕິເປັນປັດຊະຍາດ້ານຈິດໃຈ ທັງເປັນພື້ນຖານຂອງສະມາຊິກພັກກອມມູນິດຈີນ. ຖ້າບໍ່ມີພື້ນຖານອັນນີ້ກໍຈະເຮັດໃຫ້ຄົນມີຈິດໃຈອ່ອນແອ, ຫຼົງທິດທາງ, ເສຍມະໂນທຳ,ຈົນເຖິງຂັ້ນເສຍທາດຂາດຄຸນໃນດ້ານວິຊາການແລະຄຸນສົມບັດ. ເປັນຄົນຕ້ອງຝຶກຝົນຫຼໍ່ຫຼອມຕົນເອງໃຫ້ມີຄຸນສົມບັດ, ພວກເຮົາຕ້ອງຖືເລື່ອງນີ້ເປັນສິ່ງສຳຄັນອັນດັບໜຶ່ງແລະບາດກ້າວທຳອິດໃນຊີວິດຂອງຄົນເຮົາ.
ຄຳເຫັນ
0