ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ມີພຽງແຕ່ເຮັດແທ້ທຳຈິງແລະປະຕິບັດຕົວຈິງເທົ່ານັ້ນຈິ່ງຈະສາມາດຍົກສູງຄວາມສາມາດຂອງຕົນໄດ້. ໃນໄລຍະດຳລົງຕຳແໜ່ງເລຂາຄະນະພັກແຂວງເຈີ້ຈ່ຽງ, ທ່ານສີຈິ້ນຜິງເຄີຍໄດ້ໃຫ້ທັດສະນະຢ່າງເລິກເຊິ່ງກ່ຽວກັບເລື່ອງນີ້. ໃນເວລາເວົ້າເຖິງການບຳລຸງສ້າງພະນັກງານສືບທອດ, ທ່ານສີຈິ້ນຜິງກ່າວວ່າ, ບໍ່ຄວນກໍ່ສ້າງພະນັກງານສຶບທອດຢູ່ໃນເຮືອນແກ້ວແບບທະໜຸຖະໜອມ, ຫາກຄວນສົ່ງໄປຝຶກຝົນຫຼໍ່ຫຼອມ ແລະ ທົດສອບໃນຕຳແໜ່ງງານທີ່ມີຄວາມລຳບາກ ແລະ ມີສະພາບແວດລ້ອມທີ່ຫຍຸ້ງຍາກສັບສົນ. ໃນເວລາລົງພື້ນຖານທີ່ບ້ານຫຼຽງເຈ່ຍເຫີ, ຕອນນັ້ນ ທ່ານສີຈິ້ນຜິງພວມຢູ່ໃນໄວໜຸ່ມກໍໄດ້ເຮັດວຽກໝົດທຸກຢ່າງ, ບໍ່ວ່າຈະເປັນການຫາບຝຸ່ນຄອກ, ເຮັດໄຮ່ໄຖນາ, ກໍ່ຝາຍ ແລະວຽກງານອື່ນໆອີກ. ໃນສາຍຕາຂອງພໍ່ແມ່ປະຊາຊົນ, ທ່ານສີຈິ້ນຜິງເປັນຊາວໜຸ່ມຜູ້ເປັນເຈົ້າການໃນການອອກແຮງງານຢ່າງດຸໝັ່ນ ແລະ ທໍລະຫົດອົດທົນ. ເຖິງວ່າຊີວິດການກິນຢູ່ຫຼາຍຢ່າງຈະມີຄວາມທຸກຍາກກໍຕາມ, ແຕ່ເມື່ອຫວນຄືນເຖິງປະສົບການໄລຍະນັ້ນ, ທ່ານສີຈິ້ນຜິງເວົ້າວ່າ: “ປະສົບການຕອນນັ້ນເປັນຄຸນປະໂຫຍດຢ່າງໃຫຍ່ຫຼວງຕໍ່ຂ້າພະເຈົ້າ.”
ດັ່ງນັ້ນ,ກ່ຽວກັບການທີ່ຄວນເຮັດແນວໃດຈຶ່ງຖືວ່າແມ່ນພຶດຕິກຳ ແລະ ການປະຕິບັດຕົວຈິງທີ່ສຳເລັດຜົນ? ທ່ານສີຈິ້ນຜິງໄດ້ມີຄວາມເຫັນຄືດັ່ງນີ້:
“ສະສົມດິນໃຫ້ເປັນພູ, ສະສົມນໍ້າໃຫ້ເປັນທະເລ.” ຄວາມສຸກ ແລະ ອະນາຄົດທີ່ດີງາມບໍ່ຫ່ອນເກີດຂຶ້ນເອງ, ຜົນສຳເລັດຂຶ້ນຢູ່ກັບຜູ້ທີ່ມີຄວາມກ້າຫານ ແລະ ມີຄວາມມຸ່ງຫວັງຕັ້ງໃຈ.ການຍຶດໝັ້ນການເປີດປະຕູສູ່ພາຍນອກ, ຕ່າງຝ່າຍຕ່າງມີຜົນປະໂຫຍດ, ກ້າປະຕິຮູບ ແລະ ປະດິດສ້າງໃໝ່, ການກ້າວໄປສູ່ເປົ້າໝາຍສ້າງປະຊາຄົມຮ່ວມຊາຕາກຳຂອງມວນມະນຸດຢ່າງບໍ່ຢຸດຢັ້ງ, ຮ່ວມກັນສ້າງອະນາຄົດທີ່ດີງາມໃຫ້ອາຊີ ກໍຄືໃຫ້ກັບໂລກ!
ທ່ານສີຈິ້ນຜິງກ່າວໃນພິທີເປີດກອງປະຊຸມເວທີປຶກສາຫາລືອາຊີໂປອາວປີ 2018
ສຳນວນດັ່ງກ່າວແມ່ນຄຳເຫັນຕອນໜຶ່ງຂອງທ່ານສີຈິ້ນຜິງທີ່ກ່າວໃນພິທີເປີດກອງປະຊຸມເວທີປຶກສາຫາລືອາຊີໂປອາວປີ 2018.ໃນຄຳເຫັນຕອນນີ້, ທ່ານສີຈິ້ນຜິງໄດ້ໃຊ້ຄຳບູຮານ ຄື “ສະສົມດິນໃຫ້ເປັນພູ, ສະສົມນໍ້າໃຫ້ເປັນທະເລ.” ປະໂຫຍກນີ້ມີເຄົ້າເດີມມາຈາກ ປື້ມ“ຊຸນຈື. ຣູຊ້ຽວ”. ເມື່ອເບິ່ງຈາກຄວາມໝາຍຂອງປະໂຫຍກນີ້ແລ້ວເຫັນວ່າ: ບໍ່ວ່າຈະເປັນພູທີ່ສູງເທົ່າໃດກໍຕາມ ກໍເກີດຂື້ນຈາກດິນຫຼາຍໆໂກບນ້ອຍທີ່ສະສົມໂຮມເຂົ້າກັນ. ທະເລເຖິງຈະເລິກເທົ່າໃດກໍຕາມ ກໍເກີດຈາກຢົດນ້ຳນ້ອຍຫຼາຍໆຢົດທີ່ສະສົມໂຮມເຂົ້າກັນ. ເຊິ່ງມີຄວາມໝາຍຢ່າງເລິກເຊິ່ງວ່າ: ບໍ່ວ່າເປັນຜູ້ຍິ່ງໃຫຍ່ ຫຼື ຄົນທຳມະດາ, ມີພຽງແຕ່ຕ້ອງສຸມຄວາມພະຍາຍາມຢ່າງບໍ່ລົດລະເທົ່ານັ້ນຈຶ່ງຈະບັນລຸເປົ້າໝາຍອັນຍິ່ງໃຫຍ່ໄດ້.
ໃນຄວາມໝາຍດ້ານທີ 2 ຄື: ບໍ່ວ່າເຮັດວຽກໃດກໍຕ້ອງມີຈຸດເລີ່ມຕົ້ນ ແລະ ຈຸດສຳເລັດຜົນດ້ວຍດີ. ມີຄຳບູຮານຈີນປະໂຫຍກໜຶ່ງທີ່ມີເຄົ້າເດີມມາຈາກປື້ມ “ຈ້ານໂກເຊີ້ ຊິນເຊີ້”, ປະຊາຊົນຈີນມັກເວົ້າເລື້ອຍໆວ່າ: “ ເມື່ອເດີນທາງໄປຮອດຈຸດທີ90ລີ້ ຂອງໄລຍະທາງ 100 ລີ້ (ລີ້ ເປັນຫົວໜ່ວຍວັດແທກຄວາມຍາວໃນສະໄໝບູຮານຈີນ, 1 ລີ້ ເທົ່າກັບ 500 ແມັດ)ແຕ່ກໍຊ່ຳກັບວ່າຫາກໍເດີນທາງໄດ້ພຽງເຄິ່ງໜຶ່ງເທົ່ານັ້ນ, ນີ້ສະແດງໃຫ້ເຫັນເຖິງຄວາມຫຍຸ້ງຍາກລຳບາກໃນການເດີນທາງໄລຍະສຸດທ້າຍ.” ເຊິ່ງໝາຍຄວາມວ່າ, ເມື່ອເດີນທາງໄດ້ 90 ລີ້ແລ້ວ, ຍັງເຫຼືອ ພຽງແຕ່10ລີ້ຂອງໄລຍະທາງທີ່ຫຍຸ້ງຫຍຸ້ງຍາກລຳບາກທີ່ສຸດ, ອັນເນື່ອງມາຈາກຄວາມອິດເມື່ອຍ, ເມື່ອໄດ້ຍຶດໝັ້ນມາເປັນເວລາດົນນານແລ້ວ, ໄດ້ສຸມຄວາມພະຍາຍາມກໍຫຼາຍສົມຄວນແລ້ວ, ເຖິງວ່າໃກ້ຈະຮອດຈຸດໝາຍປາຍທາງແລ້ວ, ແຕ່ເມື່ອໃດຫາກລົດລະຄວາມພະຍາຍາມພຽງໜ້ອຍດຽວ, ວຽກທີ່ໄດ້ພະຍາຍາມເຮັດຜ່ານມາກໍຈະເສຍແຮງໄປລ້າໆ.
ໃນປື້ມ “ຊຸນຈຶ”ຍັງມີສຳນວນຕອນໜຶ່ງເວົ້າໄວ້ວ່າ: ຫາກບໍ່ສະສົມທຸກບາດກ້າວກໍຈະບໍ່ສາມາດໄປເຖິງທາງໄກເປັນພັນລີ້ໄດ້; ຫາກຫ້ວຍນ້ຳນ້ອຍບໍ່ໂຮມເຂົ້າກັນ, ກໍຈະບໍ່ສາມາດກາຍເປັນທະເລໃຫຍ່ໄດ້”. ປະໂຫຍກນີ້ຖືວ່າຖືກຕ້ອງທີ່ສຸດ. ສະນັ້ນ, ບໍ່ວ່າຈະມີອຸປະສັກຫຍຸ້ງຍາກລຳບາກຢ່າງໜັກໜ່ວງປານໃດຂວາງຢູ່ເບື້ອງໜ້າພວກເຮົາກໍຕາມ, ຂໍພຽງແຕ່ສຸມທຸກຄວາມພະຍາຍາມຢ່າງບໍ່ລົດລະ, ກ້າວເດີນໄປຕາມທິດທາງທີ່ຖືກຕ້ອງ, ໃນທີ່ສຸດກໍຈະບັນລຸເປົ້າໝາຍຂອງຕົນໄດ້ແນ່ນອນ. ແມ່ນໍ້າລຳເຊ ແລະ ທະເລເກີດຂື້ນໄດ້ກໍແມ່ນຍ້ອນຢົດນ້ຳນ້ອຍຫຼາຍໆຢົດສະສົມໂຮມເຂົ້າກັນ, ພູສູງເກີດຂື້ນໄດ້ກໍແມ່ນຍ້ອນດິນຫຼາຍໆໂກບນ້ອຍສະສົມໂຮມເຂົ້າກັນ, ດັ່ງນັ້ນ, ພາລະກິດອັນຍິ່ງໃຫຍ່ກໍຕ້ອງລົງມືປະຕິບັດຕົວຈິງຈາກວຽກເລັກໆນ້ອຍໆເຊັ່ນກັນ.
“ສະສົມດິນໃຫ້ເປັນພູ, ສະສົມນໍ້າໃຫ້ເປັນທະເລ”. ຄຳວ່າ ສະສົມນີ້ກໍໝາຍເຖິງການປະຕິບັດຕົວຈິງ, ແຕ່ການປະຕິບັດຕົວຈິງກໍຕ້ອງເຄົາລົບກົດເກນພາວະວິໄສ. ຄັນຊັ້ນ,ໃນຍຸກສະໄໝໃໝ່ນີ້, ພວກເຮົາຄວນປະຕິບັດຕົວຈິງໃຫ້ເປັນຈິງໄດ້ ແນວໃດ? ແລະ ຄວນເຄົາລົບກົດເກນຫຍັງແດ່?
ໜຶ່ງ, ຖ້າຢາກປະສົບຜົນສຳເລັດກໍຕ້ອງຍຶດໝັ້ນເປັນເວລາຍາວນານ. ສຸຸພາສິດຈີນກ່າວໄວ້ວ່າ: “ກິນແຕ່ເຂົ້າຄຳດຽວຈະບໍ່ສາມາດກາຍເປັນຄົນຕຸ້ຍໄດ້.” ແມ່ນແທ້, ພຶດຕິກຳທີ່ສຳເລັດຜົນເປັນພຶດຕິກຳທີ່ຍຶດໝັ້ນເຮັດໄປຈົນເຖິງຜົນສຳເລັດສຸດທ້າຍ. ດັ່ງນັ້ນ,ທ່ານສີຈິ້ນຜິງຈຶ່ງກ່າວເນັ້ນວ່າ: ນອກຈາກມີຄວາມກະຕືລືລົ້ນທີ່ຈະຍາດແຍ່ງທຸກເວລານາທີແລ້ວ, ຍັງຕ້ອງມີຈິດໃຈອົດທົນສືບຕໍ່ຍຶດໝັ້ນການປະຕິ ບັດຕົວຈິງຢ່າງຕໍ່ເນື່ອງ, ທ່ານສີຈິ້ນຜິງກໍໄດ້ພິສູດກ່ຽວກັບເລື້ອງນີ້ໂດຍຍົກຕົວຢ່າງ ບັ້ນປົວແປງທະເລຊາຍຢູ່ເມືອງຢິ້ວຢວີ້ແຂວງສ່ານຊີ່.
ເມືອງຢິ້ວຢວີ້ແຂວງສ່ານຊີ່ຕັ້ງຢູ່ແຖບແລວລົມທຳມະຊາດຂອງທະເລຊາຍມາວອູຊູ້, ເປັນເຂດທີ່ບໍ່ມີພືດຫຍັງເກີດຂື້ນເລີຍ. ຫຼັງຈາກສະຖາປະນາ ສປຈີນແລ້ວ, ເລຂາຄະນະພັກເມືອງຊຸດທຳອິດກໍໄດ້ນຳພາປະຊາຊົນປູກຕົ້ນໄມ້ເພື່ອປົວແປງທະເລຊາຍ. ຈາກນັ້ນມາ, ໂດຍອີງຕາມເປົ້າໝາຍດັ່ງກ່າວ, ພະນັກງານການນຳທຸກສະໄໝຂອງຄະນະພັກເມືອງກໍໄດ້ສຸມທຸກຄວາມພະຍາຍາມຕາມແຜນແມ່ບົດດັ່ງກ່າວ, ໃນທີ່ສຸດໄດ້ຫັນປ່ຽນດິນທີ່ໄຮ້ພືດໃຫ້ກາຍເປັນດິນຂຽວ.
ທ່ານສີຈິ້ນຜິງໃຊ້ເລື່ອງນີ້ເພື່ອບອກໃຫ້ພະນັກງານການນຳອັນໄພສານຮູ້ວ່າ, ຕ້ອງມີສະຕິຕື່ນຕົວທີ່ວ່າ ຜົນສຳເລັດຈະບໍ່ຈຳເປັນຕ້ອງແມ່ນເຮົາ,ຂໍພຽງແຕ່ໄດ້ລົງມືເຮັດກໍພໍ. ແຜນແມ່ບົດທີ່ດີໃດໜຶ່ງ ຂໍພຽງແຕ່ຖືກຕ້ອງຕາມຫຼັກວິທະຍາສາດ, ສົມເຫດສົມຜົນ, ສອດຄ່ອງກັບຄວາມເປັນຈິງ, ສອດຄ່ອງກັບຄວາມມຸ້ງມາດປາຖະນາຂອງປະຊາຊົນແລ້ວ, ກໍຄວນພະຍາຍາມປະຕິບັດຢ່າງຕໍ່ເນື່ອງປານແຂ່ງຂັນແລ່ນຕໍ່ໄມ້.
ປີ 1984, ທ່ານສີຈິ້ນຜິງໄດ້ດຳລົງຕຳແໜ່ງເປັນເລຂາຄະນະພັກເມືອງເຈີ້ງຕິ້ງແຂວງເຫີເປີຍ
ສອງ, ພຶດຕິກຳບໍ່ແມ່ນການເຄື່ອນໄຫວຂອງຄົນຜູ້ດຽວ, ແຕ່ເປັນການເຄື່ອນໄຫວຂອງມະຫາຊົນ, ເປັນພຶດຕິກຳທາງສັງຄົມ. ສະນັ້ນ, ທ່ານສີຈິ້ນຜິງໄດ້ເນັ້ນໜັກເປັນພິເສດວ່າ, ພະນັກງານການນຳຂອງພັກ ແລະລັດຕ້ອງຍົກສູງຄວາມສາມາດຂອງຕົນ. ວິທີການຢູ່ໃສ? ກໍແມ່ນຢູ່ນຳປະຊາຊົນຫັ້ນແຫຼະ. ປີ 1984, ທ່ານສີຈິ້ນຜິງໄດ້ດຳລົງຕຳແໜ່ງເປັນເລຂາຄະນະພັກເມືອງເຈີ້ງຕິ້ງແຂວງເຫີເປີຍ, ເພິ່ນໄດ້ຂຽນຈົດໝາຍໄປເຖິງຄະນະພັກ, ສະພາປະຊາຊົນ, ອົງການປົກຄອງ ແລະ ສະພາປຶກສາການເມືອງປະຊາຊົນຂອງເມືອງເຈີ້ງຕິ້ງ. ທ່ານໄດ້ສະເໜີວ່າ, ຕ້ອງປັບປ່ຽນແບບແຜນອາດຍາສິດ, ລົງເລິກສູ່ຮາກຖານ ແລະ ເຂົ້າຫາປະຊາຊົນ, ຕ້ອງດຳເນີນການສຳຫຼວດຄົ້ນຄວ້າ, ເຄົາລົບປະຊາຊົນເປັນອາຈານ, ຊອກຫາພະລັງແຮງນຳປະຊາຊົນ. ທ່ານສີຈິ້ນຜິງຮຽກຮ້ອງໃຫ້ພະນັກງານຂອງເມືອງເຈີ້ງຕິ້ງຕ້ອງໃຊ້ເວລາ 1 ສ່ວນ 3 ຂອງທຸກປີເພື່ອລົງຮາກຖານ ແລະ ດຳເນີນການສຳຫຼວດຄົ້ນຄວ້າ. ໃນໄລຍະເປັນເລຂາຄະນະພັກເມືອງເຈີ້ງຕິ້ງ, ທ່ານສີຈິ້ນຜິງໄດ້ສຳຫຼວດເບິ່ງທຸກບ້ານຂອງເມືອງເຈີ້ງຕິ້ງ, ກໍແມ່ນຍ້ອນໄດ້ຊອກເຫັນບັນຫາໄດ້ຢ່າງແມ່ນຢໍາ, ສາມາດກຳນົດມາດຕະການໄດ້ຢ່າງເໝາະສົມ ແລະ ຕິດແທດກັບຄວາມເປັນຈິງ, ເສດຖະກິດສັງຄົມຂອງເມືອງເຈີ້ງຕິ້ງຈຶ່ງໄດ້ຮັບການພັດທະນາຢ່າງວ່ອງໄວ.
ສຸພາສິດຈີນກ່າວໄວ້ວ່າ: “ຄົນຄົນດຽວສາມາດຍ່າງໄດ້ໄວ, ແຕ່ຄົນເປັນກຸ່ມຈຶ່ງຈະສາມາດເດີນທາງໄດ້ໄກກວ່າ.” ໃນໂລກນີ້ມີຫຼາຍວຽກຕ້ອງໄດ້ຜ່ານການຮ່ວມມືກັນເທົ່ານັ້ນຈຶ່ງຈະສຳເລັດຜົນໄດ້. ເວົ້າສຳລັບພະນັກງານການນຳແລ້ວ, ຖ້າຢາກສ້າງຜົນງານທີ່ດີໄດ້ ກໍຕ້ອງອາໄສປະຊາຊົນ, ຕ້ອງເປັນນະໂຍບາຍທີ່ກຳເນີດຈາກພຶດຕິກຳທີ່ປະຊາຊົນມີສ່ວນຮ່ວມຈຶ່ງຈະເປັນຜົນດີຕໍ່ການພັດທະນາປະເທດຊາດ, ແລະ ຈະນຳເອົາຄວາມຜາສຸກມາໃຫ້ແກ່ປະຊາຊົນໄດ້.
ຄຳເຫັນ
0