ຫວ່າງມໍ່ໆມານີ້, ສະຖານີໂທລະພາບ Fox News ອາເມລິກາໄດ້ແນປາຍຫອກໃສ່ສະຖາບັນຄົ້ນຄວ້າເຊື້ອພະຍາດອູຮັ້ນເລື້ອຍໆ. ແຕ່ການລາຍງານຂ່າວຂອງເຂົາພຽງແຕ່ເປັນຄວາມເວົ້າແບບ “ຂ່າວເລື່ອນລອຍປາກຕໍ່ປາກ”, ບໍ່ມີຫຼັກຖານຫຍັງເລີຍ.
ເລື່ອງທີ່ຄົນທັງຫຼາຍຮູ້ດີແລ້ວກໍແມ່ນວ່າ, ສະຖານີໂທລະພາບດັ່ງກ່າວແມ່ນຜູ້ສະໜັບສະໜູນຕົວຈິງຂອງຜູ້ນຳອາເມຣິກາ, ຈຸດປະສົງຂອງສະຖານີໂທລະພາບນີ້ໄດ້ລາຍງານຂ່າວແບບນີ້ກໍເພື່ອປ່ຽນຈຸດສົນໃຈໃຫ້ເປັນປະເທດຈີນເພື່ອຊ່ວຍຜູ້ນຳອາເມຣິກາຫາສຽງໃນສະພາບທີ່ການຮັບມືກັບການແຜ່ລະບາດຂອງພະຍາດໂຄວິດ-19 ຢູ່ອາເມຣິກາບໍ່ມີປະສິດທິຜົນ, ແລະຢາກໃຫ້ປະເທດຈີນຮັບຜິດຊອບຕໍ່ການແຜ່ລະບາດຂອງພະຍາດຄັ້ງນີ້.
ພາຍຫຼັງພະຍາດໂຄວິດ-19 ແຜ່ລະບາດມານີ້, ສະຖາບັນຄົ້ນຄວ້າເຊື້ອພະຍາດອູຮັ້ນກໍໄດ້ຖືກໂຈມຕີຈາກນັກການເມືອງແລະສື່ມວນຊົນອາເມຣິກາໂດຍຂາດຫລັກຖານອ້າງອີງຢ່າງຕໍ່ເນື່ອງ. ທີ່ຈິງແລ້ວ, ສະຖານບັນຄົ້ນຄວ້າເຊື້ອພະຍາດອູຮັ້ນໄດ້ຮ່ວມມືຢ່າງໃກ້ຊິດກັບວົງການວິທະຍາສາດຂອງອາເມຣິກາ, ຝຣັ່ງ ແລະ ປະເທດອື່ນໆ ໃນດ້ານການຄົ້ນຄວ້າວິທະຍາສາດ, ໃນນັ້ນຫ້ອງທົດລອງຄວາມປອດໄພຊີວະພາບລະດັບ 4 ແມ່ນໂຄງການຮ່ວມມືສຳຄັນລະຫວ່າງລັດຖະບານຈີນກັບຝຣັ່ງ, ສະນັ້ນ, ມັນບໍ່ມີຫຍັງທີ່ຕ້ອງສົງໄສອີກແລ້ວກ່ຽວກັບລະດັບດ້ານວິຊາການຂອງສະຖາບັນຄົ້ນຄວ້າອູຮັ້ນ.
ເມື່ອບໍ່ດົນມານີ້, ວິທະຍຸກະຈາຍສຽງອັງກິດຫຼື BBC ໄດ້ນຳເອົາຄວາມເວົ້າຂອງທ່ານຟີລິບປາ ເລນໂຊດ ຜູ້ຊ່ຽວຊານຄວາມປອດໄພດ້ານຊີວະພາບຂອງສະຖາບັນເຈົ້າຊີວິດອັງກິດມາລາຍງານວ່າ: ຖ້າວ່າຫ້ອງທົດລອງໄວຣັດຂອງປະເທດໃດໜຶ່ງເຂົ້າຮ່ວມໂຄງການສາກົນ, ກໍຕ້ອງສອດຄ່ອງກັບເງື່ອນໄຂລະດັບຄວາມປອດໄພດ້ານຊີວະພາບສາກົນ; ຖ້າວ່າຢາກສະໜອງການກວດຫາເຊື້ອພະຍາດ, ກໍຕ້ອງຖືກກັບມາດຕະຖານສາກົນຄືກັນ. “ຢ່າງໜ້ອຍທີ່ສຸດກໍສາມາດເວົ້າໄດ້ວ່າ: ປັດຈຸບັນບໍ່ມີຫຼັກຖານສາມາດຢືນຢັນໄດ້ວ່າ: ເຊື້ອໄວຣັດໂຄວິດ-19 ໄດ້ລຸດລອດອອກຈາກສະຖາບັນຄົ້ນຄວ້າເຊື້ອພະຍາດອູຮັ້ນ ຫຼື ຫ້ອງທົດລອງໄວຣັດອື່ນໆ.” ນີ້ສະແດງໃຫ້ເຫັນວ່າວົງການວິທະຍາສາດສາກົນມີຄວາມໝັ້ນໃຈ ແລະ ມີຄວາມເຫັນດີເຫັນພ້ອມຕໍ່ມາດຖານການຄຸ້ມຄອງຄວາມປອດໄພແລະວິທະຍາສາດຂອງສະຖານບັນຄົ້ນຄວ້າເຊື້ື້ອພະຍາດອູຮັ້ນ.
ທີ່ຈິງແລ້ວ, ເລີ່ມແຕ່ພະຍາດໂຄວິດ-19 ແຜ່ລະບາດເປັນຕົ້ນມາ, ສະຖານບັນຄົ້ນຄວ້າເຊື້ອພະຍາດອູຮັ້ນກໍໄດ້ສຸມກຳລັງເພື່ອຄົ້ນຄວ້າເຊື້ອພະຍາດໂຄວິດ-19 ມາໂດຍຕະຫຼອດ. ໃນຖານະເປັນໜຶ່ງໃນສະຖາບັນສາມແຫ່ງທີ່ປະເທດຈີນກຳນົດໄວ້, ສະຖານບັນຄົ້ນຄວ້າເຊື້ອພະຍາດອູຮັ້ນກໍໄດ້ແຈ້ງລຳດັບແຊນຂອງເຊື້ອພະຍາດດັ່ງກ່າວຕໍ່ອົງການອະນາໄມໂລກ ເຊິ່ງເປັນການສ້າງພື້ນຖານອັນສຳຄັນໃຫ້ແກ່ປະເທດຕ່າງໆໃນໂລກໃນການຄົ້ນຄວ້າວິທີກວດຫາເຊື້ອໄວຣັດໃນໄລຍະຕົ້ນກໍຄືການຄົ້ນຄວ້າຜະລິດຢາວັກແຊງ.
ການຄົ້ນຫາແຫຼ່ງກຳເນີດເຊື້ອໄວຣັດແມ່ນບັນຫາວິທະຍາສາດທີ່ເຄັ່ງຄັດ. ກໍຄືເຈົ້າໜ້າທີ່ອົງການອະນາໄມໂລກກ່າວໃນເມື່ອບໍ່ດົນມານີ້ວ່າ: ຈີນພວມສຳຫຼວດແຫຼ່ງກຳເນີດເຊື້ອໄວຣັດຈາກຫຼາຍດ້ານ, ຈີນເປັນປະເທດນຳພາການສຳຫຼວດແມ່ນເລື່ອງທີ່ສົມເຫດສົມຜົນ. ຖ້າວ່າອາເມຣິກາຍິນດີຄົ້ນຄວ້າບັນຫາແຫຼ່ງກຳເນີດເຊື້ອໄວຣັດດ້ວຍທ່າທີວິທະຍາສາດຢ່າງແທ້ຈິງ, ກໍສາມາດຮ່ວມມືກັບຈີນໃນການຄົ້ນຄວ້າດັ່ງກ່າວ.
ຖ້າວ່າບາງຄົນສືບຕໍ່ປັ້ນແຕ່ງເລື່ອງ “ເປັນກົນອຸບາຍຊື່ໆ” ເພື່ອເປົ້າໝາຍທາງການເມືອງຂອງຕົນ, ຈະເປັນການລົບກວນແລະທຳລາຍການຮ່ວມມືໃນດ້ານການຕໍ່ຕ້ານການແຜ່ລະບາດຂອງພະຍາດຂອງວົງການວິທະຍາສາດສາກົນ. ນັກການເມືອງອາເມຣິກາໃສ່ຮ້າຍປ້າຍສີປະເທດຈີນໂດຍສວຍໃຊ້ໂອກາດການແຜ່ລະບາດຂອງພະຍາດໂຄວິດ-19, ບໍ່ສາມາດເຮັດໃຫ້ ການແຜ່ລະບາດຂອງພະຍາດຢູ່ອາເມຣິກາມີສະພາບຜ່ອນຄາຍລົງ, ພຽງແຕ່ຈະເຮັດໃຫ້ການລະເຫຼີງໜ້າທີ່, ປະລະໜ້າທີ່ ແລະ ການກະທຳທີ່ບໍ່ໃຫ້ຄວາມສຳຄັນຕໍ່ຊີວິດຂອງປະຊາຊົນຂອງເຂົາເຈົ້າຖືກເປີດເຜີຍອອກມາຢ່າງຈະແຈ້ງກວ່າເກົ່າ.
ຄຳເຫັນ
0