ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ໃນເວລາປະກອບຄຳເຫັນກ່ຽວກັບວຽກງານຕ້ານການສໍ້ລາດບັງຫຼວງ, ທ່ານສີຈິ້ນຜິງເຄີຍຍົກເອົາກະວີ 2 ປະໂຫຍກຂອງທ່ານຕູ້ຟູ ນັກກະວີລາຊະວົງຖັງທີ່ມີຊື່ສຽງ, ຄື : “ຢາກປູກໄມ້ແປກໃໝ່ໃຫ້ມັນໃຫຍ່ສູງພັນສອກ, ຫາກມີໄມ້ໄຜ່ທີ່ເປັນຕາຊັງໝື່ນລຳບົດບັງມັນກໍຕ້ອງຕັດຖິ້ມໃຫ້ໝົດ”, ເຊິ່ງສະແດງໃຫ້ເຫັນເຖິງຄວາມຕັດສິນໃຈທີ່ເດັດດ່ຽວໃນການຕ້ານການສໍ້ລາດບັງຫຼວງ. ໃນຄວາມເປັນຈິງແລ້ວ, ຄວາມຕັດສິນໃຈນີ້ມາຈາກສະຕິຮັບຜິດຊອບຕໍ່ອະນາຄົດ ແລະ ຊາຕາກຳຂອງພັກ ແລະປະເທດ, ແລະມາຈາຈິດໃຈຮັກປະຊາຊົນຢ່າງສຸດໃຈ. ຕໍ່ໄປຂໍຍົກຕົວຢ່າງ ເລື່ອງໜຶ່ງຂອງທ່ານສີຈິ້ນຜິງ, ເລື່ອງນີ້ເກີດຂຶ້ນຢູ່ເຂດນິງເຕີແຂວງຟູຈ້ຽນເມື່ອ 30 ປີກ່ອນ.
ໃນເວລານັ້ນ, ເຂດນິງເຕີແຂວງຟູຈ້ຽນຍັງເປັນເຂດທີ່ຫຼ້າຫຼັງ, ແຕ່ຢູ່ເຂດຫຼ້າຫຼັງນີ້ຫາກມີປະກົດການໜຶ່ງຄື “ບໍ່ຍອມນ້ອຍໜ້າ”, ຄືພະນັກງານການນຳຢູ່ເຂດນັ້ນເມົານຳການຍຶດທີ່ດິນປຸກສ້າງຢ່າງຜິດລະບຽບວິໄນ ແລະ ຂໍ້ກຳນົດ. ຄ່າໃຊ້ຈ່າຍຂອງການປຸກເຮືອນແບບນີ້ຢ່າງໜ້ອຍຕ້ອງໃຊ້ໜຶ່ງແສນກວ່າຢວນ, ຈົນກະທັ້ງຫຼາຍແສນຢວນ. ແຕ່ໃນໄລຍະນັ້ນ, ເງິນເດືອນສະເລ່ຍຕໍ່ປີຕໍ່ຄົນຂອງພະນັກງານໃນທົ່ວແຂວງຟູຈ້ຽນແມ່ນ 1400 ກວ່າຢວນເທົ່ານັ້ນ. ຊັ້ນຄ່າປຸກເຮືອນນີ້ມາແຕ່ໃສ? ວັດສະດຸມາແຕ່ໃສ? ນີ້ແມ່ນມີປາກົດການສໍ້ລາດບັງຫຼວງຢ່າງຮ້າຍແຮງ. ປາກົດການທີ່ຍຶດທີ່ດິນປຸກສ້າງກໍນັບມື້ນັບໜັກໜ່ວງຂຶ້ນ, ປະຊາຊົນເກືອບໝົດສັດທາຕໍ່ການລົບລ້າງແບບແຜນທີ່ຫຍໍ້ທໍ້ແບບນີ້.
ແຕ່ວ່າເມື່ອປີ 1989, ສະພາບການດັ່ງກ່າວໄດ້ເກີດມີການປ່ຽນແປງ. ກ່ອນບຸນປີໃໝ່ຂອງປີນັ້ນ, ພະນັກງານການນຳຂັ້ນຕ່າງໆຂອງເຂດນິງເຕີໄດ້ຮັບແຈ້ງການໃຫ້ເຂົ້າຮ່ວມກອງປະຊຸມ. ການຈັດກອງປະຊຸມໃນເວລານັ້ນ, ບາງຄົນມີຄວາມຮູ້ສຶກຜິດປົກກະຕິ. ຜູ້ເປັນປະທານກອງປະຊຸມຄັ້ງນີ້ກໍແມ່ນທ່ານສີຈິ້ນຜິງທີ່ຫາກໍ່ດຳລົງຕຳແໜ່ງເປັນເລຂາຄະນະພັກເຂດນິງເຕີໄດ້ບໍ່ດົນ.
ໃນສາຍຕາຂອງພະນັກງານການນຳທ້ອງຖິ່ນ, ເລຂາຄະນະພັກທີ່ມາໃໝ່ຜູ້ນີ້ເປັນຄົນທີ່ເປັນກັນເອງແລະເຂົ້າຫາໄດ້ງ່າຍໃນຍາມທຳມະດາ. ແຕ່ໃນກອງປະຊຸມມື້ນັ້ນ, ຄົນທັງຫຼາຍໄດ້ເຫັນທ່ານສີຈິ້ນຜິງທີ່ມີສີໜ້າອັນເຄັ່ງຂຶມ ແລະ ບໍ່ປາກບໍ່ເວົ້ານັ່ງມິດງຽບຢູ່. ເມື່ອເວົ້າເຖິງບັນຫາ ຍຶດທີ່ດິນປຸກສ້າງ, ພະນັກງານຫຼາຍຄົນເວົ້າວ່າ, ບັນຫານີ້ບໍ່ແມ່ນເລີ່ມມີຂຶ້ນໃນມື້ນີ້, ຫາກແມ່ນເກີດມີມາເປັນເວລາດົນນານແລ້ວ, ພະນັກງານຫຼາຍຄົນຂອງທ້ອງຖິ່ນລ້ວນແຕ່ກ່ຽວພັນເຖິງບັນຫານີ້,ຄວາມຈິງມັນກໍເປັນແບບນີ້ແລ້ວ,ເລື່ອງມັນກໍເກີດຂຶ້ນແລ້ວ, ວິທີດີທີ່ສຸດກໍແມ່ນ ການນຳຜູ້ໃໝ່ບໍ່ຄວນທາວຫາບັນຫາເກົ່າ.
ເດືອນພະຈິກປີ 2003, ທ່ານສີຈິ້ນຜິງໃຫ້ສຳພາດຕໍ່ໂທລະພາບສູນກາງຈີນເລົາເລື່ອງການແກ້ໄຂບັນຫາການຍຶດທີ່ດິນປຸກສ້າງຢ່າງຜິດກົດໝາຍຢູ່ເນດນິງເຕີ ແຂວງຟູຈ້ຽນ.
ຍັງມີພະນັກງານບາງຄົນເວົ້າວ່າ, ບັນຫານີ້ແມ່ນແກ້ຍາກທີ່ສຸດ. ໃນດ້ານໜຶ່ງ, ກົດໝາຍຈະບໍ່ລົງໂທດຄົນຈຳນວນຫຼາຍ, ອີກດ້ານໜຶ່ງຜູ້ທີ່ຍຶດທີ່ດິນປຸກສ້າງເຫຼົ່ານີ້ຍັງເປັນໝູ່ຮ່ວມງານ, ຖ້າຍຶດເອົາເຮືອນ ແລະ ດິນຂອງເຂົາເຈົ້າ, ກໍຈະເກີດຄວາມຂັດແຍ້ງ ກັບເຂົາເຈົ້າຢ່າງແນ່ນອນ. ທ່າມກາງສະພາບທີ່ປ່ອຍປະລະເລີຍ ຖິ້ມຄວາມຮັບຜິດຊອບກັນ ແລະ ການຍອມຮັບແບບບໍ່ມີຫຼັກການແບບນີ້, ທ່ານສີຈິ້ນຜິງໃນໄວໜຸ່ມໄດ້ຕົບໂຕະແລ້ວລຸກຂຶ້ນ ແລະ ກ່າວວ່າ, ແມ່ນແທ້, ພະນັກງານການນຳທີ່ຍຶດທີ່ດິນປຸກສ້າງມີຈຳນວນຫຼາຍ, ແຕ່ເມື່ອທຽບກັບພະນັກງານ ອັນໄພສານແລ້ວ, ເຂົາເຈົ້າກວມເອົາພຽງແຕ່ສ່ວນໜ້ອຍເທົ່ານັ້ນ. ເມື່ອທຽບໃສ່ປະຊາຊົນ 2 ລ້ານກວ່າຄົນໃນທົ່ວເຂດແລ້ວ, ຍິ່ງເປັນສ່ວນໜ້ອຍທີ່ສຸດ. ທ່ານສີຈິ້ນຜິງໄດ້ຊີ້ແຈງຢ່າງຈະແຈ້ງວ່າ, ຕ້ອງແກ້ໄຂບັນຫາຍຶດທີ່ດິນປຸກສ້າງທີ່ຜິດລະບຽບວິໄນຢ່າງເດັດຂາດ, ທັງກຳນົດວ່າ, ນັບແຕ່ມື້ທີ່ຈັດກອງປະຊຸມນີ້ເປັນຕົ້ນໄປ, ໃຫ້ໂຈະການກໍ່ສ້າງເຮືອນສ່ວນຕົວຂອງພະນັກງານການນຳທັງໝົດ, ແລະລົງມືກວດກາສອບສວນແລະ ປັບປຸງຢ່າງຮອບດ້ານໃນທັນທີ. ຕໍ່ມາ ໜັງສືພິມປະຊາຊົນລາຍວັນໄດ້ລາຍງານຂ່າວພິເສດກ່ຽວກັບບັ້ນແກ້ໄຂບັນຫາຍຶດທີ່ດິນປຸກສ້າງຄັ້ງນີ້ຢູ່ເຂດນິງເຕີ, ໂດຍມີຫົວຂໍ້ຂ່າວວ່າ “ກະທຳດີເລື່ອງໜຶ່ງ, ຍາດໄດ້ຈິດໃຈຂອງປະຊາຊົນນັບໝື່ນ”.
ໃນໄລຍະເຮັດວຽກຢູ່ແຂວງເຈີ້ຈ່ຽງ, ທ່ານສີຈິ້ນຜິງໄດ້ຈັດເອົາວຽກງານຕ້ານການສໍ້ລາດບັງຫຼວງໄວ້ຢູ່ໃນຖານະທີ່ພົ້ນເດັ່ນ. ຫຼັງຈາກດຳລົງຕຳແໜ່ງຜູ້ນຳພັກ ແລະ ລັດຖະບານແລ້ວ, ເມື່ອຜະເຊີນກັບສະພາບການທີ່ຂ້ຽວຂາດ ແລະ ສັບສົນໃນວຽກງານຕ້ານການສໍ້ລາດບັງຫຼວງ, ທ່ານສີຈິ້ນຜິງຍັງຍຶດໝັ້ນໃນການນຳໃຊ້ຄວາມກົດດັນສູງ ແລະ ເນັ້ນການນາບຂູ່, ລົງໂທດຜູ້ສໍ້ລາດບັງຫຼວງໂດຍບໍ່ໂຍະຍານແມ່ນແຕ່ໜ້ອຍດຽວ, ເດັດດ່ຽວສະກັດກັ້ນທ່າຂະຫຍາຍຂອງປາກົດການສໍ້ລາດບັງຫຼວງ. ໂດຍຜ່ານການສຸມທຸກຄວາມພະຍາຍາມມາຫຼາຍປີຢ່າງບໍ່ລົດລະ, ພວກເຮົາໄດ້ເຫັນວ່າ, ເປົ້າໝາຍທີ່ບໍ່ກ້າສໍ້ລາດບັງຫຼວງໄດ້ບັນລຸຜົນເປັນຈິງໃນເບື້ອງຕົ້ນ ແລະ ມີສະພາບດີຂຶ້ນຕໍ່ແບບແຜນຂອງພັກ ແລະ ແບບແຜນບໍລິຫານການປົກຄອງ.
ໃນການເສີມສ້າງແບບແຜນຂອງພັກ ແລະການປົກຄອງແບບປອດໃສຂາວສະອາດ ແລະ ການຕ້ານການສໍ້ລາດບັງຫຼວງຂອງຈີນ, ມີຖ້ອຍຄຳຢ່າງໜຶ່ງທີ່ວ່າ “ການແກ້ໄຂບັນຫາທີ່ປາຍເຫດເປັນການປະຢັດເວລາໃຫ້ກັບການແກ້ໄຂບັນຫາທີ່ຕົ້ນເຫດ.” ການຕ້ານການສໍ້ລາດບັງຫຼວງຢ່າງເຂັ້ມແຂງ ແລະການສ້າງສິ່ງນາບຂູ່ເປັນມາດຕະການທີ່ແກ້ໄຂບັນຫາທີ່ປາຍເຫດ, ຄັນຊັ້ນ, “ຕົ້ນເຫດ” ຂອງການຕ້ານການສໍ້ລາດບັງຫຼວງເກີດຂຶ້ນຢູ່ບ່ອນໃດ? ກ່ອນອື່ນ “ຕົ້ນເຫດ” ນີ້ໝາຍເຖິງການສ້າງລະບອບລະບຽບການ. ທ່ານສີຈິ້ນຜິງກ່າວວ່າ:“ຜູ້ຊ່າງກູ້ໄພຈະສຳຫຼວດຫາຕົ້ນເຫດ, ຜູ້ຊ່າງປົວພະຍາດຈະກຳຈັດແຫຼ່ງກຳເນີດ.” ພັກເຮົາກຳອຳນາດເປັນເວລາຍາວນານ, ມີທ່າແຮງດ້ານການເມືອງອັນໃຫຍ່ຫຼວງ, ທັງຜະເຊີນກັບສິ່ງທ້າທາຍທີ່ຂ້ຽວຂາດ, ຕ້ອງອາໄສກຳລັງແຮງຂອງການຈັດຕັ້ງພັກທຸກຂັ້ນ ແລະ ປະຊາຊົນ, ເພີ່ມທະວີ ແລະ ປັບປຸງການກໍ່ສ້າງພັກ ການຄຸ້ມຄອງ ແລະ ການຕິດຕາມກວດກາ ພັກຢ່າງບໍ່ຢຸດຢັ້ງ.
ສຳນວນດັ່ງກ່າວແມ່ນຄຳເຫັນຂອງທ່ານສີຈິ້ນຜິງທີ່ກ່າວໃນບັ້ນຮໍ່າຮຽນລວມໝູ່ຄັ້ງທີ 24 ຂອງກົມການເມືອງສູນກາງພັກກອມມູນິດຈີນສະໄໝທີ 18ໃນວັນທີ 26 ມິຖຸນາປີ2015, ໂດຍເນັ້ນໜັກເຖິງການເສີມສ້າງລະບຽບກົດໝາຍໃນການຕ້ານການສໍ້ລາດບັງຫຼວງ ແລະ ສົ່ງເສີມຄວາມປອດໃສຂາວສະອາດ. ທ່ານສີຈິ້ນຜິງຊີ້ອອກວ່າ, ເມື່ອເບິ່ງຈາກຄະດີສໍ້ລາດບັງຫຼວງທີ່ຮ້າຍແຮງຈຳນວນໜຶ່ງແລ້ວເຫັນວ່າ, ສາເຫດສຳຄັນອັນໜຶ່ງທີ່ໄດ້ເກີດຄະດີຮ້າຍແຮງເຊັ່ນນີ້, ກໍເປັນຍ້ອນວ່າໂຄງປະກອບ ແລະ ກົນໄກໃນບາງຂົງເຂດຍັງບໍ່ທັນສົມບູນເທື່ອ. ຄັນຊັ້ນຈະເຮັດແນໃດເພື່ອອາໄສລະບອບລະບຽບການໃນການປ້ອງກັນ ແລະ ແກ້ໄຂບັນຫາສໍ້ລາດບັງຫຼວງຢ່າງມີປະສິດທິຜົນ, ຍັງເປັນບັນຫາສຳຄັນທີ່ໃຫ້ພວກເຮົາແກ້ໄຂ.
ໃນຄຳເຫັນຕອນນີ້ຂອງທ່ານສີຈິ້ນຜິງໄດ້ນຳໃຊ້ປະໂຫຍກໜຶ່ງຈາກຕຳລາບູຮານ, ຄື “ຜູ້ຊ່າງກຳຈັດໄພພິບັດຈະສືບຫາຕົ້ນເຫດ, ຜູ້ຊ່າງປົວພະຍາດຈະກຳຈັດແຫຼ່ງກຳເນີດ”. ໝາຍຄວາມວ່າ, ຜູ້ທີ່ສາມາດຄົ້ນພົບຕົ້ນເຫດຂອງໄພພິບັດຈຶ່ງເປັນຄົນຊ່າງກຳຈັດໄພພິບັດໄດ້ຢ່າງແທ້ຈິງ, ແພດໝໍທີ່ສາມາດຄົ້ນພົບແຫຼ່ງກຳເນີດຂອງພະຍາດ ແລະ ປິ່ນປົວໃຫ້ຫາຍຂາດຈາກພະຍາດຢ່າງເຖິງຖອງນັ້ນຈຶ່ງເປັນແພດໝໍທີ່ດີ. ເຊິ່ງປະໂຫຍກນີ້ເຄົ້າເດີມແມ່ນມາຈາກ ປື້ມ“ເຊີ້ລິນ”ທີ່ແຕ່ງໂດຍທ່ານໄບຈູ່ຢີ້ໃນລາຊະວົງຖັງ. ປື້ມ “ເຊີ້ລິນ”ແມ່ນແນວຄິດ ແລະ ຂໍ້ສະເໜີຂອງທ່ານໄບຈູ່ຢີ້ກ່ຽວກັບບັນຫາດ້ານການເມືອງ ການທະຫານ ແລະ ເສດຖະກິດທີ່ເກີດຂຶ້ນຢູ່ຕໍ່ໜ້າອຳນາດການປົກຄອງລາຊະວົງຖັງໃນໄລຍະນັ້ນ. ສະນັ້ນ, ໃນຄວາມເປັນຈິງແລ້ວ ປະໂຫຍກນີ້ແມ່ນຂໍ້ສະເໜີຂອງທ່ານໄບຈູ່ຢີ້ທີ່ຖະຫວາຍແດ່ເຈົ້າຊີວິດ, ໃນເວລາທີ່ແກ້ໄຂບັນຫາ ແລະ ຄວາມຫຍຸ້ງຍາກຂອງລັດ, ສິ່ງສຳຄັນທີ່ສຸດກໍຄືການຊອກຄົ້ນ ແລະ ແກ້ໄຂບັນຫາຕົ້ນເຫດຂອງມັນ.
ປະໂຫຍກນີ້ຂອງທ່ານໄບຈູ່ຢີ້ເຕັມໄປດ້ວຍປັດຊະຍາ ແລະສະຕິປັນຍາແບບຈີນ, ກໍຄືດັ່ງທີ່ການແພດຈີນປົວພະຍາດຈະບໍ່ປິ່ນປົວຕາມຈຸດທີ່ເກີດອາການ, ຕ້ອງສັງເກດອາການ, ດົມກິ່ນ, ຖາມອາການ ແລະ ຈັບຊີບພະຈອນ, ຊອກຄົ້ນ ແລະ ກຳຈັດແຫຼ່ງກຳເນີດຂອງພະຍາດ, ແລ້ວຈະປິ່ນປົວໄດ້ທັງອາການ ແລະຕົ້ນເຫດຂອງອາການໄປພ້ອມກັນ. ສຳລັບການຕ້ານການສໍ້ລາດບັງຫຼວງ ແລະ ສົ່ງເສີມຄວາມປອດໃສຂາວສະອາດກໍເຊັ່ນກັນ ຕ້ອງແກ້ໄຂທັງປາຍເຫດ ແລະ ຕົ້ນເຫດຂອງບັນຫາໄປພ້ອມໆກັນ. ໃນການແກ້ໄຂຕົ້ນເຫດຂອງບັນຫາ, ກ່ອນອື່ນໝົດກໍແມ່ນເສີມສ້າງລະບອບລະບຽບການ.
ຄຳເຫັນ
0