ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ໃນເວລາທີ່ກ່າວເຖິງການເສີມສ້າງລະບຽບການແລະກົດໝາຍເພື່ອຕ້ານການສໍ້ລາດບັງຫຼວງ ແລະ ສົ່ງເສີມຄວາມປອດໃສຂາວສະອາດ, ທ່ານສີຈິ້ນຜິງໄດ້ນຳໃຊ້ຄຳບູຮານປະໂຫຍກໜຶ່ງ ຄື “ຜູ້ຊ່າງກຳຈັດໄພພິບັດຈະສືບຫາຕົ້ນເຫດ, ຜູ້ຊ່າງປົວພະຍາດຈະກຳຈັດແຫຼ່ງກຳເນີດ” ພ້ອມທັງຊີ້ອອກວ່າ, ພື້ນຖານຂອງການຕ້ານການສໍ້ລາດບັງຫຼວງຂຶ້ນຢູ່ກັບການສ້າງລະບຽບການ.
ກ່ຽວກັບການສ້າງລະບຽບການ, ທ່ານສີຈິ້ນຜິງເຄີຍເວົ້າປະໂຫຍກໜຶ່ງທີ່ຖືກຮັບຮູ້ທົ່ວໄປ, ຄື “ໃຊ້ອຳນາດຕາມລະບຽບການ.” ຖ້າຢາກປະຕິບັດໃຫ້ໄດ້, ໃນດ້ານໜຶ່ງ, ກໍຕ້ອງສ້າງລະບຽບການທີ່ມີປະສິດທິຜົນ. ອີກດ້ານໜຶ່ງ, ກໍຕ້ອງມີຄວາມສາມາດໃນການປະຕິບັດຢ່າງເຂັ້ມແຂງ. ມີແຕ່ປະສົມປະສານທັງສອງດ້ານໃຫ້ເປັນຢ່າງດີແລ້ວ, “ການໃຊ້ອຳນາດຕາມລະບຽບການ”ຈຶ່ງຈະບັງເກີດຜົນໄດ້, ບົດບາດຂອງການຕ້ານການສໍ້ລາດບັງຫຼວງດ້ວຍລະບຽບການຈຶ່ງສາມາດສະແດງຜົນອອກມາ. ທ່ານສີຈິ້ນຜິງໄດ້ໃຫ້ຄວາມສຳຄັນຢ່າງສູງຕະຫຼອດມາຕໍ່ການຕ້ານການສໍ້ລາດບັງຫຼວງດ້ວຍລະບຽບການ, ແລະການເສີມສ້າງລະບຽບການ.
ເມື່ອ 35 ປີກ່ອນ, ຕອນທີ່ທ່ານສີຈິ້ນຜິງຫາກໍດຳລົງຕຳແໜ່ງເປັນເລຂາຄະນະພັກເມືອງເຈີ້ງຕິ້ງແຂວງເຫີເປີຍໄດ້ບໍ່ດົນ, ກໍໄດ້ຈັດຕັ້ງການສ້າງຂໍ້ກຳນົດກ່ຽວກັບການປັບປຸງແບບແຜນຂອງພະນັກງານລັດ, ວາງຂໍ້ຮຽກຮ້ອງໂດຍແນໃສ່ແກ້ໄຂບັນຫາປະເພດຕ່າງໆໃນດ້ານແບບແຜນຂອງພະນັກງານລັດຂອງເມືອງເຈີ້ງຕິ້ງ, ໄດ້ກຳນົດເປັນລະບຽບການ, ແລະໄດ້ສົ່ງຜົນສະທ້ອນຢ່າງເລິກເຊິ່ງເປັນໄລຍະຍາວ. ສຳລັບຂະບວນການ ແລະ ມາດຕະການເສີມສ້າງແບບແຜນຂອງຄະນະພັກເມືອງເຈີ້ງຕິ້ງ, ຫຼາຍຄົນຍັງມີຄວາມປະທັບໃຈຫຼາຍຈົນມາເຖິງປະຈຸບັນ.
ປີ 2014, ໃນເວລາເກັບກຳແລະລວບລວມຂໍ້ມູນສຳຄັນຂອງທ່ານສີຈິ້ນຜິງໃນໄລຍະທີ່ເພິ່ນເຮັດວຽກຢູ່ເມືອງເຈີ້ງຕິ້ງ, ທ່ານຈ່າງຊູ້ຈ່າວ ຮອງຫົວໜ້າຫ້ອງຄົ້ນຄວ້າຂອງຄະນະພັກນະຄອນສືເຈ່ຍຈ່ວງແຂວງເຫີເປີຍໄດ້ພົບເຫັນວ່າ, ໃນຕົ້ນຊຸມປີ 1980, ຢູ່ເມືອງເຈີ້ງຕິ້ງໄດ້ດຳເນີນການປະຕິຮູບ ແລະເປີດປະຕູສູ່ພາຍນອກຢ່າງເດັດຂາດແລະກ້າຫານ. ແຕ່ໃນຂະບວນການດັ່ງກ່າວ, ຄືກັນກັບທ້ອງຖິ່ນອື່ນໆ, ຢູ່ເມືອງເຈີ້ງຕິ້ງກໍໄດ້ເກີດມີປາກົດການຫຍໍ້ທໍ້ທີ່ປະຊາຊົນໄດ້ມີຫາງສຽງຢ່າງຮຸນແຮງຄື: ພະນັກງານລັດປຸກເຮືອນ ແບ່ງເຮືອນ ປ່ຽນສຳມະໂນຄົວຊົນນະບົດໃຫ້ເປັນສຳມະໂນຄົວຕົວເມືອງຢ່າງຜິດລະບຽບການ, ມີພະນັກງານໃນບ້ານຈຳນວນໜຶ່ງ ແບ່ງຊັບສິນລວມໝູ່ຢ່າງລັບໆ, ຍັງມີພະນັກງານສະມາຊິກພັກບາງຄົນໂຍະຍານໃນດ້ານລະບຽບວິໄນ, ເມື່ອພົບເຫັນບັນຫາແລ້ວກໍໜິ້ງກັນຮັບຜິດຊອບ. ບັນຫາເຫຼົ່ານີ້ເຮັດໃຫ້ທ່ານສີຈິ້ນຜິງເອົາໃຈໃສ່ໃນລະດັບສູງ. ຫຼັງຈາກທ່ານສີຈິ້ນຜິງດຳລົງຕຳແໜ່ງເປັນເລຂາຄະນະພັກເມືອງ ເປັນເວລາ 30 ກວ່າມື້, ເມື່ອໄດ້ຂໍຄວາມເຫັນຈາກພະນັກງານການນຳ ແລະ ພາກສ່ວນທີ່ຂຶ້ນກັບການຄຸ້ມຄອງໂດຍກົງຂອງອົງການປົກຄອງເມືອງເຈີ້ງຕິ້ງແລ້ວ, ໄດ້ເປັນປະທານຈັດກອງປະຊຸມຄະນະປະຈຳຄະນະພັກເມືອງໃນວັນທີ 6 ທັນວາປີ 1983, ໄດ້ພິຈາລະນາຄົ້ນຄວ້າ ແລະ ຮັບຮອງ “6 ຂໍ້ກຳນົດຂອງຄະນະພັກເມືອງເຈີ້ງຕິ້ງກ່ຽວກັບການປັບປຸງແບບແຜນນຳພາ.”
ເນື້ອໃນສຳຄັນຂອງ 6 ຂໍ້ກຳນົດມີຄື: ໜຶ່ງ, ກຳກັບສະພາບການໂດຍລວມ, ກຳແໜ້ນວຽກໃຫຍ່; ສອງ, ຄັດຄ້ານແບບແຜນອາດຍາສິດ, ເນັ້ນປະສິດທິຜົນຕົວຈິງໃນການເຮັດວຽກ; ສາມ, ເສີມສ້າງຄວາມສາມັກຄີຂອງຄະນະນຳ, ຮັກສາຄວາມເປັນເອກະພາບກັນຂອງຄະນະນຳໃນຄະນະພັກເມືອງເຈີ້ງຕິ້ງ; ສີ່, ປະພຶດຕົວເປັນແບບຢ່າງທີ່ດີ, ບໍ່ໃຫ້ມີແບບແຜນຫຍໍ້ທໍ້; ຫ້າ, ເພີ່ມທະວີການຮໍ່າຮຽນ, ຍົກລະດັບການນຳພາໃຫ້ສູງຂຶ້ນເລື້ອຍໆ; ຫົກ, ສ້າງອຸດົມການທີ່ສູງສົ່ງ,ສ້າງຜົນງານທີ່ດີເດັ່ນໃນພາລະກິດ “4 ທັນສະໄໝ”.
6 ຂໍ້ກຳນົດດັ່ງກ່າວໄດ້ປະກາດໃຊ້ຖືກກັບກາລະເທສະພໍດີ ໂດຍໄດ້ຊຸກຍູ້ແບບແຜນຂອງພັກ ແບບແຜນການປົກຄອງ ປະເພນີປະຊາຊົນ ແລະ ແບບແຜນສັງຄົມຂອງເມືອງເຈີ້ງຕິ້ງຈຶ່ງໄດ້ເຮັດໃຫ້ເກີດມີການປ່ຽນແປງດີຂຶ້ນ, ທັງໄດ້ຊຸກຍູ້ໃຫ້ເສດຖະກິດຂອງເມືອງເຈີ້ງຕິ້ງໄດ້ຮັບການພັດທະນາແບບກ້າວກະໂດດ.
ຈາກ 6 ຂໍ້ກຳນົດທີ່ປັບປຸງແບບແຜນຂອງພະນັກງານລັດຢູ່ເມືອງເຈີ້ງຕິ້ງ, ຮອດພຶດຕິກຳດ້ານການບໍລິຫານການປົກຄອງ ຂອງທ່ານສີຈິ້ນຜິງໃນໄລຍະຕໍ່ມາ, ຈົນຮອດການປະກາດໃຊ້ກົດເຫຼັກ 8 ຂໍ້ ຫຼັງກອງປະຊຸມໃຫຍ່ ຂອງພັກກອມ ມູນິດຈີນຄັ້ງທີ 18, ການເສີມສ້າງລະບຽບການຕ້ານການສໍ້ລາດບັງຫຼວງ ແລະ ສົ່ງເສີມຄວາມປອດໃສຂາວສະອາດໄດ້ຮັບການປັບປຸງໃຫ້ດີຂຶ້ນຢ່າງບໍ່ຢຸດຢັ້ງ. ພວກເຮົາເຫັນໄດ້ວ່າ ທ່ານສີຈິ້ນຜິງໄດ້ຍຶດໝັ້ນການຕ້ານການສໍ້ລາດບັງຫຼວງ ແລະ ສົ່ງເສີມຄວາມປອດໃສຂາວສະອາດຢ່າງສະເໝີຕົ້ນສະເໝີປາຍ, ແລະ ໄດ້ລົງເລິກຄົ້ນຄິດ ຊອກຮູ້ຢ່າງຕໍ່ເນື່ອງ ແລະ ຍຶດໝັ້ນການປະຕິບັດຕົວຈິງຢູ່ສະເໝີ.
ນັບແຕ່ກອງປະຊຸມໃຫຍ່ ຂອງພັກກອມມູນິດຈີນຄັ້ງທີ 18ເປັນຕົ້ນມາ, ພາຍໃຕ້ການນຳພາທີ່ເຂັ້ມແຂງຂອງສູນກາງພັກກອມມູນິດຈີນທີ່ມີທ່ານສີຈິ້ນຜິງເປັນແກນນຳ, ລະບຽບຕ່າງໆໃນການຄຸ້ມຄອງຄົນ ວຽກ ວັດຖຸ ແລະ ເງິນ ໄດ້ຖືກປະກາດໃຊ້ຢ່າງເປັນລະບົບ. ການກຳນົດ ແລະ ປະກາດໃຊ້ກົດລະບຽບ ແລະ ລະບຽບການພາຍໃນພັກຫຼາຍສະບັບຢ່າງລຽນຕິດ ໄດ້ເຮັດໃຫ້ລະບົບລະບຽບການຂອງພັກກອມມູນິດຈີນນັບມື້ນັບສົມບູນຂຶ້ນ, ທັງເຮັດໃຫ້ລະບົບລະບຽບການນັບມື້ນັບເຂັ້ມແຂງແລະໜາແໜ້ນກວ່າເກົ່າ, ເຊິ່ງເຮັດໃຫ້ການເສີມສ້າງແບບແຜນພັກ ແລະ ການປົກຄອງທີ່ປອດໃສຂາວສະອາດ ແລະ ວຽກງານຕ້ານການສໍ້ລາດບັງຫຼວງກ້າວສູ່ໄລຍະໃໝ່ທີ່ສາມາດແກ້ໄຂບັນຫາການສໍ້ລາດບັງຫຼວງໄດ້ຢ່າງເຖິງກົກເຖິງຮາກ.
ຄົນບູຮານຈີນສົ່ງເສີມການຝຶກຝົນຫຼໍ່ຫຼອມຄຸນສົມບັດໃຫ້ແກ່ຕົນເອງ, ຄຸ້ມຄອງຄອບຄົວໃຫ້ດີ, ບໍລິຫານບ້ານເມືອງໃຫ້ຈະເລີນຮຸ່ງເຮືອງ, ເຮັດໃຫ້ປະຊາຊົນຢູ່ເຢັນເປັນສຸກແລະປະເທດຊາດມີຄວາມສະຫງົບປອດໄພ.ໃນນີ້, ການຝຶກຝົນຫຼໍ່ຫຼອມຄຸນສົມບັດໃຫ້ແກ່ຕົນເອງແມ່ນເປັນອັນດັບໜຶ່ງ. ຊາວພັກກອມມູນິດຈີນຍິ່ງຄວນເພີ່ມຄວາມເຂັ້ມງວດຕໍ່ຕົນເອງ, ເພີ່ມທະວີການຝຶກຝົນຄຸນສົມບັດໃຫ້ແກ່ຕົນເອງ, ພະຍາຍາມກາຍເປັນແບບຢ່າງທີ່ດີໃນການເຂັ້ມງວດຕໍ່ຕົນເອງໃຫ້ມີຄວາມປອດໃສຂາວສະອາດ. ກ່ຽວກັບເລື່ອງນີ້, ທ່ານສີຈິ້ນຜິງກ່າວວ່າ:
ໄປຄຽງຄູ່ກັບການເພີ່ມຂຶ້ນຂອງອາຍຸພັກ,ສະຕິພັກ ສະຕິຕື່ນຕົວທາງແນວຄິດ ແລະຄຸນສົມບັດຂອງພະນັກງານການນຳຈະບໍ່ຍົກສູງຂຶ້ນເອງ, ແລະກໍຈະບໍ່ຍົກສູງຂຶ້ນແບບທຳມະຊາດຕາມຕຳແໜ່ງທີ່ເລື່ອນສູງຂຶ້ນ, ຫາກຕ້ອງ ໄດ້ພະຍາຍາມຢູ່ຕະຫຼອດຊີວິດ. ຖ້າຢາກກາຍເປັນພະນັກງານການນຳທີ່ດີ, ກໍຕ້ອງໄດ້ປັບປຸງໂລກອັດຕະວິໄສ, ເສີມສ້າງສະຕິພັກ, ເພີ່ມທະວີການບຳລຸງສ້າງຄຸນທາດຄຸນສົມບັດຢ່າງບໍ່ຢຸດຢັ້ງ. ພະຍາຍາມເຮັດໃຫ້ໄດ້ເຖິງຂັ້ນທີ່ “ບໍ່ຫວັ່ນໄຫວຄອນແຄນເນື່ອງຈາກຜົນປະໂຫຍດເລັກນ້ອຍ, ບໍ່ຫຼົງໄຫຼແສງສີລາບຍົດລໍ້ໃຈ”, ເປັນຄົນຢ່າງຊື່ສັດບໍລິສຸດ, ເຮັດວຽກຢ່າງໜັກແໜ້ນ, ເປັນເຈົ້າໜ້າທີ່ທີ່ປອດໃສຂາວສະອາດ.
ທ່ານສີຈິ້ນຜິງທີ່ກ່າວໃນກອງປະຊຸມວຽກງານການຈັດຕັ້ງທົ່ວປະເທດທີ່ຈັດຂຶ້ນໃນວັນທີ 28 ມິຖຸນາປີ 2013
ສຳນວນດັ່ງກ່າວແມ່ນຄວາມເຫັນຂອງທ່ານສີຈິ້ນຜິງທີ່ກ່າວໃນກອງປະຊຸມວຽກງານການຈັດຕັ້ງທົ່ວປະເທດທີ່ຈັດຂຶ້ນໃນວັນທີ 28 ມິຖຸນາປີ 2013. ພະນັກງານການນຳທີ່ດີຄວນມີມາດຕະຖານແນວໃດ? ທ່ານສີຈິ້ນຜິງກ່າວວ່າ, ຕ້ອງ “ບໍ່ຫວັ່ນໄຫວຄອນແຄນເນື່ອງຈາກຜົນປະໂຫຍດເລັກນ້ອຍ, ບໍ່ຫຼົງໄຫຼແສງສີລາບຍົດລໍ້ໃຈ”. ຂົງຈື້ກໍເຄີຍກ່າວວ່າ: “ຢ່າສະແຫວງຫາແຕ່ຄວາມໄວ, ຢ່າເຫັນແກ່ຜົນປະໂຫຍດເລັກນ້ອຍ. ຢາກສຳເລັດໄວເກີນໄປກໍຈະບໍ່ໄດ້ຜົນ, ເຫັນແກ່ຜົນປະໂຫຍດເລັກນ້ອຍກໍຈະບໍ່ສາມາດເຮັດສຳເລັດພາລະກິດຍິ່ງໃຫຍ່ໄດ້.” ເຊິ່ງມີຄວາມໝາຍວ່າ, ບໍ່ວ່າເຮັດສິ່ງໃດກໍຕ້ອງເຄົາລົບກົດເກນພັດທະນາທີ່ປົກກະຕິຂອງທຸກສິ່ງຢ່າງ, ບໍ່ຄວນຄິດເອົາປຽບແມ່ນແຕ່ເລື່ອງນ້ອຍໆ. ຜູ້ມັກເອົາລັດເອົາປຽບຈະບໍ່ສາມາດບັນລຸເປົ້າໝາຍທີ່ຍາວໄກໄດ້.
ສຳລັບປະໂຫຍກທີ່ວ່າ “ບໍ່ຫຼົງໄຫຼແສງສີລາບຍົດລໍ້ໃຈ”, ໃນນີ້ ຄຳວ່າ “ແສງສີ” ມີເຄົ້າເດີມມາຈາກປຶ້ມຕຳລາ “ຕ້າວເຕີຈິ່ງ”ຂອງເຫຼົາຈື, ປະໂຫຍກເດີມຄື “5 ສີເຮັດໃຫ້ຄົນຕາບອດ, 5ສຽງເຮັດໃຫ້ຫູໜວກ, 5 ລົດຊາດເຮັດໃຫ້ຄົນເສຍຄວາມສາມາດຊິມລົດຊາດ.” ທີ່ນີ້ ໃນຄຳວ່າ “5 ສີ”, “5ສຽງ”, “5 ລົດຊາດ”, ຄຳວ່າ “5” ບໍ່ໄດ້ໝາຍເຖິງຈຳນວນແນ່ນອນ,ຫາກໝາຍເຖິງຊະນິດຕ່າງໆ, ຄື ສີສັນຕ່າງໆ,ສຽງຕ່າງໆ,ລົດຊາດຊິນິດຕ່າງໆ, ຄັນຊັ້ນ,ໝົດປະໂຫຍດດັ່ງກ່າວກໍ ໝາຍຄວາມວ່າ, ສິ່ງທີ່ງາມຕາ ມ່ວນຫູ ແລະ ແຊບຊ້ອຍນັ້ນ, ຖ້າເອົາຫຼາຍເກີນໄປຈະທຳລາຍຄວາມສາມາດການເບິ່ງ ການຟັງ ແລະ ການຊິມລົດຊາດຂອງຄົນເຮົາ. ສະນັ້ນ, ພວກເຮົາບໍ່ຄວນຖືກຍົວະຍວນ ແລະຖືກຫຼອກລວງຈາກສິ່ງເຫຼົ່ານີ້. ນີ້ກໍຄືຄະຕິເຕືອນໃຈຂອງຄົນບູຮານຈີນທີ່ວ່າ ”ເຊີ້ນເວີ່ຍ” ແປວ່າ: “ລະມັດລະວັງຈາກສິ່ງເລັກນ້ອຍ”.
“ລະມັດລະວັງຈາກສິ່ງເລັກນ້ອຍ” ເປັນຫຼັກການຝຶກຝົນຄຸນສົມບັດຂອງຕົນ ແລະການຄົບຄ້າສະມາຄົມທີ່ສຳຄັນທີ່ສຸດສຳລັບນັກຮຽນຮູ້ປັນຍາຊົນແລະຂຸນນາງໃນສະໄໝບູຮານຂອງຈີນ. ຕົວຢ່າງວ່າ ປາວປຸ່ນຈິ້ງ ທີ່ຄົນທັງຫຼາຍຮັບຮູ້ດີ. ໃນປະຫວັດສາດ, ປາວປຸ່ນຈິ້ງເປັນເຈົ້າໜ້າທີ່ທີ່ມີຄວາມປອດໃສຂາວສະອາດທີ່ຫາຍາກ ເປັນລູກກະຕັນຍູ ທັງເປັນເສນາອາມາດທີ່ຈົ່ງຮັກພັກດີຕໍ່ເຈົ້າຊີວິດ.
ຄຳເຫັນ
0