ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຫວ່າງກ່ອນນີ້ບໍ່ດົນ, ທ່ານສີຈິ້ນຜິງ ປະທານປະເທດຈີນໄດ້ໄປສຳຫຼວດກວດກາວຽກງານຢູ່ແຂວງສ້ານຊີ່, ບ່ອນທຳອິດທີ່ທ່ານເລືອກໄປກໍແມ່ນສາຍພູຊິນຫຼິງ, ທັງໄດ້ໃຫ້ຄະຕິເຕືອນໃຈວ່າ “ຈົ່ງເປັນຜູ້ປ້ອງກັນລະບົບນິເວດຂອງສາຍພູຊິນຫຼິງໃຫ້ດີ” ແລະ ອື່ນໆ, ເຊິ່ງສະແດງໃຫ້ເຫັນວ່າທ່ານໃຫ້ຄວາມສຳຄັນຢ່າງຍິ່ງຕໍ່ການອະນຸລັກລະບົບນິເວດຂອງສາຍພູຊິນຫຼິງ.
ຈຸດໝາຍປາຍທາງແຫ່ງທຳອິດໃນການສຳຫຼວດກວດເບິ່ງສາຍພູຊິນຫຼິງຂອງທ່ານສີຈິ້ນຜິງໃນຄັ້ງນີ້, ແມ່ນຮ່ອມພູງົວປ່າ takinຢູ່ເຂດປ່າສະຫງວນທຳມະຊາດລະດັບຊາດນິວເປີ້ຍຫຼຽງ. ສຳລັບສາຍພູຊິນລິງຕອນເຂດປ່າສະຫງວນທຳມະຊາດນິວເປີ້ຍຫຼຽງຕັ້ງຢູ່ນັ້ນ, ແມ່ນເຂດແຫຼ່ງນ້ຳຕົ້ນຕໍ ໂຄງການສົ່ງນ້ຳສາຍກາງຈາກພາກໃຕ້ໄປສູ່ພາກເໜືອຂອງຈີນ.
ຕາມຂ່າວແຈ້ງວ່າ, ນັບແຕ່ວັນທີ 12 ທັນວາປີ 2014 ຫາຕົ້ນເດືອນທັນວາປີ 2019, ໂຄງການສົ່ງນ້ຳສາຍກາງຈາກພາກໃຕ້ສູ່ພາກເໜືອທີ່,uສາຍພູຊິນຫຼິງເປັນແຫຼ່ງນ້ຳນັ້ນໄດ້ສະໜອງນ້ຳ25,8 ຕື້ແມັດກ້ອນ, ເຊິ່ງໄດ້ຫຼຸດຜ່ອນບັນຫາຂາດນ້ຳຢູ່ນະຄອນຫຼວງປັກກິ່ງ ນະຄອນທຽນສິນ ແຂວງເຫີເປີຍ ແລະ ແຂວງເຫີນານ, ປະຊາຊົນປະມານ 60 ລ້ານຄົນໄດ້ຮັບຜົນປະໂຫຍດ.
ປະຈຸບັນ, ສາຍພູຊິນຫຼິງບໍ່ພຽງແຕ່ເປັນແຫຼ່ງສະໜອງນ້ຳກິນໃຊ້ໃຫ້ປະຊາຊົນຈີນເທົ່ານັ້ນ, ຍັງເປັນແຫຼ່ງສະໜອງຜະລິດຕະພັນກະສິກຳທຳມະຊາດ ເຊັ່ນ ເຫັດຫູໜູ ຢາພື້ນເມືອງຈີນ ໃບຊາ ແລະ ອື່ນໆໄດ້ກາຍເປັນແຫຼ່ງລາຍຮັບທີ່ພາໃຫ້ປະຊາຊົນທ້ອງຖິ່ນແຫ່ງນັ້ນສາມາດຫຼຸດພົ້ນອອກຈາກຄວາມທຸກຍາກ ແລະ ສ້າງຄວາມຮັ່ງມີ, ເຊິ່ງບໍ່ພຽງແຕ່ມີຄຸນຄ່າດ້ານເສດຖະກິດນິເວດອັນໃຫຍ່ຫຼວງເທົ່ານັ້ນ, ຍັງສາມາດຫັນເປັນປະສິດທິຜົນດ້ານເສດຖະກິດອີກດ້ວຍ.
ປີ 2020 ແມ່ນປີສຸດທ້າຍທີ່ຈີນຕ້ອງສຳເລັດເປົ້າໝາຍສຳຄັນຫຼາຍຢ່າງ, ທັງແມ່ນປີທີ່ຈີນ ແລະ ທົ່ວໂລກຮ່ວມກັນຜະເຊີນໜ້າກັບສິ່ງທົດສອບຈາກການແຜ່ລະບາດຂອງພະຍາດCOVID-19. ເຖິງວ່າການພັດທະນາຂອງເສດຖະກິດສັງຄົມໄດ້ພົບກັບສິ່ງທ້າທາຍທີ່ບໍ່ເຄີຍມີມາກ່ອນ, ແຕ່ທ່ານສີຈິ້ນຜິງໄດ້ຮັກສາຄວາມເຂັ້ມແຂງໃນການອະນຸລັກລະບົບນິເວດຢ່າງບໍ່ຫວັ່ນໄຫວຄອນແຄນແມ່ນແຕ່ໜ້ອຍດຽວ. ການສຳຫຼວດກວດເບິ່ງສອງເທື່ອຂອງທ່ານສີຈິ້ນຜິງໃນຫວ່າງມໍ່ໆມານີ້, ລ້ວນແຕ່ແມ່ນການສຳຫຼວດຄົ້ນຄວ້າພາຍໃຕ້ຫົວຂໍ້ “ການອະນຸລັກລະບົບນິເວດ”.
ເມື່ອ 20 ກວ່າມື້ກ່ອນ, ທ່ານສີຈິ້ນຜິງໄດ້ໄປສຳຫຼວດກວດກາວຽກງານຢູ່ແຂວງເຈີ້ຈ່ຽງ, ໂດຍໄດ້ໄປກວດເບິ່ງທ່າກຳປັ່ນ ແລະ ວິສາຫະກິດຂະໜາດກາງແລະ ນ້ອຍກ່ອນໝູ່, ຈາກນັ້ນຈຶ່ງໄປກວດເບິ່ງບ້ານອີຊຸ່ນເມືອງອ່ານຈີ ແລະ ໜອງຊີ່ຫູ. ໃນນັ້ນບ້ານອີຊຸ່ນກໍແມ່ນບ່ອນທີ່ທ່ານສີຈິ້ນຜິງດ້ສະເໜີແນວຄວາມຄິດ “ພູຂຽວນ້ຳໃສກໍແມ່ນພູເງິນພູຄຳ” ເປັນຄັ້ງທຳອິດໃນປີ 2005.
ການສຳຫຼວດກວດກາວຽກງານຢູ່ແຂວງສ້ານຊີ່ຂອງທ່ານສີຈິ້ນຜິງໃນຄັ້ງນີ້, ເນື້ອໃນຕົ້ນຕໍກໍແມ່ນການລຶບລ້າງຄວາມທຸກຍາກ, ແຕ່ທ່ານໄດ້ເລືອກໄປກວດເບິ່ງສາຍພູຊິນຫຼິງກ່ອນໝູ່, ທັງເນັ້ນວ່າ “ຖ້າວ່າມະນຸດບໍ່ທຳລາຍພູຜາທຳມະຊາດ, ພູຜາທຳມະຊາດກໍຈະສ້າງຜົນປະໂຫຍດໃຫ້ແກ່ມວນມະນຸດແນ່ນອນ”, ນີ້ໄດ້ສ່ອງແສງເຖິງທັດສະນະການພັດທະນາແບບສີຂຽວ, ທັງບໍ່ສ້າງຜົນກະທົບຕໍ່ມະນຸດ ແລະ ພູຜາທຳມະຊາດທັງສອງ.
ຄຳເຫັນ
0