ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 1 ພຶດສະພາແມ່ນວັນກຳມະກອນສາກົນ ເປັນວັນບຸນຂອງຊາວຜູ້ອອກແຮງງານ. ໃນໄລຍະທີ່ເກີດມີສະພາບພະຍາດໂຄວິດ-19, ວັນກຳມະກອນສາກົນປີນີ້ຈຶ່ງມີຄວາມໝາຍທີ່ບໍ່ທຳມະດາ.
ຕັ້ງແຕ່ໄລຍະເບື້ອງຕົ້ນ, ທ່ານສີຈິ້ນຜິງ ຜູ້ນຳສູງສຸດຂອງຈີນກໍໄດ້ກຳນົດໃຫ້ບັ້ນປ້ອງກັນແລະຄວບຄຸມພະຍາດຄັ້ງນີ້ເປັນ “ບັ້ນຮົບທົ່ວປວງຊົນ” ໂດຍເນັ້ນວ່າ ຕ້ອງຖືຄວາມປອດໄພດ້ານຊີວິດແລະສຸຂະພາບຮ່າງກາຍຂອງປະຊາຊົນເປັນສິ່ງສຳຄັນທີ່ສຸດ, ຕ້ອງອາໃສປະຊາຊົນຢ່າງແໜ້ນແຟ້ນເພື່ອເອົາຊະນະພະຍາດຄັ້ງນີ້. ໂດຍຜະເຊີນໜ້າກັບພະຍາດດັ່ງກ່າວທີ່ເກີດຂຶ້ນຢ່າງກະທັນຫັນ, ນັບແຕ່ພະນັກງານແພດໝໍຈົນຮອດພະນັກງານທີ່ມີສ່ວນຮ່ວມໃນການປ້ອງກັນແລະຄວບຄຸມພະຍາດຢູ່ໃນຂະແໜງການຕ່າງໆ, ຈາກພະນັກງານກວດອະນາໄມຕາມຖະໜົນຫົນທາງ, ຜູ້ສົ່ງເຄື່ອງດ່ວນຈົນຮອດກຳມະກອນຜະລິດອຸປະກອນປ້ອງກັນພະຍາດ, ປະຊາຊົນຜູ້ອອກແຮງງານເປັນພັນເປັນໝື່ນຄົນໄດ້ສຸມຄວາມພະຍາຍາມ ແລະອຸທິຕົນຢ່າງງຽບໆຢູ່ໃນໜ້າທີ່ວຽກງານຂອງຕົນ ເຊິ່ງໄດ້ເຕົ້າໂຮມກຳລັງແຮງທີ່ເຂັ້ມແຂງເພື່ອເອົາຊະນະພະຍາດ. ກ່ອນໜ້ານີ້, ທ່ານປະທານສີຈິ້ນຜິງໄດ້ສົນທະນາກັບຜູ້ນຳຕ່າງປະເທດຜ່ານທາງໂທລະສັບ ໂດຍກ່າວເນັ້ນວ່າ: “ເພື່ອເອົາຊະນະພະຍາດຄັ້ງນີ້, ຜູ້ທີ່ໃຫ້ກຳລັງໃຈແລະຄວາມໝັ້ນໃຈແກ່ພວກຂ້າພະເຈົ້າກໍຄືປະຊາຊົນຈີນ” ທັງໄດ້ຍ້ອງຍໍວ່າ: “ປະຊາຊົນຈີນແມ່ນວິລະຊົນທີ່ແທ້ຈິງ”.
ທ່ານບຣູສ ແອດເວີດ ທີ່ປຶກສາລະດັບສູງຂອງຜູ້ອຳນວຍການໃຫຍ່ອົງການອະນາໄມໂລກກ່າວວ່າ: ອາສາສະໝັກຈີນໄດ້ສູ້ຊົນຢູ່ແນວໜ້າແຫ່ງການປ້ອງກັນປະເທດຈີນແລະແຫ່ງຕ່າງໆຂອງໂລກຢ່າງແທ້ຈິງ.
ອີງຕາມແຜນການ, ປີນີ້ຈີນຈະເຮັດສຳເລັດໜ້າທີ່ລຶບລ້າງຄວາມທຸກຍາກເດັດຖານ, ບັນລຸເປົ້າໝາຍທີ່ສ້າງສັງຄົມທີ່ອີ່ມໜຳສຳລານໃຫ້ສຳເລັດຢ່າງຮອບດ້ານ. ເຖິງວ່າສະພາບພະຍາດຄັ້ງນີ້ໄດ້ເປັນສິ່ງທ້າທາຍໃຫ້ແກ່ການພັດທະນາເສດຖະກິດຂອງຈີນ, ແຕ່ຂໍແຕ່ວ່າປະຊາຊົນຈີນ 1,4 ຕື້ຄົນສາມັກຄີກັນສູ້ຊົນຜ່ານຜ່າ, ກໍຈະບໍ່ມີສິ່ງທ້າທາຍແລະຄວາມຫຍຸ້ງຍາກໃດທີ່ຈະບໍ່ສາມາດຜ່ານຜ່າໄດ້. ຜູ້ອອກແຮງງານເປັນພັນເປັນໝື່ນຄົນຈະເປັນກຳລັງອັນໃຫຍ່ຫຼວງແລະເຂັ້ມແຂງ ທີ່ຈະຊຸກຍູ້ໃຫ້ປະເທດຈີນສືບຕໍ່ກ້າວເດີນໄປໜ້າຢ່າງເດັດດ່ຽວໜຽວແໜ້ນ ເພື່ອບັນລຸເປົ້າໝາຍການພັດທະນາປະເທດຊາດທີ່ໄດ້ກຳນົດໄວ້.
ຄຳເຫັນ
0