ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ໃນປຶ້ມຕຳລາອະມະຕະຂອງບູຮານຈີນເປັນຈຳນວນຫຼວງຫຼາຍປານມະຫາສະໝຸດອັນກວ້າງໃຫຍ່ໄພສານ, ສຳນວນກ່ຽວກັບຜູ້ມີຄວາມຮູ້ຄວາມສາມາດນັ້ນມີຢ່າງຫຼວງຫຼາຍ ເຊິ່ງລ້ວນແຕ່ໄດ້ຊີ້ບອກເຫດຜົນອັນໜຶ່ງຄື ຜູ້ມີຄວາມຮູ້ຄວາມສາມາດເປັນພື້ນຖານຂອງການບໍລິຫານປະເທດ ທັງເປັນຂໍກຸນແຈທີ່ຕັດສິນຊີ້ຂາດຜົນສຳເລັດຂອງພາລະກິດໃດໜຶ່ງ.
ກ່ຽວກັບຜູ້ມີຄວາມຮູ້ຄວາມສາມາດ, ທ່ານສີຈິ້ນຜິງໄດ້ໃຫ້ທັດສະນະສຳຄັນຈຳນວນຫຼາຍ, ແລະໃນເວລາບັນຍາຍທັດສະນະເຫຼົ່ານີ້ທ່ານໄດ້ຍົກໃຫ້ເຫັນຫຼາຍໆສຳນວນບູຮານອະມະຕະທີ່ພົ້ນເດັ່ນ. ຕໍ່ໄປ, ພວກເຮົາຈະແນະນຳສຳນວນອະມະຕະເຫຼົ່ານີ້ສູ່ທ່ານຜູ້ຟັງຟັງ ເພື່ອເຊື່ອມຊຶມທັດສະນະກ່ຽວກັບຜູ້ມີຄວາມຮູ້ຄວາມສາມາດຂອງທ່ານສີຈິ້ນຜິງໃຫ້ໄດ້ຢ່າງເລິກເຊິ່ງ.
ໃນວັດທະນະທຳຈີນທີ່ມີມູນເຊື້ອອັນດີງາມໃນປະຫວັດສາດຫຼາຍພັນປີ,ໃນນັ້ນ, ມີມູນເຊື້ອທີ່ດີທີ່ສຸດອັນໜຶ່ງຄື: ການເຄົາລົບຜູ້ມີຄວາມຮູ້ຄວາມສາມາດ. ນັບແຕ່ກອງປະຊຸມໃຫຍ່ຂອງພັກກອມມູນິດຈີນຄັ້ງທີ 18 ເປັນຕົ້ນມາ, ທ່ານສີຈິ້ນຜິງໄດ້ໃຫ້ທັດສະນະກ່ຽວກັບຜູ້ມີຄວາມຮູ້ຄວາມສາມາດເປັນຈຳນວນຫຼາຍທີ່ສຸດຕົວຢ່າງເຊັ່ນ: “ຄວາມເຂັ້ມແຂງຂອງຊາດຂຶ້ນກັບຜູ້ມີຄວາມຮູ້ຄວາມສາມາດ”, “ຊັບພະຍາກອນມະນຸດເປັນຊັບພະຍາກອນລັກສະນະພື້ນຖານຂອງພັກໃນການກຳອຳນາດແລະການສ້າງປະເທດໃຫ້ຈະເລີນເຂັ້ມແຂງ”, “ຕ້ອງປູກຈິດສຳນຶກໂດຍໃຫ້ຄວາມສຳຄັນຢ່າງສູງຕໍ່ຜູ້ມີຄວາມຮູ້ຄວາມສາມາດ, ມີຄວາມປາຖະນາຢ່າງແຮງກ້າໃນການສະແຫວງຫາຜູ້ມີຄວາມຮູ້ຄວາມສາມາດ ແລະເມື່ອພົບຜູ້ມີຄວາມຮູ້ຄວາມສາມາດກໍປານໄດ້ແກ້ວປະເສີດ, ການສະເໜີຜູ້ມີຄວາມຮູ້ຄວາມສາມາດໂດຍບໍ່ຈຳກັດແຕ່ມາດຕະຖານໃດໜຶ່ງ, ໝູນໃຊ້ຜູ້ມີຄວາມຮູ້ຄວາມສາມາດໃຫ້ເຂົາເຈົ້າສາມາດເສີມຂະຫຍາຍຄວາມສາມາດຂອງຕົນຢ່າງເຕັມທີ່” ເປັນຕົ້ນ, ເຊິ່ງທັດສະນະເຫຼົ່ານີ້ ໄດ້ສະແດງໃຫ້ເຫັນຢ່າງເຕັມສ່ວນວ່າ ທ່ານສີຈິ້ນຜິງມີຄວາມຮັບຮູ້ທີ່ສູງສົ່ງຕໍ່ຜູ້ມີຄວາມຮູ້ຄວາມສາມາດ.
ຄັນຊັ້ນ, ຜູ້ມີຄວາມຮູ້ຄວາມສາມາດເປັນຄົນແບບໃດ? ໃນຍຸກໃໝ່ຄືທຸກມື້ນີ້, ພວກເຮົາມີມາດຕະຖານແນວໃດໃນການຕີລາຄາວ່າ ຄົນໆໜຶ່ງເປັນຜູ້ມີຄວາມຮູ້ຄວາມສາມາດຫຼືບໍ?ທ່ານສີຈິ້ນຜິງໃຫ້ທັດສະນະວ່າ:
“ ‘ຄວາມຮູ້ຄວາມສາມາດເປັນສິ່ງຄ້ຳຊູຄຸນສົມບັດ, ຄຸນສົມບັດເປັນສິ່ງບັນຊາຄວາມຮູ້ຄວາມສາມາດ’ ການບຳລຸງສ້າງຜູ້ມີຄວາມຮູ້ຄວາມສາມາດຕ້ອງເປັນຂະບວນການທີ່ເປັນເອກະພາບກັນ ລະຫວ່າງການສຶກສາຄົນກັບການສ້າງຜູ້ມີຄວາມຮູ້ຄວາມສາມາດ, ສ່ວນການສຶກສາຄົນເປັນພື້ນຖານ, ຄົນໆໜຶ່ງຫາກບໍ່ມີຄຸນສົມບັດກໍຈະບໍ່ສາມາດຍືນຍົງຄົງຕົວຢູ່ໃນສັງຄົມໄດ້, ພື້ນຖານຂອງການສຶກສາຄົນຂຶ້ນຢູ່ກັບການສ້າງຄຸນສົມບັດ, ນີ້ຄືວິທີສັດຈະວິພາກໃນການບຳລຸງສ້າງຜູ້ມີຄວາມຮູ້ຄວາມສາມາດ.”
ທ່ານສີຈິ້ນຜິງໂອ້ລົມສົນທະນາກັບນັກສຶກສາແລະຄູອາຈານຂອງມະຫາວິທະຍາໄລປັກກິ່ງໃນວັນທີ 2 ພຶດສະພາປີ 2018, ໃນໂອກາດວັນຊາວໜຸ່ມຈີນ 4 ພຶດສະພາທີ່ໃກ້ຈະໝູນວຽນມາເຖິງ.
ສຳນວນດັ່ງກ່າວແມ່ນຄວາມເຫັນຕອນໜຶ່ງຂອງທ່ານສີຈິ້ນຜິງທີ່ເພິ່ນກ່າວໃນເວລາໂອ້ລົມສົນທະນາກັບນັກສຶກສາແລະຄູອາຈານຂອງມະຫາວິທະຍາໄລປັກກິ່ງໃນວັນທີ 2 ພຶດສະພາປີ 2018, ໃນໂອກາດວັນຊາວໜຸ່ມຈີນ 4 ພຶດສະພາທີ່ໃກ້ຈະໝູນວຽນມາເຖິງ. ໃນຄວາມເຫັນດັ່ງກ່າວ, ທ່ານໄດ້ກ່າວເຖິງວິທີສັດຈະວິພາກກ່ຽວກັບການບຳລຸງສ້າງຜູ້ມີຄວາມຮູ້ຄວາມສາມາດ, ທີ່ຈິງແລ້ວ ແມ່ນໄດ້ເວົ້າເຖິງມາດຕະຖານໃນການຈຳແນກຜູ້ມີຄວາມຮູ້ຄວາມສາມາດ. ໃນຄວາມເຫັນດັ່ງກ່າວ, ທ່ານສີຈິ້ນຜິງໄດ້ຍົກໃຫ້ເຫັນສຳນວນບູຮານຈີນຄື “ຄວາມຮູ້ຄວາມສາມາດເປັນສິ່ງຄ້ຳຊູຄຸນສົມບັດ, ຄຸນສົມບັດເປັນສິ່ງບັນຊາຄວາມຮູ້ຄວາມສາມາດ”. ສອງປະໂຫຍກນີ້ມີເຄົ້າເດີມມາຈາກປຶ້ມ “ຈື່ຈື້ທົ່ງຈ້ຽນ. ໂຈ່ວຈີ້” ເຊິ່ງເປັນປຶ້ມປະຫວັດສາດທີ່ຮຽບຮຽງໂດຍທ່ານ ຊືມາກວ່າງ ນັກປະຫວັດສາດທີ່ມີຊື່ສຽງໃນສະໄໝລາຊະວົງຊົ້ງເໜືອຂອງຈີນ （ປີ960—1127）. ສອງປະໂຫຍກດັ່ງກ່າວມີຄວາມໝາຍວ່າ: ຄຸນນະທຳແລະຄຸນສົມບັດເປັນສິ່ງບັນຊາຄວາມຮູ້ຄວາມສາມາດ, ສ່ວນຄວາມຮູ້ຄວາມສາມາດເປັນປັດໄຈຄ້ຳຊູຄຸນສົມບັດ.
ກ່ຽວກັບຄຳບູຮານດັ່ງກ່າວຍັງມີເລື່ອງລາວເລື່ອງໜຶ່ງກ່າວວ່າ: ໃນສະໄໝຊຸນຊິວ(ກ່ອນຄສປີ 770—ກ່ອນຄສ ປີ476) ມີອາມາດທ່ານໜຶ່ງຊື່ວ່າ ຈື້ຊ່ວນວຈື, ລາວໄດ້ເລືອກເອົາຄົນຜູ້ໜຶ່ງຊື່ວ່າ ຈື້ຢາວ ເພື່ອເປັນຜູ້ສືບທອດ ຕະກຸນຈື້, ລາວເຫັນວ່າ ຄົນຜູ້ນີ້ດີເດັ່ນຫຼາຍ. ແຕ່ວ່າ ໃນ ຕະກູນຂອງລາວມີຄົນຄົນໜຶ່ງຊື່ວ່າຈື້ໂກ ພັດໄດ້ຄັດຄ້ານເລື່ອງນີ້ຢ່າງເດັດດ່ຽວ. ຈື້ໂກເຫັນວ່າ ຈື້ຢາວມີຄວາມຮູ້ຄວາມສາມາດໂດດເດັ່ນອີ່ຫຼີ, ມີຈຸດດີ 5 ຢ່າງຄື: ໜຶ່ງ ມີຮ່າງກາຍທັງໃຫຍ່ແລະສູງສະຫງ່າຜ່າເຜີຍ, ມີໜ້າຕາເຈົ້າຊູ້. ສອງ, ມີທັງຄວາມຮູ້ແລະຄວາມສາມາດ. ສາມ, ຊຳນານໃນການຂີ່ມ້າຍິງທະນູ, ສີ່, ກ້າຕັດສິນໃຈຢ່າງເດັດຂາດ. ຫ້າ, ຊ່າງເວົ້າຊ່າງວ່າ. ເມື່ອມີຈຸດດີ 5 ຢ່າງດັ່ງກ່າວ, ໃຜໆກໍຮູ້ດີວ່າ ຄົນຄົນນີ້ເປັນຜູ້ດີເດັ່ນທີ່ສຸດ, ແຕ່ວ່າ ຈື້ໂກເວົ້າວ່າ: ເຖິງວ່າ ຈື້ຢາວມີຈຸດດີໃຫຍ່ໆ 5 ຢ່າງກໍຕາມ, ແຕ່ລາວມີຈຸດອ່ອນໃຫຍ່ໆທີ່ສຸດກໍຄືບໍ່ມີຄວາມເມດຕາກະລຸນາ, ມີຂໍ້ບຸກຜ່ອງໃນດ້ານຄຸນສົມບັດ. ດ້ວຍເຫດນີ້, ຈື້ໂກຈິ່ງຕັກເຕືອນໃຫ້ຈື້ຊ່ວນຈືຮູ້ວ່າ : ຫາກເຈົ້າເລືອກໃຫ້ລາວເປັນຜູ້ສືບທອດ ພາລະກິດຂອງ ຕະກູນຈື້, ຕະກູນເຮົາກໍຈະປະສົບກັບຄວາມຈິບຫາຍວາຍວອດ. ຜົນສຸດທ້າຍກໍຄືດັ່ງທີ່ຈື້ໂກຄາດໄວ້ຫຼະ, ຈື້ຢາວເປັນຄົນໂລບມາກໂລພາບໍ່ມີຄວາມເມດຕາກະລຸນາ. ໃນໄລຍະຕໍ່ມາ, ເຖິງຈະໄດ້ຄຸ້ມຄອງຕະກູນຈື້ກໍຕາມ, ແຕ່ວ່າ ພັດເຮັດໃຫ້ຕະກູນຈື້ຖືກດັບສູນໃນທີ່ສຸດ.
ດ້ວຍເຫດນີ້, ໃນເວລາເລົ່າເລື່ອງດັ່ງກ່າວໃນປຶ້ມ “ໂຈ່ວຈີ້”, ທ່ານຊືມາກວ່າງກໍໄດ້ຍົກຄຳທີ່ວ່າ: “ຄວາມຮູ້ຄວາມສາມາດເປັນສິ່ງຄ້ຳຊູຄຸນສົມບັດ, ຄຸນສົມບັດເປັນສິ່ງບັນຊາຄວາມຮູ້ຄວາມສາມາດ” ເພື່ອເຕືອນໃຈຊາວໂລກ. ເພາະວ່າຫຼາຍໆຄົນມັກຈະຫຼົງເອົາຄວາມສາມາດກັບຄຸນທາດຄຸນສົມບັດປົນແປ ເປັນສິ່ງດຽວກັນໂດຍເຫັນວ່າ ຄົນໆໜຶ່ງຫາກມີຄວາມສາມາດສູງ, ຄຸນສົມບັດຂອງລາວກໍຕ້ອງສູງສົ່ງເຊັ່ນກັນ. ຄວາມຈິງແລ້ວ ສອງຢ່າງດັ່ງກ່າວບໍ່ໄດ້ເປັນເລື່ອງດຽວກັນດອກ, ຄວາມຮູ້ຄວາມສາມາດເປັນສິ່ງສຳຄັນອີ່ຫຼີ, ແຕ່ຄຸນທາດຄຸນສົມບັດຍິ່ງສຳຄັນກວ່ານັ້ນ, ຕ້ອງເຮັດໃຫ້ໄດ້ເຖິງຂັ້ນມີທັງຄວາມຮູ້ຄວາມສາມາດແລະຄຸນສົມບັດ ຂະນະທີ່ຖືຄຸນສົມບັດນຳໜ້າ.
ຊືມາກວ່າງບໍ່ພຽງແຕ່ເປັນນັກປະຫວັດສາດຜູ້ຍິ່ງໃຫຍ່ຂອງຈີນເທົ່ານັ້ນ, ຍັງເປັນນັກການເມືອງທີ່ຍິ່ງໃຫຍ່ອີກດ້ວຍ. ໃນສະໄໝລັດຊະການຢວນໂຢ້ເຊິ່ງມີເຈົ້າຊີວິດຊົ້ງເຈີຈົ່ງເປັນຜູ້ປົກຄອງລາຊະວົງຊົ້ງເໜືອ, ຊືມາກວ່າງໄດ້ດຳລົງຕຳແໜ່ງເປັນອັກຄະເສນາບໍດີ, ເພິ່ນໄດ້ສະເໜີຍົກຕຳແໜ່ງຂອງຜູ້ມີຄວາມຮູ້ຄວາມສາມາດຄົນໜຶ່ງທີ່ຊື່ວ່າ ລິວອ່ານຊື້ ໃຫ້ດຳລົງຕຳແໜງຢູ່ກົມຄຸ້ມຄອງຕຳລາແຫ່ງຊາດ. ພາຍຫຼັງລິວອ່ານຊື້ໄດ້ຮັບການແຕ່ງຕັ້ງໃຫ້ດຳລົງຕຳແໜ່ງແລ້ວ, ທ່ານຊືມາກວ່າງໄດ້ໄປຫາລິວອ່ານຊື້ເພື່ອໂອ້ລົມກັບລາວໂດຍຖາມວ່າ: ເຈົ້າຮູ້ບໍ່ວ່າ ເປັນຫຍັງຂ້ອຍຈິ່ງສະເໜີ ຕຳແໜ່ງໃຫ້ກັບເຈົ້າ? ລິວອ່ານຊື້ຕອບວ່າ:ຂ້າພະເຈົ້າບໍ່ຮູ້, ຂ້າພະເຈົ້າເປັນຄົນຊື່ສັດ, ບໍ່ເຄີຍສວຍໂອກາດຫຼິ້ນເສັ້ນຫຼິ້ນສາຍເພື່ອສະແຫວງຫາຜົນປະໂຫຍດສ່ວນຕົວຜ່ານມາຈັກເທື່ອ. ທ່ານຊືມາກວ່າງບອກວ່າ: ສາເຫດກໍແມ່ນຍ້ອນຂ້ອຍໄດ້ເຫັນເຖິງຈຸດດີຂອງເຈົ້າທີ່ບໍ່ຫຼິ້ນເສັ້ນຫຼິ້ນສາຍນັ້ນແຫຼະ. ຕອນທີ່ຂ້ອຍຖືກລາຊະສຳນັກປົດຕຳແໜ່ງແລ້ວຈຳຕ້ອງຢູ່ເຮືອນລ້າໆ,ເຈົ້າມາຫາຂ້ອຍເລື້ອຍໆເພື່ອຄົ້ນຄວ້າແລະປຶກສາບັນຫານຳຂ້ອຍ. ຫຼັງຈາກຂ້ອຍໄດ້ດຳລົງຕຳແໜ່ງເປັນອັກຄະເສນາບໍດີແລ້ວ, ເຈົ້າບໍ່ໄດ້ຕິດຕໍ່ພົວພັນກັບຂ້ອຍແມ່ນແຕ່ຈົດໝາຍກໍບໍ່ມີຈັກກ້ານ, ຍິ່ງບໍ່ຕ້ອງເວົ້າເຖິງເລື່ອງມາຢາມຂ້ອຍ, ຈາກຈຸດນີ້, ຂ້ອຍຮູ້ດີວ່າ ເຈົ້າເປັນຄົນທີ່ຊື່ກົງມີຄຸນສົມບັດບວກກັບເຈົ້າຍັງມີຄວາມຮູ້ຄວາມສາມາດອີ່ຫຼີ.
ຄຳເຫັນ
0