ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ເນື່ອງໃນໂອກາດວັນຊາວໜຸ່ມຈີນ 4 ພຶດສະພາໃກ້ຈະໝູນວຽນມາເຖິງ, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ປະທານປະເທດຈີນ ປະທານຄະນະກຳມະການການທະຫານສູນກາງຈີນໄດ້ຕາງໜ້າໃຫ້ສູນກາງພັກສົ່ງຄຳອວຍພອນແລະຄວາມຢື້ຢາມຖາມຂ່າວຢ່າງຈິງໃຈເຖິງຊາວໜຸ່ມບັນດາເຜົ່າທົ່ວປະເທດຈີນ. ທ່ານສີຈິ້ນຜິງກ່າວວ່າ: ໄວໜຸ່ມທີ່ມີສີສັນແມ່ນມາຈາກການຝຶກຝົນຫຼໍ່ຫຼອມ, ຊີວິດທີ່ມີຜົນສຳເລັດຫຼາຍກວ່າເກົ່າແມ່ນຍ້ອນການສູ້ຊົນ. ເມື່ອຜະເຊີນໜ້າກັບພະຍາດ ໂຄວິດ-19 ທີ່ເກີດຂຶ້ນຢ່າງກະທັນຫັນ, ຊາວໜຸ່ມບັນດາເຜົ່າທົ່ວປະເທດໄດ້ຕອບສະໜອງກັບຄວາມຮຽກຮ້ອງຂອງພັກ ໄດ້ປະກອບສ່ວນເຂົ້າໃນບັ້ນຮົບທົ່ວປວງຊົນໃນການປ້ອງກັນແລະຄວບຄຸມພະຍາດໂດຍບໍ່ຢ້ານກົວຕໍ່ຄວາມຫຍຸ້ງຍາກແລະຄວາມອັນຕະລາຍ, ຕະລຸມບອນຢູ່ແນວໜ້າ,ອຸທິຕົນຢ່າງສຸດໃຈ ເຊິ່ງໄດ້ສະແດງໃຫ້ເຫັນເຖິງຈິດໃຈທີ່ມີຄວາມຮັບຜິດຊອບຂອງຊາວໜຸ່ມຈີນໃນຍຸກປັດຈຸບັນ, ແລະໄດ້ຮັບການຍ້ອງຍໍຊົມເຊີຍໃນລະດັບສູງຈາກພັກແລະປະຊາຊົນ ,ຂ້າພະເຈົ້າຮູ້ສຶກພາກພູມໃຈຕໍ່ພວກທ່ານ.
ທ່ານສີຈິ້ນຜິງກ່າວເນັ້ນວ່າ, ປີນີ້ແມ່ນປີສຸດທ້າຍໃນການສ້າງສັງຄົມອິ່ມໜຳສຳລານໃຫ້ສຳເລັດຢ່າງຮອບດ້ານ ແລະ ແມ່ນປີສຸດທ້າຍຂອງການເອົາຊະນະ ໃນບັ້ນລຶບລ້າງຄວາມທຸກຍາກ, ທັງແມ່ນປີໜຶ່ງທີ່ເຊື່ອມຕໍ່ເຂົ້າກັບພາລະກິດເພື່ອບັນລຸເປົ້າໝາຍສູ້ຊົນ 100 ປີ ຂອງ2ເຫດການປະຫວັດສາດທີ່ສຳຄັນ. ຊາວໜຸ່ມຈີນໃນຍຸກໃໝ່ຄວນສືບທອດ ແລະ ເສີມຂະຫຍາຍ ນ້ຳໃຈ “4 ພຶດສະພາ”, ຮັກສາອຸດົມການຢ່າງເດັດດ່ຽວ, ຍຶດໝັ້ນຫຼັກໝັ້ນເພື່ອປະຊາຊົນ, ຝຶກຝົນຫຼໍ່ຫຼອມຄວາມສາມາດໃຫ້ເຂັ້ມແຂງ, ປະກອບສ່ວນເຂົ້າໃນພາລະກິດສ້າງສາປະເທດໃຫ້ເຂັ້ມແຂງ, ຮັກສາທ່າບຸກໃນການບຸກບືນສູ້ຊົນດ້ວຍຄວາມທໍລະຫົດອົດທົນຢ່າງສະເໝີຕົ້ນສະເໝີປາຍ, ຮ່ວມກັບປະຊາຊົນ1 ຕື້ກວ່າຄົນ, ສູ້ຊົນຢ່າງກ້າຫານບົນເສັ້ນທາງເຄື່ອນທັບທາງໄກໃນຍຸກໃໝ່ເພື່ອບັນລຸຄວາມໃຝ່ຝັນຂອງຈີນທີ່ຈະຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງປະຊາຊາດຈີນ.
ທ່ານສີຈິ້ນຜິງກ່າວຕື່ມວ່າ, ຄະນະພັກ ອົງການປົກຄອງທຸກຂັ້ນ ພະນັກງານການນຳທຸກຂັ້ນ ກໍຄືທົ່ວສັງຄົມຄວນເອົາໃຈໃສ່ຕໍ່ການເຕີບໃຫຍ່ຂອງຊາວໜຸ່ມ, ສະໜັບສະໜູນຊາວໜຸ່ມອັນໄພສານສ້າງຜົນງານໃຫ້ຫຼາຍກວ່າເກົ່າ. ຄະນະຊາວໜຸ່ມກອມມູນິດຕ້ອງປະຕິບັດໜ້າທີ່ທີ່ມີກຽດສະຫງ່າທີ່ພັກມອບໝາຍໃຫ້, ສາມັກຄີ ແລະ ນຳພາສະມາຊິກຄະນະຊາວໜຸ່ມອັນໄພສານປະກອບສ່ວນຫຼາຍກວ່າເກົ່າເຂົ້າໃນການພັດທະນາພາລະກິດຂອງພັກ ແລະ ລັດໃນຍຸກໃໝ່.
ຄຳເຫັນ
0