ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ພາຍຫຼັງໄດ້ສຳຫຼວດວຽກງານຢູ່ແຂວງຫູເປີຍ,ແຂວງເຈີ້ຈ່ຽງແລະແຂວງສ້ານຊີ່ແຕ່ເດືອນມີນາຫາເດືອນພຶດສະພາປີ 2020ແລ້ວ, ໃນວັນທີ 11 ພຶດສະພາ ປີ2020，ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນໄດ້ເດີນທາງອອກຈາກນະຄອນຫຼວງປັກກິ່ງໄປສຳຫຼວດວຽກງານຢູ່ແຂວງຊ່ານຊີ່ອີກ. ການສຳຫຼວດຄົ້ນຄວ້າວຽກງານຢູ່ 4 ແຂວງຢ່າງລຽນຕິດພາຍໃນໄລຍະເວລາ 2 ເດືອນ, ຖືວ່າເປັນການເດີນທາງອອກຈາກນະຄອນຫຼວງປັກກິ່ງຫລາຍທີ່ສຸດຂອງທ່ານ ສີຈິ້ນຜິງເພື່ອໄປຢ້ຽມຢາມທ້ອງຖິ່ນນັບແຕ່ກອງປະຊຸມໃຫຍ່ຂອງພັກກອມມູນິດຈີນຄັ້ງທີ 19 ເປັນຕົ້ນມາ. ປີນີ້ເປັນປີຂອງການເຊື່ອມຕໍ່ ການບັນລຸເປົ້າໝາຍສູ້ຊົນ “2ເຫດການປະຫວັດສາດສຳຄັນ 100 ປີ”. ໃນຈຸດເວລາອັນສຳຄັນຄືແນວນີ້, ຢູ່ນະຄອນຕ້າທົງ ເຊິ່ງເປັນບ່ອນທຳອິດທີ່ທ່ານສີຈິ້ນຜິງຢ້ຽມຢາມແຂວງຊ່ານຊີ່, ສິ່ງສຳຄັນທີ່ທ່ານເອົາໃຈໃສ່ນັ້ນກໍຄື: ເຮັດແນວໃດເພື່ອສືບທອດພາລະກິດອັນເປັນມູນເຊື້ອທັງເສີມຂະຫຍາຍແລະບຸກເບີກການພັດທະນາໃນຍຸກໃໝ່.
ວັນທີ 11 ພຶດສະພາ,ທ່ານສີຈິ້ນຜິງໄປສຳຫຼວດກວດກາຢູ່ແຫຼ່ງປູກດອກເດລີລີນະຄອນຕ້າທົງ
ແຫຼ່ງປູກດອກເດລີລີ(daylily)ປອດສານພິດຢູ່ເມືອງຢູນໂຈ່ວນະຄອນຕ້າທົງແຂວງຊ່ານຊີ່ ເປັນບ່ອນທຳອິດທີ່ທ່ານສີຈິ້ນຜິງໄປສຳຫຼວດວຽກງານຢູ່ນະຄອນຕ້າທົງ.
ວັນທີ 11 ພຶດສະພາ,ທ່ານສີຈິ້ນຜິງໄປສຳຫຼວດກວດກາຢູ່ແຫຼ່ງປູກດອກເດລີລີນະຄອນຕ້າທົງ
ເມືອງຢູນໂຈ່ວຕັ້ງຢູ່ເຂດທຸກຍາກພິເສດທີ່ຕິດຈອດກັນເປັນບໍລິເວນກວ້າງຂວາງຢູ່ເຂດພູຢ່ຽນຊ່ານ-ພູໄທ້ຫາງ, ເຂດນີ້ມີອາກາດໜາວທີ່ສຸດ,ແຫ້ງແລ້ງ,ດິນບໍ່ ເໝາະສົມກັບການປູກຝັງ , ເຄີຍເປັນເຂດທຸກຍາກທີ່ສຸດທີ່ໃຜໆກໍຮູ້. ສະນັ້ນ, ຄວນຫາວິທີລຶບລ້າງຄວາມທຸກຍາກແບບໃດ? ດອກເດລີລີ ທີ່ມີປະຫວັດສາດການປູກຝັງມາກວ່າ600ປີໄດ້ອວດໂສມສູ່ສາຍຕາຂອງຄົນທັງຫຼາຍ. ດອກເດລີລີມີຈຸດພິເສດທີ່ປູກງ່າຍ,ທົນທານຕໍ່ອາກາດແຫ້ງແລ້ງ ທັງມີຄຸນປະໂຫຍດຫຼາຍຢ່າງເຊັ່ນ: ການແຕ່ງເປັນອາຫານ, ເປັນດອກໄມ້ປະດັບເອ້ແລະອື່ນໆ. ຊຸມປີມໍ່ໆມານີ້, ດອກເດລີລີໄດ້ກາຍເປັນ “ນາງເອກ” ບົນເວທີລຶບລ້າງຄວາມທຸກຍາກໃຫ້ກັບຊາວກະສິກອນ.
ປັດຈຸບັນ, ເນື້ອທີ່ການປູກດອກເດລີລີຂອງເມືອງຢູນໂຈ່ວມີປະມານ 11.333 ເຮັກຕາ, ມູນຄ່າການຜະລິດມີເຖິງ 700 ລ້ານຢວນ.ຄອບຄົວທຸກຍາກ 15.000 ກວ່າຄອບຄົວຂອງທົ່ວນະຄອນຕ້າທົງໄດ້ຫຼຸດພົ້ນອອກຈາກຄວາມທຸກຍາກດ້ວຍການປູກດອກເດລີລີ.ດ້ວຍເຫດນີ້, ດອກເດລີລີຕ້າທົງຈິ່ງໄດ້ຖືກຄັດເລືອກໃຫ້ເປັນໂຕແບບການພັດທະນາອຸດສາຫະກຳ ເພື່ອລຶບລ້າງຄວາມທຸກຍາກຂອງຈີນ.
ຢູ່ແຫຼ່ງປູກດອກເດລີລີ, ທ່ານສີຈິ້ນຜິງໄດ້ຍ່າງເຂົ້າສູ່ບໍລິເວນສວນເພື່ອກວດເບິ່ງສະພາບການເຕີບໃຫຍ່ຂອງດອກເດລີລີ, ເພິ່ນໄດ້ລົມກັບຊາວບ້ານທີ່ກຳລັງເຮັດວຽກຢ່າງສະໜິດສະໜົມ.ຊາວບ້ານທັງຫຼາຍບອກກັບທ່ານສີຈິ້ນຜິງວ່າ: ຊຸມປີມໍ່ໆມານີ້, ພາຍໃຕ້ການຊີ້ນຳນຳພາຂອງວິສາຫະກິດຫຼັກແຫຼ່ງຕົ້ນຕໍ ແລະສະຫະກອນ, ໄດ້ເຮັດໃຫ້ຄຸນນະພາບແລະຜົນຜະລິດຂອງດອກເດລີລີມີຄວາມໝັ້ນຄົງ, ຊ່ອງທາງການຈຳໜ່າຍແລະລາຄາກໍມີການຮັບປະກັນ ເຊິ່ງໄດ້ພາໃຫ້ຄອບຄົວທຸກຍາກຈຳນວນບໍ່ໜ້ອຍສາມາດຫຼຸດພົ້ນອອກຈາກຄວາມທຸກຍາກແລະສ້າງຄວາມຮັ່ງມີຂຶ້ນ. ທ່ານສີຈິ້ນຜິງຟັງແລ້ວກໍຮູ້ສຶກດີໃຈຫຼາຍ,ທ່ານກ່າວວ່າ: “ຕ້ອງພັດທະນາການປູກດອກເດລີລີ ໃຫ້ກາຍເປັນຂະແໜງການທີ່ສາມາດຊ່ວຍປະຊາຊົນຫຼຸດພົ້ນອອກຈາກຄວາມທຸກຍາກແລະສ້າງຄວາມຮັ່ງມີຂຶ້ນ.” ທ່ານສີຈິ້ນຜິງກ່າວວ່າ:“ການປູກດອກເດລີລີແມ່ນຂະແໜງການໃຫຍ່!ຂະແໜງການນີ້ມີອະນາຄົດທີ່ດີ.ຕ້ອງຮັກສາ ແລະພັດທະນາຂະແໜງການນີ້ໃຫ້ດີ, ໃຫ້ກາຍເປັນຂະແໜງການທີ່ດີທີ່ສາມາດສ້າງຄວາມຮັ່ງມີໃຫ້ແກ່ປະຊາຊົນ.”
ທ່ານສີຈິ້ນຜິງເດີນທາງໄປຢ້ຽມຢາມແຂວງຊ່ານຊີ່ຄັ້ງຜ່ານມາແມ່ນເດືອນມິຖຸນາປີ 2017, ເພິ່ນໄດ້ເດີນທາງໄປເຂດພູລວີຫຼຽງ ເຊິ່ງຖືວ່າເປັນການບັນລຸຄວາມມຸ້ງຫວັງຕັ້ງໃຈຢາກຢ້ຽມຢາມເຂດທຸກຍາກທີ່ສຸດທີ່ຕິດຈອດກັນເປັນບໍລິເວນກວ້າງຂວາງ ທັງໝົດ 11 ແຫ່ງຂອງຈີນ. ທ່ານຍັງໄດ້ເປັນປະທານຈັດກອງປະຊຸມສຳມະນາກ່ຽວກັບການລຶບລ້າງຄວາມທຸກຍາກຂອງເຂດທຸກຍາກທີ່ສຸດຢູ່ນະຄອນໄທ້ຢວນ ແຂວງຊ່ານຊີ່. ໃນໄລຍະສຳຫຼວດຄົ້ນຄວ້າວຽກງານຄັ້ງນັ້ນ, ທ່ານສີຈິ້ນຜິງໄດ້ເນັ້ນວ່າ: ການແກ້ໄຂຂອດຫຍຸ້ງຍາກສຸດທ້າຍໃນບັ້ນລຶບລ້າງຄວາມທຸກຍາກຕ້ອງເພີ່ມທະວີການຈັດຕັ້ງປະຕິບັດໃຫ້ເປັນຮູບປະທຳແລະໃຫ້ໄດ້ຮັບປະສິດທິຜົນຕົວຈິງ.
ສຳລັບເທື່ອນີ້, ທ່ານສີຈິ້ນຜິງໄດ້ເດີນທາງໄປຢ້ຽມຢາມແຂວງຊ່ານຊີ່ອີກຄັ້ງ, ເມືອງທຸກຍາກທັງໝົດ 58 ເມືອງຂອງແຂວງຊ່ານຊີ່ໄດ້ຫຼຸດພົ້ນອອກຈາກຄວາມທຸກຍາກໝົດແລ້ວ, ອັດຕາການເກີດຄວາມທຸກຍາກກໍໄດ້ຫຼຸດລົງເຫຼືອບໍ່ເຖິງ 0,1%.ຈຸດສຸມໃນການສຳຫຼວດຄົ້ນຄວ້າຂອງເພິ່ນກໍໄດ້ຫັນມາເປັນການຊອກຮູ້ສະພາບການເສີມຂະຫຍາຍໝາກຜົນແຫ່ງການລຶບລ້າງຄວາມທຸກຍາກໃຫ້ໝັ້ນຄົງ.
ບ່ອນທີສອງທີ່ທ່ານສຳຫຼວດວຽກງານຢູ່ນະຄອນຕ້າທົງແມ່ນບ້ານໃໝ່ຟາງເສິງຂອງຕາແສງຊີ່ຜິງເມືອງຢູນໂຈ່ວ. ເຊິ່ງບ້ານນີ້ແມ່ນເກີດຈາກການຈັດສັນໂດຍລວບລວມເອົາປະຊາກອນຜູ້ທຸກຍາກຂອງສອງບ້ານໃຫ້ຍົກຍ້າຍມາເຕົ້າໂຮມຢູ່ບ້ານໃໝ່ແຫ່ງດຽວ, ເຊິ່ງໄດ້ຍົກຍ້າຍຊາວບ້ານທັງໝົດ 196 ຄອບຄົວ ມີຈຳນວນ 412 ຄົນ, ໃນນີ້, ຄອບຄົວທຸກຍາກ 77 ຄອບຄົວ ມີຈຳນວນ 158 ຄົນ. ພາຍຫຼັງບ້ານໃໝ່ໄດ້ຮັບການສ້າງຕັ້ງຂຶ້ນແລ້ວ, ໄດ້ສຸມໃສ່ພັດທະນາຂະແໜງການຕ່າງໆເຊັ່ນ: ການປູກດອກເດລີລີ, ປ່າເສດຖະກິດ, ພືດພັນທັນຍາຫານສຳຮອງຊະນິດຕ່າງໆ.ນັບມາຮອດທ້າຍປີ2019, ຄອບຄົວທຸກຍາກໃນບ້ານໃໝ່ຟາງເສິງໄດ້ຫຼຸດພົ້ນອອກຈາກຄວາມທຸກຍາກໝົດແລ້ວ.
ວັນທີ 11 ພຶດສະພາ, ທ່ານສີຈິ້ນຜິງຢ້ຽມຢາມເຮືອນຂອງໄບກ່າວສ່ານ
ທ່ານສີຈິ້ນຜິງໄດ້ຍ່າງເຂົ້າໄປໃນເຮືອນຂອງໄບກ່າວສ່ານທີ່ເປັນຊາວບ້ານຂອງບ້ານໃໝ່ຟາງເສິງ, ທ່ານນັ່ງຢູ່ເທິງຕຽງ ແລະ ໄດ້ລົມກ່ຽວກັບ ຊີວິດປະຈຳວັນກັບທຸກຄົນໃນຄອບຄົວຂອງໄບກ່າວສ່ານ. ໄບກ່າວສ່ານໄດ້ເລົ່າ ໃຫ້ທ່ານສີຈິ້ນຜິງຟັງ ດ້ວຍຄວາມຕື່ນເຕັ້ນດີໃຈກ່ຽວກັບການປ່ຽນແປງອັນໃຫຍ່ຫຼວງຂອງຊີວິດຄອບຄົວຕົນນັບຕັ້ງແຕ່ໄດ້ຍົກຍ້າຍຖິ່ນຖານມາທີ່ນີ້ເພື່ອລຶບລ້າງຄວາມທຸກຍາກແລະໄດ້ສະແດງຄວາມຮູ້ບຸນຄຸນຕໍ່ພັກກອມມູນິດຈີນທີ່ໄດ້ເຮັດໃຫ້ຕົນມີຊີວິດການເປັນຢູ່ທີ່ຜາສຸກຄືທຸກມື້ນີ້. ທ່ານສີຈິ້ນຜິງກ່າວວ່າ: ພັກກອມມູນິດຈີນໄດ້ສະແຫວງຫາຄວາມຜາສຸກໃຫ້ແກ່ປະຊາຊົນຢ່າງສຸດອົກສຸດໃຈແລະນຳພາປະຊາຊົນຊອກຫາຊ່ອງທາງສ້າງຄວາມຮັ່ງມີຂຶ້ນ.
ທ່ານສີຈິ້ນຜິງໄປສຳຫຼວດວຽກງານຢູ່ແຂວງຊ່ານຊີ່ເມື່ອສາມປີກ່ອນນີ້, ທ່ານເຄີຍໄປຢ້ຽມຢາມບ້ານຊົ້ງເຈ່ຍໂກ່ວໃໝ່ ເມືອງເຂີລານ ເຊິ່ງເປັນບ່ອນຈັດສັນຍົກຍ້າຍຖິ່ນຖານໃຫ້ກັບຄອບຄົວທຸກຍາກເພື່ອລຶບລ້າງຄວາມທຸກຍາກ. ໃນເວລານັ້ນ, ທ່ານສີຈິ້ນຜິງກ່າວວ່າ: ການຍົກຍ້າຍຖິ່ນຖານໃຫ້ປະຊາຊົນໝົດທົ່ວບ້ານຕ້ອງແກ້ໄຂບັນຫາຕ່າງໆຢ່າງລະອຽດເປັນຕົ້ນແມ່ນ ຈະຍົກຍ້າຍໄປບ່ອນໃດ,ຫ້າງຫາເງິນທຶນແນວໃດ, ຈັດສັນພື້ນທີ່ຢູ່ບ່ອນໃດ,ປຸກເຮືອນແນວໃດ?ປະຊາຊົນຈະສາມາດສ້າງລາຍຮັບເພີ່ມຂຶ້ນໄດ້ແນວໃດ,ປົກປ້ອງສິ່ງແວລດ້ອມນິເວດແນວໃດ, ບ້ານໃໝ່ຄວນຄຸ້ມຄອງແນວໃດ? ບັນຫາເຫຼົ່ານີ້ເປັນແຜນພັດທະນານ້ອຍສະເພາະຂອງປະຊາຊົນ ທັງເປັນແຜນພັດທະນາໃຫຍ່ຂອງລັດອີກດ້ວຍ.
ການປະຕິບັດງານດ້ວຍຄວາມສຸຂຸມຮອບຄອບຢ່າງສະເໝີຕົ້ນສະເໝີປາຍ, ການເອົາໃຈໃສ່ຕໍ່ແຜນພັດທະນາຍາວນານຂອງປະຊາຊົນໃນອະນາຄົດ, ການສືບທອດພາລະກິດອັນເປັນມູນເຊື້ອທັງເສີມຂະຫຍາຍແລະ ບຸກເບີກພັດທະນາໃນຍຸກໃໝ່,ເພື່ອເຮັດໃຫ້ຊີວິດການເປັນຢູ່ຂອງປະຊາຊົນນັບມື້ນັບດີຂຶ້ນຢ່າງແທ້ຈິງ. ທັງໝົດນີ້ຄືເລື່ອງໃຫຍ່ທີ່ທ່ານສີຈິ້ນຜິງໄດ້ເອົາໃຈໃສ່ຢ່າງສະເໝີຕົ້ນສະເໝີປາຍ. ໃນເວລາສຳຫຼວດຄົ້ນຄວ້າວຽກງານຢູ່ແຂວງສ້ານຊີ່ໃນເດືອນຜ່ານມາ, ທ່ານສີຈິ້ນຜິງກ່າວວ່າ: ການລຶບລ້າງຄວາມທຸກຍາກບໍ່ແມ່ນຈຸດສິ້ນສຸດ,ແຕ່ເປັນຈຸດເລີ່ມຕົ້ນໃໝ່ຂອງຊີວິດໃໝ່ແລະການບຸກບືນສູ້ຊົນຄັ້ງໃໝ່, ໃນໄລຍະຕໍ່ໄປ ຕ້ອງສຸມຄວາມພະຍາຍາມເຂົ້າໃນການພັດທະນາຊົນນະບົດໃຫ້ຈະເລີນຮຸ່ງເຮືອງ. ວັນທີ 27 ມີນາປີນີ້, ທ່ານສີຈິ້ນຜິງໄດ້ເປັນປະທານຈັດກອງປະຊຸມຄະນະປະຈຳກົມການເມືອງສູນກາງພັກອມມູນິດຈີນໂດຍໄດ້ກຳນົດວ່າ: ຕ້ອງຄົ້ນຄວ້າເພື່ອເຮັດວຽກການເຊື່ອມຕໍ່ວຽກງານລຶບລ້າງຄວາມທຸກຍາກຂັ້ນສຸດທ້າຍກັບຍຸດທະສາດການພັດທະນາຊົນນະບົດໃຫ້ຈະເລີນຮຸ່ງເຮືອງແລະແຜນພັດທະນາເສດຖະກິດສັງຄົມແຫ່ງຊາດ5 ປີຄັ້ງທີ 14. ສູ້ຊົນບັນລຸເປົ້າໝາຍນີ້ແລ້ວມຸ້ງໜ້າສູ່ເປົ້າໝາຍໃໝ່ປານແລ່ນຕໍ່ໄມ້, ນີ້ຄືທ່າແຮງຂອງຈີນໃນການບໍລິຫານປະເທດ.
ຄຳເຫັນ
0