ວັນ​ທີ 21 ພຶດສະພາ​ນີ້, ກອງ​ປະຊຸມ​ສອງ​ສະພາ(ກອງ​ປະຊຸມ​ຄັ້ງ​ທີ 3 ຂອງ​ສະພາ​​ປະຊາຊົນ​ແຫ່ງ​ຊາດ​ຈີນ​ສະ​ໄໝ​ທີ 13 ​ແລະກອງ​ປະຊຸມ​ຄັ້ງ​ທີ 3 ຂອງ​ສະພາປຶກສາ​ການ​ເມືອງປະ​ຊາ​ຊົນແຫ່ງ​ຊາດ​ຈີນ​ສະ​ໄໝ​ທີ 13 )​ຈະຈັດ​ຂຶ້ນ​ຢູ່​ນະຄອນຫຼວງປັກ​ກິ່ງ. ກອງ​ປະຊຸມ​ສອງ​ສະພາ​ໃນ​ປີ​ນີ້​ໄດ້​ຈັດ​ຂຶ້ນ​ໃນ​ໄລຍະ​ພິ​ເສດ,​ແນ່ນອນ​ແລ້ວ​ກໍ​ມີ​ຄວາມ​ໝາຍ​ພິ​ເສດ. ທ່ານ​ສີ​ຈິ້ນ​ຜິ​ງ​ເຄີຍ​ປະກອບ​ຄຳ​ເຫັນ​ທີ່​ສຳຄັນ​ໃນ​ກອງ​ປະຊຸມ​ສອງ​ສະພາ​ໃນຫຼາຍ​ປີຜ່ານມາ, ເຊິ່ງ​ມີເນື້ອ​ໃນ​ຈິດ​ໃຈ​ອັນ​ດຽວ​ກັນ​​ກັບ​ຄຳ​ເຫັນ​ສຳຄັນ​ຕ່າງໆ​​​ຂອງ​ທ່ານ​ສີ​ຈິ້ນ​ຜິງ​ທີ່​ກ່າວໃນ​ໄລ​ຍະ​ທີ່​ທ່ານ​ບັນຊາ​ການ​ໃນບັ້ນ​ຮົບ​ຕ້ານ​ກັບ​ພະຍາດ​ໂຄ​ວິດ-19,​ໃນ​ນັ້ນ​,​ເນື້ອ​ໃນ​ສຳ​ຄັນຂອງ​ຄຳ​ເຫັນ​ເຫຼົ່າ​​ນັ້ນຄື: ທັດສະນະ​ທີ່​ຖື​ປະຊາຊົນ​ສຳຄັນ​ກວ່າ​ໝູ່.

 

ປີ 2020 ​ແມ່ນ​ປີ​ໜຶ່ງ​ທີ່​ບໍ່​ທຳ​ມະ​ດາ, ພະຍາດ​ໂຄ​ວິດ-19 ທີ່​​ເກີດ​ຂຶ້ນ​ຢ່າງ​ກະທັນຫັນ​ໄດ້​ແຜ່​ລະບາດ​ຢູ່​ຫຼາຍ​ປະ​ເທດ, ບໍ່​ພຽງ​ແຕ່​ເປັນ​ໄພ​ຂົ່ມຂູ່​ທີ່​ໜັກໜ່ວງ​ຕໍ່​ຄວາມ​ປອດ​ໄພ​ດ້ານ​ຊີວິດ ​ແລະ ສຸຂະພາບ​ຮ່າງກາຍ​ຂອງ​ມວນ​ມະນຸດ​ເທົ່າ​ນັ້ນ, ​ແຕ່​ຍັງ​ເປັນ​ສິ່ງ​ທົດ​ສອບ​ທີ່​ຂ້ຽວຂາດ​ຕໍ່​ທັດສະນະບໍ​ລິ​ຫານ ລະບົບ​ບໍ​ລິ​ຫານ​ແລະ ຄວາມ​ສາມາດ​ໃນການ​ບໍ​ລິ​ຫານ​ປະ​ເທດຂອງ​ບັນດາ​ປະ​ເທດ​ໃນ​ໂລກ.

 

​ໃນ​ບັ້ນ​ປ້ອງກັນ ​ແລະ ຄວບ​ຄຸມພະ​ຍາດ​ຄັ້ງ​ນີ້, ທ່ານ​ສີ​ຈິ້ນ​ຜິ​ງ​ໄດ້​ບັນຊາ​ການ​ແລະ ວາງ​ແຜນ​ການດ້ວຍ​ຕົນ​ເອງ,​ໂດຍ​ໄດ້​ເຄື່ອນ​ໄຫວ​ເຮັດ​ວຽກ​ຕາມ​ວາ​ລະຖີ່​ເຂົ້າ​ກວ່າ​ປົກ​ກະ​ຕິດ້ວຍ​ຈັງຫວະ​ວ່ອງ​ໄວ​ກວ່າປົກ​ກະ​ຕິ. ທ່ານ​ໄດ້​ເປັນ​ປະທານ​ຈັດ ຫຼື​ເຂົ້າ​ຮ່ວມ​ກອງ​ປະຊຸມ​ຄະນະ​ປະຈຳ​ກົມ​ການ​ເມືອງ​ສູນ​ກາງ​ພັກ​ກອມ​ມູນິດ​ຈີນ 14 ​ເທື່ອ, ກອງ​ປະຊຸມ​ກົມ​ການ​ເມືອງ​ສູນ​ກາງ​ພັກ​ກອມ​ມູນິດ​ຈີນ 4 ​ເທື່ອ,​ເດີນທາງໄປ​ສຳ​ຫຼວດວຽກ​ງານ​ຢູ່​ທ້ອງ​ຖິ່ນ 6 ​ເທື່ອ, ສົນທະນາ​ກັບ​ຜູ້ນຳ​ຕ່າງປະ​ເທດ ຫຼື ຜູ້​ຮັບຜິດຊອບ​ອົງການ​ຈັດ​ຕັ້ງ​ສາກົນ​ທາງ​ໂທລະສັບ 51 ​ເທື່ອ. ທ່ານ​ໄດ້​ກ່າວ​ເນັ້ນ​ມາ​ຫຼາຍ​ເທື່ອ​ແລ້ວ​ວ່າ: “ຖື​​ເອົາ​ຄວາມ​ປອດ​ໄພ​ດ້ານ​ຊີ​ວິດ​ແລະ​ສຸຂະພາບ​ຮ່າງກາຍ​ຂອງ​ປະຊາຊົນສຳ​ຄັນ​ກວ່າ​ໝູ່” “ຊີວິດ​ສູງກວ່າ​ພູຜາ, ການ​ຕ້ານ​ກັບ​ພະຍາດ​​ຄືຄຳ​ສັ່ງ​ເດັດ​ຂາດ, ການ​ປ້ອງ​ກັນ ​ແລະ​ຄວບ​ຄຸມພະ​ຍາດ​​ຄື​ຄວາມ​ຮັບຜິດຊອບ.”
 

ຄຽງ​ຄູ່​ກັບ​ການ​ປ່ຽນ​ແປງ​ຂອງ​ສະພາບ​ການ​ປ້ອງ​ກັນ​ແລະ ຄວບ​ຄຸມພະ​ຍາດ​ທັງ​ພາຍ​ໃນ ​ແລະ ຕ່າງປະ​ເທດ, ທ່ານ​ສີ​ຈິ້ນ​ຜິ​ງ​ໄດ້​ຊີ້​ນຳ​ການປ້ອງ​ກັນ ຄວບ​ຄຸມພະ​ຍາດ​ແລະ ການພັດທະນາ​ເສດຖະກິດ​-ສັງຄົມ​ໄປ​ພ້ອມ​ໆກັນ​ຕາມ​ຄວາມ​ເໝາະ​ສົມ.​ແລະ​ໄດ້​ພິຈາລະນາ​ຢູ່​ຕະຫຼອດ​ວ່າ​​: ຄວນໃຊ້​ທຸກ​ວິທີ​ເພື່ອຫຼຸດຜ່ອນ​ຜົນ​ກະທົບ​ທີ່ມີຕໍ່​ປະຊາຊົນ​ໃຫ້ໜ້ອຍ​ລົງ​ເທົ່າ​ທີ່​ຈະ​ໜ້ອຍ​ໄດ້.
 

​ໃນ 7 ປີຜ່ານມາ,​ໃນ​ໄລ​ຍະກອງ​ປະຊຸມ​ສອງ​ສະພາ​ໃນ​ແຕ່​ລະ​ປີ, ທ່ານ​ສີ​ຈິ້ນຜິ​ງ​ໄດ້​ແລກປ່ຽນ​ຄຳ​ຄິດ​ຄຳ​ເຫັນ​ຢ່າງ​ສະໜິດ​ສະໜົມ​ກັບ​ຄະນະ​ຜູ້​ແທນ​ສະພາ​ປະຊາຊົນ​ແຫ່ງ​ຊາດ. ຈາກ​ເລື່ອງ​ການ​ພັດທະນາ​ເສດຖະກິດ​-ສັງຄົມ ຈົນຮອດບັນຫາ​ປີກຍ່ອຍທີ່​ຢູ່​ໃກ້​ໂຕປະຊາຊົນ, ທ່ານ​ສີ​ຈິ້ນ​ຜິ​ງ​ໄດ້​ໃຫ້​ຄວາມ​ສຳຄັນຢ່າງ​ສູງ, ​ຖາມຢ່າງ​ລະອຽດ ​ແລະ ຈື່​ຈຳໄດ້​ດີໃນ​ທຸກ​ສິ່ງຢ່າງ​ທີ່ກ່ຽວຂ້ອງກັບປະຊາຊົນ.

 

ທ່ານ​ເຄີຍ​ເອົາ​ໃຈ​ໃສ່​ເລື່ອງ​ສ້າງ​ຄອບຄົວ​ຂອງ​ຄົນ​ໂສດ​ຢູ່​ບ້ານ​ສິບ​ແປດ​ຖ້ຳ​ແຂວງ​ຫູ​ນານ, ​ບັນຫາສ້ອມແປງ​ຫ້ອງ​ນໍ້າ​ຢູ່​ໃນ​ເຮືອນ​ຊາວບ້ານ, ທ່ານ​ຍັງ​ເຄີ​ຍກ່າວ​ ເປັນ​ພິ​ເສດ​ວ່າ:​ເມື່ອ​ເຫັນ​ວ່າ​ຊາວບ້ານ​ແລະ ​ເດັກນ້ອຍ​ຢູ່ “ບ້ານ​​​ໜ້າ​ຜາ”ຢູ່​ກິ່ງ​ແຂວງ​ລຽງ​​ຊ່າ​ນ​ແຂວງ​ເສ​ສວນ​ເວ​ລາ​ເຂົ້າ​ອອກ​ບ້ານ​ແມ່ນຕ້ອງ​ປີນຂຶ້ນ​ຕາມໜ້າຜາດ້ວຍເສັ້ນ​ຫວາຍ​ມາ​ຫຼາຍ​ປີ ​ເຊິ່ງເປັນການສ່ຽງຕໍ່ຄວາມປອດໄພ, ​ທ່ານຮູ້ສຶກ​ເປັນ​ຫ່ວງ​ເປັນ​ໃຍ​ຫຼາຍ.​ເມື່ອໄດ້​ຮັບຮູ້​ຂໍ້​ມູນ​ວ່າ​:ຢູ່​ທ້ອງ​ຖິ່ນແຫ່ງ​ນັ້ນ​ໄດ້​ສ້າງ​ຂັ້ນ​ໄດ​ເຫຼັກ​ປ່ຽນແທນເສັ້ນຫວາຍແລ້ວ, ທ່ານຈຶ່ງຮູ້ສຶກໂລ່ງໃຈ​ລົງ​ໜ້ອຍ​ໜຶ່ງ.

 

ທ່ານ​ສີ​ຈິ້ນ​ຜິ​ງ​ໄດ້​ກ່າວ​ເນັ້ນມາ​​ໂດຍ​ຕະຫຼອດ​ວ່າ: ຜູ້​ທີ່​ໃຫ້​ກຳລັງໃຈ​ແລະ ຄວາມ​ໝັ້ນ​ໃຈ​ແກ່​ພວກ​ເຮົາ​ນັ້ນ​ກໍຄືປະຊາຊົນ​ຈີນ.​ໃນ​ກອງ​ປະຊຸມ​ສອງ​ສະພາ​ປີຜ່ານມາ, ທ່ານ​ສີ​ຈິ້ນ​ຜິ​ງ​ໄດ້​ໃຊ້​ຄຳ​ກອນ​ບູຮານ​ທີ່​ວ່າ “ຄຸດບິນ​ສູງ​ໄດ້ ບໍ່​ແມ່ນ​ຍ້ອນວ່າມີຂົນເບົາອັນດຽວ; ​ມ້າ​ແລ່ນ​ໄວໄດ້ ບໍ່​ແມ່ນ​ຍ້ອນວ່າມີ​ກຳລັງ​ພຽງຕີນ​ດຽວ”,​ເຊິ່ງ​ທ່ານ​ສີ​ຈິ້ນ​ຜິງ​ໄດ້​ນຳ​ໃຊ້​ຄຳກອນ​ນີ້​ມາ​ບັນ​​ຍາຍ​ເຫດຜົນ​ທີ່ວ່າ “ຕ້ອງ​ອາ​ໄສ​ປະຊາຊົນ​ຢ່າງ​ໃກ້ຊິດ”. ​ໃນ​ເດືອນ​ເມສາ​ປີ​ນີ້,​ໃນ​ເວລາ​ໄປ​ສຳ​ຫຼວດວຽກງານ​ຢູ່​ແຂວງ​ສ້າ​ນຊີ່, ທ່ານ​ສີ​ຈິ້ນ​ຜິ​ງ​ໄດ້​ກ່າວ​ເນັ້ນ​ອີກ​​ເທື່ອ​ໜຶ່ງ​ວ່າ: ຕ້ອງ​ຍຶດໝັ້ນໃນ​ແນວ​​ຄິດ​ການພັດທະນາ​ທີ່​ຖື​ປະຊາຊົນ​​ເປັນ​ໃຈກາງ,​ເຮັດ​ແທ້​ທຳ​ຈິງ​ເພື່ອ​ສ້າງ​ຜົນ​ປະ​ໂຫຍ​ດ​ໃຫ້​ແກ່​ປະຊາຊົນ.
 

 

 ປີ 2014, ທ່ານ​ສີ​ຈິ້ນ​ຜິງເຂົ້າ​ຮ່ວມ​ການ​ປຶກສາ​ຫາລື​ກັບ​ຄະນະ​ຜູ້​ແທນ​ແຂວງ​ກຸ້ຍ​ໂຈ່​ວໃນ​ກອງ​ປະຊຸມ​ຄັ້ງ​ທີ 2 ຂອງ​ສະພາ​ຜູ້​ແທນ​ປະຊາຊົນ​ແຫ່ງ​ຊາດ​ຈີນ​ສະ​ໄໝ​ທີ 12

​ໃນ​​ໃຈ​ຂອງ​ທ່ານ​ສີ​ຈິ້ນ​ຜິ​ງ, ປະຊາຊົນຄື ​ຟ້າ​ແລະ ​​ແຜ່ນດິນ. ປີ 2014, ​ໃນ​ເວລາ​ເຂົ້າ​ຮ່ວມ​ການ​ປຶກສາ​ຫາລື​ກັບ​ຄະນະ​ຜູ້​ແທນ​ແຂວງ​ກຸ້ຍ​ໂຈ່​ວໃນ​ກອງ​ປະຊຸມ​ຄັ້ງ​ທີ 2 ຂອງ​ສະພາ​ຜູ້​ແທນ​ປະຊາຊົນ​ແຫ່ງ​ຊາດ​ຈີນ​ສະ​ໄໝ​ທີ 12, ທ່ານ​ສີ​ຈິ້ນ​ຜິ​ງ​ໄດ້​ຫວນຄືນ​ເຖິງ​ວັນ​ເວລາ​ທີ່​ລົງ​​ພື້ນຖານ​ຢູ່​ຊົນນະບົດ. ທ່ານ​ກ່າວ​ວ່າ: “ຂ້າພ​ະ​ເຈົ້າ​ມີ​ສາຍສຳພັນ​ແບບ​ທຳ​ມະ​ຊາດ​ກັບ​ປະຊາຊົນ​ຜູ້​ທຸກ​ຍາກ”. ​ໃນ​ຫຼາຍ​ປີຜ່ານມາ, ທ່ານ​ສີ​ຈິ້ນ​ຜິ​ງ​ໄດ້​ໄປ​ສຳ​ຫຼວດເຂດ​ທຸກ​ຍາກ​ທີ່​ສຸດ​ແບບ​ຕິດ​ຈອດ​ກັນ​ເປັນ​ບໍ​ລິ​ເວນກວ້າງ ທັງ​ໝົດ ​14 ແຫ່ງໃນ​ທົ່ວ​ປະ​ເທດ, ຊອກ​ຮູ້​ສະພາບ​ຄວາມ​ເປັນ​ຈິງ​ແລະ ຮັບ​ຟັງສຽງ​ຮຽກຮ້ອງ​ຂອງ​ປະຊາຊົນ​ດ້ວຍ​ຄວາມ​ຈິງ​ໃຈ.​ການ​ເຮັດ​ໃຫ້​ປະຊາຊົນ​ຜູ້​ທຸກ​ຍາກ​ຫຼຸດ​ພົ້ນ​ອອກ​ຈາກ​ຄວາມທຸກ​ຍາກ, ​ແມ່ນ​ສິ່ງ​ທີ່​ທ່ານ​ສີ​ຈິ້ນຜິ​ງ​ເອົາ​ໃຈ​ໃສ່​ທີ່​ສຸດ. ທ່ານ​ໄດ້​ບັນຊາ​ການ ​ແລະ​ຕິດຕາມ​ກວດກາ​ວຽກ​ງານ​ລຶບລ້າງ​ຄວາມທຸກ​ຍາກ. ​ໃນ​ກອງ​ປະຊຸມ​ສອງ​ສະພາ​ທຸກ​ປີ​ນັບ​ແຕ່​ກອງ​ປະຊຸມ​ໃຫຍ່​ ຂອງ​ພັກ​ກອມ​ມູນິດ​ຈີນຄັ້ງທີ 18 ​ເປັນ​ຕົ້ນ​ມາ, ທ່ານ​ໄດ້​ເນັ້ນ​ເຖິງ​ວຽກ​ງານ​ລຶບລ້າງ​ຄວາມທຸກ​ຍາກ​ຊ້ຳແລ້ວຊ້ຳ​ອີກ.
 

 

 ປີ 2014, ທ່ານ​ສີ​ຈິ້ນ​ຜິງເຂົ້າ​ຮ່ວມ​ການ​ປຶກສາ​ຫາລື​ກັບ​ຄະນະ​ຜູ້​ແທນ​ແຂວງ​ກຸ້ຍ​ໂຈ່​ວໃນ​ກອງ​ປະຊຸມ​ຄັ້ງ​ທີ 2 ຂອງ​ສະພາ​ຜູ້​ແທນ​ປະຊາຊົນ​ແຫ່ງ​ຊາດ​ຈີນ​ສະ​ໄໝ​ທີ 12

ຂໍ້​ມູນ​ສະ​ແດງ​ໃຫ້​ເຫັນ​ວ່າ: ປະຊາກອນ​ຜູ້​ທຸກ​ຍາກ​ຂອງ​ຈີນ​ໄດ້​ຫລຸດລົງຈາກ98,99ລ້ານ​ຄົນ​ເມື່ອ​ທ້າຍ​ປີ 2012 ຍັງເຫລືອ 5,51 ລ້ານ​ຄົນ​ເມື່ອ​ທ້າຍ​ປີ 2019, ອັດຕາ​ການ​ເກີດ​ຄວາມທຸກ​ຍາກ​ໄດ້​ຫລຸດລົງຈາກ 10,2% ຍັງເຫລືອ 0,6% ,​ຈຳນວນ​ຜູ້​ທຸກ​ຍາກ​ໄດ້​ຫຼຸດ​ລົງໃນຈຳນວນ 10 ລ້ານ​ຄົນ​ຂຶ້ນ​​ໄປຕໍ່​ປີ ເຊິ່ງ​ເປັນ​7 ປີ​ລຽນຕິດ.

 

ປີ​ນີ້ຄື​ປີ​ສຸດ​ທ້າຍ​ຂອງ​ບັ້ນ​ລຶບລ້າງ​ຄວາມທຸກ​ຍາກ ທັງແມ່ນປີທີ່​ໄດ້ຮັບ​ຜົນ​ກະທົບ​ຈາກ​ພະຍາດ​ໂຄ​ວິດ-19.​ໃນ​ເວລາ​ທີ່​ຕ້ານ​ກັບ​ພະຍາດ, ທ່ານ​ສີ​ຈິ້ນ​ຜິ​ງກໍ​ບໍ່​ໄດ້​ລະເລີຍ​ການວາງ​ແຜນການ​ທີ່ເຂັ້ມ​ແຂງ​​​ໃນ​ວຽກ​ງານ​ລຶບລ້າງ​ຄວາມທຸກ​ຍາກ.
 

​ໃນ​ຕົ້ນ​ເດືອນ​ມີນາ​ປີ​ນີ້,​ໃນ​ກອງ​ປະຊຸມສຳ​ມະ​ນາ​ກ່ຽວ​ກັບ​ການສູ້​ຊົນ​ເອົາ​ຊະນະ​ໃນ​ບັ້ນ​ລຶບລ້າງ​ຄວາມທຸກ​ຍາກໄລຍະ​ສຸດ​ທ້າຍ, ທ່າ​ນສີ​ຈິ້ນ​ຜິ​ງ​ໄດ້​ເນັ້ນໃຫ້​ເລັ່ງ​ເວລາ, ຮຽກຮ້ອງ​ໃຫ້​ມີການ “ປຸກລະດົມ​ອີກຄັ້ງ​ໃໝ່​ແລະ ວາງ​ແຜນ​ການຄັ້ງ​ໃໝ່” ​ໃນ​ການ​ລຶບລ້າງ​ຄວາມທຸກ​ຍາກ.
 

​ແຕ່​ວັນ​ທີ 20 ຫາ 23 ​ເມສາ ປີ​ນີ້, ​ໃນ​ເວລາ​ໄປ​ສຳ​ຫຼວດວຽກ​ງານ​ຢູ່​ແຂວງ​ສ້ານຊີ່, ທ່ານ​ສີ​ຈິ້ນ​ຜິ​ງ​ໄດ້​ເດີນທາງໄປເຂດ​ພູດ​ອຍທີ່​ທຸກ​ຍາກ, ທ່ານ​ສົນ​ໃຈ​ທີ່​ສຸດ​ກ່ຽວ​ກັບ​ບັນຫາ​ການ​ຊ່ວຍ​ເຫຼືອ​ຜູ້​ທຸກ​ຍາກ​ຫຼັງ​ຫຼຸດ​ພົ້ນ​ອອກ​ຈາກຄວາມທຸກ​ຍາກ​ວ່າ​ຈະສາມາດ​ສ້າງ​ເປັນ​ກົນ​ໄກ​ແບບ​ໝັ້ນຄົງ​ແລະ​ຍືນ​ຍົງໄດ້​ຫຼື​ບໍ່; ​ແຕ່​ວັນ​ທີ 11 ຫາ 12 ພຶດສະພາ​ປີ​ນີ້, ທ່ານ​ສີຈິ້ນ​ຜິ​ງໄດ້​ໄປ​ສຳ​ຫຼວດວຽກ​ງານ​ຢູ່​ແຂວງ​ສ່າ​ນຊີ່, ບ່ອນ​ທຳ​ອິດ​ແມ່ນໄປ​ສຳ​ຫຼວດວຽກ​ງານ​ລຶບລ້າງ​ຄວາມທຸກ​ຍາກໂລດ, ທ່ານ​ສົນ​ໃຈ​ທີ່​ສຸດ​ກ່ຽວ​ກັບ​ບັນຫາ “​ເຮັດ​​ແນວ​ໃດ​ຈຶ່ງຈະ​ສາມາດ​ປັບປຸງ​ໝາກຜົນການ​ລຶບລ້າງ​ຄວາມທຸກ​ຍາກ​ໃຫ້​ໝັ້ນ​ຄົງ, ປ້ອງ​ກັນ​ບໍ່​ໃຫ້​ກັບ​ຄືນ​ສູ່​ສະພາບ​ທຸກ​ຍາກຄືເກົ່າ, ຮັບປະກັນ​ໃຫ້​ປະຊາຊົນ​ມີ​ລາຍ​ຮັບ​ເພີ່ມ​ຂຶ້ນ​ຢ່າງ​ຕໍ່​ເນື່ອງ.”
 

ທ່ານ​ກ່າວ​ເນັ້ນ​ວ່າ: ການ​ຫຼຸດ​ພົ້ນ​ອອກ​ຈາກ​ຄວາມທຸກ​ຍາກ​ບໍ່​ແມ່ນ​ຈຸດ​ສິ້ນ​ສຸດ, ​ແຕ່​ແມ່ນຈຸດ​ເລີ່​ມຕົ້ນ​ຂອງ​ຊີວິດ​ໃໝ່​ແລະ ບັ້ນ​ສູ້​ຊົນ​ໃໝ່. ພີ່​ນ້ອງ​ປະຊາ​ຊົນ​ຈະ​ມີ​ຊີວິດ​ການ​ເປັນ​ຢູ່​ທີ່​ດີ​ຂຶ້ນ​ເລື້ອຍໆ,​ມີຊີວິດທີ່ດີກວ່າເກົ່າ​ໃນ​ອະນາຄົດ.
 

ການຖື​ປະຊາຊົນ​ສຳຄັນ​ກວ່າ​ໝູ່,​ແມ່ນ​ຄະຕິ​ເຕືອນ​ໃຈ​ດ້ານ​ການ​ບໍ​ລິ​ຫານ​ປະ​ເທດ​ທີ່​ທ່ານ​ສີ​ຈິ້ນ​ຜິ​ງຈື່ຈຳ​ໄວ້​ຢູ່​ສະ​ເໝີ. ນັບ​ແຕ່​​ເກີດ​ການ​ແຜ່​ລະບາດ​ຂອງ​ພະຍາດ​ເປັນ​ຕົ້ນ​ມາ, ທ່ານ​ສີ​ຈິ້ນ​ຜິ​ງ​ໄດ້​ສະເໜີຂໍ້ຮຽກຮ້ອງ​ຕໍ່​ພະນັກງາ​ນການ​ນຳ​ມາ​ຫຼາຍ​ເທື່ອ​ແລ້ວ​ວ່າ: ຕ້ອງ​ເປັນ​ເຈົ້າ​ການ​ແບກ​ຫາບ​ຄວາມ​ຮັບຜິ​ດຊອບ, ຕັ້ງໜ້າ​ສ້າງ​ຜົນງານ​ທີ່​ດີ,​ເປັນ​ຜູ້​ຮູ້​ໃຈ​​ປະຊາຊົນ, ​ແກ້​ໄຂ​ບັນຫາ​ທີ່​ປະຊາຊົນປາ​ຖະ​ໜາ​ຢາກ​ໃຫ້​ແກ້​ໄຂ​​ໃຫ້ທັນ​ເວລາ. ທ່ານ​ກ່າວ​ເນັ້ນ​ວ່າ, ຕ້ອງ​ກ້າ​ຕຸ​ລຸມບອນ​ໃນ​ຈຸດ​ເວ​ລາ​ອັນ​ສຳ​ຄັນ, ຕ້ອງ​ຍອມ​ເສຍສະຫຼະ​ໃນ​ຂະນະ​ທີ່​ພົບ​ພໍ້​ຄວາມ​ອັນຕະລາຍ, ຈຶ່ງ​ແມ່ນຊາວ​ພັກ​ກອມ​ມູນິດ​ທີ່​ແທ້​ຈິງ.
 

ປີ 2020, ​ແມ່ນ​ປີ​ສຸດ​ທ້າຍ​ຂອງ​ການ​ສ້າງສັງຄົມທີ່​ອິ່ມ​ໜໍາ​ສຳລານ​ໃຫ້​ສຳ​ເລັດ​ຢ່າງຮອບດ້ານ ​ແລະ ການ​ປະຕິບັດ​ແຜນການ​ພັດທະນາ​ເສດຖະກິດ-​ສັງຄົມ 5 ປີ ຄັ້ງ​ທີ 13. ​ໃນ​ເວລາ​ສຳ​ຫຼວດວຽກ​ງານ​ຢູ່​ແຂວງ​​ຊ່າ​ນຊີ່, ທ່ານ​ສີ​ຈິ້ນ​ຜິ​ງ​ໄດ້​ກ່າວ​ເນັ້ນ​ອີກ​ເທື່ອ​ໜຶ່ງ​ວ່າ: “ພັກ​ກອມ​ມູນິດ​ຈີນ​ຖື​ເອົາ​ການ​ເຮັດ​ວຽກ​ເພື່ອ​ປະຊາຊົນ ສ້າງ​ຜົນ​ປະ​ໂຫຍ​ດ​ໃຫ້​ແກ່​ປະຊາຊົນ​ເປັນ​ຜົນງານ​ສຳຄັນ​ທີ່​ສຸດ, ຖື​ເອົາ​ການ​ເຮັດ​ວຽກ​ຕົວ​ຈິງ​ໃຫ້ຫລາຍ​ແລະ ສ້າງ​ຜົນ​ປະ​ໂຫຍ​ດ​ໃຫ້​ແກ່​ປະຊາ​ຊົນ​ໃຫ້ຫຼາຍ​​ເປັນ​ມາດຕະຖານ​ສຳຄັນ​ໃນ​ການກວດ​ສອບ​ຜົນງານ​ການ​ປົກຄອງ.” ທ່ານ​ສີ​ຈິ້ນ​ຜິ​ງ​ເຫັນ​ວ່າ, ພັກ​ກອມ​ມູນິດ​ຈີນ​ກໍ​ແມ່ນ​ຜູ້​ທີ່​ສະ​ແຫວ​ງຫາ​ຄວາມສຸກ​ໃຫ້​ແກ່​ປະຊາຊົນນັ້ນເອງ.