蒙龙

ດາວໂຫຼດ App CRI-FM93 ລະບົບ IOS

ດາວໂຫຼດ App CRI-FM93 ລະບົບ Android

FM93

​ການລະ​ດົມ​ໃຫ້​ວິ​ສາ​ຫະ​ກິດ​ອາ​ເມ​ຣິ​ກາ​ຖອນ​ອອກ​ຈາກ​ຈີນນັ້ນ​ເປັນ​ຄວາມ​ເພີ້​ຝັນ​ຂອງນັກ​ການ​ເມືອງ​ອາ​ເມ​ຣິ​ກາ​​ອີກ​ແລ້ວ

2020-06-05 14:56:14 CRI

ເພື່ອ “ຕັດ​ການ​ພົວ​ພັນ​ກັບ​ຈີນ, ອາ​ເມ​ຣິ​ກາ​ໄດ້​ກຽມ​ພ້ອມ​ແລ້ວ​ບໍ?” ນີ້​ຄື​ການ​ຕັ້ງ​ຄຳ​ຖາມ​ອັນ​ແຫຼມ​ຄົມ​ຂອງ “ໜັງ​ສື​ພິມວອນ​ສະ​ຕ​ຣິດ​ລາຍ​ວັນ” ​ເມື່ອ​ວັນ​ທີ 3 ມິ​ຖຸ​ນາ​ນີ້. ເບື້ອງຫຼັງ​ທີ່​ລົງ​ບົດ​ຄວາມ​ດັ່ງ​ກ່າວ​ແມ່ນ: ໂດຍ​ຜະ​ເຊີນ​ໜ້າ​ກັບ​​ຜົນ​ກະ​ທົບ​ຈາກການ​ແຜ່​ລະ​ບາດ​ຂອງ​ພະ​ຍາດໂຄວິດ-19, ນັກ​ການ​ເມືອງ​ອາ​ເມ​ຣິ​ກາ​ຈຳ​ນວນ​ໜຶ່​ງ​ບໍ່​ໄດ້​ພິ​ຈາ​ລ​ນາ​ວ່າ​ຈະ​ເຮັດ​ແນວ​ໃດ ​ເພື່ອເປີດ​ກວ້າງ​ການ​ຮ່ວມ​ມື ເພື່ອ​ຍາດ​ແຍງ​ການ​ສະ​ໜັບ​ສະ​ໜູນ​ໄດ້ຫຼາຍກວ່າ​ເກົ່າ, ​ແຕ່ກົງ​ກັນ​ຂ້າມ, ​ພັດໄດ້​ຍຶດ​​ໝັ້ນ​​ໃນ​ຈຸດ​ຢືນ​ຂອງສົງ​ຄາມ​ເຢັນ ແລະ ແນວ​ຄວາມ​ຄິດ​ຂ້ອຍ​ໄດ້​ເຈົ້າ​ເສຍ, ​ໂດຍ​ໄດ້ປ່າວ​ປະ​ກາດ​ວ່າ​ຈະ “ຕັດ​ການ​ພົວ​ພັນ​ທາງ​ເສດ​ຖະ​ກິດ​ກັບ​ຈີນ”, “​ລະ​ດົມໃຫ້​ວິ​ສາ​ຫະ​ກິດ​​ປະ​ເທດ​ຕົນຖອນ​ອອກ​ຈາກ​ຈີນ” ແລະ ​ມີຖ້ອຍ​ຄຳ​ຜິດ​ພາດ​ອື່ນໆ.

ນັກ​ການ​ເມືອງ​ເຫຼົ່າ​ນີ້​ຮ້ອງ​ຈົນ​ຄໍ​ແຫບ, ແຕ່​ໃນ​ສາຍ​ຕາ​ຂອງ​ບຸກ​ຄົນ​ໃນ​ວົງ​ການ​ເສດ​ຖະ​ກິດ​ສາ​ກົນ​ແລ້ວ, ຖ້ອຍ​ຄຳ​ເຫຼົ່າ​ນີ້​ເປັນ​ກາ​ນ​ເພີ້​ຝັນ​ເທົ່າ​ນັ້ນ. ເມື່ອ​ສັງ​ເກດ​ຈາກ​ແງ່​ມຸມ​ເສດ​ຖະ​ກິ​ດ​ແລ້ວ​ເຫັນ​ວ່າ, ຕ່ອງ​ໂສ້​ການ​ສະ​ໜອງ ແລະ ຕ່ອງ​ໂສ້​ອື່ນໆ​ໄດ້​ປາ​ກົດ​ໂຕ​ຂຶ້ນ​ມາ​ດ້ວຍ​ການ​ຈັ​ດ​ສັນ​​ຕາມ​ກົນ​ໄກຕະຫຼາດ ແລະ ການ​ແບ່ງ​ງານ​ລະ​ຫວ່າງ​ບັນ​ດາ​ປະ​ເທດ​ໃນ​ໂລກ. ບໍ​ລິ​ສັດ​ຂ້າມ​ຊາດ​ໄດ້​ຈັດ​ສັນ​ຊັບ​ພະ​ຍາ​ກອນ​ໃນ​ຂອບ​ເຂດ​ທົ່ວ​ໂລກ​ຕາມ​ກົດ​ເກນ​ເສດ​ຖະ​ກິດ​ຕະຫຼາດ, ຈຸດ​ປະ​ສົງ​ກໍ​ແມ່ນ​ເພື່ອ​ສ້າງ​ຜົນ​ກຳ​ໄລ​ໃຫ້​ໄດ້ຫຼາຍ​ທີ່​ສຸດ. ບໍ​ລິ​ສັດ​ເຫຼົ່າ​ນີ້​ຈະ​ບໍ່​ຟັງ​ຄວາມ​ເຫັນ​ແບບ​ໄຮ້​ດຽງ​ສາ​ຂອງ​ນັກ​ການ​ເມືອງ​ອາ​ເມ​ຣິ​ກາ​ນັ້ນ​ດອກ.

ສິ່ງ​ທີ່​ເຮັດ​ໃຫ້​ວິ​ສາ​ຫະ​ກິດ​ອາ​ເມ​ຣິ​ກາ​ມີ​ຄວາມ​ບໍ່​ພໍ​ໃຈ​ອີກ​ນັ້ນ​ກໍ​ຄື, ຖ້າ “ຕັດ​ການ​ພົວ​ພັນ​ທາງ​ເສດ​ຖະ​ກິດກັບ​ຈີນ”, ນີ້​ກໍ​ໝາຍ​ຄວາມ​ວ່າ, ວິ​ສາ​ຫະ​ກິດ​ອາ​ເມ​ຣິ​ກາ​ຈະ​ເສຍ​ຕະຫຼາດ​ຈີນ ທີ່​ເປັນ​ຕະຫຼາດ​ຂະ​ໜາດ​ໃຫຍ່ ແລະ ມີ​ຄວາມ​ສາ​ມາດ​ບົ່ມ​ຊ້ອນ​ອັນ​ໃຫຍ່ຫຼວງ. ບໍ່​ມີ​ວິ​ສາ​ຫະ​ກິດ​ປະ​ເທດ​​ໃດ​ຈະ​ຍິນ​ຍອມເສຍ​ຕະຫຼາດ​ແບບ​ນີ້.

ບົດ​ລາຍ​ງານ​ທີ່​ຢົງ​ຕິງ​ເປີດ​ເຜີຍ​ໃນ​ຫວ່າງ​ມໍ່ໆ​ມາ​ນີ້​ສະ​ແດງ​ໃຫ້​ເຫັນ​ວ່າ, ເຖິງວ່າ​ໄດ້​ຮັບ​ຜົນ​ກະ​ທົບ​ຈາກ​ການ​ແຜ່​ລະ​ບາດ​ຂອງ​ພະ​ຍາດ​ໂຄວິດ-19, ໂຄງ​ການ​ລົງ​ທຶນ​ທີ່​ບໍ​ລິ​ສັດ​ອາ​ເມ​ຣິ​ກາ​ປະ​ກາດ​ຈະ​ລົງ​ທຶນ​ຢູ່​ຈີນ​ໃນ​ໄຕ​ມາ​ດ​ທຳ​ອິດ​ຂອງ​ປີ​ນີ້​ມີ​ເຖິງ 2,3 ຕື້​ໂດ​ລາ​ສະ​ຫະ​ລັດ, ພຽງ​ແຕ່​ຕ່ຳ​ກວ່າ​​ຈຳ​ນວນ​ສະ​ເລ່ຍ​ຂອງ​ແຕ່​ລະ​ໄຕ​ມາດ​ໃນ​ປີ​ຜ່ານ​ມາ​ໜ້ອຍ​​ດຽວ. ທີ່​ຈິງ​ແລ້ວ, ວິ​ສາ​ຫະ​ກິດ​ອາ​ເມ​ຣິ​ກາຫຼາຍ​ແຫ່ງ​ໄດ້​ມີ​ການ​ກະ​ທຳ​ທີ່​ກົງ​ກັນ​ຂ້າມ​ກັບ​ຄຳ​ເວົ້າ​ຂອງ​ນັກ​ການ​ເມືອງ​ອາ​ເມ​ຣິ​ກາ. ສຳ​ນັກ​ງານ​ໃຫຍ່​ໃນ​ປະ​ເທດ​ທີ່​ເປັນ​ຕະຫຼາດ​ຈະ​ເລີນ​ໃໝ່ ກໍ​ຄື​ສູນ​ປະ​ດິດ​ສ້າງ​ໃໝ່​​ຂອງ​ບໍ​ລິ​ສັດ​ໂຮ​ນີ​ເວວ​ຂອງ​ອາ​ເມ​ຣິ​ກາໄດ້​ສ້າງ​ຕັ້ງ​ຂຶ້ນ​ຢູ່​ນະ​ຄອນ​ອູ​ຮັ້ນ​ຂອງ​ຈີນ, ບໍ​ລິ​ສັດ​ລົດ​ເຕ​ສ​ລາ​ຂອງ​ອາ​ເມ​ຣິ​ກາ​​ກໍ​ໄດ້ປະ​ກາດ​ເປີດກວ້າງ​ກຳ​ລັງ​ການ​ຜະ​ລິດ​ຢູ່​ນະ​ຄອນ​ຊຽງ​ໄຮ້​​ຂອງຈີນ. ຄື​​ດັ່ງຄຳ​ເວົ້າ​ຂອງ​ທ່ານ​ອາ​ລັນ ບີ​ບີ ປະ​ທານ​ສະ​ພາ​ການ​ຄ້າ​ອາ​ເມ​ຣິ​ກາ​​ຢູ່ຈີນ​ກ່າວ​ວ່າ: “ພາຍຫຼັງ​ຈີນ​ປະ​ສົບ​ຜົນ​ສຳ​ເລັດ​ທີ່​ມີ​ລັກ​ສະ​ນະ​ຍຸດ​ທະ​ສາດ​ໃນ​ການ​ປ້ອງ​ກັນ​ແລະ​ຄວບ​ຄຸມ​ພະ​ຍາດ​ໂຄວິດ-19 ແລ້ວ, ເສດ​ຖະ​ກິດ​ຈີນ​ໄດ້​ຟື້ນ​ຕົວ​ໄວ​ກວ່າ​ເສດ​ຖະ​ກິດ​ຂອງ​ປະ​ເທດ​ອື່ນ. ແຕ່​ກ່ອນ, ຫຼາຍ​ບໍ​ລິ​ສັດ​ເລືອກ​ມາ​ພັດ​ທະ​ນາ​ຢູ່​ຈີນ, ດຽວ​ນີ້​ກໍ​ເຊັ່ນ​ດຽວ​ກັນ.”

ຄົນ​ທັງຫຼາຍ​ໄດ້​ໃຫ້​ຄວາມ​ສົນ​ໃຈ​ຕໍ່ບົດ​ລາຍ​ງານ​ວຽກ​ງານ​ຂອງລັດ​ຖະ​ບານ​​ຈີນ​ສະ​ບັບ​ປີ​ນີ້​​ທີ່ໄດ້​ກ່າວ​ເນັ້ນ​ວ່າ, ຕ້ອງ​ຍຶດ​ໝັ້ນ​ການ​ເປີດກວ້າງ​ການ​ເປີດ​ປະ​ຕູ​ສູ່​ພາຍນອກ​ຢ່າງ​ໝັ້ນ​ໜຽວ​ບໍ່​ປ່ຽນ​ແປງ, ຮັບ​ປະ​ກັນ​ໃຫ້​​ຕ່ອງ​ໂສ້​ອຸດ​ສາ​ຫະ​ກຳ​ແລະ​ຕ່ອງ​ໂສ້​ການ​ສະ​ໜອງ​ສາ​ມາດພັດ​ທະ​ນາ​​ໄດ້ຢ່າງ​ໜັກ​ແໜ້ນ, ຊຸກ​ຍູ້​ການ​ປະ​ຕິ​ຮູບ ແລະ ການ​ພັດ​ທະ​ນາ ດ້ວຍ​ການ​ເປີດ​ປະ​ຕູ​ສູ່​ພາຍນອກ.

ບົດ​ຄວາມ​ຂອງ “ໜັງ​ສື​ພິມວອນ​ສະ​ຕ​ຣິດ​ລາຍ​ວັນ” ຂຽນ​ວ່າ: “ຕະຫຼາດ​​ອັນ​ກວ້າງ​ໃຫຍ່​ໄພ​ສານຂອງ​ຈີນ​ເປັນ​ສິ່ງ​ທີ່​​ເບິ່ງ​ຂ້າມ​ບໍ່​ໄດ້.” ນີ້​​ແມ່ນ​ສອດ​ຄ່ອງ​ກັບ​ສະ​ພາບ​ຄວາມ​ເປັນ​ຈິງ, ທັງ​ເປັນ​ຄວາມ​ເຫັນ​ທີ່​ເປັນ​ເອ​ກະ​ພາບ​ກັນ​ຂອງ​ທົ່ວ​ໂລກ. ສຽງ​ຮ້ອງ​ໂຮ່​ແບບ​ອັດ​ອັ້ນ​ຕັນ​ໃຈຂອງ​ນັກ​ການ​ເມືອງ​ອາ​ເມ​ຣິ​ກາ​ຈະ​ບໍ່​ສາ​ມາດ​ບັ່ນ​ທອນ​ຄວາມ​ຕັດ​ສິນ​ໃຈ​ຂອງວິ​ສາ​ຫະ​ກິດ​ຂ້າມ​ຊາດ​ໄດ້ ເຊິ່ງ​ລວມ​ທັງ​ວິ​ສາ​ຫະ​ກິດ​ອາ​ເມ​ຣິ​ກາ​​ທີ່ມາ​ລົງ​ທຶນ​ຢູ່​ຈີນ. “ການ​ຕັດ​ການ​ພົວ​ພັນ​ທາງ​ເສດ​ຖະ​ກິດ” ທີ່​ນັກ​ການ​ເມືອງ​ອາ​ເມ​ຣິ​ກາ​ປ່າວ​ປະ​ກາດ​ນັ້ນ ກໍ​ເປັນ​ພຽງ​ຄວາມເພີ້​ຝັນ​ຂອງ​ພວກ​ເຂົາ​ເຈົ້າ​ເອງ​ເທົ່າ​ນັ້ນ.

ຄຳ​ເຫັນ

0